Yakobbo 3
3
Ohutuka olulimi
1Basyaange, abaangi mweeng'we muteholanga ohuba abeekesa. Olwohuba mumanyire muti efwe abeekesa bachia ohutuheengera omusaango neende obwaalaba ohuhiraho abaandu baandi. 2Efwe fweesi ebiha bihira obuungi hudoondobana nihuhola ebibi. Nae omuundu yeesi owutadondobana mu nomanoma yae, oyo aba omuluungifu elalira, onyala ohutuka obulamu bwae bwoosi. 3Nihuta olusaala luundi mu munwa kw'efaraasi, lukera chaatuwulira mani hwanyala ohuchiyira chaachia yi hudaha yoosi. 4Oba bonereho hu meeri chosi. Kata achahaba ehoongo chityo, nichiiruswa neende omuyaka kw'amaani, chitukwa neende engasi ndiidi, mani chaachia buli abuundu woosi yi otuka adaha. 5Olulimi lwosi luli lutyo. Kata neende niluli ahatuundu hadiidi muno ah'omubiri, nae lunyala ohwefumia hulw'ebiindu bihoongo bi lulomaloma.
Baaseho koti lu muliro mudiidi kunyala ohusaamba esichaha sihoongo. 6Olulimi lwosi luli koti omuliro. Lweechula ebibi ebiingi. Olulimi situundu sy'omubiri kweefwe nae lunyaasa omubiri kwoosi. Haandi olweene olwo nilwo oluwaambia omuliro hu mubiri kwoosi nilukutusa mu nyaanja y'omuliro. 7Omuundu anyala ohutuka ebiloonge byoosi, ebisolo biteende neende amayoni, ebisolo byambaaka neende eng'eeni mani yaabihola byaloongoyala. 8Nae abulao omuundu yeesi onyala ohutuka olulimi. Olulimi lubi haandi silutukiha, mani lweechula obusiba bwiita. 9#Huc 1:26. Hwehoonyera olulimi lweefwe ohufumia Omwaami haandi Seefwe, haandi hwehoonyera olulimi lweefwe lweene olwo ohubwaaba omuundu waloongwa mu fwaani ya Nasaae. 10Mu munwa mulala omwo nimwo omutula ohufumia Nasaae neende ohubwaaba abaandu. Basyaange, sino haba sisihoyera ohuba sityo, 11Mubaasa muti mu sulo ndala, munyala ohutulamo amaachi malai neende amaachi malulu? 12Basyaange, mubaasa muti omutuli kunyala ohwaamaho emiseituuni, oba omusabbiibbu kwaamaho emituli? Kata esulo y'amaachi k'omuunyu haba siyinyala husoohamo amaachi malai.
Amakesi katula aakulu
13Wiina mweeng'we omukesi haandi omanyire ebiindu? Lehe yeekeserenge amakesi kae neende ohumanya hwae mu bulamu bwae buluungifu, neende mu biholwa byae biholerwa mu buloonga neende mu makesi. 14Nae mu myooyo kyeeng'we nimuba nimweechulamo ehali-hali bi neende obwiimani, mani muleheenge ohweniinia neende ohweebacha nimuyiingania obwadyeeri. 15Obukesi buno haba sibufwaanana neende obwo obwiiha ohutula Muukulu daawe, nae bw'esyaalo nibwo, obutaali obunadiini, obw'omusaambwa. 16Olwohuba aali ehalihaali neende obwiimani, ao wosi aliwo ohutabuha neende ebibi by'engeri choosi. 17Nae amakesi katula Muukulu kataangira ohuba amoolerefu; haandi kaleeta omuleembe, haandi kalimo obuloonga, neende ohudeeba hu baandu baandi; keechulamo esisa mani keebula ebiholwa bilai. Haba sikalimo mwooyo mubi, oba obwebachirisi. 18Haandi abo abaleeta omuleembe banyoolamo obwadyeeri bwataakwa mu mireembe kino.
©Bible Society of Kenya, 2019
©Bible Society of Uganda, 2019