Rooma 10
10
ꞌDooꞌdi Issiraayele Waakh ikakhuufin
1ꞌDooꞌd Kiriistokaaw, wihi uur weyti iꞌdoono toro la an Waakh daaho, a ꞌdooꞌdi Issiraayele laribo. 2Ani rubeyteey saggi icho rumanka weyti Waakh ikafalin iꞌdoonaan a cheeka. Iꞌdaasenyi raahnaanki icho Waakh raahin ꞌdoonaan ka, jiti runti Waakh lakaabti ma raahaan. 3Icho jiti Waakh enenyet ꞌdooꞌdi fiffissan iekkaacho ma aban. Icho awtichooda on u jiti icho ꞌdooꞌdi fiffissan iskayeelaan yowtaan. Icho jiti Waakh enenyet ꞌdooꞌdi fiffissan iekkaacho raahin a ꞌdiiꞌdeen. 4Kiriisto jiti amurre Muusa laraaho ꞌdee enenyet ꞌdooꞌdi fiffissan lakayeelo a massiche, ꞌdee eti tuummane Kiriisto rummeeste, Waakh eti fissan iekkaacha.
Ribnaanki Waakh enenyet ribo, a ki ꞌdooꞌdi yaafo tuumman
5Wihi Muusa yidahye jita amurreta laraaho ꞌdee enenyet ꞌdooꞌdi fiffissan liiekkaacho miinsan a waha, “Eti tuummane wihi amurre cheekto tuum raaho, amurretaas us raaho ka, jiro ꞌhela.”#10:5 Laawi 18:5. 6Iꞌdaasenyi jiti Waakh lakakhuufo toro la Waakh enenyet eti fissan iekkaacho ka, “Uur ka iꞌda ma leessi, ‘Ayyo serey irta ichoowka goobi Waakh goya gela?’ ” ꞌDee iꞌdaakka Kiriisto iche harrata lakeena. 7Toro la, “Iꞌda ma leessi, ‘Ayyo ankhari dahane ieleelin iyaga?’ ” ꞌDee iꞌdaakka Kiriisto iche omoot kasookahcha. 8Kamalda bal, Chiirnaanneti Waakh mehe tadeeh? “Farniinki Waakh weyti atin idowyahe, furuurohiinna fuula, uurassiin goya la kajira.” Wahaas la a farniinki kakhuufnaanki Waakh lakakhuufo miinsane, nah enenyet icheekno.#10:8 Deewutoronomi 30:14. 9Farniinka la a mehe ya, chirri at afaah ka, “Yeesso usu Kamure,” cheekto, uuraah ka la saggi Waakh Yeesso omoot ka isookahche rummeysatte, Waakh a kiriba.
10Iꞌdi tahe uuraahha Yeesso karummeysatta, wahaas la mehe delaan ya, Waakkhi eti fissan kiekkaacho. Toro la chaꞌat ꞌdow ka saggi at Yeesso rummeysatti cheekto, waha mehe delaan ya, Waakkhi kiribo. 11Iꞌdi Chiirnaanneti Waakh lakachiiruu, “Eti tuummane usu kakhuufo, lakhaanyo ma lakadowo.”#10:11 Isaaya 28:16. 12Waha mehe tusaan ya, eti Yaꞌhuude ichoow eti Yaꞌhuud ieheynan seley ma gaan. Kamur a Kamuri enenyet tuummane, ulla eti tuummane usu wahe, weyti imaala. 13A mehe iꞌdi Chiirnaanneti Waakh liikachiiruu “Eti tuummane magahi Kamur waho, Waakh a riba.”#10:13 Yoowel 2:32.
14Iꞌdaasenyi, saggoh Kamuri icho irummeysan iwahaan? Toro la chirri icho woriis idaagin, saggoh Kamura irummeestaan? Toro la saggoh wora idaagaan chirri etoo wora ikacheekin? 15ꞌDooꞌdi wora cheeko la saggoh woraas ꞌdooꞌd ieleelicha chirri liiergin? Iꞌdi liichiiruu, “Luhti Wori Haaggan keento, weyti lagantahe!”#10:15 Isaaya 52:7.
16Iꞌdaasenyi ꞌdooꞌd tuumman mee Wori Haaggan raahe. Iꞌdi Isaaya rubeytiis chiiruu,
“Kamur, ayyo woreenyo rummeeste?”#10:16 Isaaya 53:1.
17Maantaka kakhuufnaanki Waakh lakakhuufo Wora Haaggane ladaago kayamiit. Wora Haaggan la chirri wori Kiriisto miinsan lacheeko iche ladaaga.
18Iꞌdaasenyi wihi an worsadi a mehe ya, ꞌdooꞌdi Issiraayel wora ma daagin a? Aa! Rumanka a daageen. Iꞌdi Chiirnaanneti Waakh liikachiiruu,
“Hooyassicho harra tuumman a kataaꞌheene,
yeedi icho yeyyeedeen harra ginꞌdohiche tuumman a eleele.”#10:18 Sabuur 19:4.
19Toro la wihi an worsadi, ꞌdooꞌdi Issiraayel wora ma aban a? Aa! A abteen. Kolooraat Muusa wihi us soolaabe yaafohi Issiraayel miinsan a mehe ya,
“An inaafi atin ꞌdooꞌdoo yaafti rummaat laka ieheynan kiinaaftaan
iche goytiin gessa,
yaafti ꞌdalammee ka a atin holloocha.”#10:19 Deewutoronomi 32:21.
20Yomboka Yeedi Waakhe Isaaya roorro laan cheeke kalla,
“ꞌDooꞌdi ani iꞌhele a ki ꞌhor ani iyowan.
ꞌDooꞌdi an istuse la, a ki ꞌhor ani iwahin.”#10:20 Isaaya 65:1.
21Iꞌdaasenyi wihi ꞌdooꞌdi Issiraayel miinsane Waakh yidah a waha,
“An maalinki noole goya ween ꞌdooꞌdi yeedeey iraahine,
ani itirrimo iche dahanoheey iooge.”#10:21 Isaaya 65:2.
Currently Selected:
Rooma 10: rel
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
