1 MACABEOS 7
7
Rey Demetrio kachamun Judeaman Baquidestawan Alcimotawan
[2 Mac. 14.1-4]
1Seleucoj wawan Demetrio, pachaj phishqa chunka ujniyoj kaj watapi, Roma llajtamanta llojsispa pisi runasllawan khuska, chayarqa uj llajtaman, jatun qochaj qayllampi kasharqa chayman. Chaypitaj rey jina kamachiyta qallarerqa. 2Wakichikushajtintaj yaykunampaj ñaupa tatasnimpa wasinkuman, soldadosqa presochasqanku Antiocotawan Lisiastawan, Demetrioj makisninman churanankupaj. 3Chayta yachaspataj, Demetrioqa nerqa: Ama rikuchiwaychejchu uyasninkutaqa, nispa. 4Chantaqa, soldados wañuchisqanku paykunata. Ajinamanta, Demetrioqa rey tiyanapi tiyaykukorqa.
5Chaymanta, Alcimowan waj mana leyniyoj Diosta wasanchaj israelitaswan khuska, reyta watukorqanku. Chay Alcimoqa munashasqa jatun sacerdoteman tukuyta. 6Paykunaqa reypa ñaupaqempi Diospa ayllumpaj kay jinata rimarqanku: Judaswan wauqesninwan tukuy amigosniykita chinkachinku, noqaykutataj llajtaykumanta qharqowarqayku. 7Kunanqa, reyniyku, kachay uj ajllakusqayki runata rikunampaj imatachus paykunaqa ruwawarqayku, imatachus ruwarqanku qampa jallp'aykiwampis, chayta. Chay runaqa rispa castigachun paykunata, qhepanakuta rejkunatawan.
8Reytaj ajllasqa Baquidesta. Chay Baquidesqa reypa amigon kasqa. Chaykama payqa kamachej jallp'aspi Eufrates mayumanta pañanejpi kashan chaypi. Chay runaqa may rejsisqa karqa reinopi, reyman k'askasqataj karqa. 9Baquideswan khuska rinampaj reyqa kachamullarqataj chay rumi sonqo Alcimota. Paykunaman ordenta qosqa kutichikunankuta israelitasman. Alcimotataj nisqa jatun sacerdoteman tukuchinanta. 10Chay iskayninku kachaykukusqanku Judeaman. Chayaspataj ashkha soldadoswan kachasta kachamusqanku. Chay kachastaj misk'i simiwan parlarqanku Judaswan wauqesninwantaj, llullakuspataj nerqanku allimpi kausakunankuta. 11Judastaj mana uyarikorqachu nisqankuta, rikusqanrayku ashkha soldadoswan chayamusqankuta. 12Jinapis, wakin Diospa leyninta yachachejkuna rerqanku taripaj Alcimotawan Baquidestawan uj tratota ruwayta munaspa. 13Hasideos nisqa chay runasqa tukuykunamanta ñaupajta chay tratota ruwayta munasharqanku. 14Paykunaqa nisharqanku: Aarompa mirayninmanta kaj uj sacerdote soldadoswan khuska chayamun. Chay runaqa mana ni ima sajrata ruwawasqaykuchu, nispa.
15Kikin Alcimo misk'i simiwan paykunaman parlarqa, juramentota ruwaspataj nerqa: Noqaykoqa mana ni ima sajrata ruwasqaykuchu qankunaman amigosniykichejmampis, nispa. 16Chayrayku paykunaqa payta creerqanku. Chaymantataj Alcimoqa presocharqa sojta chunkata paykunamanta, uj diallapitaj wañucherqa, Escritura nisqanman jina. 17Munakusojkunaj ayasninkuta t'aqararqanku, yawarninkutataj jich'arqanku tukuy Jerusalempi. Manataj kanchu p'ampajqa.
18Tukuy runastaj manchachikoj kanku. Nisharqankutaj: Chay runasqa mana cheqan sonqoyojchu. P'akinku ari chay juramentowan trato ruwasqankuta. 19Baquidestaj riporqa Jerusalenmanta, jarakorqataj Bet-Zetpi. Chaymanta presoyacherqa ashkha runasta payman pasakorqanku chaykunamanta, waj israelitastawan. Nerqataj wañuchinankuta wijch'unankutataj uj t'oqoman. 20Chaymantataj Baquidesqa saqerqa chaypi Alcimota kamachejta jina. Saqerqataj ashkha soldadosta yanapanankupaj. Chantaqa kutimporqa maymanchus rey kasharqa chayman.
