Luka 6
6
Yesu ke Zhinkir ɓu̱ Fu̱ɗar Maasi
(Mat 12:1-8; Mar 2:23-28)
1Yesu a mbu mbu̱ damku su̱yen ndu̱ nu̱ mburi nda ku Fu̱ɗar Maasi ɓu̱ Yakhudekwang. Tu̱ nu̱ mbu Yesu kwang ku̱s zha ɗyin ɗyi kaɓkandi nu̱ mbu̱ damkwang a pakhtaran mbu̱ khar wor a njiiran ku. 2Tu̱ Parisekwang wu wor za, “Nu̱m saki nun khutlo wopar ɓu̱ Musa nu̱ nggu̱tlki aa nyi tlu̱na fu̱ɗar maasang ɓa?”
3Tu̱ Yesu tlogha ye wor za, “Shwat nun na bu̱laran mbu̱ lagarkatikwang za sarcha nje nu̱ Annabi Dauda ndu̱ nduki ɓaran tu̱kki meeri.#6:3 Nggu̱t tu̱k mbu̱: 1Sam 21:1-6. 4Tu̱ vi nu̱ mbu̱ Rafti ɓu̱ Magham ta da ɓurti tolir nu̱ke kuru nu̱ tlu̱nar mbu̱ Rafti ɓu̱ Magham ɗyenda shipaki ku̱ nji, tu̱ nji, tu̱ vu̱r ye nduki nu̱ke a su̱yen ndu̱ chin tu̱ nji ku ɓa goma?”
5Tu̱ Yesu lauɗa su̱ ɓalarang za, “Yi ɓu̱ Nduku ɗya zhinkir ɓu̱ Fu̱ɗar Maasi.”
Yesu wa Shaana Khaati ye Fu̱ɗar Maasi
(Mat 12:9-14; Mar 3:1-6)
6Nu̱ Fu̱ɗar Maasi nggur a ɓa ki tu̱k, Yesu a shogar ye nduki mbu̱ kib tabar ɓu̱ Yakhudeku, yang khuski nggur a nje nu̱ke kharan nu̱ zu̱ma zurɗaran. 7Tu̱ Pariseku nu̱ mbu taurete ndu̱ nu̱ shogar Taurete ye nduki sa yiti wor ku̱me na nda mbu̱ Yesu ka shaana njifang ye fu̱ɗar maasang ku̱me gwanda nda ndu̱ zop. 8Yang Yesu wa zu̱n kwaari ɓaanda kap, tu̱ Yesu ze nu̱ zurɗar khara za, “A ɓo to ching gha fan.” Tu̱ njifang ji tu̱ ching gha gume ndukyang.
9Tu̱ Yesu zham wor za, “Ngaa zhamndonu, wa shipa shem kya tlu̱nar mbarkandi Fu̱ɗar Maasi mu yang shem kya tlu̱nar malkandi? Ɗana mi kya nyifi mu yang tlagha mi kya mu̱ti?”
10Tu̱ Yesu nggu̱t wor njang dong, kom tu̱ ze nu̱ zurɗar khara za, “A zoɓo khaara ya.” Nu̱ shorɗaki kharanang, tu̱ kharana shaana.
11Tu̱ Pariseku ndu̱ nu̱ shogar Taurete ku ɓara su̱bu̱r memu̱na wor nu̱gha maɗyi, tu̱ vi ma kwaari nu̱ ɗyine ɗyi nu̱ke wor ɓu̱ she Yesu.
