Rooma 15

Awtaah u iishamaadinne, ꞌdooꞌdi addan kahamaadi

1Maantaka innohi kakhuufnaanki inno Waakh kakhuufno ka miige, ꞌdooꞌdi kakhuufnaanki us Waakh kakhuufo ka ꞌdabakhe igarrahsanni, a mehe wihi icho yeelaan ichoow kakhuufnaanki icho Waakh kakhuufaan ma israahaan. Toro la uus inno awteenna on ishamaadin giꞌde. 2Eteemba ꞌdooꞌd Kiriisto a kahamaadicho, wihi haaggan a iyeelo, ꞌdee rubeyohicho a disno. 3A mehe Kiriisto rubeytiis ma iskahamaadin. Iꞌdaasenyi wihi chiiran, “Okkhoow abaari ꞌdooꞌd kileeabaarramo ani isookute.”#15:3 Sabuur 69:9. 4Wihi dakkhane goorat Chiirnaanneti Waakh goya lakachiire walahe inno abchaane, ꞌdee Chiirnaannetaas ka garrahsi ꞌhella, uur inno miigowa, toro la khajjeel khabna.

5Waakkhi garrahsi lehe enenyet uur miigoocho ba, dabat Yeesso Kiriistoki atin raahtaan ka maloo kalday atin siicha, 6ꞌdee atin tuumman hooyoo kalday ka Waakkhi Yeesso Kiriistohi Kamureene Waakkhiisenye toro la Aabbahiise saaꞌddaan.

ꞌDooꞌdi yaafohi Yaꞌhuud ieheynan laka Waakh saaꞌda

7Taba giꞌde, saggi Kiriisto atin ikhaattuu, saggaas isikhaadda, ꞌdee enenyet Waakh a saaꞌdo. 8A mehe wihi an atin icheeko, Kiriisto falfati yaafohi Yaꞌhuude khandiiti iche yitah. Falfatichoti us yitah ka la, saggi Waakh liikakhuufo us ayyinti us aacchinyeteenti oraat igooche irummaache iche tusa. 9Kiriisto la a yimiyye ꞌdee yaafohi Yaꞌhuud ieheynan Waakh saaꞌdaan jeenteti us enenyet uur ikasoonugleestuu. Iꞌdi liichiiruu,

“Maantaka an ꞌdooꞌdi yaafohi Yaꞌhuud ieheynan goyaka a kikoolicha,

geeyo ka magahaah a saaꞌda.”#15:9 Sabuur 18:49.

10Toro la mehe tadeeh ya,

“Taba giꞌde, atinhi yaafohi Yaꞌhuud ieheynan ꞌdooꞌdaas Waakh ikhaya hamaada.”#15:10 Deewutoronomi 32:43.

11Toro la,

“Atinhi yaafohi Yaꞌhuud ieheynan tuumman taba, Kamur koolicha.

Weeli enenyet tuumman Waakh a saaꞌdo.”#15:11 Sabuur 117:1.

12Toro la, wihi Isaaya yidahye Kiriisto miinsan kallaayo,

“Eti hiiy Yeessee a yamiite,

ulla ꞌdooꞌdi yaafohi Yaꞌhuud ieheynane dakhta.

Icho la usu khajjeel kakhabaan.”#15:12 Isaaya 11:10.

13Waakkhi khajjeel leh ba, kakhuufnaanki atin usu kakhuuftaan ka, hamaad tuumman ichoow nebey ba atin kahida, ꞌdee miigti Rubeyti Munyee atin siisso ka, khajjeeliin weyti buuraata.

Baawulo ꞌdooꞌdi ilassi addan Wori Haaggan eleelicha

14ꞌDooꞌd Kiriistokaaw, ani rubeyteey saggi wihi hahhaaggan atin ibuuhaane, wihi ꞌdooꞌd Kiriisto miinsan tuum igarattaane toro la iswaanin itabuuꞌdiin a tissiba. 15Iꞌdaasenyi jeenteti haaggi Waakhe buurenye liisiichuu, roorro laan a atin isoochiire ꞌdee wahanyeyyohoo atin kasooꞌhelcha. 16Iꞌdi tahe an a falfa Yeesso Kiriisto, ꞌdooꞌdi yaafohi Yaꞌhuud ieheynane liisooerge. An hili kuhaani haaggicha, Wori Haaggane Waakh iche cheeka, ꞌdee ꞌdooꞌda iꞌdi soorriyoti Waakh kahamaado Rubeyti Munyee munyaasse yateeh.

