1 Kedinto 11
11
1Inarahen nyo yaken a ominara si Yeso Kizisto.
Vazay no mavavakes a kano mahahakay do kalwalovotan a meynozi
2Ko isaray inyo, ta nyo masangib yaken a yamanakem a yamangozay do nipamizing ko jinyo a iwawalam no kyokay. 3Am inaoy si katenngan nyo si Yeso Kizisto a tomalamozong ninyo a mahakay. O mahakay rana am ipeymatmatngeh da o mavakes da. Si Yeso Kizisto am onotan na si Ama ta do to. 4No meynozi sira kapangononong da no mahakay do kalwalovotan a meysakop am manoyong sira komolala si Kizisto. 5Am no meynozi sira kapangononong da no mavakes do kalwalovotan no tao a kaji da bonbonan do oo da am manoyong sira komolala so kahanghangan da. O akman rana sang a mavakes am meyyangay sira kano nigolgolan da a mavakes. 6No ji da bonboni o oo da no mavakes am apyapya kato na rana nedtedan do avok da. No ipacimanig da o kapeygolgol da am bonbonan da o oo da. 7Ji bonboni o oo da no mahakay. Ta kehngehngay da o kamamagen ni Ama ta do to a kano azwazway na. Am pacikazwayan no mavakes o mahakay. 8Ta beken a mavakes o nikamaogan na no mahakay no kapangamaog na pa ni Ama ta do to so karawan. Ta o mavakes am mahakay nikamaogan na. 9O nyamamaogan na ni Ama ta do to so mavakes am sidongen na o mahakay. 10Am ori o ipeyvazongot da no mavakes, do kapacita da nya do tinsi na ni Ama ta do to so kapacyanod da so nakem do mahakay na. 11Am yaten rana amraralay ni Yeso a tao am masicyakarilaw o mahakay a kano mavakes do vazay an. 12Tana nimapo o ney manma a mavakes do mahakay am nimapodpod o mahakay do mavakes a kapo no makakaday a masaod no karawan ji Ama ta do to.
13To nyo na naknakman. Manngwa, mazway o ji bonbon do oo da a mavakes do kalwalovotan a meynozi? 14Manngwa, nyo jya kazazap no onowned nyo o kapacimanig no mapatovo so avok a mahakay? 15O mavakes am ikazway da o anaro a avok da. Ta o anaro a avok da no mavakes am ibonbon da do oo da. 16No si myan pa so jyalpid a tao am naknakmen na o kabo no meytarek a iwawalam ta. So da ikamimin no peycyakyokyokayan na yanan no yakman sang a iwawalam.
No iyapapaw si Yeso
(Matay 26:26-29; Make 14:22-25; Locya 22:14-20)
17Yapa myan so ko ipanci jinyo. Ori rana am ko jyakzan o vazay nyo no kamo meylovolovot. Ta beken a nyo ikapya o nyo kalovot a yameynozi. Ta nyo ipeyparahet. 18Ney manma na am yamyan so tao a yamanci nya jyaken so nyo ikavwavwak a yameykalyalipenpenan so nakenakem no kamo malwalovot a meynozi. Ko anoyngan no kanoyong no yatatasa dang a ciring. 19So na jyalasi no nyo kasyasyay so nakem. Ta ori o ipakateneng do manoyong rana so nakem ji Ama ta do to. 20No kanyo malwalovot a omapapaw si Kizisto am macitarek o yanyo naknakmen. 21Ta yamyan so yato manmanma koman a da keyyop. So na iyan no manowji a ji makapis so nipeylovolovot da kanen. Am ori o ipeykakcin da. 22Manngwa, yabo kavahayan nyo a nyo akanan? Kamo manoyong saon a yakomolala so kyokay na ni Ama ta do to a yamapanyanig so ji makahakaw a tao. Akman ko na so wanjin a omnanao jinyo. Manngwa, azwazwain ko inyo? Jyabo kazwazway ko jinyo a.
23O ko ipamizing jinyo am nimahap ko ji Yeso a Panirsirngen ta. So ko nipancyan rana nya jinyo. Ahep no kapanazang da ni Yeso am ahapen na o pang, 24a kasaray na nya ji Ama ta do to akcikcilen. Maniring am, “Oya rana am kataotao ko ya a ivyay jinyo. So kanan nyo sya a iyapapaw nyo jyaken.” 25Mateyka sira koman am akman so sang a mahap so ayoyopan. Maniring am, “Oya rana am yongkad no vayo a pangozayan nyo a ciring na ni Ama ta do to a manci no kahap na jinyo do kanimvoyog ko ninyo no rala. So to nyo amwamooni sya a iyapapaw nyo jyaken.” 26Mangday no kakan nyo so pang a omyop so potaw cyo eya o kapeylimwang nyo ni Yeso Kizisto a nimawakwak no raraten nyo, mangay do ikeypirwa na mai.
27Am ori an, no myan so tao a koman so pang a keyyop na so amyan do ayoyopan a ji nakenakem so peypeypangayan na am manoyong kapeyraratenen na so sang a mapasala do kataotao na kano rala na ni Yeso. 28Am ori an, naknakman pa so karatan no kataotao a kakan rana sya, keyyop rana sya. 29No kanen na o pang a keyyop na so yamyan do ayoyopan a kaji na makatenngan do peypeypangayan na am mangay jya o peyoyaoyyan na ni Ama ta do to. 30Am ori o na iyan rana jinyo no yameykeyngeyngen a kano yanimawakwak. 31No panmanmahen ta pa o kanakenakem ta so nikaratan no onowned ta am jyabo kaoya na nyaten ni Ama ta do to a. 32Am o oyyan na nyaten ni Ama ta do to am inanao na jyaten. Ta ori o ji ta macizanoji do ji nganoyong jya tao a peydednan na so peyoyaoyyan na no makwa.
33Am ori an, manga kakteh an. No malwalovot kamo a omapapaw si Yeso am macipananala kamo an. 34No myan so makcin am manmanma koman do vahay da an, a kabo na no oyaoya na ninyo ni Ama ta do to no meylovolovot kamo. Yapa myan so ipanci ko jinyo am cyaha, ta ipanci ko no ipisa kai ko.
Currently Selected:
1 Kedinto 11: snt
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan
