Sơnròp Gơlik Gơs 27
27
Jakôp kơñau bơta lơngai Esau dê
1Tòm tŭ Isak neh kra jơngo mat ò gŏ tai, gen khai hòi Esau, kòn tơnhoa khai dê mơ đơs lah: “Ơ kòn!” Esau ho lah: “Do añ.” 2Isak đơs lah: “Do, añ neh kra rau, ò git tŭ lơi añ rơp chơt. 3Behơ̆ tŭ do añ dan mê ai tĕ pềs tà, ding kam mơ àtak lik lòt tòm ƀlàng jòi añ in poac phan brê, 4lơh phan sa bơkah jat be añ kòñ sa, gen yò añ in sa, nàng hwềng soàn añ ai lơngai mê in lài mơ tŭ añ chơt.”
5Tòm tŭ Isak đơs mơ Esau kòn klau khai, gen Rebeka kơno. Mơ Esau lik lòt tòm ƀlàng mòc poac brê nàng cèng bèp in. 6Rebeka đơs mơ Jakôp kòn klau khai lah: “Do, añ neh kơno bèp mê sồr Esau, bi mê lah: 7‘Cèng añ in poac phan brê, yò phan sa bơkah añ in sa, nàng lài mơ tŭ añ chơt, añ rơp ai lơngai mê in di đap Yàng Jehôwa.’ 8Behơ̆, ơ kòn, tŭ do iat tĕ añ mơ lơh jat jơnau añ sồr: 9Lòt tus hơ mpồl, kup bàr nơm kòn be niam, gen añ rơp lơh phan sa bơkah bèp mê in jat be khai kòñ. 10Mê rơp yò bèp mê in sa nàng khai ai lơngai mê in lài mơ tŭ khai chơt.” 11Jakôp đơs mơ khai lah: “Ơ mè! Esau, bi añ, gơs sơnò mơya añ ò gơs. 12Digơlan bèp rơp ƀư dê añ mơ đal git añ be cau pơrlồm gen añ rơp àñ bơta srat rma, ò di la geh bơta lơngai ò.” 13Mè đơs lah: “Ơ kòn, bơta srat rma hơ̆ lòi añ kong, kư̆ iat tĕ jơnau añ, lòt kup tĕ bàr nơm kòn be.” 14Behơ̆, Jakôp lòt kup bàr nơm kòn be cèng mè in lơh phan sa bơkah jat be bèp khai kòñ.
15Mơ Rebeka ai ào srồmpha niam rlau Esau dê, kòn tơnhoa khai neh gơs tòm hìu, mơ tơnsoh Jakôp in, kòn put khai dê. 16Gen khai ai gơltau kòn be pùt tê mơ ngko, bơh tê mơ ngko Jakôp ò gơs sơnò. 17Gen Rebeka ai phan sa bơkah mơ piang lă khai neh lơh ơn di tê kòn put khai dê.
18Jakôp yò cèng bèp khai in mơ đơs lah: “Ơ bèp!” Isak ho lah: “Do añ, ơ kòn, mê la ñcau taih?” 19Jakôp ho lah: “Añ la Esau, kòn tơnhoa bèp dê. Añ neh jat jơnau bèp neh sồr, dan bèp guh, nggui sa poac phan brê añ jê, nàng hwềng soàn bèp rơp ai lơngai añ in.” 20Isak lùp lah: “Mbe lơh mê lòt mòc mhar behơ̆ taih?” Khai ho lah: “Bơh Jehôwa Yàng Tom Trồ bèp dê neh sơnio añ tìp mhar behơ̆.” 21Isak đơs mơ Jakôp lah: “Ơ kòn! Lòt tus rềp nàng añ ƀư tồ git mê ngan la Esau kòn añ hala ò.” 22Gen Jakôp lòt rềp di Isak, khai ƀư mơ đơs lah: “Sap đơs la Jakôp dê, ai bàr đah tê la Esau dê.” 23Isak ò git khai bơh bàr đah tê kung gơs sơnò be bi khai la Esau. Behơ̆ Isak ai lơngai lơngò khai in. 24Khai lùp lah: “Mê ngan la Esau kòn klau añ hala ò?” Jakôp ho: “Di, ngan la añ.” 25Gen Isak đơs lah: “Yò tĕ poac phan brê mê dê añ in sa nàng hwềng soàn añ ai lơngai mê in.” Jakôp yò khai in sa, kung cèng tơrnòm khai in ñô sơl.
26Isak bèp khai đơs lah: “Ơ kòn, tus rềp mơ cum añ.” 27 Gen Jakôp tus rềp mơ cum khai. Isak rhềp ƀô ào kòn klau khai dê, gen ai lơngai khai in mơ đơs lah:
“Do, ƀô nhơm kòn klau añ,
Kung be ƀô bơh ƀlàng mơ Yàng Jehôwa neh ai lơngai;
28Dan Yàng Tom Trồ ai mê in dà mơryuh bơh trồ.
