2 Kọrint 11

ẠPol nꞌiben iteledōm obho

1Ịmoghonyan ạami, sesen ni, ạkar esiibha bho ạami natu mọḍeghe ạraḍeghe araama bho. 2Ạami ạteeny mobōbhan mi tenyina kẹzo bho Ẹnaan ạteeny obho, ebum obho enyina idi kooḅi ọkpur ọnyani olo ạneghe ni ạman, olo ạami utuḅenaan mọkala maKraist komoom olom olo odi ạteeny. 3Ạami nạatu magey molo enyina ịgbaranuan ẹḍua tetulan nꞌịitua bhꞌenyina mi taKraist kẹzo bho ooḍigh obho abhin aapeleghia ạdegh mIiv, odi ameel obho. 4Ebum obho enyina ikẹm lẹpuuny nepinom kōoy kōoy olo aru nạgba ạnogho enyina mọnon ạJizos olo akōrōnuan mobho ezōor ụgba ụnogho enyina bho, nepinom nạ mẹmugh nꞌadōm olo oozuan io noozuan mẹmugh obho nꞌadōm obho enyina ibhin tezōor obho.

5Ạami nạatua, ạami usōoriōm io apu mạkar ibꞌiteledōm ibhꞌenyina. 6Eru nạ kạar olo ạami ụmaar io mọnuekpete, olōghōm ạar ạmi idi. Ezōor nọogba ghạ miibha bho mi toomo oḍigh kẹrekere araabōom mi toomo kạar kạar ọnogho zenyina.

7Ạami umuul io enyina bọbon onyiin ạar men obho ạami ụgba mọnuekpete ooḅi adōm obho tẸnaan ụnogho enyina bho. Ạami usōoriōm lōor ạmi mọbughe enyina. Iibha bho ạami uḍighi mịkarabh gạ? 8Amen obho ạami ụrolan enyina uḍighian enyina moḍighi obho, ịnon ạrasosi kịkpe ghạ zạmi mikpoki oḍighi ạmi. Idi kolo ạami umiigh eedi mọloghom ạvo ọnogho enyina. 9Men obho ạami odi nꞌenyina bho, ạami ụnogho ḍio enyina mịiḅaghami ọlogh ạvo ọnogho ạmi tamen olo okpoki olo nolo tạvo ạmi, ebum obho aburumōr ibha aMasidonia ibhin iruom ạami kạar kạar ilo ạami nạva mọrolom. Ẹzo bho ịrol tamen olo naatẹn obho pẹzo tẹtol nạ taghisigh. Bọbon amen olo ạami tạnogho enyina mịiḅaghami olo. 10Tọgba agey taKraist ibha idi tạmi obho, iituma bhibha tạmi iḍigh io meḍum kesi kesi mi toomo ebhugh obhꞌaGris. 11Ebum eeghe kạami nạḍeghe miibha bho? Ebum obho ạami utulan io enyina gạ? Ẹnaan be kalōghōm erumolo ạami utulan io enyina.

12Ạami taḍighi ghạ ni be ạki taghisigh siibha bho molo “iteledōm” ipedi obho ịteeny mọnu ootuma oghōl meedi nꞌezōor uḍighi monyiin oḍighi obho. 13Arōoy ilo idi kua iben iteledōm. Oḍighi eedi oobiōghōm arōoy be, ooghirina ọrol kiteledōm taKraist. 14Ẹzo bho, aSetan ẹkona naaghirina ghạ nị ạtol konyiin oteledōm ẹḅaal obho. 15Molo, ibꞌạar io erumolo ạrubana odi iighirina ịrol kạrubana ilo ịneghe ni ịman taghisigh tẸnaan. Ikunughi obho eedi tepin tạvo tẸnaan mạmukpe oḍigh oḍighi obho eedi neḍighi obho.