21Alcimotaj munasharqapuni jatun sacerdote kayta. 22Tukuy ch'ajwata ruwajkunapis payman k'askakoj kanku. Paykunaqa dueñochakorqanku Israelmanta, miracherqankutaj llakiyta tukuy Israelpi. 23Judastaj rikorqa imatachus ruwashasqankuta Alcimowan runasninwan. Aswan millayta ruwasqanku paganosmanta nisqaqa. 24Judastaj rikuspa imatachus ruwashasqankuta, tukuy Judeanta purerqa, castigarqataj pikunatachus enemigoman pasakorqanku chaykunata. Nerqataj ama Judeanejpi purikunankuta.
Nicanor atipachikun
[2 Mac. 14.5-36]
25Alcimo rikuspa Judaspis wauqesnimpis ancha kallpayoj kasqankuta, yachaspataj pay kikin mana atipayta atisqanta, reypaman kutimporqa, paykunatataj tumparqa jatuchej sajra imasmanta. 26Reytaj Nicanorta kachamorqa nispa israelitasta tukuchinanta. Chay Nicanorqa may rejsisqa general karqa. Israelitastaqa anchatapuni chejnikoj. 27-28Ashkha soldadoswan chayarqa Nicanorqa Jerusalenman. Puraj uyawantaj kachamorqa Judasman wauqesninmantaj allin palabrasta, kayta nichimuspa: Ama kachunchu maqanaku noqawan qanwan. Pisi runasllawan jamushani qanwan parlaj sonqo tiyasqa kaypi. 29Ajinamanta, pay chayarqa Judaspaman. Iskayninkutaj napaykunakorqanku respetowan. Judaspa enemigosnintaj wakichisqasña karqanku payta jap'inankupaj. 30Yachaspaña Judasqa Nicanor jamusqanta llulla sonqowan, manchachikorqa, manañataj munarqachu payta rikuyta. 31Rikuspa Nicanor yachakusqantaña sajra yuyayninta, kachaykukorqa Judaswan maqanakoj. Tinkunakorqankutaj Cafarsalama chaynejpi. 32Chay tinkupitaj Nicanorpa runasninmanta phishqa pachaj jina karqanku wañojkunaqa. Puchojkuna ayqerqanku David llajtaman.
33Chaymantataj, Nicanorqa riporqa Sión orqoman. Payta napaykoj chayarqanku wakin templomanta sacerdotes wakin kurajkunawan khuska. Sonqo tiyasqa kaypi napaykuytawanqa, paykunaqa rikucherqanku rikuchikusta, reypaj jallch'asharqanku chaykunata. 34Paytaj asipayaspa, paykunata thoqaykorqa ch'ichichasqas qhepakunankupaj. Anchatapunitaj trataykorqa. 35May phiñasqa, kay juramentota ruwarqa: Manachus makisniyman churapuwankichej chayqa chay Judasta soldadosnintinta, kutimuspa atipasqaymanta kay maqanakupi, kay templota ruphaykuchisaj, nispa. Riporqataj may phiñasqa. 36-37Sacerdotestaj temploman yaykuspa, sayarqanku rikuchiku altar qayllapi, santuarioj chimpampi, waqaspataj nerqanku kay jinata: Qan kay templota ajllarqanki sutiykiwan sutichasqa kanampaj, kaypi runasniyki qanmanta mañakunankupajtaj. 38Kutichiy kunanqa kay runaman soldadosninman ima. Paykunaqa espadawan wañuchisqas kachunku. Yuyarikuy millay palabrasninkumanta. Castigallayña paykunataqa.