Yesu wa dat pudeku ɓaran gwanggu̱m rap
(Mat 10:1-4; Mar 3:13-19)
12Mbu̱ qaandiku naandang, tu̱ Yesu dlan ɗyin dleng ma barari, tu̱ qan ɗyin barar ye Magham. 13Vi dumaaran tu̱ taba nu̱ mburi nda ku kap, tu̱ dat nduki gwanggu̱m rap chele ɓaanda, tu̱ qa wor pudeku ɓaran. 14Siman nu̱ Yesu kaa qaki nda Biturus, ndu̱ Andu̱rawus khachin Biturus, ndu̱ Yaqub, ndu̱ Yokhana, ndu̱ Filibus, ndu̱ Bartilomi. 15Ndu̱ Matta, ndu̱ Toma, ndu̱ Yaqub woi ɓu̱ Alfawus, ndu̱ Siman nu̱ka qaki nda za, “Nu̱ zhiri ghai ɓaran.”#6:15 Siman Ɗya da chele ɓu̱ nduki ku nu̱ zhiri ghai ɓaanda nu̱ka qaki wor za Zealots. A shim tu̱pa nda kwaaɗar ɓu̱ nduk Roma ɓar ɗyine wora ku̱ Israila gwa ɗyinan. 16Ndu̱ Yakhuda woi ɓu̱ Yaqub, kom ndu̱ Yakhuda Iskariyoti nu̱ masaki nda ɓara.
Yesu wa shi shogar kom ndu̱ shaanar khaati
(Mat 4:23-25)
17Tu̱ Yesu ndu̱ pudeku ɓaranang bu̱r nu̱ ye maa nu̱ke dalang a nje bing sa dlengang tu̱ ching nu̱ si. Tu̱ gwa nu̱ mburi nda ku khang su̱yen ndu̱ tabar nduki nu̱ ɗa viki ku dlar ghai Yakhudiya, mbu̱ ghai Urshalima ndu̱ ghai Taya ndu̱ Sidon nu̱ke a me ɗyim chitndi gwaanjang. 18A ɓa ku ma tu̱k shogar ndu̱ kaalar shaanar khaatiku ɓaanda, nu̱ khu̱kheeti malkandi ku tu̱k wa gwa shaanari. 19Aaki ba komkomi su̱ɓa nda ku̱me zalale wa ka vi ve nda ma shaana nu̱ khaati ku kap.
Nduki nu̱ barka
(Mat 5:1-12)
20Kom tu̱ Yesu dambu̱r nu̱ she nu̱ mburi nda kwa za,
“Barkya ve nu tun nun ka naki katar ɓaanu mbe shir shimndi ɓu̱ Magham
ku̱me kwaaɗar ɓu̱ Magham ɗya ɓaanu.
21Barkya ve nu tun nu̱ke a tu̱k meeri leendang,
ku̱me mbonu ka ɓa zhi.
Barkya ve nu tun nu̱ ghoori leendang,
ku̱me tun ka ɓa shi mu̱si.
22Barke ɓaanu mbu̱ nduki wa zhangndonu,
tu̱ pu̱zonu tu̱ komba nu,
su̱yen ndu̱ zu̱r malkandi nu̱ ve nu,
ku̱me nga Yi ɓu̱ nduku.
23“Shi ma kashar maɗyikandi ye fu̱ɗaran tun shi zhakhzhakh ku̱me ɗye ɓi gwaanji a buro nu viɗi. Mbu̱ tun wa koori, zhikankirku ɓaanda shi wanang ku ye Annabiku nu̱ zhu.
Chiti mbu nu̱ke a ɓari
24“Tun nu̱ gu̱narku meeni. Tun ɗye zhiyaye
ku̱me nang ke lauɗarsi tu̱kti mu̱ndi ɓaanu.
25Tun nu̱ke mbonu zhiran leendang tun
ɗye zhiyaye
ku̱me tun ka ɓa tu̱k meeri maɗyi.
Tun nu̱ mu̱si leendang tun ɗye zhiyaye
ku̱me mbonu ka ɓa taɓa tun shi
ghoori maɗyikandi.
26Tun ɗye zhiyaye mbu̱ aakya makhta nu,
ku̱me zhikankirku ɓaanu shi wanang
ye annabi kotameku nu̱ dlu̱r ɓalar
she Magham zhu.
