Naa^hum 2
2
Ni^naa^we Zuqc Mbaang
1Ni^naa^we Zingh aac, maaih mienh daaih mborqv meih aqv.
Oix zuqc maaih mienh yiem zingh nyei laauh zuov jienv,
mbungh jienv jauv-kuv,
liuc leiz ziangx,
gapv jienv qaqv mborqv jaax.
2 Ziouv oix bun Yaakopv nyei njang-laangc nzuonx daaih hnangv loz wuov nor,
yaac hnangv I^saa^laa^en nyei njang-laangc,
maiv gunv zoux waaic nyei mienh bun ninh mbuo zuqc baaic waaic,
yaac bun ninh mbuo nyei a'ngunc hmei-nquaah waaic nzengc.
3Ninh nyei mborqv jaax henv nyei baeng nyei torngv-baaih siqv nyei.
Baeng zuqv nyei lui-houx siqv-hongc.
Ninh mbuo liuc leiz mborqv jaax wuov hnoi,
mborqv jaax cie nyei hlieqv njapc njapc nyei hnangv douz nor.
Mborqv jaax nyei maaz jiex naaiv jiex wuov beqv jienv mingh.#2:3 Ih jaax hnoi mienh maiv hiuv dingc naaiv joux Hipv^lu waac maaih haaix nyungc eix leiz.
4Mborqv jaax cie ndutc ndutc nyei gan hei-horngc mingh,
yiem wuov domh zuangx zaamc siepv-siepv nyei tiux mingh tiux daaih.
Buatc ninh mbuo hnangv douz-baav nor njang,
yaac hnangv mba'lingc nor siepv.
5Ninh heuc ninh nyei baeng-bieiv daaih,
ninh mbuo yaac ndorpc ndorpc lorqv-lorqv nyei mingh.
Ninh mbuo tiux jienv mingh taux zingh laatc,
zorqv torngv wuoqc ginc nyei ga'naaiv torngv jienv.#2:5 Loz-hnoi mienh mborqv jaax ninh mbuo longc diuh ndiangx, longc hlieqv buang jienv dueiv-mueiz, aengx ndiux jienv qorng fongv mingh zong zingh laatc gaengh huv. Yiem zingh laatc gu'nguaaic wuov deix baeng haih longc la'bieiv zoi njiec fai longc juang-zinx buonv njiec. Zong laatc gaengh nyei baeng ziouc longc kuaaiv ga'naaiv jangv nyei torngv jienv ninh mbuo nyei m'nqorngv gu'nguaaic.
6Zaeqv ndaaih nyei gaengh koi nqoi mi'aqv,
hungh dinc nyei mienh lunc nzengc.#2:6 Fai “hungh dinc yuqc nzengc mi'aqv” fai “hungh dinc mbaang nzengc mi'aqv”.
7Baeng ciev nzengc hungh maac#2:7 Mienh maiv hiuv dingc naaiv joux Hipv^lu waac nyei eix leiz. nyei lui-houx,
caangv ninh mingh mi'aqv.
Ninh nyei m'sieqv bou nzauh,
nzuei ganh nyei la'kuotv
heuc jienv hnangv baeqc gopv heuc nyei qiex.
8Ni^naa^we se hnangv wuom-domh,
wuom liouc jienv cuotv.
Maaih mienh heuc jienv gorngv, “Dingh! Dingh!”
Mv baac maiv maaih haaix dauh huin nzuonx.
9Luv jiem,
luv nyaanh maah!
Maaih nyei zinh zoih camv haic, zungv maiv haih nzengc,
maaih nyungc-nyungc jaaix haic nyei ga'naaiv.
10Baaic waaic baaic huaang, zuqc mietc nzengc aqv loh!
Mienh nyei mba'nziu yuqc, cingh mborqc nqaapv jaax,
sin zaangc nyei qaqv zitc mi'aqv.
Dauh dauh nyei hmien mbienc nzengc.
11Sienh nyei dorngx
caux dorh sienh dorn nyei kuotv yiem haaix?
Se sienh gouv sienh nyeiz bieqc cuotv nyei dorngx yiem haaix?#2:11 Fai “sienh dorh ninh zorqv daaih nyei orv daaih”.
Sienh dorn yiem wuov yaac maiv maaih mienh haeqv.
12Sienh gouv betv ninh duqv daaih nyei orv gaux uix sienh dorn,
aengx ngaatc orv daaih bun sienh nyeiz.
Ninh siou ninh betv daaih nyei orv buangv ninh yiem nyei kuotv,
ninh ngaatc daaih nyei orv buangv nzengc kuotv gu'nyuoz.
13Nernh Jiex nyei Ziouv gorngv,
“Yie caux meih benx win.
Yie oix buov meih nyei mborqv jaax cie benx sioux nzengc.
Meih mbuo nyei sienh dorn oix zuqc nzuqc ndaauv daix.
Dongh meih mbuo caangv ganh deix mienh nyei ga'naaiv, yie oix zorqv nzengc.
Yiem naaiv mingh maiv maaih haaix dauh haiz
meih nyei douc fienx mienh nyei qiex.
Currently Selected:
Naa^hum 2: IuMiNR
Highlight
Share
Copy
Want to have your highlights saved across all your devices? Sign up or sign in
ฉบับอักษรโรมันใหม่ © Thailand Bible Society, 2007.