17Maantaka, jeenteti ani ichoow Yeesso Kiriisto ba wohoo kalday inahuu, hili an Waakh ihaaggicho ka a geeddi an eylajo. 18Wihi Kiriisto ikahaagsate on menye, walah addane an kaayyeedo mele. Iꞌda ka yeedeey ichoow jiroteey ka ꞌdooꞌdi yaafohi Yaꞌhuud ieheynan a woya ayti Waakh raahaan. 19Ulla miigti Rubeyti Munyee ka wahanyeyyohi miigti Waakh tuso ichoow wihi weeli enenyet yeelin iubaaꞌdan ba yeele, icho Waakh iwoye. Iꞌdaas ka la ani Wori Haaggane Kiriisto miinsan tuume cheeke. Ilkerengeetti weene Yeerusaleeme kasookhabde ichoowka ili Iliriiko eleeliche. 20Wihi kol dakkhan uur iꞌdoono a mehe ya, a anihi Wori Haaggan inti magah Kiriisto injire liikadaagin ka cheeko. Iꞌda ka daddaabohi ilaate etoo addan dise sarche ma kadisdi. 21Mele, iꞌdi liichiiruu,

“ꞌDooꞌdi injire farniinkiis liikacheekin usu a arga,

ki injire woriis idaagin la a abta.”#15:21 Isaaya 52:15.

22Jeenteti an meelassaas Wori Haaggan ikacheekuu, wahaase kolassi ittaawe saggi an atin isooꞌdaaro itirte.

Baawulo ꞌdooꞌdi Waakhe ilkerengeetti weene Rooma kijiro ꞌdaarin ꞌdoona

23Iꞌdaasenyi toolla an hileey meelassaas ka massiche la, geeddi deere atin sooargin ꞌdoone gone, 24mali an khabo a mehe ya, maanti an ili Isbaaniya isohdi a atin sooꞌdaara. Khajjeeli an khabo a ki an atin leeamiite, ꞌdee atin luhlo iyeessaan. Waha la a inkoo an geeddoo atin leebarye, inno isleehamaane. 25Iꞌdaasenyi toolla rubeyche ilkerengeetti weene Yeerusaleeme isohda, ꞌdooꞌdi Waakhe ilaas kajiro wihi lasoobaayiche igeechaa. 26Iꞌdi tahe urur Kiriistoki boroofenhi Makedooniya ichoow ki Akhaaya ba, baaysihi icho ꞌdooꞌdi Waakhe miskiinenye ilkerengeetti weene Yeerusaleem kagargaaraan a soobaayicheen. 27Icho hamaad on ka baaysihaas diibeen. Icho rumanka moge khabeen. Iꞌdi tahe ꞌdooꞌdi Yaꞌhuud buuhaas Rubeyti Munyee kayamiit a ꞌhele, toro la ꞌdooꞌdi yaafohi Yaꞌhuud ieheynan a leegismaan. Jeentetaas u a imasse chiꞌ ꞌdooꞌdi yaafohi Yaꞌhuud ieheynan buuhi wahanyeyyohi harratane icho khabaan ꞌdooꞌdi Yaꞌhuud leegismaan. 28Chaꞌan ꞌdee hila massiche, saggi chilimmeti ꞌdooꞌd soobaayiche tuumman ꞌdooꞌd liigise arge la, ili Isbaaniya miinsada, ꞌdee maantaas la a atin leeamiit. 29ꞌDee maantaas an goytiin imiy la, wihi an tissibo buuh Kiriisto tuume atin ileeamiit.

30Toollaka ꞌdooꞌd Kiriistokaaw, Yeesso Kiriistohi Kamureene ka ichoow ꞌdooninti Rubeyti Munyee atin siisso ka a atin hawwaasda, Waakh isoowaha diho ileesoogela. 31Waakh isoowaha ꞌdee dahanohi ꞌdooꞌdi ili Yaꞌhuudiya kijiro Yeesso Kiriisto rummeysan ꞌdiiꞌddan a liibuucho. Toro la Waakh isoowaha ꞌdee ꞌdooꞌdi Waakhe ilkerengeetti weene Yeerusaleem hila an icho chilimme igeecho uus ꞌdiiꞌdine, 32ꞌdee chiꞌiche ꞌdooninti Waakh tahe anihi hamaad khabo goytiin a imaate, goytiin a kanaso, a isleehamaano. 33Waakkhi nebey tuumman leh ba atin tuumman atin leejira. Aamiin.

Currently Selected:

Rooma 15: rel

Highlight

Copy