Nimlivolivon 26
26
1Maniring si Aglipa ji Pawlo am, “Ji ka nig a manci no ciring mo.” So nipaztaznekan na so lima na ni Pawlo a manci no ciring na.
2Maniring am, “Ko masaray a yameytatanek do tangain mo, mo Aglipa a panirsirngen, a yamanci no da raherahetan jyaken no tao do Yotay. 3Ta mo katenngan o iwawalam da no tao do Yotay a kano da kazyakan nyaken. Am ori o amizngan mo so ciring ko.
4“O iwawalam ko no kalyalikey ko, na kai sicya rarakeh ko na ya do ili namen a kado Yelosaleng am yada mamimin a katenngan no tao do Yotay. 5No si manakem da o mina vazay ko no kakwa am anoyngan da rana yaken a tey makdeng so nakem a tao a macyagom do Vadisay a ji mapasala do iwawalam namen a tao do Yotay. 6Sicyaraw rana ya am ko myan do tangain nyo a nyo pacicin, ta ko anoyngan o kanoyong na no nipanci na ni Ama ta do to do ineynapo ta do keypirwa da mavyay no nimawakwak a tao. 7Iya o yata pananalahen a sivosivovoong da no rarwa so ikakarwan a ineynapo ta, do ta kararalay ni Ama ta do to. Mo panirsirngen, ori o peypeypangayan no da rakpan jyaken no keylyan ta. 8Am inyo rana a tao do Yotay am ikongo nyo ji nganoyngi ji Ama ta do to a mapeyvangon so nimawakwak rana tao.
9“No kakwa pa am abo ji ko peyvazaya a izakat ko so tao a omamizing so nanao ni Yeso a tao do Nasale. 10Ori o mina vazay ko no keyyan ko pa do Yelosaleng. Nipya da yaken no panipanirsirngen no mapatanatanang so nakem da si Ama ta do to a omrakep so omanoyong ji Yeso a tao. No kapanzakat da jira am to ko myapya. 11Masangib ko sira a pakakasin do peyneynozyan da a kapanci ko nira omalalas ji Yeso a iraralay da. So nikakdeng ko a macioya jira. Tomakatakaw kangay ko do teyhesa ka ili a mapakakasi sira.
12“Ipisa nipya da yaken no panipanirsirngen no mapatanatanang so nakem da si Ama ta do to a mangay do Tamaseke. 13Amyan ko do rarahan do peyignan no araw am to ko makacita so maniray apo do teyngato a mazngazngang pa kano araw a komowap jyaken a kano kararay ko. 14So nikamimin namen a nimavazakwang do teyrahem a nimakowap. Meyratateng am makamizing ko so ciring no Sipolay a tao. Maniring jyaken am, ‘Sawlo, Sawlo, ikongo yamo pakakasyan jyaken. Jyabo o kapakaharag mo jyaken a. Ta rakorako o oyowyat ko a ka nimo.’ 15Maniring ko jya am, ‘Mo Panirsirngen, sino ka.’ Maniring am, ‘Yaken rana am si Yeso ko a mo pakakasin. 16Peyvangon rana a kapeylimwang mo nyaken a nimapacita jimo. Ta yaken rana am yako nipamnekan imo a mahap so vazay ko. So peylimwangan mo no meypanam pa vazay a itoro ko jimo. 17Ko tovoin imo a meylimwang nyaken do tao do Yotay a kano beken a tao do Yotay. No si myan so omraherahet jimo am cyaha, ta apzatan ko imo. 18Ko tovoin imo a omiwang do mata da kapakacita da rana so kazngangan a komaro do vazay ni Satan a omanoyong rana ji Ama ta do to. So ikanoyong da rana mavonas so raraten a macikaop do amraralay nyaken a tao,’ kwan na yaken ni Yeso.
19“Am ori mo Aglipa a panirsirngen, o ko to mangozai do yana nipanci jyaken ni Yeso no kapakacita ko sya. 20Nimanma na do Tamaseke a kado Yelosaleng o nyangayan ko a kangay ko na do peycyeylilyan na do Yotay a kado peyilyan da no beken a tao do Yotay amvavaga jira a komaro do peyraratenan da a somazap si Ama ta do to a mapacita rana no apiya icicirawat da, do kanoyong da rana nimamlis. 21Ikongo do nimangnanao ko do beken a tao do Yotay, am ori o nirakpan da jyaken no tao do Yotay do rako a panaralayan a vovwan a zakaten. 22Yato ngai sicyaraw eya o na nisidongan jyaken ni Ama ta do to a meylimwang no ciriciring na do meynakem a tao a kano ipangoyongoyod da tao. O nipeylimwang ko am meyyangay a kano nipeylimwang ni Moyse a kano panoyonoywan na so ciring ni Ama ta do to no kakwa. 23Ta o nipeylimwang da da Moyse am manoyong keyyan no alalaw ni Kizisto a wakwaken da. So ika iya na no ney manma na a nimirwa a mavyay. Ta iya o mapatazadang jyaten a tao do Yotay a kano beken a tao do Yotay.”
24Ji na pa teyka ni Pawlo o ciring na am to na amizing si Veyseto a amlololos. Maniring am, “Ka zomyak eya an? Ta yateywara rana o mo naknakmen a vazay.” 25Maniring si Pawlo am, “Ko ikamo imo mo Veyseto panirsirngen am jyabo ko kazyak a. Yamanoyong saon o ciring ko ang.” 26Maniring si Pawlo ji Aglipa am, “Mo katenngan o akman sang a vazay. Am ori o ko jyamogawi a yamapatwaw sya jimo. Ta o akman rana sya a vazay am abo makatayo sya. 27Mo Aglipa a panirsirngen, mo anoyngan o ciring da no panoyonoywan na so ciring ni Ama ta do to no kakwa pa? Ko katenngan mo kanoyong jya.” 28Maniring si Aglipa ji Pawlo am, “Mo panopen yaken a yaomanoyong ji Kizisto?” 29Maniring si Pawlo ji Aglipa am, “Tana mahay rana am to ko meynozyan nimo a kano aro a mangamizing a tao do jya a kamimin nyo rana akman jyaken a omanoyong jya. Am ji nyo nginara yaken a da aptengen!”
30Mamizing na ni Aglipa kani Veyseto a kano meyngaran so Peynici a mavakes a kano aro a tao a mangamizing am mina to sira meytatanek a makowbot do pantaw. 31Amyan rana sira do pantaw am maniring sira do kadwan jira am, “Ikongo peypeypangayan no kato tamtengan sya, kato ta wakwakan sya.” 32Maniring si Aglipa ji Veyseto am, “No ji na nipanci no tao eya o kangay na ji Kaysa a panirsirngen no Loma am jyabo o kaji ta mapasawayan sya.”
Currently Selected:
Nimlivolivon 26: snt
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan
