Jɔn 12
12
Paɣ’ so niŋ tulaale ʒe Yisa
(Matiu 26.6-13; Maak 14.3-9)
1Di ni daa ti kpalim daba ayɔbu ni bɛ puhi Yaɣigari Chuɣu, ka Yisa daa chaŋla Bɛtani din nyɛ o ni daa neei Lazarɔs so la ni daa be tin’ shɛl’ la. 2Ka bɛ daa ti niŋ bindirigu ti o nimaani, ka Maata kpuɣ’ bindirigu maa na ti zali, ka Lazarɔs gba daa be bɛn ʒini ni bɛ di bindirigu maa ni. 3#Luk 7.37-38 Ka Mariama daa zaŋ tulaale alali lita pirigili ka Yisa sanna ti booi li niŋ o naba, ka zaŋ o zabiri nyɛhinyɛhi o naba maa, ka tulaale maa nyom deei yili maa zaa. Bɛ ni booni ti’ shɛli naad la ka bɛ daa zaŋ mali tulaale maa, ka di mali shaara pam. 4Ka Judas Isikariɔt ŋun daa nyɛ Yisa nyaandoliba ni yino ka nyɛ ŋun daa ti yɛn yi Yisa nyaaŋa la bɔhi, 5“Bɔzuɣu ka paɣ’ ŋɔ bi zaŋ tulaale ŋɔ kɔhi kaman tumtumda yuun’ muni tuma yɔri n-zaŋ ti nandaamba?” 6Di pala o daa yurila nandaamba zuɣu ka o daa yɛl’ lala maa, amaa o ni daa nyɛ tayiɣ’ la zuɣu. Ŋuna n-daa gbib’ bɛ liɣiri kolibila, ka zuri piiri liɣiri maa. 7Ka Yisa yɛli, “Chɛl’ paɣ’ ŋɔ baalim! Chɛ ka o niŋ li gu n sɔɣibu dali. 8#Zal 15.11 Dama nandaamba kul ni be yi sani sahakam, amaa man’ kul ku be yi sani sahakam.”
Lazarɔs kubu nia lɔbu
9Yɛhudianim’ pam ni daa wum ni Yisa be nimaani maa ka bɛ daa kana. Pa Yisa kɔŋko zuɣu ka bɛ daa kana, amaa bɛ daa kamina ni bɛ ti nya Lazarɔs so Yisa ni daa neei kum ni la. 10Lala zuɣu ka maligumaaniba kpamba daa lo nia ni bɛ ku Lazarɔs gba, 11dama o zuɣu ka Yɛhudianim’ pam daa chɛ bɛ zuɣulaannima ka niŋ Yisa yɛda.
Yisa Jɛrusalɛm kpɛbu
(Matiu 21.1-11; Maak 11.1-11; Luk 19.28-40)
12N-daa yi biɛɣu ka niriba pam bɛn daa ka chuɣu maa ni na wum ni Yisa kani Jɛrusalɛm na. 13#Yila 118.25, 26 Ka bɛ daa ŋmahi abie tihi wula din mali vari n-chaŋ ti tuh’ o soli ka kuhiri yɛra, “Paɣimiya Naawuni! Izraɛlnim’ Naa ŋun mali ti Duuma yuli kanna ŋɔ mal’ alibarika!” 14Ka Yisa daa bo bumbila m-ba kaman di ni daa sab’ shɛm la. Di sabiya:
15 #
Zak 9.9
“Ziɔnnima, di zɔriya dabiɛm! Nyamiya!
Yi naa bari bumbil’ kani yi sanna.”
16Yisa nyaandoliba daa na bi baŋ dimbɔŋɔ gbinni faashee o ni daa ti lab’ o jilima shee la nyaaŋa, ka bɛ naanyi teei ni dimbɔŋɔnim’ zaa pun sabimi zan’ o zuɣu, ka di mi shiri niŋ o lala.
17Ka niriba bɛn daa be Yisa sani saha shɛl’ o ni daa neei Lazarɔs kum ni gballi ni la daa di o shɛhira. 18Niriba maa ni daa wum o ni wuhi shihir’ shɛli maa zuɣu ka bɛ daa chaŋ ti tuh’ o soli maa. 19Dina n-daa chɛ ka Farisiinim’ yɛri taba, “Nyamiya, ti kul nahindila timaŋ’ yoli! Dunianim’ zaa n-kabiri dol’ o la.”
Giriikinim’ bɛn bɔri ni bɛ nya Yisa
20Giriikinim’ shɛb’ daa be ninvuɣ’ shɛb’ bɛn daa kana ni bɛ ti jɛm Naawuni chuɣu maa puhibu ni la kalinli ni. 21Bɛna n-daa ka Filip so ŋun daa yi Bɛtisaida Galili tiŋgbɔŋ ni na la sani ti yɛl’ o, “N dana, ti bɔri ni ti nyala Yisa.”
22Ka Filip daa chaŋ ti yɛli Anduru, ka Anduru mini Filip daa chaŋ ti yɛli Yisa. 23Ka Yisa yɛli ba, “Saha yipa paaya ni Daadam Bia nya jilima. 24Achiikatim, yɛlimaŋli ka n yɛri ya, faashee kabiɛlli kpe tiŋgban’ ni pooi, di yi pa lala, di kul ni nyɛla kabiɛl’ yini maa ko; amaa di yi kpe tiŋgban’ ni pooi, di ni nabi. 25#Mat 10.39; 16.25; Maak 8.35; Luk 9.24; 17.33 Ŋun yur’ o nyɛvili ni ti kɔŋ li, ka ŋun mi je o nyɛvili dunia ŋɔ ni ni ti mal’ li hal ni saha din ka bahigu. 26Ŋun bɔri ni o jɛm ma, ŋun’ doli ma. N ni be luɣ’ shɛli, nimaani ka n yiŋbia gba ni ti be. Ŋun jɛmdi ma, dilana ka m Ba Naawuni tiri jilima.”
