Ŋaha 1
1
Ŋaha Bukaata
1 #
1 Nan 4.32
Dauda bia Sulemaana ŋun daa nyɛ Izraɛl naa la ŋaha. 2Di nyɛla yɛm mini wuhibu yɛla bɔhimbu din ni sɔŋ zaŋ chaŋ ashili yɛtɔɣa baŋbu polo. 3Di ni lan sɔŋ zaŋ chaŋ yɛm wuhibu mini wuntitali ni zaligu dolibu ni nimmaŋtali polo. 4Di ni lan chɛ ka tarimba nya fahim, ka wuhi bipola baŋsim mini yɛm. 5Chɛ ka yɛnnim’ gba wum li, ka nya yɛm pahi, ka leei ninvuɣ’ shɛb’ bɛn woligiri binyara, 6ka baŋdi ŋaha mini yɛliŋmahima din nyɛ yɛnnim’ yɛtɔɣa mini bɛ saliŋlɔha.
Kpamdi yɛtɔɣa din nyɛ bipola dini
7 #
Ayu 28.28; Yila 111.10; Ŋaha 9.10 Yawɛ zɔbu n-nyɛ baŋsim piligu, jɛra bɛn’ lihi ʒiɛmla yɛm mini wuhibu.
8M bia, wumm’ a ba ni wuhir’ a shɛli, ka miri ka a zaɣisi a ma ni wuh’ a shɛli. 9Dama di ni leei jilima zuɣupiligu a zuɣu ni, ka leei dolibi a nyiŋgol’ ni.
10M bia, alahichinim’ yi kpɛhir’ a kɔre, nyin’ di saɣi. 11Bɛ yi yɛl’ a, “Kamina ti pahi ti zuɣu, chɛ ka ti dɔni gu n-ku so, ka chɛ ka ti liri bɛn ka taali. 12Ti valim’ ba zaɣ’ nɛma kaman kpiimba biɛhigu shee ni niŋdi shɛm la. Ti ni vali ba zaɣ’ muna kaman ninvuɣ’ shɛb’ bɛn kpe gballi ni. 13Ti ni nya nɛma balibu kam din mali shaara, ka ŋme n-di nɛma pam ti pali ti yinsi. 14Kamina ti pahi ti zuɣu, ti zaa ni laɣim mal’ liɣiri kolibil’ yini.”
15M bia, gbaam’ amaŋa ka chɛ bɛ ni niŋdi shɛm maa. 16Dama bɛ zo n-kpɛla zaɣ’ biɛɣu tumbu ni, ka niŋ yomyom ni bɛ ku niriba. 17Dama nir’ yi bari zana noombil’ ninni, yoli ka o bari li maa. 18Amaa bɛ kul domi gu ni bɛ ŋmaligi ku bɛmaŋa. Bɛmaŋmaŋ’ nyɛviya ka bɛ doya gu maa. 19Bɛnkam suhuri ye buni zuɣu, ka zaŋ kiŋkansi bɔrili bahigu ni yɛn nyɛ shɛm m-bala. Di dirila bɛn su li nyɛviya.
Yɛm booni niriba
20Yɛm kuhiri pampam solɔri zuɣu, o duhir’ o yee niriba laɣiŋgu shee. 21#Ŋaha 8.1-3 O duhir’ o yee zama pam ni, ka tɔɣisiri yɛtɔɣa fɔntinsi dunɔdaya gbini.
22Yinim’ bɛn be ʒilinsi ni ŋɔ, saha yuusim wula ka yi kul bɔri ni yi be ʒilinsi maa ni? Saha yuusim wula ka ansarisimaaniba kul yɛn be ansarisi malibu ni? Ka saha yuusim wula ka jɛra kul yɛn zaɣisiri yɛm? 23Gbilisim tibili wum n saɣisigu ŋɔ; n ni yɛl’ a din be n suhu ni, n ni chɛ ka a baŋ n ni yɛli shɛm. 24Dama m boli ya ka yi zaɣisi, ka n teei n nuu na, ka yi baɣa ka di ni. 25Ka yi ni zaɣisi n saɣisigu ka bi deei n ni kpahi yi zuɣu ni shɛm la zuɣu, 26n gba ni lan ya yi zaɣ’ biɛɣu nyabu saha, ka mali ya ansarisi yi dabiɛm saha. 27Suhusaɣiŋgu yi ti paai ya kaman sanʒiɛɣu la, ka zaɣ’ biɛɣu paai ya kaman pɔhimʒiɛpiliŋga la, ka biɛrim mini nandahima yi ti paai ya; 28di saha yi ni ti boli ma, amaa ka n ku garigi ya. Yi ni ti bo ma ni nimmoo, amaa ka ku nya ma. 29Yi ni daa je yɛm, ka bi zaŋ Yawɛ zɔbu kpɛhi yi kɔbili ni, 30ka zaɣisi n saɣisigunima, ka lihi ʒiɛm n ni kpahi yi zuɣu ni shɛm la zuɣu. 31Dinzuɣu yi ni ti di yi tuma nyɔri, ka di yi nia biɛri tiɣi. 32Dama bɛn be ʒilinsi ni biriginsim n-kuri ba, ka jɛra mi nini ni tiɣi bɛmaŋmaŋ’ shɛm kuri ba. 33Amaa ninvuɣ’ shɛb’ bɛn wumdi n yɛligu ku be barina ni, bɛ ni be ni alaafee ka ku zɔri dabiɛm zaŋ chaŋ zaɣ’ biɛɣu polo.
Red Letter Dagbani Bible © Bible Society of Ghana, 2011