ngalatea 4

1panton'a, ho o'amocu te sasmoyʉskʉ 'ote ticngihi ci cou, 'e afu'u ezoezoyʉ e'vono zou acʉhʉ nuusi, at'inghi o'aisi ah'una to soskuskunu. 2homon'a foinana, pantola aʉt'ʉcʉ ci cou, asusuczeni to ezoezoyʉsi, totea hocic'u esmi na ohsila esvʉta no amosi ci hie. 3totiski, ho mon'a yufoinana 'e piepiya, mito maezo tiou no lasi hia poʉt'ʉcʉ nola yainca piepiya ta mouhpʉhpʉngʉ. 4at'inghi, hotenac'u noc'ʉhʉ 'o hie, isicu popeoskuna to hamo 'o iachisi oko, noa peyafa to mamespingi, yunsou to skufu to hoolicu, 5akoevano to'usni 'emo noskufu ta hoolicu ci cou, poa tma'upu no ongko no 'o'oko to hamo na a'to.

6mo'so maica na a'to#<na a'to> to anana'o tposʉ zou <na muu>. zou 'o'okosi, isicu popeoskuna to hamo 'o piepiya to okosi ho yʉmeʉmʉ ta 'to'tohʉngʉto, eyoho'ʉ mainca: <amo! amo'u!> 7maicac'o, o'ana soskuskunu na suu, zoucu okosi; ho zoucueno oko to hamo, tesicu poa ticngihi ci cou to hamo na suu.

taaecingia to poolo 'o coungalatea

8ne auyusi o'a ohmula honga 'o hamo, ohsila soskuskunu to o'a hamo ci hicu. 9maitan'e imucu honga 'o hamo (hocieno yainca, isicu honga to hamo), maincis'a i'vaho yuovei ho biebimi tomo uk'a tonʉ uk'a a'a'ausna ci piepiya ta mouhpʉhpʉngʉ? mainci i'momhomʉ yuovei ho noa toleihe? 10lamu na'na noʉyʉci 'emo piyo ci hie, feohʉ, homeesia, tonsoha! 11la'u na'na ta'kuv'eni muu, sokoeva no acʉhʉ peis'afeungu 'o o'ula hioa ta taicomu ne auyusi.

12maanat'ohaesa, te'o eucufna muu ho tohmʉskʉ a'o, maica 'amo'ulaeno maezo tohmʉskʉ muu, ci mimueno ahtu peismi note koa kuzo a'o ci hi'hioa. 13imu cohivi, maica mo yaa tma'congoa 'e feango'u, ko'ko mi'o 'oc'ocic'o meelʉ ahoicu mi'usnu muu ho psoyaska 'e fukuin. 14'e tma'congo'u la e'vono poa ma'kuv'o muu, at'inghi o'aimu a'hupsona a'o, ciha a'o. lamu apuya aʉt'ʉt'ʉca a'o, mais'a aʉt'ʉcʉ to tensi to hamo, mais'a aʉt'ʉca 'o kilisto iesu. 15'onia hiamu kaebʉ ne mio, micu mainenu maitan'e? te'o peela yainca. ne mio, 'upena hocimu yu'ezi 'o mcoo ho faeni a'o temuc'o mimha! 16te'o mi'usnu muu ho eʉlʉ maitan'e, temun'asi apuya hangʉ a'o?

17'omo maica ci cou la na'no em'ameongʉ muu, mo anana'o 'oha ʉmnʉ ci koyu. na atuhcuhe tehe akoeva no poa biachi a'o, poa meelʉ maezo na muu ho em'ameongʉ. 18hoci ma'cucuveu tamo ʉmnʉ ci hi'hioa mo anana'o ʉmnʉ, at'inghi o'ate anouc'o ho la'u no'upu niantemu maica. 19mao'o'oko'u, te'o ivaho i'nʉskʉ mais'a 'o ino ho tiou no 'atutumzo hote peyafa 'o oko, ac'ʉhʉ ho tenac'u tmucou ta nsoumu 'o yu'ausna to kilisto. 20mi'o tongsoyʉ no meelʉcu no'upu muu maitan'e, te'o ko'ko boemi nomo h'unasi ci mi'ausna ho mi'usnu muu. nomzo muu. la na'no ma'tipvongʉ co 'tohʉngʉ'u!

epo'usa to siacia ho saala

21te'o mi'usnu tola mici yaansou to skufu to hoolicu ci cou ho tuocosi 'emo conci a'a'ausna: o'a mocu imueno ahta talʉi 'e hoolicu to moose? 22isi tposi to tposʉ to hoolicu, 'o 'avulahamu mo yoso 'o okosi, 'omo cihi isi peyafa to soskuskunu nosi mamespingi, 'omo cihi isi peyafa to ziu ci mamespingi. 23'o isi peyafa to soskuskunusi moc'o maitala yu'ausna ho yayo; 'e isi peyafa ta ziu ci mamespingi mo i'mi no teomneni to hamo ho yayo. 24na eni te peela teyai epo'usa: 'emo yoso ci mamespingi tamza no yuso ci esvʉta. 'emo cihi zou siacia, mo i'mi ne hcuyusiinai. 'e isi peyafa zou acʉhʉc'o tolei. 25'e siacia isi pas'usna to mo yone 'alavia ci hcuyusiinai#<'e siacia isi pas'usna to...hcuyusiinai> panto piyo ci h'unasi ci tposʉ noana'o isi yainca <'e hcuyusiinai zou conci hcuyu ne 'alavia>., isi pahtuyaecingha ta 'elusalemu maitan'e; 'o iachisi ho i'o 'o'okosi ihe h'oyunsova na soskuskunu. 26at'inghi 'o 'elusalemu ne pepe mo ziu; zou inoto. 27maica isi tposi to seiso:

'o o'ate meelʉ ngangho'ʉ, o'amocumosola yaa oko ci mamespingi,

teko kokaekaebʉ!

na o'amocumosola tma'hongʉ no 'atutumzo no yaa okoa ci mamespingi,

teko tmunoi moozoyʉ!

maica i'e lahe ang'osa ci mamespingi,

te botngonʉhe tola no'upu to vcongʉ na tesi 'o'oko!

28maanat'ohaesa, aʉlʉ totiski to 'isaku, maica ho mimu i'mi to ohsila teomneni to hamo hocu meelʉ tma'usnu no 'o'okosi. 29ne mio, i'e mo mino yu'ausna ho yayo isi akuzkuzoa 'emo i'mi no seilei ho yayo; maitan'e mioc'o maezo maica. 30at'inghi isieno av'a to seiso? yainca to seiso <te peobanga 'o soskuskunu no mamespingi ho i'o okosi, maica'sio 'e okosi ta soskuskunu. o'ate meelʉ maita oko ta isi peyafa ta ziu ci mamespingi ho iepoepohʉ ticngihi ta ezoezoyʉ.> 31ko'koeno, maanat'ohaesa, o'as'a oko to soskuskunu no mamespingi a'to, ma isi peyafa to ziu ci mamespingi.

Currently Selected:

ngalatea 4: bsnfe

Highlight

Copy