Valooma 16

ɄPaulo isuungʼa ʉlʉsaamuso kʉ vaanu ava naava

1Ndikʉvavʉʉla ʉkʉta ʉFoibe immaatsa viitu mu lwɨdɨko, muunu nnonu, ikange mbombi va mpelela ʉgʉlɨ kʉ vʉtsenge wa Kenkileya. 2Ndidoova mumwʉpɨlɨle vʉnonu, ʉlwakʉva mwɨdɨki va Ntwa ʉYɨɨsʉ. Ʉkʉvomba ewo kʉvanogye avɨɨdɨki wʉ vavombage. Ikange, ndidoova ʉkʉta jʉmuntangage ɨngahʉmɨle ave ilonda ʉkʉtangɨlwa, manya ʉmwene aavatangile avaanu vongosu, ʉkʉhanza nʉʉne.

3Muvasaamuse avavombivajyango, ʉPulisila paninie nʉ nʼgoosi va mwene ʉAkila. Avo naveene valɨ mu vʉvombeli wa Mesiya ʉYɨɨsʉ, 4ikange vaale vanya kwambʉtsa ʉwʉʉmi wa veene kʉ nongwa jyane ʉne. Nandɨlɨ jyʉne ndɨ ndikʉvasaana avo, apeene nava vaanu avatava Vayahudi mu mipelela gyoni, vikʉvasaana siitso avo. 5Ikange, muvasaamuse avampelela aviiva vilʉndamana mu nyumba jya veene, paninie nʉ nʼgane vango ʉEpaineto, ʉvɨ ʉmwene vɨ ntatsi ʉkʉmwɨdɨka ʉKɨlɨsiti ʉkʉ kʉ mpandʉlʉ gwa Asiya.

6Munsaamuse ʉMaliyamu, ʉvɨ aavombile ɨmbombo kʉ lwɨkupilo kʉ lʉvʉmbʉlɨlo lwanyie, 7ikange muvasaamuse ʉAndiloniko nʉ Yuniya ʉwʉ naveene Vayahudivajyango, avaakʉngilwe paninie nʉʉne mu kɨkʉngwa. Avo vaalongwe kwane ʉkʉmwɨdɨka ʉKɨlɨsiti, ikange vaamanyikiike siitso pagati pa vapositili.#16:7 Vaamanyikiike siitso pagati pa vapositili Ʉvʉganulu ʉvʉnge wiita vaamanyikiike siitso mu vapositili.

8Munsaamuse ʉAmpuliyato, ʉnʼgane vango ikange mwɨdɨki va Ntwa ʉYɨɨsʉ Kɨlɨsiti. 9Munsaamuse ʉSitaku, ʉvɨ namwene nʼgane vango, nʉ mbombinʼjiitu ʉUlibano ʉvɨ alɨ mu vʉvombeli wa Kɨlɨsiti.

10Munsaamuse ʉApele, ʉvɨ aagendye ingelo nyongosu nʉ kwɨdɨkiwa nʉ Kɨlɨsiti, ikange muvasaamuse avaanu va mu nyumba jya Alisitobulo.

11Munsaamuse ʉHelodioni, ʉNʼyahudinʼjyango, na vaanu va mu nyumba jya Nalikiso, ʉwʉ vikʉmwɨdɨka ʉNtwa ʉYɨɨsʉ Kɨlɨsiti.

12Muvasaamuse ʉTilufeni nʉ Tilufosa. Avadala avo vikɨkupila siitso ʉkʉvomba ɨmbombo jya Ntwa ʉYɨɨsʉ. Ikange, munsaamuse ʉnʼgane vango ʉPelisi. Ʉjʉ namwene nʼdala ʉvɨ aavombile ɨmbombo jya Ntwa ʉYɨɨsʉ kʉ lwɨkupilo.

13Munsaamuse ʉLufasi, ʉmwomolwa va Ntwa ʉYɨɨsʉ, ikange munsaamuse nʉ vanyina ʉvɨ aannangile ʉne ʉta vɨ jyʉva ʉvannyolile.

14Ikange, muvasaamuse ʉAsunikilito, ʉFulegoni, ʉHelume, ʉPatiloba, ʉHelima, na vɨɨdɨki va Yɨɨsʉ Kɨlɨsiti vooni ʉwʉ valɨ paninie navo.

15Kʉ vʉmalɨlo, muvasaamuse ʉFilologo nʉ Yuliya, ʉNeleya nʉ mmaatsave, ʉOlimpa, paninie na vɨɨdɨki va Yɨɨsʉ Kɨlɨsiti vooni ʉwʉ valɨ paninie navo. 16Musaamusaniage pa kɨpambaga.#16:16 Musaamusaniage pa kɨpambaga Mu Kɨyunaani jɨvɨgilwe ʉkʉtsibana. Ʉlwiho ʉlwa lwavombekaga kʉ nzɨla jya kʉtsibana kʉ ndomo evo kʉ lʉtseetse. Ɨkyo kyale kɨmanyilo kya lʉgano. Lɨno, kwawe twɨ Vakɨnga ʉlwiho ʉlwa lʉhwaniine ndʉ kwɨsaamusa pa kɨpambaga. Vikʉvasaamusa avɨɨdɨki vooni va mipelela gya Kɨlɨsiti ɨgɨlɨ kʉnʉ.