Ọmiinom tạPol tebum obho odi aru monyiin oteledōm obho

16Ạami digha ạḍeghe nạ monyiin ẹzo bho, ịítua ghạ mobho ạami uru meema. Kenyina ẹetua nạ kua ẹkona, pipinom ạami keema molo ạami ạteeny ạni mạar obhin ootumuom. 17Ibha ạami nạḍeghe siibha bho ạami nạḍeghe rạḍeghe eema, ịḍua ḍio tịto tObạmọogh obho keru. Ạkar ạraḍeghe iituma bhobho ạami nạḍeghe araama. 18Ku neeḍigh iru molo ọlogh arōoy neebhin neetumuom mịitua ịlelemu arōoy obho, ạami ẹkona taatuma ạni ni. 19Enyina nịvo nịvo ilōghōm mạar arōoy, molo enyina nẹḅaal ghạ ni mologhi eḅaam rạḍeghe araama. 20Enyina neḅaam ghạ nị ẹnogho mobo bho neeghirimi enyina kạrubana bho, bolobolo eliom enyina bho, ẹdeghogh enyina mẹzo olo ologhi eedi aḍigh, eenon enyina ekiemi, eḅōrōgh nạ masumusigh enyina bho. 21Ạami nạkpete mọlokia ạregheer, ezōor ụroogh nị opu moḍighi ipa bho.

Keḍio kōoy kōoy olo ane ạkpaton mọnu mootuma, — ạami nạḍeghe mạraḍeghe eema — ạami ẹkona tane nạ nị aatuma. 22Eedi arōoy aHibru bẹle? Ạami sẹzo bho nạ. Eedi ilꞌIzirẹl? Ạami ẹkona. Eedi ạnwuny ọobhe tEbrạhạm? Ạami ẹzo bho nạ. 23Eedi ạrubana taKraist? Ạami nạḍeghe kōoy olo nakpo mizim ẹede ọnon, ạami ukumuan apu eedi. Ạami uḍiku nạ mikoli apu eedi, ilo nọogurogh nạ zạmi ipu zeedi, keḍio ọlogh amen olo ạami naatuan mọbho, oomo eedi olo naarubh lẹke motuan olo. 24Neegbẹbh ōogh amen mobho arōoy aJu obho nẹegurogh ạami monyiin olo merubal ạligur ạvo. 25Ịraar amen mobho nọoguroghom ạami mọga, otōḅōl ạami men. Sịraar amen mobho ạami nạagbana togbo ọbhiiny ạbadi molo onyiin amen ạami ụrol tạmuum ạmuum moomo uḍugul nꞌootaany. 26Tararele bhꞌạmi, ụgba ḍio men mobho ạami ụrol teesoḍia aḍuugh nꞌọbho mi tạribhiiny, nꞌạravo ạruḅa nạ, nꞌạravo ạkar arōoy ạmi nạ, nꞌạravo arōoy ịnon aruubhugh obho nꞌạravo iben aburumōr ạmi tibꞌạraama bho nꞌibꞌeekpu aruuḍum obho, tibꞌạribhiiny. 27Ụgba ḍio men olo ạami ukumuan uḍighi moḍighi molo ạami ukoḍi ḍio rạla muḍugul, ụrol nạ mọkoony eḍian nꞌạmuum. Oto amen, bọbon eḍian ole ilo, esi oḍigh obhooghia olo, ukpe okuugha ẹkona olo. 28Tẹzo olo osōbh okpẹrẹmi, oomo aḍuma mobho ịitua ạmi nẹvimoghom ghạ zạmi tilo igboloman nꞌoomo ạrasosi obho. 29Okōr ōoy adugh tomōruōm odi molo ạmi udugh ạni ḍio? Okōr ōoy ameel aḍigh tesi ịkarabh molo ạami ụsuanaan io ghụsan?

30Ạami taatuma nạ ekona, ạami taatuma tọkpo bho ịgba neḍeeriom ạami mobho ạami ịnyaam ilo nolo bho. 31Ẹnaan tạJizos Obạmọogh obho obho aru nạ mỌde odi obho, obho ạlisebh tẹtol ni ẹnogho kamen kamen obho, naalōghōm mobho ạami ụgba ḍio miben. 32Onyiin amen mi tạDamaskos, uvẹmụ ōoy ẹma bho, obho odi tẹeḍiani tẠretas ọolema bho, arōm rōoy mọmara tọnu otu ẹma bho moḅol ạmi. 33Keḍio ụlogh ạami tọkpaagh usōorẹ tẹḅagh-otu ẹma bho molo ạami umuzōnaan tạravo odi.

Currently Selected:

2 Kọrint 11: OḌU

Highlight

Copy