2 Kɔrintinima 12

Pool ʒiinim’ mini kahigibu shɛŋa o ni nya

1N ni bahi nyu bara. Di naɣ’ kala buchi, amaa n na kul ni tɔɣisi ʒiinim’ mini kahigibunim’ shɛŋa ti Duuma ni daa zaŋ ti ma la yɛla. 2N daa mi do’ so ŋun be Masia ni yuun’ pinaanahi din gari ŋɔ puuni, ka Naawuni daa kpuɣ’ o du zuɣusaa m-mali ti paai alizanda puuni ha. O yi daa bela o niŋgbuŋ ni bee o yi daa ka o niŋgbuŋ ni, m bi mi; Naawuni m-mi. 3M mi ni Naawuni daa zaŋ doo maa du alizanda ni. O yi daa bela o niŋgbuŋ ni bee o yi daa ka o niŋgbuŋ ni, m bi mi; Naawuni m-mi. 4Ka o daa wum binshɛŋa yɛla nimaani, ka di nyɛ ninsal’ ni ku tooi zaŋ shɛli n-niŋ yɛtɔɣa ni, ka lan nyɛ ninsal’ ni ku tooi zaŋ shɛli tɔɣisi. 5Doo maa zuɣu ka n ni nyu bara, amaa n ku nyu bara maŋmaŋ’ zuɣu dina; n naɣ’ ni nyula bara mmaŋmaŋ’ chɔɣinsi zuɣu. 6Ka hal n yi nyu bara gba, m bi tum jɛrilim, dama n ni tɔɣisila yɛlimaŋli di puuni. Amaa n zaɣisila lala niŋbu ni di chɛ ka so ku duhi ma n-gar’ o ni nya ma ka n niŋ shɛm zuɣu bee o ni wum ka n niŋ shɛm zuɣu.

7Daliri din ni chɛ ka n ku duhi mmaŋa n-yaɣi n ni daa nya kahigibunim’ pam shɛŋa la zuɣu, ka go’ shɛli din be kaman Sintani tumo la kuhi ma n-kpalim be n niŋgbuŋ ni ni di muɣisi ma n-chɛ ka n ku duhi mmaŋ’ yaɣi. 8Siɣimsiɣim buta ka n daa suhi n Duuma di zuɣu ni o yihi li n ni. 9Amaa ka o daa yɛli ma, “N daalibarika saɣ’ a, dama n yaa niŋdi dɛde chɔɣinsi ni.” Ka n kul ni nyuri bara m-pahiri ni suhupiɛlli n chɔɣinsi zuɣu ka di chɛ ka Masia yiko tooi be n ni. 10Masia zuɣu m mali suhupiɛlli chɔɣinsi ni mini ʒiɛmbu ni ni kɔŋsim ni ni alaka nyabu ni ni wahala dibu puuni, dama n yi ti gbarigi, di saha ka n lan nyari yaa.

Pool suhu zɔhiri Kɔrintinim’ zuɣu

11N tɔɣisi jɛrilim m barinyubo ni, amaa yinima m-muɣisi ma ka n niŋ lala. Di di simdi ni yinim’ paɣi ma, dama hal n yi kul pa shɛli, n lee pala ŋun pɔri tuum’ shɛba yi ni tibigiri la ni. 12N daa tum tuun’ maŋli shihira wuhibu tuma yi sani ni suɣilo dibu zaa. Dina n-nyɛ: shihira wuhibu mini alahiziba tumtumsa ni yiko tuma. 13Bɔ ka n niŋ ya ka di be di ko ni cheechi shɛŋa din kpalim la n-naɣ’ pahila n ni bi zaŋ n yɛla doli ya la? Chɛliya dimbɔŋɔ taali paŋ ma!

14Siɣimsiɣim buta m-bɔŋɔ ka m mali shili ni n ka yi sanna; ka m mi ku zaŋ n yɛla doli ya, dama m bi bɔri yi binshɛli, amaa yimaŋmaŋ’ ka m bɔra. Pa bihi n-dihiri bɛ laamba, amaa bihi laamba n-dihiri ba. 15M mali suhupiɛlli ni n zaŋ mmaŋa mini n ni mali shɛlikam saɣim yi zuɣu. N ni yuri ya pam la zuɣu, yinima ni yuri ma la biɛla?

16Di pa shɛli yi ni saɣi ni m bi zaŋ n yɛla doli ya, amaa ka lee yɛli ni n nyɛla yɛmbimbiɛrilana ŋun zaŋ yɔhiŋgu gbahi ya. 17N daa di yi zuɣu nyɔri n ni daa tim shɛb’ yi sanna la ni? 18N daa kpam Taitus jaande ni o ka yi sanna, ka daa lan chɛ ka ti mabi’ so pah’ o zuɣu na. Taitus daa di yi zuɣu nyɔri? Pa biɛhigu yini ka ti mali? Pa so’ yini ka ti doli?

19Yi kul tɛhirimi ni ti zabirila timaŋ’ zuɣu yi sani? M mabiyurisi, Naawuni sani, Masia zuɣu ka ti kul tɔɣisira, ka di zaa nyɛla yi kpaŋsibu zuɣu. 20N zɔri ni di pa shɛli ka n ti ka yi sanna m bi nyan ya kaman n ni di bɔri ni yi be shɛm, ka yi mi ti bi nya ma kaman yi ni di bɔri ni m be shɛm. Di pa shɛli ka naŋgbankpeeni mini nyuli zabbu ni suhuyiɣisili ni zunyuŋ ni tiŋŋmaŋ ni nyaanzubo ni maŋduhibu ni duŋtaabo ti be yi sunsuuni. 21N zɔri ni di pa shɛli ka n ti lab’ yi sanna ka Naawuni ti siɣisi ma yi sani, ka n fabili bɛn daa tum alahichi ka na bi niŋ tuuba bɛ daɣiri tuma mini bɛ zina niŋbu ni bɛ kɔr’ biɛri tuun’ shɛŋa bɛ ni tumdila zuɣu.

Currently Selected:

2 Kɔrintinima 12: DBwDB

Highlight

Copy