ទំនុកតម្កើង 12

ទូលសូមជំនួយក្នុងគ្រាអាក្រក់!

ទំនុករបស់ស្ដេចដាវីឌ សម្រាប់មេភ្លេង ត្រូវលេងដោយប្រដាប់មានខ្សែប្រាំបី។

1ឱព្រះ‌យេហូវ៉ាអើយ សូមព្រះ‌អង្គជួយផង!

ដ្បិតមនុស្សដែលកោតខ្លាចព្រះ

គេកំពុងតែរួញថយទៅ

ហើយមនុស្សស្មោះ‌ត្រង់ក៏កាន់តែសូន្យបាត់

ពីចំណោមមនុស្សលោកដែរ។

2គ្រប់គ្នាពោលតែពាក្យភូត‌ភរ

ដល់អ្នកជិតខាងរបស់ខ្លួន

គេពោលដោយបបូរមាត់បញ្ចើចបញ្ចើ

និងដោយមានចិត្តពីរ។

3ព្រះ‌យេហូវ៉ានឹងកាត់អស់ទាំងបបូរមាត់

បញ្ចើចបញ្ចើចេញ

ព្រមទាំងអណ្ដាតដែលអួតអាងយ៉ាងសម្បើម

4ជាអស់អ្នកដែលពោលថា

«ដោយសារអណ្ដាតរបស់យើង

យើងនឹងឈ្នះ បបូរមាត់របស់យើង

ស្រេចលើយើង

តើអ្នកណាជាចៅ‌ហ្វាយលើយើង?»

5ព្រះ‌យេហូវ៉ាមានព្រះ‌បន្ទូលថា៖

«យើងនឹងក្រោកឡើងឥឡូវ

ព្រោះមានគេសង្កត់‌សង្កិនមនុស្សក្រីក្រ

ហើយព្រោះតែសម្រែករបស់មនុស្សកម្សត់ទុគ៌ត

យើងនឹងដាក់ពួក‌គេឲ្យនៅទីសុវត្ថិភាព

ដែលគេដង្ហក់រកនោះ»។

6ព្រះ‌បន្ទូលរបស់ព្រះ‌យេហូវ៉ា

ជាព្រះបន្ទូលដ៏សុទ្ធស្អាត

ដូចប្រាក់ដែលគេបន្សុទ្ធក្នុងឡនៅលើដី

ហើយបានសម្រង់អស់ប្រាំពីរដង។

7ឱព្រះ‌យេហូវ៉ាអើយ ព្រះ‌អង្គនឹងថែគេ

ព្រះ‌អង្គនឹងការពារយើង

ចាប់តាំងពីមនុស្សជំនាន់នេះតរៀងទៅ។

8កាលណាមនុស្សលើកតម្កើង

សេចក្ដីលាមកអាក្រក់ឡើង

មនុស្សអាក្រក់ដើរក្រវែលគ្រប់កន្លែង។

Currently Selected:

ទំនុកតម្កើង 12: គកស១៦

Highlight

Copy

Want to have your highlights saved across all your devices? Sign up or sign in

Learn More About ព្រះគម្ពីរបរិសុទ្ធកែសម្រួល ២០១៦