Yisa yɛli o kum yɛla
27Yisa daa lan yɛli, “Pumpɔŋɔ n suhu saɣimmi zaa, ka wula ka n ni yɛli? N ni yɛli, ‘M Ba, chɛ ka saha ŋɔ miligi n zuɣu?’ Aai, dama di zuɣu ka n kana nti kpalim beni hal ni pumpɔŋɔ ŋɔ. 28Amaa n ni yɛlimi, ‘M Ba, chɛ ka a yuli nya jilima.’ ”
Di saha ka kukol’ shɛli vuri daa yi alizanda ni na yɛra, “M pun chɛ ka di nya jilima; amaa n ni lan chɛ ka di nya jilima pahi.”
29Ka salo bɛn daa ʒe nimaani maa wum lala ka yɛli ni saa n-tahira.
Ka shɛb’ mi yɛli ni malaika n-tɔɣisir’ o yɛtɔɣa shɛm maa.
30Amaa ka Yisa yɛli ba, “Yi zuɣu ka kukoli maa tɔɣisiri maa, pa n zuɣu. 31Pumpɔŋɔ n-nyɛ dunia ŋɔ saria karibu saha; ka Naawuni ni yihi dunia ŋɔ naa bahi. 32Ka bɛ yi ti zaŋ ma sa zuɣusaa, n ni vooi sokam zaa tahi n sanna.” 33O daa yɛl’ lala ni o wuhi la kum shɛli o ni daa ti yɛn kpi la yɛla.
34 #
Yila 110.4; Aiz 9.7; Ɛzɛk 37.25; Dan 7.14 Ka salo maa daa yɛl’ o, “Ti pun wum Naawuni zaligu puuni ni Masia ni be hal ni saha din ka bahigu; ka wula ka a yɛli ni shee bɛ zaŋ Daadam Bia sa zuɣusaa? Ŋuni n-lee nyɛ Daadam Bia maa?”
35Ka Yisa yɛli ba, “Neesim ni be yi sani yuui biɛla. Ka yi ni mali neesim maa zuɣu, kul chamiya; di yi pa lala zibisim ni ti paai ya. Ŋun chani zibisim ni bi mi o ni kpari shɛli polo. 36Yi ni na mali neesim maa zuɣu, niŋmiya neesim maa yɛda, dina n-ni chɛ ka yi tooi leei neesim maa bihi.”
Yɛhudianim’ biɛhimbu yɛla
Yisa ni daa tɔɣisi yɛtɔɣa ŋɔ naai, o daa chaŋmi ti sɔɣi. 37Hal o ni daa kul wuhi shihira pam niriba maa sani maa zaa yoli, bɛ daa bi niŋ o yɛda. 38#Aiz 53.1 Dimbɔŋɔ daa niŋmi ni di chɛ ka Anabi Aizaia ni daa yɛli shɛm la niŋ pali. O ni daa yɛli shɛm maa m-bɔŋɔ:
“N Duuma, ŋuni n-lee niŋ ti yɛligu yɛda?
Ka ŋuni ka ti Duuma lee kahig’ o yiko wuhi?”
39Dina n-daa chɛ ka bɛ bi tooi niŋ yɛda;
dama Anabi Aizaia daa lan yɛli ni Naawuni yɛliya:
40 #
Aiz 6.10
“N ni chɛ ka bɛ nina zom,
ka chɛ ka bɛ suhuri kpaŋ,
ka bɛ nina ku nya shɛli,
ka bɛ suhuri mi ku baŋ shɛli,
ka bɛ labi n sanna,
ka n tib’ ba.”
41Anabi Aizaia ni daa nya Yisa jilima zuɣu ka o daa yɛl’ o yɛla lala maa.
42Hal Yɛhudianim’ zuɣulaannim’ pam daa niŋ Yisa yɛda, amaa bɛ ni daa zɔri Farisiinim’ zuɣu ka bɛ daa bi bɔri ni bɛ yihi li palo, ka Farisiinim’ maa ti kari ba bɛ jɛmbu duu; 43dama bɛ daa yurila salinim’ paɣibu gari Naawuni paɣibu.
Yisa yɛligu din nyɛ din kariti saria
44Ka Yisa daa kuhi yɛli, “Ŋunkam niŋ ma yɛda, pa mani ka o niŋ yɛda, amaa ŋun tim ma na maa ka o niŋ yɛda maa. 45Ka ŋunkam nya ma, o nya ŋun tim ma na maa. 46N kala dunia ŋɔ ni na kaman neesim, ka ŋunkam niŋ ma yɛda ku kpalim be zibisim ni. 47Ka so yi wum n yɛligu ka bi dol’ li, n ku kar’ o saria, dama m bi kamina ni n ti kari dunianim’ saria, amaa n kamina ni n ti tiligi dunianima. 48Ŋunkam je ma, ka bi deei n yɛligu mali sariakarita. Yɛtɔɣ’ shɛŋa n ni pun tɔɣisi la nti yɛn kar’ o saria zaadali, 49dama m bi yɛri shɛli mmaŋmaŋ’ yiko ni, amaa m Ba ŋun tim ma na maa n-zali ma n ni yɛn yɛli shɛm ka tɔɣisi shɛm. 50Ka m mi ni o zaligu nyɛla din tiri nyɛvili din ka bahigu. Dinzuɣu n ni yɛri shɛlikam nyɛla m Ba ni wuhi ma ni n yɛli shɛm.”
Currently Selected:
Jɔn 12: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.