Tito 2

Yongweeza mayongweezo ya hachi

1Ela wewe ni had̯i uyongweeze haya mayongweezo ya hachi. 2Wambe hawa wazee wa kiyume wawe wantu watuvu, wantu wa t̯aḅia nyema, wantu wa mvidhyo, na wawe wantu wa faro, wantu wa matsako, na wantu wa kuit̯isa. 3Na dza vivyo, wambe hawa wake wakuu waishi maisha ya udheru na watsekaiya mambo ya nyano ambu wawe wahumwa wa mvinyo. Ni had̯i wayongweeze yeyo mema, 4ili kwamba wake waḍoḍo wadziyongweeze kuwatsaka wayume wao na wana wao. 5Ni had̯i wawayongweeze kuwa wake wa akili na wadheru na kuwa wahiḍu, weonawat̯ii wayume wao, ili kutseewa muntu jwa kuchinenea mazuka chuuwo cha Muungu.

6Dza vivyo, wafunde hawa wayume waḍoḍo wawe wantu wa kudzimiza. 7Wewe mwenye ni had̯i uwe mufaano wa mahendo mema kwao kwa kula dzambo udzeḍyohenda. Waa muntu jwa kuhikizika na wiyenamuud̯ama ukwakuyongweezani. 8Ikaa ukiyongweeza mambo yeyo sawa kaḅisa, ya kwamba ntayawezi kukungiza kualat̯wani, ili upate kuwakanyera hawa nyabvao, watseepata kintu kizuka kiḍechonse cha kunena dzuu yehu.

9Wambe hawa weo wahumwa, wawat̯ii maḅwana wao na wawatsakize kwa kula kintu. Ntawa ruhusa ya kwambukuyana nao 10ambu kuwakwiwiya. Ishinu, ni had̯i wayange kuwa wahikizika kwa kula kintu. Na kwe hi hii namuna, mahendo yao yanayeha shad̯umea kwa hichi chuuwo cha Muungu mupfonya jwehu.

11Koro Muungu kayanga matsakoye makuu kwa kuwayehea mupfonyo wantu wonse. 12Hayo hayo matsakoye, yakuhuyongweezani kwamba huyatse kuishi maisha mazuka na t̯amaa za kilumwengu, huishi maisha ya kudzimiza, yeyo madheru, na ya kimuungu humu humu lumwenguni, 13huku hukiindiiya hiyo Nsiku ya tsekea hwiyokuieghat̯ani. Hiyo hiyo Nsiku, marembo ya Muungu jwehu mukuu na mupfonya jwehu Yesu *Kirist̯o yanaonekana. 14Jeje kadziyavya maishaye kwa dzambo ḍyehu, ahupfonye na mazuka yonse na kuhudheresa na nabvise zehu, huwe wantuwe jeje heket̯u weo na hamu ya kuhenda mambo mema.

15Haya ndiyo haya mambo wiyonamala kuyongweeza. Na kwa uwezo wako wonse wiwo nao, wafunde na kuwabusa hawa weonakusikiiya. Dziza muntu jwa kukubalifa.

Currently Selected:

Tito 2: pkb

Highlight

Copy

Compare