Valooma 4

Ʉkʉvalɨlwa ʉvʉgolosu kʉ nzɨla jya lwɨdɨko

1Pwʉ lɨno, ʉkʉkongana ni kulongwi itsi itsa kʉvalɨlwa ʉvʉgolosu, ʉwe twɨ Vayahudi tʉte kɨki pa kulongwi tsa Abulahamu, ʉmbʉmbʉtsi viitu, ʉmwʉ aatsimanyie itsi? 2Ɨngave twita ʉAbulahamu aavaliilwe ʉvʉgolosu ʉkʉkongana ni mbombo tsa mwene ingolosu, ʉmwene aale iiva nɨ kɨɨnu kya kwɨginihitsa. Lɨno ʉwajɨlweli wiita, alɨ vʉvʉle ɨkya kwɨginihitsa pamiiho pa Ngʉlʉve. 3Lola, ʉVʉvɨge ʉVʉvalatse wiita, “ɄAbulahamu aamwɨdiike ʉNgʉlʉve, pwʉ ʉNgʉlʉve akambalɨla ʉvʉgolosu.”#Vʉtengʉlɨlo 15:6

4Jɨlweli, ʉmuunu angavombe ɨmbombo, ʉlʉhombo lwa mwene nalwiva lwokelo, apeene lwiva kɨɨnu kya mwene ɨkyʉ anogye ahombwe. 5Lɨno ʉmuunu ʉvɨ nihʉʉvɨla imbombo tsa mwene, apeene ikʉmwɨdɨka ʉNgʉlʉve ʉvɨ ikʉmpa ʉvʉgolosu, nʉpwʉ jɨngave nanʼgolosu, ʉjwa vɨ mwene ʉNgʉlʉve ikʉmbalɨla ʉvʉgolosu ʉkʉkongana nʉ lwɨdɨko lwa mwene. 6Pa kulongwi tsa vʉgatalʉsu wa muunu ʉvɨ ʉNgʉlʉve ikʉmbalɨla ʉvʉgolosu kɨtsila kʉlola imbombo tsa mwene, ʉnkʉlʉdeeva ʉDavʉdi namwene aatsovile akata,

7“Vagatalʉsu valya ʉwʉ ʉNgʉlʉve avasyɨkye imbiivi tsa veene,

nʉ kʉtsihetsa lwoni.

8Inʼgatalʉsu ʉmuunu ʉvɨ ʉNtwa ʉNgʉlʉve nikʉmbalɨla ikange ʉkʉta,

alɨ ni mbiivi.”#Zabuli 32:1-2

9Ndeeti, ʉvʉgatalʉsu ʉwa ʉvutsowa nʉ Davʉdi, wa valya veene avatahiliiwe, kwʉ kʉta aVayahudi, evo wa paninie na vaanu avatava Vayahudi? Ndikʉvakʉmbʉsa ʉVʉvɨge ʉVʉvalatse ʉwiita, ʉNgʉlʉve aambalye ʉAbulahamu ʉvʉgolosu kʉ nzɨla jya lwɨdɨko lwa mwene kwa Ngʉlʉve.#Vʉtengʉlɨlo 15:6 10Pwʉ lɨno, ndinywilitsa ʉkʉta, palya ʉpwʉ ʉAbulahamu aavaliilwe ʉvʉgolosu, aale akaanale ʉkʉtahiliwa! Apeene wʉ galʉtɨngʼiinie ago pwʉ akatahiliwa. 11Ʉkʉtahiliwa kwa mwene kyale kɨmanyilo kʉ mwene kya kʉmbonia ʉkʉta ʉNgʉlʉve aambalye ʉkʉva nʼgolosu ʉkʉhʉmana nʉ lwɨdɨko lwene ʉlwʉ aale nalwo wʉ akaanale ʉkʉtahiliwa. Kʉ nzɨla ɨjyo ʉAbulahamu ɨɨpelile dadajyavo va vooni avikwɨdɨka, nʉpwʉ jɨngave navatahiliiwi, pakʉta naveene vavalɨlwe ʉvʉgolosu. 12Avaanu avatahiliiwe naveene, ʉAbulahamu vɨ dadajyavo mu lwɨdɨko, vangave vikʉmwɨdɨka ʉNgʉlʉve. Lola, niiva dadajyavo ʉlwakʉva vatahiliiwe, apeene dadajyavo ʉlwakʉva vikʉmwɨdɨka ʉNgʉlʉve ndʉwʉ aale ʉmwene ʉjwa, palya wʉ akaanale ʉkʉtahiliwa.

