1 Timoti 3
3
Cheechi ni toondaannim’ yɛla
1Yɛtɔɣili ŋɔ nyɛla yɛlimaŋli: So suhu yi yɛya ni o leei cheechi toondana, o ni bɔri tuun’ shɛli maa nyɛla tuun’ suŋ. 2#Tait 1.6-9 Di niŋ kamaata ni cheechi toondana mali biɛrisuŋ: di simdi ni o malila paɣ’ yino, ka nyɛ ŋun gbib’ omaŋa ni ŋun mali yɛm ni ŋun biɛhigu doli soli ni ŋun niŋdi saani ni ŋun ni tooi wuhi niriba viɛnyɛliŋga. 3Di bi simdi ni o nyɛla ŋun nyuri dam kuuna bee ŋun nyɛ vubɔra, amaa di simdi ni o nyɛla ŋun be baalim, ka pa ni ŋun ŋmɛri naŋgbankpeeni bee ŋun suhu ye liɣiri zuɣu nti yaɣi. 4Di niŋ kamaata ni o nyɛla ŋun gbib’ omaŋmaŋ’ yiŋnim’ viɛnyɛliŋga, ka niŋdi din ni chɛ ka o bihi deer’ o noli ka tir’ o jilima binshɛɣukam puuni; 5dama nir’ yi bi mi o ni yɛn niŋ shɛm n-gbib’ omaŋmaŋ yiŋnima, wula ka o ni tooi gbibi Naawuni cheechi? 6Di mi bi simdi ni o nyɛla ŋun na yoli niŋ tuuba; di yi nyɛ lala, di pa shɛli ka o ti niŋ karimbaani duh’ omaŋa, ka saria karibu di o kaman di ni daa di Sintani shɛm la. 7Ka din pahi dimbɔŋɔnim’ zaa zuɣu nyɛla, di niŋ kamaata ni o nyɛla ŋun mali shɛhira suŋ bɛn be kpaŋ’ sani, di yi pa lala, di pa shɛli ka o ti tum vi tuma, ka Sintani zana gbaag’ o.
Cheechi ni sɔŋdiba
8Lala n-nyɛ cheechi sɔŋdiba gba: Di niŋ kamaata ni bɛ mali biɛrisuŋ, ka di yɛri naŋgbanvoya ayiyi, ka di bi simdi ni bɛ nyɛla bɛn nyuri dam kuuna bee bɛn suhuri ye liɣiri zuɣu ti yaɣi. 9Di niŋ kamaata ni bɛ nyɛla bɛn suhuri ni tɛha ka galimi, ka lan nyɛ bɛn gbib’ yɛlimaŋa din yi zahira ti wuhibu puuni la. 10Ka di simdi ni cheechi buɣisi ba pɔi, ka bɛ biɛhigu yi wuhi ni bɛ ka galimi, ka cheechi naanyi chɛ ka bɛ tum cheechi sɔŋdiba tuma. 11Lala n-nyɛ bɛ paɣiba gba: Di niŋ kamaata ni bɛ gba mali biɛrisuŋ, ka pa ni bɛn nyɛ munaafichinima, amaa di simdi ni bɛ gbib’ bɛmaŋa ka ʒe yim binshɛɣukam puuni. 12Di simdi ni cheechi sɔŋdiba malila paɣ’ yinoyino, ka tooi gbib’ bɛ bihi mini bɛ yiŋnim’ viɛnyɛliŋga. 13Ninvuɣ’ shɛb’ bɛn tumdi cheechi sɔŋdiba tuma ŋɔ viɛnyɛliŋga zaani yu’ suma, ka tooi mali suhukpeeni n-tɔɣisiri bɛ ni niŋ Yisa Masia yɛda shɛm yɛla palɔni.
Adiini ashil’ titali
14M mali tahima ni di ku yuui ka n kana ti kaag’ a, amaa n sabiri yɛl’ shɛŋa din be gbaŋ ŋɔ ni n-tir’ a mi 15ni n yi yuui kandina, di ni chɛ ka a mi a ni yɛn niŋdi shɛm Naawuni niriba bɛn nyɛ ŋun’ Naawuni ŋun be ŋɔ cheechi la ni, ka nyɛ daantaliga mini tanzaa Naawuni yɛlimaŋli ni tam shɛli zuɣu la. 16Biɛhiŋ kani, ti daadiini soli ŋɔ ashili nyɛla zaɣ’ titali. Dina n-nyɛ:
Ŋuna n-daa leei daadam yi palo,
ka Naawuni Shia Kasi daa di o shɛhira,
ka malaikanim’ daa nya o.
Bɛ daa mol’ o yɛla zuliya kam ni,
ka niriba daa niŋ o yɛda dunia ŋɔ ni,
ka Naawuni daa ti kpuɣ’ o
chaŋ jilima shee alizanda ni.
Currently Selected:
1 Timoti 3: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.
