Rooma 12

Saggi jiroti Waakh kahamaado liijiro

1Maantaka ꞌdooꞌd Kiriistokaaw, jeenteti uurnugleeli Waakh u, a atin hawwaasda, taba sartiin Waakh ibahcha, iꞌdi soorriyoti jirto toro la munyee u. Soorriyotaas la a ti Waakh kahamaadisso. Waha la a saggi imasse atin Waakh iwahattaan. 2Taba giꞌde, jiroti ꞌdooꞌdi wahanyeyyohi harratane sussuuje raaho ajirina. Rubeyti Waakh mali atin malattaan tuum a husubnaasso. Iꞌdaas ka wihi Waakh atin igooche a fiirissaane toro khaatattaan. Waha la a wihi haaggan ichoow wihi Waakh kahamaado toro la a tuum.

3A mehe haaggi Waakhe buurenye liisiiche ka, an etiimba waansihane siicha. Taba etiimba uus weyti serey isgeen iꞌdoo us khummanyahuu. Iꞌdaasenyi ebba mujjum a isfiiricho geeddi kakhuufnaanki Waakh usu siiche ka. 4Saggi sarteen miilassi ittaawe ikhabto, miil ba la hiliis yeer iyahuu, 5saggaas on u innohi ittaawe laka, jeenteti inno ichoow Kiriisto ba wohoo kalday inahuu, a iꞌdi sartoo kaldaye miilassi ittaawenye iskaattoollo khabto.

6Waakh haaggiiski buure ka, eteemba siimohi yeerenye siiche. Maantaka, chirri siinti Waakh kisiiche ti Waakh liiyeyyeedo tahe, taba giꞌde, ebba kakhuufnaanki Waakh siiche ka, Waakh mujjum a iyeyyeedo giꞌde. 7Chirri siinti Waakh kisiiche ti enenyet liihilo tahe, enenyet ihil giꞌde. Chirri siintaah ti enenyet walah laabcho tahe, enenyet mujjum wihi rummaat abi giꞌde. 8Chirri siintaah ti enenyet uur lamiigoocho tahe, tab enenyet uur miigooy. Chirri siintaah ti enenyet walah lasiicho tahe, tab uuri haaggan ka enenyet walah sii. Chirri siintaah ti enenyet lawoyo tahe, tab enenyet mujjum woy. Chirri siintaah ti enenyet uur liinugleesti tahe, tab hamaad ka enenyet uur inugleyso.

9ꞌDooninti atin enenyet ikhabtaan ti rummaat a eheetti. Wihi suuje tuumman ꞌdiiꞌda, haag on jurkhicha. 10Iꞌdi ꞌdooꞌdi uuroo kaldaye u, isꞌdoona, ꞌdooꞌdi addan kol tuumman ꞌdirihiin inkaanyita. 11Hiliin ka ꞌdooꞌdi seyꞌhooti iitaahana. Rubeyohiin ka hili Kamur tuum gela.

12Jeenteti atin khajjeel ikhabtaan u, hamaada. Sinati atin loomhicho ka garrahsada, kol dakkhan la Waakh wahda. 13Wihi atin khabtaan ꞌdooꞌdi Waakhe gargaar ꞌdoono leegisma, toro la artohiin faha, marti urmohiin a soogesso.

14Eti sina atin omhicho afalina iweesda on. 15ꞌDooꞌdi hamaado leehamaada, ki ooyo la leeooya. 16Maloo kalday khaba. Eeylajina, ꞌdooꞌdi miskiine fiddihi haaggan ikhaba. Weyti serey iisgeenna.

17Etoo kalday laka suujoon suujoon akagutanna. Wihi enenyet tuumman ortiis ka haaggan on yeela. 18Chiꞌiche tateeh, geeddi atin tabuuꞌdiin tuumman, hol dowa, ꞌdooꞌdi addan nebey kaleefiddiya. 19Aalassaay koloo kalday laka aál agutanna, holi Waakhe buure aassiin a gutti. A mehe wihi chiiran, “Aale a taaya, ani baha,” iche Kamur essa.#12:19 Deewutoronomi 32:35. 20Atinhi iꞌdaas yeessaan ka atinhi iꞌda yeessaane deefta,

“Chirri chiiytankaah raarah khabo, golol sii.

Chirri us sugub khabo, sugub bihi.

Iꞌda ka jilahti lakhaanyo matahenyeticho kichibta.”#12:20 Mammaho 25:21-22.

21Taba giꞌde, suujoon uus atin kahataatine, haag yeela, ꞌdee suujoon sooricha.

Currently Selected:

Rooma 12: rel

Highlight

Copy