HECHOS 10

Pedr no Corneḻy

1Güyuꞌ to mpyquie ciuda ni le Cesarea, le me Corneḻy. Nac me xcapitáṉ to batallóṉ soldad ni le Italian. 2Mpyquie-rieꞌ, gydibyno xmiꞌñ me, ulihbu rzobdiidz me Dioz no rzacbeeiy me lee. No modni rdee me medy-gun par meññ ni riaadz ni rquihñ, no tirgahc rnab me lo Dioz. 3To udzie beeiy las-trez, bwieꞌ me to x‑ángel Dioz güyuꞌ ru dxie me, no ra leeme:

―¡Corneḻy!

4Were bwiedzie Corneḻy leeme, modni gadzie me, ra me ángel:

―¿Bia racladzyiꞌ, Señor?

Were ra ángel leeme:

―Dioz rieññ me lii hor-rnabiꞌ lo me, no gawieꞌ me gyre ni gayacnoy meññ. 5Cshahliꞌ xmósiꞌ, tza yâme Jope, dziycaꞌ yâme Simóṉ, ni ra yâme lee Pedr. 6Leeme nu xiryuꞌ sto Simóṉ, ni rtzoo curtir guiedy, gahsh gá coo nisdoo zob xiryuꞌ me. Leeme ga lii bia ctzooy.

7Scâsy byruu ángel, pshalcaꞌ gahc Corneḻy chohp xmós me no sto xsoldad me ni ulihbu rzoob xtiidz Dioz, 8bieno me diidz leeyâme gyre mod-ra ángel leeme, no luxu pshahl me lee Jope ru nu Pedr.

9Ni byre guiaal‑e naꞌ beeiy glaꞌy dzé, ru ba gadziñgahsh yâme Jope, hor-wé cueꞌ Pedr ihqy yuꞌ guia, zignab me lo Dioz. 10No hor-wé ba galahn me. Lóni gatzoo yâme ni gahgü me, tohzydzi guhc me beeiy ni ganii xcaaḻ, 11bwieꞌ me nxal gybaa no bwieꞌ me ziaht lo mbeꞌ beeiy to mant nliiby gydap squiñu. 12Leññ mant-caḻ ziaad gyre clasy maꞌ ni rahp tahp nieꞌ, no ma-rzîbyleññ no ma-rzîbyshiily. 13No hor-wé bieññ me to riedz, ra leeme:

―Biahsiꞌ, Pedr, biꞌdy no güdahgü.

14Were günii Pedr, ne me:

―Yac, Señor; porni naa nito dgueññ gahguaꞌ mbehty ni ne leiy nehx beeiy gahgü meññ lee porni nehx nyeu.

15Gyzac ra riedz-caḻ leeme:

―Ni ba günii Dioz nye la, di gyniiy nehx nyeu.

16Tzonn vuelt ra riedz-caḻ leeme mod-wé, no luxu güyehpy mant-caḻ gybaa sto. 17No nu ihqy Pedr ni bwieꞌ me guia, ne me: “¿Biahx‑e nacu ni bwien mod-wé?” No hor-wéhb bydzihñ meññ ni pshahl Corneḻy lee ni ganabdiidz bá glo nu Simóṉ. Scâsy bydzihñ yâme ruꞌ yuꞌ, 18günabdiidz yâme bâḻ wé nu sto Simóṉ ni ra yâme lee Pedr. 19Nu ziaꞌ ihqy Pedr ni bwieꞌ me, ra xiSpirt Dioz leeme:

―Gayo tzonn meññ lii. 20Biahtiꞌ. Güya no leeyâme no di yqueꞌladzyiꞌ mbehty, porni naa we pshaalaꞌ leeyâme.

21Were biaht Pedr, günino me meññ-pshahl Corneḻy lee, ra me lee:

―Naa we ni gayo laꞌd. ¿Bia ctzoo laꞌd naa?

22Ra yâme leeme:

―Pshahl to capitáṉ noꞌ ni le Corneḻy, to mpyquie-tziaawy no rzacbeeiy me Dioz; mpyquie-rieꞌ gyre meññ-Isṟael rdee diidz meññ-tziaawy leeme. Güya to x‑ángel Dioz, ra leeme cshalcaꞌ me lii, tzaꞌy xiryuꞌ me par guieññ me ni gahbyiꞌ leeme.

23Luxu bdee Pedr xiryuꞌ me, güyuꞌ yâme. Ni byrer guiaal, were za Pedr no leeyâme no zrieñ meññ-rman ni nu yahc Jope.

24Ni byrohpu dzé bydzihñ yâme Cesarea ru gabiahz Corneḻy leeyâme no xfamily no zrieñ xmígü me ni psieññ me lee. 25Hor-bydzihñ Pedr ruꞌ yuꞌ, byruu Corneḻy bigydzil-lo leeme no bisshiby lo me, bzacbeeiy leeme. 26Were günahzy Pedr ña me no gülesy leeme, ra leeme:

―Biahsiꞌ, di ctzooy mod-wé, porni meññ gahc‑e naa beeiy gahc lii.

