Zechariah 2

Nahsénhaton Ateʼtsénsera: Ne Ne Rón꞉kwe Rahá꞉we Iontenenhtensthákwa Asé꞉riie

1Wakatarakétsko tánon rón꞉kwe wahí꞉ken iontenientensthákwa asehiéie rahá꞉we. 2Eʼthò꞉ne wakariwanón꞉ton “Kanonwewáse?”

Watharihwaʼserá꞉ko, “ne nahkatenienténhstakwe Jerusalem, ne nahontʼtokénhse tohnahtewahthákaron ó꞉ni tsi nahiónshonke.”

3Ethò꞉ne ne raronhiakeró꞉non tsi niká꞉ien ne tehionkenithá꞉rahkwe ohén꞉ton nontá꞉re, tánon thiháte raronhiakeró꞉non thontahoteráhte. 4Tánon wahawénhase, “Tesharáhtat, tsióri thí꞉ken nithohiónha: ne Jerusalem kwáh tsi enhathiʼteróntake thóh nenhiotón꞉hake tsi ní꞉iot ne tsi kanatakérons iáh othé꞉non tewashontó꞉tons, tiorì꞉wa tsi nihiakotiohkowá꞉nen nonkwehó꞉kons ó꞉ni khonthiʼtsé꞉nen thóh kontinákere. 5Ne Roiá꞉ner rorahrátston raónha ne tekensténrote nótsire neh tekanhathanákton nahonthashá꞉kohne tánon thóh nón꞉we nenhenterónthake skatʼke ne rahohiathanerahkwátshera.”

Ne Ronwahthinakerahkwáton Ionshahonwatínonhke Ne Thahontahón꞉ne

6-7Ne Roiá꞉ner washakawénhase ne rahonkweʼtashón꞉ʼa, “Tekwahrehniáton kwák tsík nitsiotserahthánions. Ók nihnónhwa, ne sehwanhakeráhkwen, shasehwaniáken ne Babylonia nón꞉we tánon Jerusalem nionshá꞉sehwe. 8Nónhka akénhake nahieshakahré꞉wahte wahekahré꞉wahte tsi nahò꞉ten ne kwáh kanó꞉ron nakerihwà꞉ke.”

Káti ne Roiá꞉ner Roshatstenhserowá꞉nen tahakahthéniete nahontatʼkháwe kí꞉ken aterihwahnhothátshera ne rahothirihwà꞉ke tsi nihá꞉ti ne shakothinénhskwen ne rahonkweʼtashón꞉a: 9“Ne Roiá꞉ner iatenhohiátisthe tsi ensehwaterí꞉io, tánon kwáh ronónha entieshanénhsko tsi niká꞉ien ne shanhatserahkén꞉en kénʼne.”

Nó꞉nen kí꞉ken é꞉tho nenhiá꞉wenhne, kwáh onhkweʼtakwé꞉kon tsi enhiakoterienʼtá꞉rahʼne né꞉tho Roiá꞉ner Roshatstenhserowá꞉nen thakható꞉rion.

10Ne Roiá꞉ner wahèn꞉ron, “Tesherí꞉wak natonnharáhtshera, tiónkwe ne Jerusalem! Thónkak kontáhtie ne sehwenhtióhkwakon akitehrónthake!”

11Ne thóh nenhkahá꞉wike iakotiohkowá꞉nen rahonhà꞉ke ne Roiá꞉ner niénhien tánon rahonkwè꞉tah enhiónton. Skátke entewenterontake, tánon ensehwaterienʼtá꞉rahne tsi raónha thakató꞉rion ne tionhá꞉ke. 12Shé꞉kon énska iensehwaterátsthe ne Judah kwáh kahtokénston rahonhatsí꞉wa ne Roiá꞉ner enhahiathakwénhioke thóh nón꞉we rahonwenhtsiatokenhtí꞉ke, tánon Jerusalem ne kanahtowá꞉nen ne tsiahonhà꞉a entahnatanorónhkwake.

13Sak thikénhak, sewakwé꞉kon, ne rahohén꞉ton ne Roiá꞉ner, asè꞉ken thóh nón꞉we nonhthahawehnonhátie ne iotokénhti thonónhsote.

Currently Selected:

Zechariah 2: MHK

Highlight

Copy

Want to have your highlights saved across all your devices? Sign up or sign in

Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.

The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).

Learn More About Ohiatonhseratokénti