Upfenuo wa Yohana 8
8
Kuvunzwa kwa hu muhuri wa fungahe
1Kisa huyu Mwana Mbuzi kauvunza hu muhuri wa fungahe. Epfouvunza, hukuḍe mbinguni vyamba mya kwa hafufi nusu saa nzima! 2Niwaona hawaḍe malaika wakuu wofungahe, weonasumama usoni kwa Muungu, wakipfegwa t̯arumbet̯a mfungahe.
3Kisa kudza malaika yungine, kadzakasumama hapfa pfepfo haya *madhabahu. Ewa kagija ḅaakuli ya dhahaḅu ya kufukizia vumba. Na kapfegwa vumba dzinji ḍya kutsanganya na mayombo ya wadheru wa Muungu wonse, ili amuyaviye Muungu hapfa pfa haya madhabahu ya dhahaḅu yeyo usoni ya hichi kiti cha kihaju. 4Na hu mosi wa hiḍi vumba pfamodza na haya mayombo ya wantu wa Muungu, vyenda dzuu mumpaka hapfaḍe pfa Muungu epfokuwa. 5Kisa huyu malaika kahwaa makaa ya moho hapfaḍe madhabahuni, kayangiza humu mwa hi ḅaakuli ya kufukizia vumba na kaifat̯ula lumwenguni. Na kugunga maḅaḅat̯u, mpepfe na muhehemo mukuu wa nsi.
Malaika wane wabiga t̯arumbet̯a zao
6Hawa malaika wafungahe weokuwa na hizi t̯arumbet̯a zomfungahe, wadziweka t̯ayari kuzibiga.
7Malaika jwa d̯ura kaibiga hi t̯arumbet̯a yakwe na kugwa mvuya ya mawe na moho itsanganyikiyeo na mwazi. Hi mvuya igwa lumwenguni, na sehemu modza ya hahu ya huju lumwengu ipfya. Na hi mihi na mani yonse ya hiyo hiyo sehemu vipfya.
8Kisa malaika jwa pfii epfoibiga hi t̯arumbet̯a yakwe, kufat̯ulwa kintu dza murima mukuu wiwoukiwaka moho. Ugwa ḅaharini, na sehemu modza ya hahu ya hi ḅahari ihalawa mwazi. 9Sehemu modza ya hahu ya hivi viumbe vyonse vya humu ḅaharini vifwa. Na sehemu modza ya hahu ya hivi vyombo vyonse vivyokuwa humu ḅaharini vinangwa-nangwa.
10Kisa malaika jwa hahu nae kabiga t̯arumbet̯a yakwe. Kugwa nyoha nkuu kuyawa yuwinguni iyoikiwaka dza tsotso. Igwiya sehemu modza ya hahu ya matsana na sehemu zingine zonse ziizo na madzi. 11Hi nyoha ikihanigwa “Tsungu wa Muharagesa.” Na sehemu modza ya hahu ya haya madzi yagala tsungu. Wantu wenji wafwa kwa dzambo ḍya kunwa haya madzi yeyokuwa tsungu.
12Kisa malaika jwane nae kabiga hi t̯arumbet̯a yakwe. Sehemu modza ya hahu ya hiḍi dzuwa, mwezi na nyoha vipata bigo na ntavikuyangaa kawii. Sehemu modza ya hahu ya hu muyanga wa nasiku na wa musikahi waara.
13Kisa nikidzanikihea matso, niona chalikoko kakuguukani humu angani dzuu. Na nimusikia akinena na saut̯i nkuu akyamba, “Waa d̯inani, waa d̯inani, waa d̯inani! Saa ya hawa malaika wohahu wasaiyeo wadzepfozibiga hizi t̯arumbet̯a zao, wantu weokuishini lumwenguni wanawa d̯inani!”
Currently Selected:
Upfenuo wa Yohana 8: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy
