Mbombo tsa Vapositili 25

ɄPaulo idoova ɨnongwa jya mwene jɨhɨlɨkwe kʉvʉlongolo kuhɨgwa nʉ Kaisali

1ɄFesito akasika kʉ Kaisaliya mu mpandʉlʉ gwa Yuuda, akatengʉla ʉvʉlongotsi. Wʉ silʉtɨngʼiinie isigono sidatu, akahega pa Kaisaliya, akalʉta kʉ Yelusalemu. 2Wʉ alɨ apo, avavaha va vateeketsi paninie na vanzagɨla avange va Vayahudi vakiitsa kʉ mwene, vakambʉʉla tsyoni itsʉ vaammɨgaga ʉPaulo. Kʉ vʉmalɨlo, vakanʼdoova 3ʉkʉta avatange, ankilivule ʉPaulo kʉ Yelusalemu. Aveene vɨdɨngʼiine ʉkʉta avaanu jʉvanʼgonele nʉ kʉmʼbuda ʉPaulo wʉ alɨ mu nzɨla ʉkʉlʉta kʉ Yelusalemu. 4ɄFesito akavaanda akata, “ɄPaulo itsiga mu vʉloleeli kʉ Kaisaliya, ʉne jʉndikilivuka ʉkʉ mu sigono siisi isi. 5Pwʉ lɨno omoli avavaha viinyo vaninie ndɨlʉte navo ʉkʉ, vakatsove ɨnongwa jiinyo angave ʉPaulo avombile ʉvʉviivi ʉvʉveetsaga.”

6ɄFesito akataama paninie na vaanu valya isigono innaana (8) evo kɨtsigo (10), pwʉ akakilivuka ikange kʉ Kaisaliya. Ɨkɨgono ɨkyakongile pavʉsiku, akataama pa kɨtaamilo kya mwene kya kʉhɨgɨla inongwa. Akalagɨla ʉkʉta viitse nave ʉPaulo pavʉlongolo pa mwene. 7ɄPaulo wʉ asiike apo, aVayahudi avaahʉmile kʉ Yelusalemu vakantsʉngʉtɨla, vakatengʉla ʉkʉmmɨga amaviivi mongosu. Napeene, valemwagwa ʉkʉvonia ʉwajɨlweli wa geene.

8Kʉmbele, ʉPaulo namwene akatengʉla ʉkwanda ɨnongwa akata, “Nandɨnangili itsiveetsaga pa kulongwi jya ndagɨlo tsa Vayahudi evo pa kulongwi jya tembile, evo ʉkʉleka ʉkʉmpʉlɨka ʉKaisali pa kɨveetsaga.”

9ɄFesito aanogilwe ʉkʉvahovosa aVayahudi. Pwʉ akambʉʉtsa ʉPaulo akata, “Ndeeti, vukwɨdɨka ʉkʉbɨha kʉ Yelusalemu, ʉkahɨgwe pavʉlongolo paane ikulongwi tsa nongwa itsi?”

10ɄPaulo akamwanda akata, “Ʉne lɨno ndyɨmile pavʉlongolo pa kɨtaamilo kya kʉhɨgɨla inongwa ɨkɨvɨɨkilwe nʉ Kaisali. Apa pwʉ pannogye ndɨhɨgwe ʉkʉkongana ni ndagɨlo tsa Kɨlooma. Ndʉwʉ ʉve jyʉve ʉlʉmanyile vʉnonu, nakɨkʉli ɨkɨveetsaga ɨkyʉ ndɨnangile kʉ Vayahudi. 11Ɨngave ndɨtulile ɨnongwa ɨjɨveetsaga, ɨjɨlɨ pa kɨgelelo kya kʉmmelela ndɨbudwe, nandibeela ʉkʉta vambude. Lɨno aVayahudi ava vikʉnnyɨga itsa vʉnuasi vʉvʉle. Pwʉ lɨno nakʉli ʉmuunu ʉvɨ alɨ nʉ vʉtavʉlɨlwa wa kʉnnyibata nʉ kʉnnyɨlɨka kʉ veene. Ʉne ndidoova ɨnongwa jyango jɨlʉtage jɨkahɨgwe kwa Kaisali!”#25:11 Ɨnongwa jyango jɨlʉtage jɨkahɨgwe kwa Kaisali Ʉmuunu ʉvaveetsaga ʉNdooma, aatavʉlɨlwagwa ʉkʉhɨlɨka ɨnongwa jya mwene jɨkahɨgɨlɨlwe kʉ Looma, pavʉlongolo pa nkʉlʉdeeva ʉmbaha ʉvaatambʉlwagwa Kaisali.

12Baaho ʉFesito akɨtsosanza na vatangɨli va mwene, pwʉ akamwanda ʉPaulo akata, “Ndʉwʉ ʉdoovile ʉkʉta ɨnongwa jyako jɨkahɨgwe kwa Kaisali, wʉ jivombeka ewo. Jʉwilʉta ʉkahɨgwe kwa Kaisali!”

ɄFesito ikʉmbʉʉla ʉAgilipa ikulongwi tsa Paulo

13Wʉ silʉtɨngʼiinie isigono sidebe, ʉnkʉlʉdeeva ʉAgilipa paninie nʉ mmaatsave ʉBelunike vakiitsa kʉ Kaisaliya, pakʉta vansaamuse ʉFesito. 14Avo vaataamile baaho isigono syongosu. Mu sigono isyo, ʉFesito akampangɨla ʉnkʉlʉdeeva ɨnongwa jya Paulo akata, “Apa pwale ʉmuunu mpamato, ʉPaulo ʉvɨ ʉFeliki akandekile akʉngilwe mu kɨkʉngwa. 15Ʉnsɨkɨ ʉgwʉ ndɨkalʉtile kʉ Yelusalemu, avavaha va vateeketsi na vanzagɨla va Vayahudi, vakambʉʉlile tsyoni itsʉ vikʉmmɨga ʉPaulo. Vakandoovile ndɨmmɨge ndɨte alɨ nʉ vʉnangi.

16“Lɨno ndɨkavaandile ndɨkatye nalwiho lwitu ʉwe twɨ Valooma ʉkʉmmɨga ʉmuunu, wʉ akaanale ʉkwaganila na valya avikʉmmɨga nʉ kwɨtetela itsʉ vikʉmmɨga. 17Pwʉ ndɨkakiliwiike paninie navo apa. Wʉ tʉsiike, nandɨkasuvatse ɨnongwa ɨjyo. Wʉ kʉkie, ndɨkataamile pa kɨtaamilo kyango kya kʉhɨgɨla inongwa, ndɨkalagye viitse nave ʉPaulo pavʉlongolo paane. 18Wʉ asiike, avaanu avikʉmmɨga vakɨɨmile, vakatengwe ʉkʉtsova itsyatulile. Amamenyu ʉgwʉ vakammɨgaga nagakaave maviivi siitso, ndʉwʉ ndɨkahʉʉvɨlaga. 19Apeene valɨkʉkaningʼana nave ikulongwi tsa mpelela gwa veene, nɨ kulongwi jya muunu mpamato ʉvɨ aasue, ɨlitaawa lya mwene vɨ Yɨɨsʉ. ɄPaulo alɨkʉta ʉYɨɨsʉ atsʉʉkile, mwʉmi. 20Pa mamenyu agalɨ ndaaga, nandɨkajɨvone ɨnzɨla jya kwolela vʉnonu ʉwajɨlweli wa geene. Pwʉ ndɨkambʉʉtsiitse ʉPaulo ɨngave ikwɨdɨka ʉkʉlʉta kʉ Yelusalemu, akahɨgwe ʉkʉ ikulongwi itsi. 21Lɨno ʉPaulo akadoovile atsige mu kɨkʉngwa kya Valooma, ʉkʉsika ʉpwʉ ɨnongwa jya mwene jihɨgwa nʉ mwɨmɨkiwa ʉmbaha, ʉKaisali. Pwʉ ndɨkalagye ʉkʉta alolelwagwe mu kɨkʉngwa ʉkʉsikila ʉpwʉ ndikʉjɨvona ɨnzɨla jya kʉmmɨlɨka kwa Kaisali.”

22Pwʉ ʉAgilipa akambʉʉla ʉFesito akata, “Ʉne najyʉne ndinogwa ndɨmpʉlɨhɨtse ʉmuunu ʉjwa.” ɄFesito akamwanda akata, “Jʉvukʉmpʉlɨhɨtsa kɨlaavo.”

ɄPaulo pavʉlongolo pa nkʉlʉdeeva ʉAgilipa

23Wʉ kʉkie, ʉAgilipa paninie nʉ Belunike vakiitsa nʉ lʉtogo siitso. Vakiingila apoonu ʉpwʉ vaalʉndamanaga wʉ vipʉlɨhɨtsa inongwa, vaakongiine paninie nʉ joojolo va vasikali, na vanzagɨla va vʉtsenge ʉwa. Pwʉ ʉFesito akalagɨla ʉkʉta vakantole ʉPaulo viitse nave. 24Wʉ asiike ʉPaulo, ʉFesito akatengʉla ʉkʉtsova akata, “Ʉve vɨ nkʉlʉdeeva Agilipa, nʉʉnyie nyɨ vooni nyɨ tʉlʉndamiine paninie apa, ʉmuunu ʉjʉ ʉvɨ mukʉmbona pavʉlongolo apa, aVayahudi vooni vaakuutile pavʉlongolo paane ɨnongwa ɨjyʉ vikʉmmɨga. Vaakuutile wʉ ndɨlɨ kʉ Yelusalemu ikange nʉ wʉ ndɨkiliwiike apa. Valɨkwoveela valɨkʉta nanogelaniili ʉkʉtsiga mwʉmi. 25Ʉne nandɨtsiweeni imbiivi itsiveetsaga itsʉ avombile itsa kʉmpelela abudwe. Lɨno ʉlwakʉva ʉmwene akandoovile ɨnongwa jya mwene jɨlʉtage jɨkahɨgwe kʉ Looma nʉ mwɨmɨkiwa ʉmbaha, ʉKaisali, pwʉ ndɨkalamwe ʉkʉta vammɨlɨke ʉkʉ. 26Lɨno ʉne ndɨlemilwe ʉkʉkɨvona ɨkya kʉmbɨgɨla ʉnkʉlʉdeeva viitu ʉmbaha pa kulongwi jya muunu ʉjʉ. Ɨkɨ kyʉ mene ndɨlagye iitse pavʉlongolo paanyie, siitso pavʉlongolo paave, nkʉlʉdeeva Agilipa, pakʉta wʉ tʉmalile ʉkʉmbʉʉtsa ndɨve nɨ kɨɨnu kya kʉvɨga kʉ nkʉlʉdeeva ʉmbaha pa kulongwi tsa muunu ʉjʉ 27manya ndivona ʉkʉta nalweli ʉkʉmmɨlɨka ʉnkʉngwa kwa Kaisali kɨtsila kʉmbʉʉla ɨkyʉ ihɨgwa ʉnkʉngwa ʉjʉ.”

Currently Selected:

Mbombo tsa Vapositili 25: zga

Highlight

Copy