Nicanorta wañuchinku
[2 Mac. 15.1-36]
39Nicanorqa Jerusalenmanta llojsispa Bet-Horompi jarakorqa. Siria llajtayoj soldadostaj chaypi ujchakorqanku paywan. 40-41Judasrí sayasharqa Hadasapi kinsa waranqa runaswan. Judastaj chaypacha, Diosmanta mañakorqa kay jinata: Maypachachus Asiria reypa kachasnin jamorqanku qampaj millayta rimaj, angelniyki jamuspa wañucherqa pachaj pusaj chunka waranqa soldadosta ejercitonmanta. 42Ajinallataj, kunampis ñaupaqeykupi tukuchiy kay soldadosta. Tukuy wajkuna yachachunku Nicanorqa millayta parlasqanta temploykipaj. Sajra kayninman jina paytaqa castigay.
43Chay iskay ejercitosmanta soldadosqa maqanakupi tinkorqanku Adar killamanta chunka kinsayoj kaj diapi. Nicanorpa soldadosnin tukuchisqas karqanku. Nicanorpuni ñaupajta urmarqa. 44Nicanorpa soldadosnenqa rikuytawanqa kamachejninku wañuchisqa kasqanta, maqanaku armasninkuta saqerparispa ayqerqankupacha. 45Judiostaj qhatiykorqanku paykunataqa uj día junt'ata Hadasamantapacha Gezerkama, pututusta waqachispa wasankumanta. 46Tukuynejpi Judea llajtasmanta runa llojsimoj, muyuykamojtaj kanku ayqejkunata. Kutichimorqankutaj, paykunapurata tinkunachispa. 47Tukuyninkutaj espadawan wañuchisqas karqanku. Mana ni ujllapis kausarqachu. Chantaqa judiosqa tarisqankuta apakaporqanku. Chaymanta, qholurparerqanku Nicanorpa umanta, paña makintapis khuchurarqanku. Chay makintaqa paymin wapu wapulla aysasqa. Umantawan makintawan Jerusalenman aparqanku runas rikunankupaj. 48Runasqa anchata kusikorqanku. Chay diataj paykunapaj karqa jatun fiesta. 49Chantaqa, nerqanku chay kutimantapacha chay diaqa waqaychasqa kananta sapa wata chunka kinsayoj kaj diapi Adar killamanta. 50Qhepan wataspitaj allin kay karqa Judá jallp'api.
Currently Selected:
1 MACABEOS 7: QCHSB
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.
1 MACABEOS 7
7
Rey Demetrio kachamun Judeaman Baquidestawan Alcimotawan
[2 Mac. 14.1-4]
1Seleucoj wawan Demetrio, pachaj phishqa chunka ujniyoj kaj watapi, Roma llajtamanta llojsispa pisi runasllawan khuska, chayarqa uj llajtaman, jatun qochaj qayllampi kasharqa chayman. Chaypitaj rey jina kamachiyta qallarerqa. 2Wakichikushajtintaj yaykunampaj ñaupa tatasnimpa wasinkuman, soldadosqa presochasqanku Antiocotawan Lisiastawan, Demetrioj makisninman churanankupaj. 3Chayta yachaspataj, Demetrioqa nerqa: Ama rikuchiwaychejchu uyasninkutaqa, nispa. 4Chantaqa, soldados wañuchisqanku paykunata. Ajinamanta, Demetrioqa rey tiyanapi tiyaykukorqa.
5Chaymanta, Alcimowan waj mana leyniyoj Diosta wasanchaj israelitaswan khuska, reyta watukorqanku. Chay Alcimoqa munashasqa jatun sacerdoteman tukuyta. 6Paykunaqa reypa ñaupaqempi Diospa ayllumpaj kay jinata rimarqanku: Judaswan wauqesninwan tukuy amigosniykita chinkachinku, noqaykutataj llajtaykumanta qharqowarqayku. 7Kunanqa, reyniyku, kachay uj ajllakusqayki runata rikunampaj imatachus paykunaqa ruwawarqayku, imatachus ruwarqanku qampa jallp'aykiwampis, chayta. Chay runaqa rispa castigachun paykunata, qhepanakuta rejkunatawan.