27No lóni gayu yâme diidz, güyuꞌ Pedr leññ yuꞌ no bwieꞌ me dxie xtahl meññ ni bydohp uga. 28Ra me leeyâme:

―Laꞌd nann laꞌd dleiy noꞌ neu nehx beeiy tzu meññ-Isṟael lahd meññ-mbiuhz, ni leññ xiryuꞌ nehx beeiy ziuꞌ yâme. Per Dioz ba bluu me naa ndruhty nehx beeiy csacaꞌ lee ma uxiee que naa no nehx beeiy gynin nehx nye mod-rtzoo yâme. 29No leewe, scâsy bydzihñ meññ-bigyne naa, ziaḻ gahcaꞌ sinn nzuulaꞌ diidz. Naꞌ racdadzyaꞌ gannaꞌ bia nacu pshalcaꞌ laꞌd naa.

30Ra Corneḻy leeme:

―Rahp tahp dzé beeiy gahc hôrrieꞌ, lo hor-gatzon ayun no ganabaꞌ lo Dioz leññ diryuꞌn, tohzydzi bydzihñ to mpyquie, nutz me to lar-quitzybo lé rcampytzeꞌu, 31ra me naa: “Corneḻy, Dioz rieññ me lii hor-rnabiꞌ lo me, no gawieꞌ me gyre ni gayacnoy meññ. 32Pshahl diidz lo Simóṉ ni le Pedr ni nu Jope, guiaad me. Leeme nu xiryuꞌ sto Simóṉ ni rtzoo curtir guiedy ni nu gahsh gá coo nisdoo. Ru guiaad me, leeme ga lii bia ctzooy.” 33No leewe ngueeḻy gahc pshalcan lii; no mos ptzooy ziaadiꞌ. No naꞌ Dioz nu me neꞌ tohzy no noꞌ lehdy guieññ noꞌ gyre ni pshahl me lii zidney noꞌ.

Xtiidz Pedr ni günii me li Corneḻy

34Were guzlo ganii Pedr, ne me:

―Naꞌ ba bieññaꞌ ni uli par Dioz tohzy mdid‑e rsahc gyre meññ. 35No rxilyno me meññ-gyre nacióṉ ni rzacbeeiy leeme no rtzoo ni nac xñahzû. 36No nirieꞌ, leegahcu we xtiidz me ni psieññ me meññ-Isṟael lehdy tzu yahc dzie tziaawy por Jesucrist; no Crist‑e rtzoo mdad gyre ni nu lo guiedzylie. 37Laꞌd nann laꞌd gyre ni guhc gydo lo ṟegioṉ-Judea, ni guzlo xtâ ṟegioṉ-Galilea bylux de ni bieno Juaṉ xtiidz Dioz meññ no pchôbnihs me leeyâme. 38No nann laꞌd pshahl Dioz Jesúz ni nac meññ-Nasaret no güluꞌ me Spirt-Sant no zegahc poder xguîlmbahñ, no Jesúz güzeꞌ me gucno me meññ no psiaḻ me meññ ni nu bêndzab lee, porni nu Dioz no leeme. 39Noꞌ bwieꞌ noꞌ gyre ni ptzoo me lo ṟegioṉ-Judea no leññ ciuda-Jerusaléṉ. No meññ-Isṟael ni nu yahc uga biꞌdy yâme leeme, pquee yâme leeme lo cruzy. 40Per Dioz bispahñ leeme lo ni bionn dzé, no Dioz bdee me lsenzy bwieꞌ noꞌ leeme. 41Nehx bwieꞌ gyre meññ leeme, nunzy noꞌ bwieꞌ leeme porni güle Dioz noꞌ ba xtze lehdy guhcu modé. Noꞌ güdahgü noꞌ no güee noꞌ tohzy no leeme dze-bylux gübahñ me de lahd mînguty. 42No pshahl me noꞌ dzigyuno noꞌ meññ xtiidz me no ga noꞌ leeyâme leeme we ni ba güle Dioz lee par ctzoo guîlguxtisy lguia gyre meññ ni mbahñ no gyre meññ ni ba guhty. 43No gyre profet ni güyuꞌ yahc ba xtze günii yâme, ne yâme gyre meññ ni gylíladzy leeme la, ziar xguîlquie.

Meññ-nehx meññ-Isṟael cuaꞌ Spirt-Sant

44Gayuno ziaꞌ Pedr diidz leeyâme, tohzydzi bidtzu Spirt-Sant xguîlmbahñ meññ-gayieññ ni ganii me. 45Gyre meññ-rman ni nac meññ-Isṟael, ni nu señ lady, ni biahd no Pedr, modni ptzunadz yâme hor-bwieꞌ yâme cuaꞌ meññ-nehx meññ-Isṟael Spirt-Sant. 46Gunn yâme niwé, porni guzlo gahc ganii meññ-nehx meññ-Isṟael gydze diidz, no gaguguia yâme Dioz. 47Were ra Pedr meññ-ziyno me lee:

―¿Nehxni nnii mu nehx beeiy nrôbnihs meññ-rieꞌ yahc ni cuaꞌ Spirt-Sant ni ba cuaꞌ nó?

48No ptzoo me mdad byrôbnihs yâme porni ba bylíladzy yâme Jesucrist. No luxu, günab yâme guiaꞌn Pedr no leeyâme doozy dzé.

Currently Selected:

HECHOS 10: zpg

Highlight

Compare

Copy