Nimlivolivon 19
19
Amyan si Pawlo do Ivoso
1Amyan rana si Apolo do Kedinto am meypangay pa si Pawlo do Ivoso. So nipeyliktaw na do Vodicya. Ori o nipakasazi na dang so amraralay ni Yeso Kizisto a tao. 2Maniring si Pawlo jira am, “Manngwa, nimeydedna jinyo o Seyzi no kanoyong nyo ji Yeso Kizisto an?” Maniring sira am, “Namen pa jya nimamizing o Seyzi.” 3Maniring si Pawlo am, “No ori am sino nyo pangozayan a tomaktak jinyo.” Maniring sira am, “O nipangnanao ni Yowani a nimanaktak o namen katenngan.” 4Maniring si Pawlo am, “O nipanaktak na ni Yowani am yongkad da do mina kapamlis da rana so onowned. O nipanci na pa do Isedi a tao ni Yowani am, ‘Anoyngan nyo o yamanownowjyan pa ka nyaken a yamai a meyngaran si Yeso.’ ” 5Mamizing da o ciring na ni Pawlo am pangozayan da o ngaran ni Yeso to rana mya so kataktak da jira, 6kakadain na sira paoptan na so lima na ni Pawlo. Karahan am meydedna jira o Seyzi. So nipeyzezyak da so matarek a ciriciring no Seyzi a kapeylimwang da no ciriciring na ni Ama ta do to. 7Sira rana am rarwa sira so ikakarwan o tao.
8So nipakatlo na vehan dang ni Pawlo a to ngyan do peyneynozyan a macinekanekad jira a manci no agagazan no italamozong na ni Ama ta do to a mapanod so tao a omanoyong ji Yeso Kizisto. 9Am tatasa jira o ji mapownot so nakem da amraherahet so nipangnanao ni Pawlo a omagaz ji Yeso Kizisto. Am ori o nipalolwan na so sinjya ni Pawlo a komaro jira. So nipangday da so araw a meysirisiring do pangananawan na vahay no meyngaran so Tilano a tao. 10O akman rana sang a vazay am mina kadwa kawan. Tana tao do Yotay a tana tao do Sila am nimamimin sira o meyvahay do Yasiya a nimakamizing so ciring ni Yeso Kizisto.
Papito ananak na ni Sekaywa
11Nioyatan na ni Ama ta do to si Pawlo a meyvazay so aro a mapeyzokab a vazay. 12Am ori o nyahapan da no tao so nipeyveynget ni Pawlo a pangain do kataotao da no meyngen a tao a kapya da rana a kavozwaw da no kalamsoyan ni Satan a komovot do tao. 13So niyan da no tao do Yotay a omlivolivon a amvozwaw so kalamsoyan ni Satan. Sira rana am tana ji da anoyngi si Yeso am ikakza da pangozayan o ngaran ni Yeso. Ori nisirsirngan da so kalamsoyan ni Satan. Maniring sira am, “Namen pangozayan o ngaran no ipeylimwang ni Pawlo a si Yeso a amvozwaw jinyo.” 14O nimapeyvazay so sang am papito a ka anak na no asa ka panirsirngen da no mapatanatanang so nakem da si Ama ta do to a meyngaran so Sekaywa. 15Tovisan na no kalamsoyan ni Satan sira am, “Namen kasingkadan si Yeso. Namen katenngan si Pawlo am sino kamo ang.”
16O nikovotan rana no kalamsoyan ni Satan a mahakay am mina to zagzag a nimbakbak jira, kapeyzaza da a kapisipising no talili da. Ori nipeypalalayo da a makowbot do vahay ang. 17Mamizing da no meyvahay do Ivoso a tao do Yotay a kano tao do Sila o akman sang a vazay am manyahey sira. Niminda dang o kapeypakdeng da rana omraralay ni Yeso. 18So nikaro no amraralay ni Yeso a tao a mai a mapatwaw so nikaratan da no kakwa do tangain no aro a tao. 19Aro o makahaw a tao a mai no vakong da kasleb da sya. Vilangan da am to ngyan so ikalima na laksa (50,000) no nizpi a ngina na. 20So nipeylimwang na rana do dang no ciriciring na ni Yeso. Ori nipeyparo da no omanoyong jya tao.