8Reytaj ajllasqa Baquidesta. Chay Baquidesqa reypa amigon kasqa. Chaykama payqa kamachej jallp'aspi Eufrates mayumanta pañanejpi kashan chaypi. Chay runaqa may rejsisqa karqa reinopi, reyman k'askasqataj karqa. 9Baquideswan khuska rinampaj reyqa kachamullarqataj chay rumi sonqo Alcimota. Paykunaman ordenta qosqa kutichikunankuta israelitasman. Alcimotataj nisqa jatun sacerdoteman tukuchinanta. 10Chay iskayninku kachaykukusqanku Judeaman. Chayaspataj ashkha soldadoswan kachasta kachamusqanku. Chay kachastaj misk'i simiwan parlarqanku Judaswan wauqesninwantaj, llullakuspataj nerqanku allimpi kausakunankuta. 11Judastaj mana uyarikorqachu nisqankuta, rikusqanrayku ashkha soldadoswan chayamusqankuta. 12Jinapis, wakin Diospa leyninta yachachejkuna rerqanku taripaj Alcimotawan Baquidestawan uj tratota ruwayta munaspa. 13Hasideos nisqa chay runasqa tukuykunamanta ñaupajta chay tratota ruwayta munasharqanku. 14Paykunaqa nisharqanku: Aarompa mirayninmanta kaj uj sacerdote soldadoswan khuska chayamun. Chay runaqa mana ni ima sajrata ruwawasqaykuchu, nispa.
15Kikin Alcimo misk'i simiwan paykunaman parlarqa, juramentota ruwaspataj nerqa: Noqaykoqa mana ni ima sajrata ruwasqaykuchu qankunaman amigosniykichejmampis, nispa. 16Chayrayku paykunaqa payta creerqanku. Chaymantataj Alcimoqa presocharqa sojta chunkata paykunamanta, uj diallapitaj wañucherqa, Escritura nisqanman jina. 17Munakusojkunaj ayasninkuta t'aqararqanku, yawarninkutataj jich'arqanku tukuy Jerusalempi. Manataj kanchu p'ampajqa.
18Tukuy runastaj manchachikoj kanku. Nisharqankutaj: Chay runasqa mana cheqan sonqoyojchu. P'akinku ari chay juramentowan trato ruwasqankuta. 19Baquidestaj riporqa Jerusalenmanta, jarakorqataj Bet-Zetpi. Chaymanta presoyacherqa ashkha runasta payman pasakorqanku chaykunamanta, waj israelitastawan. Nerqataj wañuchinankuta wijch'unankutataj uj t'oqoman. 20Chaymantataj Baquidesqa saqerqa chaypi Alcimota kamachejta jina. Saqerqataj ashkha soldadosta yanapanankupaj. Chantaqa kutimporqa maymanchus rey kasharqa chayman.
21Alcimotaj munasharqapuni jatun sacerdote kayta. 22Tukuy ch'ajwata ruwajkunapis payman k'askakoj kanku. Paykunaqa dueñochakorqanku Israelmanta, miracherqankutaj llakiyta tukuy Israelpi. 23Judastaj rikorqa imatachus ruwashasqankuta Alcimowan runasninwan. Aswan millayta ruwasqanku paganosmanta nisqaqa. 24Judastaj rikuspa imatachus ruwashasqankuta, tukuy Judeanta purerqa, castigarqataj pikunatachus enemigoman pasakorqanku chaykunata. Nerqataj ama Judeanejpi purikunankuta.
Nicanor atipachikun
[2 Mac. 14.5-36]
25Alcimo rikuspa Judaspis wauqesnimpis ancha kallpayoj kasqankuta, yachaspataj pay kikin mana atipayta atisqanta, reypaman kutimporqa, paykunatataj tumparqa jatuchej sajra imasmanta. 26Reytaj Nicanorta kachamorqa nispa israelitasta tukuchinanta. Chay Nicanorqa may rejsisqa general karqa. Israelitastaqa anchatapuni chejnikoj. 27-28Ashkha soldadoswan chayarqa Nicanorqa Jerusalenman. Puraj uyawantaj kachamorqa Judasman wauqesninmantaj allin palabrasta, kayta nichimuspa: Ama kachunchu maqanaku noqawan qanwan. Pisi runasllawan jamushani qanwan parlaj sonqo tiyasqa kaypi. 29Ajinamanta, pay chayarqa Judaspaman. Iskayninkutaj napaykunakorqanku respetowan. Judaspa enemigosnintaj wakichisqasña karqanku payta jap'inankupaj. 30Yachaspaña Judasqa Nicanor jamusqanta llulla sonqowan, manchachikorqa, manañataj munarqachu payta rikuyta. 31Rikuspa Nicanor yachakusqantaña sajra yuyayninta, kachaykukorqa Judaswan maqanakoj. Tinkunakorqankutaj Cafarsalama chaynejpi. 32Chay tinkupitaj Nicanorpa runasninmanta phishqa pachaj jina karqanku wañojkunaqa. Puchojkuna ayqerqanku David llajtaman.
