Filipainima 1

1 # Tuma 16.12 Man’ Pool mini Timoti bɛn nyɛ Yisa Masia daba la n-sabiri gbaŋ ŋɔ tiri Naawuni ninvuɣ’ gahinda zaa bɛn be Yisa Masia ni la mini cheechi zuɣulaannim’ ni sɔŋdiba bɛn be Filipai.

2Ti Ba Naawuni mini ti Duuma Yisa Masia niŋm’ alibarika niŋ yi ni, ka tin ya suhudoo!

Pool suhi Naawuni ti bɛn karindi gbaŋ ŋɔ

3N teeri yi yɛla zaa, ka kul paɣiri Naawuni yi zuɣu, 4ka n yi suhiri Naawuni tiri ya sahakam, n kul suhirimi ni suhupiɛlli, 5yi ni sɔŋ ma lahibal’ suŋ la tuma ni di piligu dali hal ti paai pumpɔŋɔ shɛm la zuɣu. 6Ka m mi ni ŋun piligi tuun’ suŋ ŋɔ yi ni maa ni tum li hal ti naai li ti Duuma Yisa Masia labbuna dabisili la dali. 7Yi yɛla kul bela n suhu ni sahakam! Di zuɣu ka di simdi ni n kul tɛhiri yi yɛla. Dama yi zaa nuu be Naawuni ni ti ma dahima shɛl’ la ni, n ni be sarika ni saha shɛli ŋɔ zaŋ tabili n ni daa be yolisim ni saha shɛli ka zabiri lahibal’ suŋ la zuɣu, ka tumdi di tuma ni di ba n-zani la gba. 8Naawuni n-nyɛ n shɛhiralana ni n yɛrila yɛlimaŋli. N ni yɛli ni yi yɛla be n suhu ni la nyɛla din yi Yisa Masia maŋmaŋ’ suhu ni na. 9N ni suhiri Naawuni yi zuɣu shɛm m-bɔŋɔ: N suhiri Naawuni ni yi yurilim mini yi baŋsim maŋli zaŋ tabili yi suhuri ni baŋbu zoori pahira, 10ka di chɛ ka yi tooi pii din tuhi gari shɛlikam, ka chɛ ka yi yi daɣiri tuma zaa mini galimi ni Masia labbuna dabisili la dali. 11Ka biɛrisuntal’ maŋa din nyɛ Masia kɔŋko ni tiri shɛl’ la kpe m-pali yi bebu ni zaa Naawuni tibigibu min’ o paɣibu zuɣu.

Nir’ ni be Masia zuɣu shɛm

12M mabihi, m bɔri ni yi baŋ ni din niŋ ma la shiri sɔŋ chɛ ka lahibal’ suŋ la tuma chaŋ tooni. 13#Tuma 28.30 Di daliri zuɣu chɛ ka nayili tɔbbihi zaa mini bɛn zaa kpalim be kpe ŋɔ baŋ ni m be sarika ŋɔ ni la Masia zuɣu. 14Ka n ni be sarika ŋɔ ni zuɣu chɛ ka ti mabihi pam niŋ ti Duuma naani, naɣ’ kul gbaai yihila bɛ ni niriba biɛla. Ka bɛn niŋ naani maa kul mali suhukpeeni sahakam ka yihiri lahibal’ suŋ waazu ka dabiɛm zɔbu kani. 15Di nyɛla yɛlimaŋli, ninvuɣ’ shɛb’ yihiri Masia yɛla waazu la nyuli zabbu mini naŋgbankpeeni ŋmɛbu zuɣu, amaa ka shɛb’ mi yihiri li la dalir’ suŋ zuɣu. 16Yurilim zuɣu ka bɛmbɔŋɔnim’ bɛn’ niŋdi lala maa, dama bɛ mi ni Naawuni zaŋ lahibal’ suŋ ŋɔ zuɣu zabbu tuma ti ma. 17Ka bɛn’ la mi bi yihiri Masia yɛla waazu ni tɛhi suma, amaa ka niŋdi li mi ni nyuli zabbu tɛha, dama bɛ tɛhiri ni bɛ yi niŋdi lala di ni chɛ ka n wahaladibo maan pahi n ni be sarika ŋɔ ni saha shɛli ŋɔ. 18Ka bɔ ka dimbɔŋɔ yɛn niŋ? Niriba yi niŋdi lala ni tɛhi’ biɛri bee tɛhi’ suma, Masia yɛla molo kul bahi mooni ginda, ka m mali suhupiɛlli di zuɣu. Iin, n shiri ni mali suhupiɛlli, 19dama m mi ni yi wunsuhigu mini Yisa Masia Shia sɔŋsim ni fa ma bahi. 20N ni yu shɛm mini n tahima nyɛla ni n di kɔŋ n tuma tumbu, amaa ka kul ni tumdi li mi sahakam, di bahi bamdi pumpɔŋɔ. N ni mali suhukpeeni ka di chɛ ka n ti Masia jilima n niŋgbuŋ zaa puuni, n yi be bee n yi kpimi. 21Dama n yi be, Masia n-nyɛ n nyɛvili, ka m mi yi kpi, di nyɛla din so. 22Ka n yi na be n nyɛvil’ ni ka ni tooi tum’ tuun’ shɛli din mali buchi, dindina m bi jɛndi mi n ni yɛn pii shɛli bina ayi ŋɔ sunsuuni. 23M bela bina ayi maa sunsuuni: N suhu kul yɛmi ni n kpi n-chaŋ ti be Masia sani, dama dina n-so shɛlikam; 24amaa yi zuɣu ka di simdi ni n na be n nyɛvil’ ni. 25N dihi dimbɔŋɔ tabili, dinzuɣu m mi ni n na ni be. M mini ya zaa na ni be ka n sɔŋ chɛ ka yi tooni chandi mini yi suhupiɛlli zooi pahi yi yɛda niŋbu puuni. 26Ka n yi ti lan ka yi sanna yaha, yi ni mali daliri din ni chɛ ka yi maan paɣi Yisa Masia n ni lab’ yi sanna maa zuɣu. 27Din nyɛ yɛlikpeeni nyɛla ni yi chɛ ka yi biɛhigu doli Masia lahibal’ suŋ ni wuhi shɛm, ka n yi tooi kana ti nyan ya bee n yi bi tooi kana, ka n lee wum ni yi ʒe dɛde ni suhu yini, ka laɣim ni tɛhi yini n-tab’ tab’ tuhiri tɔbu lahibal’ suŋ la dolibu zuɣu. 28Di zɔnya yi dimnim’ dabiɛm! Kul maliya suhukpeeni ka di kahigi wuhi ba ni bɛ ni ti bahi yoli, amaa ka yinim’ ti tiligi, dama Naawuni n-nyɛ ŋun tiri ti nasara. 29Naawuni pun tin ya dahima ni yi doli Masia, ka di pala ni yi niŋ o yɛda kɔŋko, amaa ni yi di wahala gba o zuɣu. 30#Tuma 16.19-40 Dinzuɣu yi ni tooi pahi n zuɣu ka ti tuhi tɔb’ shɛli yi ni daa nya ka n tuhira, ka wum ni n na kul tuhiri li pumpɔŋɔ la.

Currently Selected:

Filipainima 1: DBwDB

Highlight

Copy