Upfenuo wa Yohana 12

Nzozi ya muke na ḍyoka

1Kisa niona dzambo kuu ḍya mafara ḍihendekeyeḍyo huku yuwinguni dzuu. Niona muke avwikijwe dzuwa, na hu mwezi wiwa nsii ya nyajoze. Kitswani mwakwe ewa kavwikwa kirauni cha kihaju, cha nyoha kumi na mbii. 2Huyu huyu muke ekiiya kwa dzambo ḍya tsungu mukali eoakisikia, koro ewa kanukijwa na ka hafufi kudzifunguya.

3Iyo saa niona dzambo ḍingine ḍya mafara ḍihendekeyeḍyo huku yuwinguni. Niona ḍyoka kuu ḍya ranji ya moho ḍiḍyokuwa na vitswa vifungahe na mpembe kumi. Na humu vitswani, ḍiwa na virauni vifungahe vya kihaju. 4Hu muchiawe ukururya sehemu modza ya hahu ya hizi nyoha za yuwinguni, na uzigisa lumwenguni. Hiḍi ḍyoka ḍisumama usoni ya huyu muke eyenukijwa, ili akidzifunguya t̯u, ḍimumiye huyu mwana.

5Huyu muke kadzifunguya mwanamuyume adzeet̯awala vyeet̯i vyonse na nsimbo ya chuma. Ela huyu mwana epfovyajwa t̯u, kapfojwa kapfiikwa mumpaka hapfaḍe pfa Muungu akaiyepfo kitini mwakwe mwa uhaju. 6Na huyuḍe muke kad̯arama kenda yuwandani, pfantu epfoelekanyijwa ni Muungu ili aweze kut̯unzwa kwa nsiku elefu modza na magana mawii na miyongo mihandahu.

7Kisa kunuka viha mbinguni. Mikaeli na malaikawe wajwana na hiḍi ḍyoka na malaikawe. 8Hiḍi ḍyoka na malaikawe washindwa na ntawakuwa na pfantu pfa kukaa kawii hukuḍe mbinguni. 9Ndookomu ḍifat̯ulwa nsii lumwenguni ḍiḍyo na malaikawe. Hiḍi hiḍi ḍyoka ni iiḍe nyoka ya hangu kae na kae, iyonahanwa Muzuka ambu Shaat̯ani. Na huyu ndiye eyekujwaaryani huju lumwengu jwonse.

10Kisa nisikia saut̯i nkuu kuyawa mbinguni ikyamba, “Ehe! Sasa Muungu jwehu kakuwapfonyani wantuwe na kamakut̯awalani na mamulaka makuu! Huyu Mutsanwa jwakwe sasa anayanga uwezowe eo nao! Koro huyu eyeakisumama usoni ya huyu Muungu jwehu na kuwasit̯aki hawa wenzehu siku na musikahi, sasa kamagiswa nsii na nkawezi kusumama awasit̯aki kawii! 11Hawa wenzehu wamushinda Shaat̯ani kwa dzambo ḍya hu mwazi wa huyu Mwana Mbuzi wihijweo na kwa dzambo ḍya ushuhuḍa wao weo nao. Koro ntawakuyahwaa maisha yao kuwa na maana, ela wewa t̯ayari hat̯a kufwa kwa dzambo ḍya Ḅwana. 12Ndookomu tsekeani muno nywinywi mwiwo kukaani mbinguni! Ela nywinywi mwiwokukaani lumwenguni na ḅaharini mujwakukunta d̯ina muno! Koro Shaat̯ani kamusukia na ngoro nkali muno akimanya ya kwamba nka muḍa muyeya wa kuihenda hi kaziye!”

13Hiḍiḍe ḍyoka ḍipfodzihambuya kwamba ḍigiswa nsi lumwenguni, ḍiḍabva kumuuḅa huyuḍe muke avyaiye huyuḍe mwana. 14Ela huyuḍe muke kapfegwa maḅawa mawii yeyo dza maḅawa ya chalikoko mukuu. Kaguuka kenda yuwandani kuye na hiḍiḍe ḍyoka.#12:14 Hapfa na 12:15, haya matsoro ya Kiyunani yahadza nyoka. Kenda hukuḍe kuntu ekoelekanyijwa, ili aweze kut̯unzwa kwa muḍa wa ngera modza, ngera mbii na nusu ngera. 15Hiḍiḍe ḍyoka ḍiyavya madzi menji na humuḍe kanwani mwakwe ili ḍipate kumuyaga madzi huyuḍe muke. Haya madzi yavuha nyuma ya huyuḍe muke dza tsana, 16ela hu mutsanga umupfonya. Udziḅaa pfangapfanga kuu na hi tsana yonse iyawiyeyo kanwani mwa hiḍiḍe ḍyoka imijwa mutsangani kuzimu. 17Ndookomu hiḍiḍe ḍyoka ḍimurejea huyuḍe muke muno na ḍihuna kwendajwana na hawa wana wangine wa huyuḍe muke. Hawa ni hawaḍe weonaziuḅa hizi sharia za Muungu na kuyavya ushuhuḍa dzuu ya Yesu.

Binensa ayawiyee na ḅaharini

18D̯ubva hiḍi ḍyoka ḍyenda ḍisumama geri ya ḅahari.#12:18 Matsoro yangine ya Kiyunani yanakwamba: D̯ubva nyenda nisumama geri ya ḅahari. Na pia makoranyo yangine, huju huju yudhiri jwonse jungizwa 13:1.

Currently Selected:

Upfenuo wa Yohana 12: pkb

Highlight

Copy

Compare