Ŋaha 2
2
Yɛm anfaani
1M bia, a yi deei n yɛligu, ka doli n zaligunim’ din be a suhu ni, 2ka gbilisiri tibili viɛnyɛliŋga n-wumdi yɛm yɛtɔɣa, ka zaŋ a suhu niŋ baŋsim yɛtɔɣa ni, 3a yi shiri bo yɛm, ka moog’ a nini bahi tɛhi’ zilima zuɣu, 4a yi bo li kaman anzinfa la, ka bo li ni nimmoo kaman azichi shɛli din sɔɣi la, 5dindina a ni baŋ Yawɛ zɔbu ni nyɛ shɛm, ka nya baŋsim din nyɛ Naawuni dini. 6Dama Yawɛ n-tiri yɛm. O noli ni ka baŋsim mini yɛla baŋbu yirina. 7O zaŋ yɛm din nyɛ yɛlimaŋli yɛm zali wuntizɔriba, ka leei nyɔtaɣirigu gu ninvuɣ’ shɛb’ bɛn ka galimi. 8O guli ninvuɣ’ shɛb’ bɛn doli zaligu soli, ka taɣiri ninvuɣ’ shɛb’ bɛn ʒe o yim barina ni.
9Di saha yi ni baŋ wuntitali mini zaligu soli ni biɛrisuntali ni so’ viɛlli kam. 10Dama yɛm ni ka a suhu ni na, ka baŋsim niŋ a nyaɣisim. 11Yɛm ni ti gul’ a, ka yɛla baŋbu gba taɣ’ a. 12Di ni tilig’ a zaɣ’ biɛɣu ni, ka tilig’ a ninvuɣ’ shɛb’ bɛn tɔɣisiri yɛtɔɣ’ biɛri nuu ni, 13ka tilig’ a ninvuɣ’ shɛb’ bɛn zaɣisi wuntitali soya dolibu ka dolila zibisim soya la, 14bɛn mali suhupiɛlli zaɣ’ biɛɣu tumbu ni ka lan mali suhupiɛlli yɛtɔɣ’ biɛri tɔɣisibu ni la nuu ni. 15Di ni lan tilig’ a ninvuɣ’ shɛb’ bɛn soya golim ka bɛ biɛhigu bi tuhi nuu ni.
16A ni tiligi pagɔrili ŋun nyɛ zinalana naŋgbammalisim ni, 17ŋun daa chɛ o yidaan’ tuuli, ka tam o ni daa lo Naawuni alikauli shɛli yɛla la. 18Dama o soli nyɛla din kuni kum shee, ka o soya kuni kpiimba biɛhigu shee. 19Bɛnkam chaŋ o sani bi lan labina bee n-lan nya nyɛvili soli. 20Dinzuɣu doli ninvuɣ’ suma soli, ka doli wuntizɔriba soli. 21Dama ninvuɣ’ suma n-nyɛ bɛn ni ti be tiŋgbɔŋ maa ni, ka ninvuɣ’ shɛb’ bɛn ka taali nyɛ bɛn ni ti kpalim be tiŋgbɔŋ maa ni. 22Amaa bɛ ni ti ku ninvuɣ’ biɛri la tiŋgbɔŋ maa ni, ka darigi yihi bɛn bi ʒe yim di ni.
Currently Selected:
Ŋaha 2: DBwDB
Highlight
Copy
Compare
Share
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.