Ndolama nu̱ zhangndi ɓaanu
(Mat 5:38-48; 7:12)
27“Tun nu̱ tu̱kti ɓalar ɓanga tu̱k ma, ndolama nu̱ zhangndi ɓaanu, shi ma mbarkir ye nduki nu̱ke a zhangndonu, 28Sa ma barke ye nduki nu̱ke a mi pontori ɓaanu tun shi barar ye nduki nu̱ke a vu̱r bonye ye nu. 29Mbu̱ nduk wa ɓu̱tlor ve shalnggor nu̱ zu̱ma mbu̱m nu̱ gu̱ɗawang yenda tu̱k, mbu wa fed lukti kadanggame ɓa ɓar ve ro, fed lukti ye mbwang to vu̱r yenda.#6:29 Kadanggame Ɗya lukti gwaanji. 30Kap njif nu̱ khuɗki tun shoro, to vu̱r yenda, njif nu̱, lawaki tun ɓar khaaro, laɓ na ku̱ gaɓ si yor ɓa. 31Ɗyi nu̱ke tun a shim ku̱ nduki she nu, shi ma ye wor wanang tu̱k.
32“Mbu̱ tun a ndola kya nduki nu̱ke a ndola nu ɗyenda, tun kaa shi barka kikimnda? Aa nu̱ solarku wa ka ndola nduki nu̱ke a ndola wora. 33Mbu̱ tun kaa shi mbarkir ɓaanu ye nduki nu̱ka shiki mbarki ye nu ɗyenda, tun kaa shi barka kikimnda? Aa nu̱ solarku wa ka shi wanang. 34Mbu̱ tun ka vu̱r kudum ɓaanu ye nduki nu̱ke tun tamanki za kaa gaɓki su̱ ye nu ɗyenda, tun ka gwa barke ni kikimnda? Aa nu̱ solarku wa ka vu̱r kudum ye nyeezi wor nu̱ sola ku̱me wa taman ku za ka ɓa gaɓ si ye wor nyeedlan. 35Yang tunu, ndola ma nu̱ zhangndi ɓaanu, tun shi mbarkir ye wora tun vu̱r kudum ye wor aa ɓu̱ gaɓ si ɓa. Mbu̱ tun wa shi wanang, ɗye ɓi ɓaanu khang viɗi, tun ka kha ma qusonggi ɓu̱ Magham nu̱ viɗi, ku̱me wa ka shi mu̱nkir ye nu̱ mu̱narku ndu̱ nduki nu̱ song wuti kuna. 36Tun kha ma nu̱ tu̱kti zhiyaye ba wa nu̱ke zhinonu nu̱ viɗi ɗya nu̱ nar zhiyaye.
Kuma nu Aaki ɓa
(Mat 7:1-5)
37“Kuma nu aaki ɓa, yang nduk ɓu̱ kuma nu zum ɓa. Vu̱r nu zop ye aaki ɓa, yang nduk ɓu̱ vu̱r zop ye nu zum ɓa. Ndu̱m ma zop ɓu̱ aaki ye wora, wor tu̱k ka ndu̱m ye nu. 38Vu̱r ma, kaa vu̱r ye nu tu̱k, kaa vu̱r ye nu nyeedlan mbu̱ du̱ɓ zhiiri, shinggaran cheetlan mbu̱ yen ku̱me ku̱ gwa maa nu̱ke chin kaa zu̱ki nu̱ ɗyinan kope tun wa gaɗa ɓeenan me bu̱n kapar ku̱me khangan. Ɗye zhiiri nun shiki boote si ma zhiran ye nduki, ka ɓa zhi ye nu baa mban.”