No kapeyvonag da do Ivoso
21Komavos o aro a vazay am ipanci na ni Pawlo o kapangonong na do Maciton a kado Akayya a mangay do Yelosaleng. Maniring am, “Si makaranes ko do dang am mangay ko pa do Loma.” 22So nipanman na so rarwa ka somidong sya si Timotay a kani Ilato a mangay do Maciton. Si Pawlo am mina todavezed do Yasiya.
23No kanang do Ivoso am amyan so nimakdeng a vazay a ikazyak da. Ori rana am omagaz do kownot da ji Yeso Kizisto. 24Amyan so asa ka meyngaran si Temolyo a mapakapkapya so gizit a ipamaring na so likta panaralayan da raralayan da no meyngaran so Atemey. Ikongo do aro tao a macipeyvazay jya, am ori o ikaro no nizpi a mahap da. 25Si Temolyo rana am lovoten na o aro a lamlamsoy na kano tao a akman sya so vazay. Maniring jira am, “Manga keypong, nyo katenngan o na karo no nizpi a ta mahap. 26Ko ipanci jinyo am nyo na nimamizing, nyo na nimacita o icicirawat na kano vazay na ni Pawlo. Ta maniring asyo am, ‘O nipariparing rana no tao a iraralay da am beken a meyngongyod a Tao do to.’ O akman sang a ciring am da to nganoyngi no aro a tao do Ivoso a kado Yasiya. 27Ko citahen rana o vazay ta am yamyan so ikarahet na. Ta o iraralay ta Atemey am yato meypapereh rana sira o tao a yaomraralay nya. Ta do Yasiya rana kado peycyamahamahatawan na am yato meypabo rana o na kadmayan no yata iraralay.”
28Mamizing da no aro a tao o akman sang a ciring am meyoyaoya rana sira. Maniring rana sira am, “O iraralay ta do Ivoso a Atemey am tey maizay.” 29Ori o nipeyvonag da asa ka ili a karakep da so kararay ni Pawlo a rarwa meyili do Maciton a meyngaran si Cyayo a kani Aditako a kalololo da sira yangay do rako a peylovolovotan da. 30Kakdain na ni Pawlo o kangay na jira am ji da mya no sinjya. 31O tatasa panipanirsirngen da no Yasiya a kagagan na ni Pawlo am manovoy sira so tao a omzazat ji Pawlo a jyangay do peylovolovotan da, ta ikanginanawa da. 32No kanang am amlololos sira o aro a tao a meyzavozavoz so ciriciring. So ikaro no ji makateneng jya tao do agagazan no kalovot da do dang. 33O tao do Yotay am padondonen da si Yadisanta a mangay do tangain da. Maniring sira aro a tao am, “Iya ya o yamapeyvazay sya.” Am ori o nipatalan na so lima na ni Yadisanta a manci no ciring na do aro a tao. 34Am katovilan da si Yadisanta a tao do Yotay. Am ori o nilololos da. Maniring sira am, “Ney maizay na o Atemey a iraralay ta do Ivoso!” So nikadwa na ka toki no nilololos da.
35Mownay am o meyvatvatek a panirsirngen do ili da am ori o nimapeyreherehes sira. Maniring jira am, “Inyo rana Ivoso a tao am sino ji makateneng jya, do ka yaten no yamzat do panaralayan no maizay a ta iraralay a Atemey a kano vato a kataotao na nimeyhekas apo do hanit. 36Si pacyanoyngan nyo o akman sang a vazay am meyreherehes kamo na an. Taosya o kapatarek nyo so marahet a vazay nyo. Ahapen nyo o apiya pangtoktwan nyo. 37Ta o nyo nyai yararwa ka tao do jya am yabwata o nitakaw da do panaralayan. Yabo da niraherahet so tao do to ta. 38Si myan so ikazyak da da Temolyo a kano macivazay jya a tao am pamnekan da o araraw no ipeysirsiring da do pacicicyan. Ta ori o amizngan da so ciring da no panirsirngen. 39Si myan pa so ikarahet nyo am nanalahen nyo o araraw no ipeykeykaygi, kakavos na rana. 40O ta nipeyvonag rana sicyaraw eya am jyabo kaji da oyyan nyaten no panirsirngen do Loma, do na kabo no peypeypangayan na.” 41Teyka na o ciring na am peysyasyain na sira o aro a tao.
Currently Selected:
Nimlivolivon 19: snt
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan
