1 Corintios 3
3
Diospa ruwananpi yanapakojkuna
1Munasqa wawqe panakuna, noqa qankunawan kashaspa, mana Diospa Espiritunpa pusasqan runakunaman jinachu parlarqaykichej, imajtinchus qankuna Diosman manaraj kutirikojkuna jina purinkichej. Chayrayku qankunaman parlarqaykichej, kunallanraj Cristoman kutirikojkunaman jinalla. 2Imaynatachus ñuñushaj wawaman lecheta qonchej, manataj khamuna mikhuytachu,#Heb 5.12-13. ajinata qankunaman yachacherqaykichej jasallata yachanaykichejpaj jina. Mana yachay atinatarí mana yachacherqaykichejchu, imaraykuchus mana entiendeyta aterqankichejchu. Kunanpis manarajpuni atinkichejchu, 3imaraykuchus Diosman mana kutirikojkuna imaynatachus purinku, jinallataraj purishankichej. Qankuna ukhupi qhawanakuykuna, churanakuykuna, t'aqanakuykuna ima tiyan.#1 Co 1.10-12. Chaykunata ruwaspaqa, qankuna manapis Diosta qhatejkunachu kawajchej jina ruwashankichej, Diosman mana kutirikojkuna jinataj yuyashankichej. 4Maypachachus qankunapura ninakunkichej: Noqaqa Pablota qhatini, noqarí Apolosta, nispa chaypacha, manachu Diosta mana qhatejkuna jina ruwashankichej?
5Chaywanpis, pitaj Pablori? Pitaj Apolosri? Noqayku Diospa kamachinkunalla kayku, qankunataj noqaykunejta Jesucristopi atinikorqankichej. Chantá sapa ujniyku imatachus Tukuyta Kamachej Jesucristo kamachiwasqaykuman jina ruwarqayku. 6Noqa qankunaman Jesucristomanta sumaj willayta willarqaykichej, Apolostaj yachachisorqachej Jesuspi atinikuspalla imaynatachus purinaykichejta.#Hch 18.24-28. Chaywanpis Dioslla astawan astawan Cristopi atinikuyta yachanaykichejpaj yanapasorqachej. 7Chayrayku pichus sumaj willayta willaj, jinataj pichus yachachej mana chaykamachu kanku. Aswanqa Dioslla, pichus astawan astawan Cristopi atinikuyta yanapawanchej, chay. 8Sumaj willayta willajwan, chantá pichus yachachejwanqa ujlla kanku. Jinataj sapa ujninku ruwasqankuman jina t'inkankuta jap'enqanku. 9Noqaykutajrí Diospa yanapajninkunalla kayku, qankunataj Diospa chajran jina kankichej, chayrí Diospa sayarichisqan wasi jina.
10Dios noqawan k'achapuni kaspa, noqa sumajta yachaj albañil jina cimientota churarqani. Kunantaj wajkuna chaypa patanpi wasichashanku. Chaywanpis, sapa uj allinta qhawachun cimiento churasqapi imaynatachus wasichashasqanta. 11Manataj pipis cimiento churasqamantaña waj cimientota churayta atinchu, imaraykuchus chay cimientoqa Jesucristo.#Is 28.16; 1 P 2.4-6.
12Pichus chay cimiento patapi wasichajqa kay jina imakunawan wasichayta atinman: Qoriwan, qolqe metalwan, lliphipirishaj rumiwan, chayrí k'aspiwan, ichhuwan, ch'aki laqhewan ima. 13Chaywanpis sapa uj imaynatachus ruwasqan juicio p'unchaypi sut'inchakonqa. Chay p'unchay Diosqa ninawan jina sapa ujpa ruwasqanta ruphaykuchenqa, imaynachus kasqan yachakunanpaj. 14Cimiento patapi pejpa ruwasqanchus mana ruphanqa chayqa, chayman jina pay t'inkanta jap'enqa. 15Pejpatachus ruwasqan ruphanqa chayrí, mana ima t'inkatapis jap'enqachu. Chaywanpis, payqa qhespichisqa kanqa, nina ukhumanta ñak'ayllata ayqekoj runa jina.
16Manachu yachankichej qankuna tukuyniykichej Diospa templon kasqaykichejta, Diospa Espirituntaj qankunapi tiyakushasqanta? 17Sichus pipis Diospa templonta urmachin chayqa, Diospis chay runata urmachillanqataj, imaraykuchus Diospa templonqa payllapaj t'aqasqa. Qankunamin chay templo kankichej.
18Ama pipis pay kikinta q'otiyakuchunchu. Sichus yuyankichej runaj qhawasqanman jina yachayniyoj kasqaykichejta chayqa, mana yachayniyojman tukuychej, Diospa ñawpaqenpi cheqapuni yachayniyoj kanaykichejpaj. 19Runaj yachaynenqa Diospaj qhasi manakaj. Diospa Qhelqachisqanpi nin:
Diosqa yachayniyojkunata yachaynillankupitaj ch'ipaykun,#Job 5.13. nispa.
20Nillantaj:
Tukuyta Kamachej Diosqa yachayniyojkunaj yuyasqankuta rejsin,
yachantaj qhasi manakaj kasqanta,#Sal 94.11. nispa.
21Chayrayku ama pi runatapis qhatisqaykichejrayku runaykachaychejchu, imaraykuchus tukuy ima qankunajta: 22Pablo kachun, Apolos kachun, Cefas kachun, kay pacha kachun, kawsay kachun, wañuy kachun, kunan p'unchaypis kachun, jamoj p'unchaypis kachun, tukuy chaykunaqa qankunajta. 23Qankunataj Cristojta kankichej, Cristotaj Diospata.
Currently Selected:
1 Corintios 3: DQPC
Highlight
Copy
Compare
Share
Want to have your highlights saved across all your devices? Sign up or sign in
Revisión Biblia Quechua Boliviano © Sociedad Bíblica Boliviana, 2017.