39Tu̱ Yesu zu̱ ye wor mbe ku̱rti ɓalar za, woɗye pugum wa ka khuɓ khar pugum ma bala nda mu? Mbu̱ pugum wa bala mu̱dlen pugum, kap ɓaanda kaɗa nggu̱ɗ nu̱ gwa. 40Sar da nu̱ dlu̱r shoga nu̱ka duk Maalu̱m ɓaran ɓa, kap ndu̱ nang, mbu̱ nu̱ dlu̱ranang ɗya nu̱ komkomi, mbu̱ wa woɗa shogaran, kaa kha wa Maalu̱m ɓaran.
41“Nu̱m saki ta nggu̱t ye wuzu̱ndi nu̱ke a mbu̱ yiti mu̱dlo, yang no damta ndu̱ kodong qu̱far nu̱ke a mbu̱ yitora ɓa? 42To kaa ze mu̱dlo no za, ‘Bu fed nga ye wuzu̱ndi nu̱ke a mbu̱ yitora ɓar kikimnda nu̱ke kodong qu̱farang nje mbu̱ yitorang? To nu̱ shir tun ku̱me ku̱ nduki na, nggo san ndu̱ feti kodong qu̱far nu̱ke a mbu̱ yitora ɓara dong, kom to kaa na yarang feti ye wuzu̱ndi nu̱ke a mbu̱ yiti mu̱dlwang ɓar mbari.’ ”
Nduk ka Zu̱n Qu̱fa nu̱ ku̱nshe Khar Yen
(Mat 7:16-20; 12:33-35)
43“Qu̱far mbarkandi nu̱ka kha qusonggi malkandi ɓa, qu̱far malkandi nu̱ka kha qusonggi mbarkandi tu̱k zum ɓa. 44Nduk kaa zu̱n aa nyi qu̱fa nu̱ ve khar yen. Sar da nduk nu̱ka ɗakh ye suga ve qu̱far nggoɗuma ɓa, yang nduk nu̱ka ɗakh ye ɓaawu ve qu̱far daanggir ɓa. 45Nduk mbarkandi wa ka shi ɗyi mbarkandi ku̱me ɗya ɗyi mbarkandi kya mbu̱ memu̱naran, yang nduk malkandi kaa shikya ɗyi malkandi ku̱me ɗyi nu̱ke a mbu̱ memu̱naranang ɗya ɗyi malkandi. Aakochi, ɗyi nu̱ nduk zu̱ki ndu̱ men nang ke ɗyi nu̱ke a mbu̱ memu̱naran.
Nu̱ Du̱ndiku Rap
(Mat 7:24-27)
46“Tun a qa nga Zhinerem gwaanji, Zhinerem gwaanja ma nu̱ma, nu̱ke nun khutlo ɓalar ɓang ɓa? 47Tu̱k ma ɗyi nu̱ njif nu̱ka tu̱kki ɓalar ɓang tu̱ka khutlo ɓalarang shipaki. 48Njif nang wa shipa njif nu̱ du̱nki kib ɓaran tu̱ sa saari du̱ndang nu̱ ɗyin tandal du̱mbu̱rkandi. Nu̱ romndi shiki, tu̱ zoɗar a ɓa, tu̱ ɗyimang nyel nu̱ sa kibang a tu̱paran, yang kibang nu̱ gu̱ɗa ɓa ku̱me du̱ndan ɗyin tandal. 49Yang aa nyi nduk nu̱ tu̱kki ɓalar ɓang, tu̱ zhang khutloran gha, wa shipa njif nu̱ du̱nki rafti ɓaran nu̱ ɗyin wuɗyiri. Nu̱ zoɗar a ɓa ki, tu̱ nyel nu̱ sa kibang, tu̱ ra su̱ kiba nu̱gha, tu̱ kiba gu̱ɗa ru̱m, gu̱ɗar malkandi.”
Currently Selected:
Luka 6: ttrNT
Highlight
Share
Copy
Want to have your highlights saved across all your devices? Sign up or sign in
Nigeria Bible Translation Trust in cooperation with Wycliffe Bible Translators, Inc.
© Wycliffe Bible Translators, Inc. and
© The Nigeria Bible Translation Trust 2016