Ù gơs bơkah tiah lơngồt.
Kòi mơ tơrnòm gơs tơngkah tơngkañ.
29 Ală làng bol rơp dòn duh mê,
ală lơgar pal cùn gơltang di đap mê.
At bồ tĕ ală oh mi mê dê,
Ală kòn klau mè mê pal cùn gơltang di đap mê.
Cau lơi srat rma mê rơp kong srat rma wơl,
Cau lơi ai lơngai mê in rơp geh lơngai wơl.”
30Tơnơ̆ mơ tŭ Isak ai lơngai Jakôp in rau mơ Jakôp pa lik bơh di bèp khai, gen Esau, bi khai rê bơh mòc. 31Khai kung lơh dô bơta sa bơkah yò bèp in mơ đơs lah: “Dan guh, nggui sa poac phan brê kòn klau bèp dê nàng hwềng soàn bèp ai lơngai añ in.” 32Isak bèp khai lùp lah: “Mê la ñcau taih?” Khai ho lah: “Añ la Esau, kòn tơnhoa bèp dê.” 33Isak rơm să oă mơ đơs lah: “Gen ñcau neh pañ poac phan brê mơ neh ai añ in sa taih? Lài mơ tŭ mê rê, añ neh sa jơh rau, mơ neh ai lơngai khai in, mơ ngan khai rơp geh lơngai hơ̆.”
34Dơ̆ Esau kơno jơnau bèp khai dê, gen khai driau dô jơnau dờng jê nùs tồr ngan mơ đơs mơ bèp lah: “Ơ bèp, ai lơngai añ in tai!” 35Mơya Isak đơs lah: “Oh mê dê neh tus ai bơta pơrlồm mơ neh kơñau bơta lơngai mê dê.” 36 Esau đơs lah: “Bơh cau sơnđan khai la Jakôp gen khai neh tòmpìt gơnoar añ jê bàr dơ̆ do rau. Khai neh kơñau gơnoar kòn tơnhoa añ, mơ tai tŭ do kung tòmpìt bơta lơngai lơngò añ jê sơl. Bèp ò lòi bơta lơngai añ in ò ơ? 37Isak ho lah: Do, añ neh bơtào khai at bồ mê, mơ neh ai oh mi khai dê lơh gơs dĭ gơna khai, mơ añ neh rcang gàr kòi mơ tơrnòm khai in. Behơ̆, ñchi bơta añ kòñ lơh mê in taih?” 38 Esau lùp Lah: “Ơ bèp! Bèp mìng gơs dô bơta lơngai hơ̆ lơm ơ? Ơ bèp! Dan ai lơngai añ in tai!” Mơ Esau nggà ñìm.
39 Isak bèp khai, đơs lah:
“Do, di tiah mê ơm ò gơs ù bơkah tiah lơngồt,
Mơ ò tơl dà mơryuh bơh đang trồ.
40 Mê rơp kơnòm di đào sồng kis,
Mơ rơp duh broă oh mê in;
Mơ tòm tŭ mê lòt nrah nring tềng do tềng dă,
Mê rơp dơrpă yô oh mê dê bơh di ngko mê.”
Esau kòñ tơnchơt Jakôp
41Esau gơjrañ kơuềng di Jakôp tài bơh bèp khai ai lơngai Jakôp in, gen đơs tòm nùs lah: “Ală ngai moat bèp dê mòr di, behơ̆ añ rơp tơnchơt Jakôp, oh añ.” 42Cau yal mơ Rebeka ală jơnau Esau đơs, gen Rebeka hòi Jakôp kòn put khai dê mơ đơs lah: “Do, Esau bi mê, kòñ tơnchơt mê nàng sal tê. 43Behơ̆, ơ kòn, tŭ do iat tĕ jơnau añ, ñă dô pồn tòm hìu Laban, bi añ, tòm Caran, 44mơ ơm mơ khai tòm dô êt ngai, tus di tŭ lơi jơh bơta gơjrañ bi mê dê. 45Tòm tŭ bơta gơjrañ bi mê neh jơh rau, mơ khai hŭi broă mê neh lơh di khai, gen añ rơp sồr mê rê. Mbe lơh añ pal kong roh jơh bàr nă tòm dô ngai ơ?”
46Rebeka đơs mơ Isak lah: “Añ neh bòl glar, ò bài kis tai, bơh ală kòn ùr cau Het dê. Dilah Jakôp kòñ bau mơ dô nă tòm ală kòn ùr cau Het dê, hơ̆ la dô nă cau ùr tòm lơgar be ală cau do, gen mbe añ kòñ kis tai taih?”
Currently Selected:
Sơnròp Gơlik Gơs 27: KPM2018
Highlight
Share
Copy
Want to have your highlights saved across all your devices? Sign up or sign in
© 2018 United Bible Societies. All rights reserved.