Mateo 2
2
Ní leli je beleku kɛ ba
1Benɛ a fɔ Yesu ngɛ Betlehem nɛ ngɛ Yudea, ngɛ Matsɛ Herode yi nɔ ɔ, ní leli komɛ je beleku kɛ ba Yerusalem ba bi ke, 2“Bimwɔyo ɔ nɛ a fɔ nɛ e ba ye Yuda bi ɔmɛ a nɔ matsɛ ɔ, jije e ngɛ? Wa na e dodoe ngɛ beleku, nɛ wa ba, konɛ wa ba ja lɛ.”
3Benɛ Matsɛ Herode nu nɔ́ nɛ ɔ, e hao, nɛ nihi tsuo nɛ ngɛ Yerusalem hu hao ja nɔuu. 4E tsɛ osɔfo nikɔtɔma amɛ, kɛ mlaa tsɔɔli tsuo nɛ ngɛ ma a mi ɔ kpe, nɛ e bi mɛ ke, “Jije a ma fɔ Kristo ɔ ngɛ?”
5A he nɔ ke, “Ngɛ Betlehem nɛ ngɛ Yudea a. Ejakaa bɔ nɛ gbalɔ ɔ ngma ji nɛ ɔ nɛ:
6 #
Mika 5.2
‘Mo Betlehem ma, ngɛ Yuda zugba a nɔ ɔ,
mo ji ma nyafii pe kulaa
ngɛ Yuda ma amɛ a kpɛti;
se o mi lɛ matsɛ maa je
kɛ ba ye ye ma Israel ɔ nɔ.’ ”
7Kɛkɛ nɛ Herode tsɛ ní leli ɔmɛ zaa, nɛ e bi mɛ fitsofitso be mi nɛ dodoe ɔ je. 8Lɔ ɔ se ɔ, e wo mɛ blɔ kɛ ho Betlehem ya kɛ sɛ gbi ke, “Nyɛɛ ya nɛ nyɛ ya hla bimwɔyo ɔ fitsofitso. Ke nyɛ na lɛ ɔ, nyɛ ba de mi, konɛ imi hu ma ya nɛ ma ya ja lɛ.”
9Benɛ a nu matsɛ ɔ sɛ gbi ɔ, a pue nɔ kɛ ho. Nɛ ɛ dodoe ɔ nɛ a na ngɛ beleku ɔ nyɛɛ a hɛ mi hluu kɛ ya si dodoe ɔ ya da he nɛ bimwɔyo ɔ ngɛ ɔ yi mi. 10Benɛ a na dodoe ɔ, a na bua jɔmi wawɛɛ nitsɛ. 11A sɛ we ɔ mi, nɛ benɛ a na bimwɔyo ɔ, kɛ e nyɛ Maria a, a kpla si nɛ a ja bimwɔyo ɔ. A pɛne a kotoku ɔmɛ a nya, nɛ a ke lɛ ní: sika tsu, mimɛ, kɛ mire.
12Akɛnɛ Mawu je tsɔɔ mɛ ngɛ nlami mi ke a ko kpale a se kɛ ya Herode ngɔ hu he je ɔ, a gu blɔ kpa kɛ ho a ma mi ya.
A kɛ bimwɔyo ɔ tu fo kɛ ya Egipt
13Benɛ ní leli ɔmɛ je ɔ, Nyɔmtsɛ ɔ bɔfo ko je e he kpo tsɔɔ Yosef ngɛ nlami mi, nɛ e de lɛ ke, “Herode ma ba hla bimwɔyo ɔ nɛ e gbe lɛ. Lɔ ɔ he ɔ, tee si! Ngɔɔ bimwɔyo ɔ, kɛ e nyɛ ɔ, nɛ o kɛ mɛ nɛ tu fo kɛ ya Egipt. Nyɛ ya hi lejɛ ɔ kɛ yaa si be nɛ ma to mo.”
14Yosef te si, nɛ e ngɔ bimwɔyo ɔ, kɛ e nyɛ ɔ, nɛ a pue nɔ nyɔ mi kɛ ho Egipt ya 15#Hos 11.1 ya hi lejɛ ɔ kɛ ya su be nɛ Herode gbo. A pee nɔ́ nɛ ɔ, konɛ nɔ́ nɛ Nyɔmtsɛ ɔ de kɛ gu gbalɔ ɔ nɔ ɔ nɛ ba mi ke, “Egipt nɛ i tsɛ ye bi ɔ kɛ je.”
A gbe Betlehem jokuɛwi
16Benɛ Herode na kaa ní leli ɔmɛ sisi lɛ ɔ, e mi mi fu wawɛɛ. E tsɔ nɛ a ya gbe jokuɛ nyumuwi tsuo nɛ ngɛ Betlehem, kɛ lejɛ ɔ ní ɔmɛ a mi; a gbe kɛ je muɔloku nɔ kɛ ya si ni nɛmɛ nɛ ye jeha enyɔɔnyɔ a nɔ. Herode kale kɛ je be nɛ ní leli ɔmɛ tsɔɔ kaa dodoe ɔ je ɔ, nɛ e kɛ tsu nɔ́ nɛ ɔ.
17Nɛ nɔ́ nɛ gbalɔ Yeremia de ɔ ba mi ke,
18 #
Yer 31.15
“A nu gbi ko ngɛ Rama,
kɔmɔ yemi kɛ ya boboobo.
Rahel ngɛ e bimɛ ɔmɛ foe,
nɛ e kplɛɛ we kpatami,
ejakaa e bimɛ ɔmɛ gbo.”
A kpale kɛ je Egipt kɛ ba Galilea
19Herode gbenɔ se ɔ, Nyɔmtsɛ ɔ bɔfo ko je e he kpo tsɔɔ Yosef ngɛ nlami mi ngɛ Egipt, 20nɛ e de lɛ ke, “Tee si! Ngɔɔ bimwɔyo ɔ, kɛ e nyɛ ɔ, nɛ o kpale o se kɛ ya Israel zugba a nɔ. Ejakaa nihi nɛ hla kaa a gbe bimwɔyo ɔ, a gbo.” 21Kɛkɛ nɛ Yosef te si, nɛ e ngɔ bimwɔyo ɔ, kɛ e nyɛ ɔ, nɛ a kpale kɛ ho Israel zugba a nɔ ya.
22Se benɛ Yosef nu kaa Arkelao ngɛ matsɛ yee ngɛ e tsɛ Herode se ngɛ Yudea a, e ye gbeye kaa e maa ya lejɛ ɔ. A kɛ lɛ tu munyu ngɛ nlami mi, nɛ enɛ ɔ ha nɛ e je kɛ ho Galilea kpokpa a nɔ ya, 23#Mar 1.24; Luk 2.39; Yoh 1.45 nɛ e ya hi ma ko nɛ a tsɛɛ Nazaret ɔ. Nɛ nɔ́ nɛ gbali ɔmɛ de to ɔ ba mi ke, “A ma tsɛ lɛ Nazaret no.”
Currently Selected:
Mateo 2: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.
