Ɛfɛsusnima 2

Kum ni yibu mini nyɛvil’ ni kpɛbu

1Saha shɛli din gari la ha puuni, yi daa nyɛla kpiimba yi nɔzaɣisibo mini yi daalahichi tumbu zuɣu. 2Di saha maa ha yi daa dolila dunia ŋɔ tuumbiɛri soli, ka deei Sintani ŋun su sagbana tiŋli ŋɔ na yiko la noli. Ŋuna n-nyɛ shi’ biɛ’ so ŋun su ninvuɣ’ shɛb’ bɛn zaɣisi Naawuni nol’ la. 3Ti zaa daa bela lala, ka tumdi timaŋmaŋ’ niŋgbuŋ kɔre tuma, ka tumdi dinkam tiɣiri timaŋmaŋ’ niŋgbuŋ mini ti tɛha nini. Ka ti zaa daa nyɛla bɛn ti yɛn di Naawuni suhuyiɣisili tibidarigibo wahala shɛli sokam ni ti yɛn di la. 4Amaa Naawuni nambɔzɔbo galisiya, ka o yurilim gba galisi zaŋ chaŋ ti polo, 5#Kol 2.13 ka hal ti ni daa nyɛ bɛn kpi ti nɔzaɣisibo zuɣu la, o daa neei ti mini Masia kum ni. Naawuni daanfaani zuɣu ka yi tiligi. 6Ti mini Yisa Masia ni laɣim nyɛ zaɣ’ yini zuɣu ka Naawuni daa neei ti min’ o kum ni ni ti min’ o laɣim ʒin’ o nam ʒiishee alizanda ni. 7Naawuni daa niŋ lala ni o kahigila o daanfaani din galisi pam la wuhi palɔni ʒiɛman’ shɛŋa din kanna ni, ka di yila o ni wuhi ti yurilim shɛli Yisa Masia zuɣu la ni na. 8Naawuni daanfaani maa zuɣu ka yi tiligi yi yɛda niŋbu puuni. Ka di bi yila yi kɔbili ni na, amaa di nyɛla Naawuni pini. 9Ka di mi pala yi ni tum shɛli zuɣu ka yi tiligi, dinzuɣu shɛli kani ka yi ni nyu bara di zuɣu. 10Naawuni n-nyɛ ti namda, ka ti mini Yisa Masia ni laɣim nyɛ zaɣ’ yin’ la zuɣu ka o nam ti ni ti mali biɛhigu shɛli din ni tumdi tuun’ sun shɛŋa o ni daa pun zali ni ti tumdi la.

Zuliya kam zaa nyɛla yim Masia ni

11Yinim’ bɛn pa Yɛhudianim’ ŋɔ nyɛla Yɛhudianim’ bɛn guni gunibu shɛli bɛ ni niŋdi niŋgbuŋ ni la ni booni ninvuɣ’ shɛb’ bɛn bi guni. Teemiya yi bebu ni daa nyɛ shɛm yɛla. 12Di saha maa yi daa ʒi Masia. Yi daa nyɛla tinzunnima, ka pa Naawuni ni daa pii zuliya shɛb’ la ni niriba. Yi nuu daa ka Naawuni ni daa lo o niriba alikauli shɛli din daa yi o daalikaulinim’ lɔbu ni na la. Yi daa ka tahima, yi mi daa ka Naawuni dunia ŋɔ ni. 13Amaa pumpɔŋɔ yi mini Masia ni laɣim nyɛ zaɣ’ yin’ la zuɣu, yinim’ bɛn daa be katiŋ’ la yipa vu m-miri Naawuni Masia ʒim zuɣu. 14Masia n-nyɛ ti suhudoo. Ŋuna n-daai dimdi goon’ shɛli din be Yɛhudianim’ mini zuliya shɛb’ bɛn kpalim la sunsuuni la luhi, ka zaŋ ba naai taba. 15#Kol 2.14 Omaŋmaŋ’ niŋgbuŋ ka o daa zaŋ kpihim Yɛhudianim’ zaligunim’ mini bɛ daadiini soli kaya ni di chɛ ka o zaŋ zuliya kam zaa niriba min’ omaŋmaŋ’ naai taba, ka di zuɣu chɛ ka suhudoo niŋ ti sunsuuni. 16#Kol 1.20 Masia dapulli zuɣu kum puuni ka o daa kpihim dimdi din be ti sunsuuni la, ka zaŋ zuliya kam zaa niriba leei zaɣ’ yini n-zaŋ ba labisi Naawuni sani. 17#Aiz 57.19 Dinzuɣu Masia daa kana nti yihi suhudoo lahibal’ suŋ waazu tila yinim’ bɛn pa Yɛhudianima, ka daa be katiŋ’ ni Naawuni la mini Yɛhudianim’ bɛn daa mir’ o la. 18Masia zuɣu ka tinim’ bɛn nyɛ Yɛhudianim’ mini bɛn pa Yɛhudianim’ zaa ni tooi chaŋ ti Ba Naawuni sani o Shi’ yino la zuɣu. 19Dinzuɣu yinim’ bɛn pa Yɛhudianim’ lan pala tinzunnim’ ni saamba yaha; yi mini Naawuni ninvuɣ’ gahinda zaa yipa laɣim nyɛla tiŋbi’ yinsi ka nyɛ Naawuni yiŋnima. 20Naawuni zaŋ yi gba me n-tamla Yisa Masia tuumba min’ anabinim’ ni daa zali tanza’ shɛli din gbinni kuɣ’ gahindili nyɛ Yisa Masia maŋmaŋ’ la zuɣu. 21Ŋuna n-nyɛ ŋun gbibi duu maa zaa ka chɛ ka di mɛri zoori hal ti leeri jɛmbu du’ kasi ti Duuma ni. 22Yi min’ o ni laɣim nyɛ zaɣ’ yini zuɣu ka o zaŋdi yi gba m-pahiri bɛn zaa kpalim zuɣu m-mɛri du’ shɛli din nyɛ Naawuni ni ni be shɛl’ ni o Shia Kasi zuɣu.

Currently Selected:

Ɛfɛsusnima 2: DBwDB

Highlight

Copy