33Chaymantataj, Nicanorqa riporqa Sión orqoman. Payta napaykoj chayarqanku wakin templomanta sacerdotes wakin kurajkunawan khuska. Sonqo tiyasqa kaypi napaykuytawanqa, paykunaqa rikucherqanku rikuchikusta, reypaj jallch'asharqanku chaykunata. 34Paytaj asipayaspa, paykunata thoqaykorqa ch'ichichasqas qhepakunankupaj. Anchatapunitaj trataykorqa. 35May phiñasqa, kay juramentota ruwarqa: Manachus makisniyman churapuwankichej chayqa chay Judasta soldadosnintinta, kutimuspa atipasqaymanta kay maqanakupi, kay templota ruphaykuchisaj, nispa. Riporqataj may phiñasqa. 36-37Sacerdotestaj temploman yaykuspa, sayarqanku rikuchiku altar qayllapi, santuarioj chimpampi, waqaspataj nerqanku kay jinata: Qan kay templota ajllarqanki sutiykiwan sutichasqa kanampaj, kaypi runasniyki qanmanta mañakunankupajtaj. 38Kutichiy kunanqa kay runaman soldadosninman ima. Paykunaqa espadawan wañuchisqas kachunku. Yuyarikuy millay palabrasninkumanta. Castigallayña paykunataqa.
Nicanorta wañuchinku
[2 Mac. 15.1-36]
39Nicanorqa Jerusalenmanta llojsispa Bet-Horompi jarakorqa. Siria llajtayoj soldadostaj chaypi ujchakorqanku paywan. 40-41Judasrí sayasharqa Hadasapi kinsa waranqa runaswan. Judastaj chaypacha, Diosmanta mañakorqa kay jinata: Maypachachus Asiria reypa kachasnin jamorqanku qampaj millayta rimaj, angelniyki jamuspa wañucherqa pachaj pusaj chunka waranqa soldadosta ejercitonmanta. 42Ajinallataj, kunampis ñaupaqeykupi tukuchiy kay soldadosta. Tukuy wajkuna yachachunku Nicanorqa millayta parlasqanta temploykipaj. Sajra kayninman jina paytaqa castigay.
43Chay iskay ejercitosmanta soldadosqa maqanakupi tinkorqanku Adar killamanta chunka kinsayoj kaj diapi. Nicanorpa soldadosnin tukuchisqas karqanku. Nicanorpuni ñaupajta urmarqa. 44Nicanorpa soldadosnenqa rikuytawanqa kamachejninku wañuchisqa kasqanta, maqanaku armasninkuta saqerparispa ayqerqankupacha. 45Judiostaj qhatiykorqanku paykunataqa uj día junt'ata Hadasamantapacha Gezerkama, pututusta waqachispa wasankumanta. 46Tukuynejpi Judea llajtasmanta runa llojsimoj, muyuykamojtaj kanku ayqejkunata. Kutichimorqankutaj, paykunapurata tinkunachispa. 47Tukuyninkutaj espadawan wañuchisqas karqanku. Mana ni ujllapis kausarqachu. Chantaqa judiosqa tarisqankuta apakaporqanku. Chaymanta, qholurparerqanku Nicanorpa umanta, paña makintapis khuchurarqanku. Chay makintaqa paymin wapu wapulla aysasqa. Umantawan makintawan Jerusalenman aparqanku runas rikunankupaj. 48Runasqa anchata kusikorqanku. Chay diataj paykunapaj karqa jatun fiesta. 49Chantaqa, nerqanku chay kutimantapacha chay diaqa waqaychasqa kananta sapa wata chunka kinsayoj kaj diapi Adar killamanta. 50Qhepan wataspitaj allin kay karqa Judá jallp'api.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
Qheshwa Biblia DC © Sociedades Bíblicas Unidas, 1986.