Ʉlʉleko lwa Paulo

17Lɨno, vɨɨdɨkivajyango, ndikʉvadoova ʉkʉta muveetsage miiho na vaanu valya ʉwʉ imanyiiso tsa veene tsipela avɨɨdɨki vagavɨke sipʉga sipʉga, ikange, tsinanga ʉlwɨdɨko nʉ lʉgendo lwa veene. Taamagi kʉtale na veene, manya imanyiiso tsa veene tsisʉtɨngʼana ni tsilya itsʉ mwamanyiisiiwe. 18Ɨlweli, avaanu avalɨ ndavʉle navikʉmbombela ʉNtwa viitu ʉKɨlɨsiti, apeene vivomba kʉ vʉsumbe wa vʉkavi wa siinu sya kʉlya vaveene. Mu vʉteki wa veene, vitsova amamenyu amanonu agihovosa, wʉ hʉmbe vikʉvasyova avɨɨdɨki avanya lwɨdɨko lʉdebe. 19Vooni vapʉliike ʉkʉta ʉnyie muliibiite vʉnonu ɨLimenyu lya Ngʉlʉve. Ɨkɨɨnu ɨkyo kikʉnnyovosa ʉne siitso. Napeene, ndinogwa muve nʉ lʉhala mu mbombo inonu, ikange mulekage ʉkʉkwegwa nʉ vʉtulanongwa. 20Lɨno, ʉNgʉlʉve ʉvipela ʉlʉnotsehetso alantika ʉSetano nʉ kʉvapa ʉnyie amaka ga kʉndema. Ʉlʉhʉngʉ lwa Ntwa viitu ʉYɨɨsʉ ʉKɨlɨsiti lʉveetsage nʉʉnyie.

21Ikʉvasaamusa ʉTimoti ʉvɨ vɨ mbombinʼjyango. Ikange, vikʉvasaamusa avajyango aVayahudi ʉLukiyo, ʉYasoni nʉ Sosipatilo. 22Najyʉne ndɨ Telitiyo, ndɨ mbɨgi va mamenyu ga kalata ɨjɨ jya Paulo, ndikʉvasaamusa ndʉ mwɨdɨkinʼjiinyo va Ntwa ʉYɨɨsʉ. 23Ikʉvasaamusa ʉGayo ʉvɨ mu nyumba jya mwene mwʉ nditaama ʉne ndɨ Paulo, ikange mwʉ ʉmpelela gwoni gwa Ntwa ʉYɨɨsʉ gulʉndamana. Ikange, ikʉvasaamusa ʉElasito, ʉvɨ ivɨɨka indalama tsa vʉtsenge ʉvʉ,#16:23 Vʉtsenge ʉvʉ Ʉvʉtsenge ʉwa ipange wʉ vʉtsenge ʉwa Kolinto. namwene ʉmwɨdɨkinʼjiitu ʉKwalito ikʉvasaamusa. 24Ʉlʉhʉngʉ lwa Ntwa viitu ʉYɨɨsʉ ʉKɨlɨsiti lʉveetsage nʉʉnyie nyɨ vooni. Ameni.#16:24 Inyandʉlʉ itsinge tsa katale tsa Vʉvɨge ʉVʉvalatse natsilɨ nalwo ʉlʉkɨndɨ ʉlʉ.

ɄPaulo ikʉnʼginia ʉNgʉlʉve

25Lɨno, tʉnʼginie ʉNgʉlʉve! Ʉmwene iweesa ʉkʉvavɨɨka ʉnyie muve nʉ lwɨdɨko ʉlʉnaludegandega ʉkʉgendela mu Livangɨli lya Yɨɨsʉ Kɨlɨsiti ɨlyʉ ndyalʉmbɨlɨlaga kwanyie. Katale ikulongwi itso tsyasihamiike. 26Lɨno, tsivɨɨkilwe pavʉvalasu, nʉ kʉgendela mu Vʉvɨge ʉVʉvalatse wa vanyamalago, ikulongwi itso tsimanyikiike kʉ vaanu va sivʉmbʉkʉ syoni mu kɨlʉnga. ɄNgʉlʉve va sikutsooni vɨ alagye ʉwajɨlweli ʉwa vʉtsowe kʉ vaanu, pakʉta avaanu avo vamwɨdɨke ʉNtwa ʉYɨɨsʉ nʉ kʉkonga itsa vʉnogwe wa mwene.

27ɄNgʉlʉve mwene ʉnya lʉhala lwoni, vɨ aginiwaagwe kʉ nongwa jya Yɨɨsʉ Kɨlɨsiti sikutsooni! Ameni.

Currently Selected:

Valooma 16: zga

Highlight

Compare

Copy