13ɄNgʉlʉve aammʉʉviitse ʉAbulahamu na vaanu va lʉjungu lwa mwene ʉkʉta, alavapa ɨkɨlʉnga kyoni, kɨve kya vʉhaale wa veene. ɄNgʉlʉve nammʉʉvɨtse ewo ʉAbulahamu ʉlwakʉva aakongaga indagɨlo, apeene ʉlwakʉva aamwɨdɨkaga ʉNgʉlʉve. Pwʉ ʉmwene ʉNgʉlʉve akambalɨla ʉAbulahamu ʉkʉva nʼgolosu. 14Lola, jɨkaale jɨve aVayahudi avikonga indagɨlo wʉ vipeewa itso itsʉ aavahʉʉviitse ʉNgʉlʉve, pwʉ ʉkʉmwɨdɨka ʉNgʉlʉve kʉkaale kwiva kʉtsila lʉvʉmbʉlɨlo. Apo ɨnyʉʉve jya Ngʉlʉve najyene jɨkaale jiiva jya vʉnuasi, 15manya ʉmuunu ʉvideenya indagɨlo ipeewa ʉlʉvʉngʉ. Lɨno ɨngave natsikʉli indagɨlo, pwʉ nakʉkʉli ʉkʉdeenya indagɨlo.

16Ɨlɨ lyʉ lɨpelile ɨnyʉʉve jya Ngʉlʉve jɨhʉʉvɨlage ʉkʉmwɨdɨka ʉmwene nʉ lʉhʉngʉ lwa mwene. Kʉ nzɨla ɨjyo, tsilya itsʉ vaahʉʉvɨtsiiwe avaanu vooni va lʉjungu lwa Abulahamu, tsive tsa lweli. Kwʉ kʉta, najiiva kʉ Vayahudi avikonga indagɨlo veene, apeene nakʉ kʉ veene avikʉmwɨdɨka ʉNgʉlʉve ndʉ Abulahamu. Ʉwe twɨ vooni, ʉdadajiitu mu lwɨdɨko vɨ Abulahamu. 17Isiinu isi ʉNgʉlʉve aatsovile mu Vʉvɨge ʉVʉvalatse ʉwiita, “Ndɨkʉvɨɨkile ʉveetsage dadajyavo va vaanu va sivʉmbʉkʉ syongosu.”#Vʉtengʉlɨlo 17:5 Pwʉ lɨno, wʉ ʉAbulahamu alɨ pamiiho ga Ngʉlʉve, aapʉliike isiinu isi isyʉ ʉNgʉlʉve aammʉʉviitse. Akamwɨdɨka ʉNgʉlʉve ʉvɨ ikʉvapa avaswe ʉwʉʉmi nʉ vɨ itsova isiinu isyʉ nasigelili ʉkʉvepwo ʉta pwʉsile.

18ɄAbulahamu ʉpwʉ aavʉʉlilwe amamenyu ago, gaale matalamu ʉkʉgɨɨdɨka. Paninie nɨɨlyo, akagendelela ʉkwɨdɨka nʉ kʉhʉʉvɨla ʉkʉta ʉNgʉlʉve alavomba ndʉwʉ aatsovile. Pwʉ akava dadajyavo va vaanu va sivʉmbʉkʉ syongosu, ndʉwʉ ʉNgʉlʉve aambʉʉlile ʉkʉta avaanu va lʉjungu lwa mwene valaava vongosu ʉngata nondwe.#Vʉtengʉlɨlo 15:5 19Ʉnsɨkɨ ʉgwa ʉAbulahamu aale nɨ myaka ʉngata ʉndeevʉlʉ mpamato (100). Ʉmwene aalʉmanyile ʉkʉta, ʉmmana gwa mwene gwale ʉngata gʉsue, ikange najyʉ nʼdala va mwene ʉSala aale nʼgʉmba. Lɨno, paninie nɨɨlyo ʉlwɨdɨko lwa mwene nalwakeepe. 20Ikange, naave nɨ numbula jya kʉsinaana pa kulongwi jya nyʉʉve ɨjyʉ aapeevilwe nʉ Ngʉlʉve. Apeene akagendelela ʉkʉmwɨdɨka nʉ kʉnʼginia, 21manya aalʉmanyile jɨlweli ʉkʉta ʉNgʉlʉve iweesa ʉkʉvomba galya ʉgwʉ ammʉʉviitse ʉkʉta jiikʉmbombela. 22Ɨkɨ kyʉ mene, ʉVʉvɨge ʉVʉvalatse wiita, ʉNgʉlʉve aambalye ʉvʉgolosu kʉ nzɨla jya lwɨdɨko lwa mwene.#Vʉtengʉlɨlo 15:6

23Lɨno amamenyu aga agiita, “ɄNgʉlʉve aambalye ʉvʉgolosu,” nagaavɨgwe pa kulongwi tsa Abulahamu mwene, 24apeene gaavɨgilwe pa kulongwi tsa twɨ vooni. Gikʉtʉvʉʉla jɨlweli ʉkʉta tʉngamwɨdɨke ʉNgʉlʉve, ʉvɨ aantsʉʉsiitse ʉNtwa viitu ʉYɨɨsʉ, pwʉ najyʉwe tuvalɨlwa ʉvʉgolosu. 25ɄNgʉlʉve aammʉmiitse ʉYɨɨsʉ abudwe kʉ nongwa jya mbiivi tsiitu, ikange akantsʉʉsa pakʉta ʉwe tʉvalɨlwe ʉvʉgolosu.

Currently Selected:

Valooma 4: zga

Highlight

Compare

Copy