Filemoni 1

1Mimi Paulo nifungijwee gerenzani kwa dzambo ḍya kuyasumwiiya haya *Maagu Mema dzuu ya *Kirist̯o Yesu, ndimi niyekworani hi hii ḅaruwa pfamodza na ndugu yehu Timoteo.

Nyakukworeani wewe ndugu Filemoni wiye muhumisi mwenzehu hukutsakiyee muno. 2Cha d̯ura, hukedhyeye hiḍi tsanganiko ḍiḍyonayomba nyumbani mwako, na imbu ḍyehu Afia, pfamodza na ndugu Arikipo eyenayahehea haya Maagu Mema dza asikari mwenzehu.

3Muungu Baba na Ḅwana jwehu Yesu Kirist̯o nawamuvodhye na kumumpa naghea nto.

Paulo kamuyombea Filemoni na kumuyaviza ḍuḍa Muungu

4Ndugu Filemoni, kula nipfonawa kukuyombeani nakaa na kumuyaviza ḍuḍa Muungu jwangu, 5koro nakaa na kusikia namuna umuhikiziyevyo Ḅwana Yesu, na namuna uwatsakiyevyo wantu wonse wa Muungu. 6Nyakukuyombeani kwamba hivi wivyonakaa na kuhariana na wahikiza wenziwo, ugije kuhariana nao zaid̯i na zaid̯i. Koro ukihenda hivi, unapata kuzimanya hizi kazi nyema nyema zonse wizonaweza kumuhendea Kirist̯o. 7Ndugu yangu mutsakwa, mimi mwenye nina tsekea nkuu muno na hat̯a hu mojo wangu uniingamaa kwa dzambo ḍya kwamba haya matsako wiyonayo kwa wantu wa Muungu yanakaa na kuwangiza mojo muno.

Paulo kamuyombea Onesimo kwa Filemoni

8Ndookomu kwa dzambo ḍya kwamba hwonse hu ndugu humuhikiziyeo Kirist̯o, sikwakushoogani kukuamuru kwamba uhende hiviḍe wivyonamala kuhenda. 9Ela kwa dzambo ḍya hivi hutsakananiyevyo, niona kwamba heri nikuyombe kuliko kukuamuru. Ndiyo maana mimi Paulo niiye jarisa,#9 Haya matsoro ya Kiyunani pia yanaweza kuwa na maana ya ḅalozi. na nifungijwee gerenzani kwa dzambo ḍya Yesu, nyakukuyombani dza ḅamujo. 10Nyakumuyombeani Onesimo kwako, eye mwanangu jwa kiruhu. Koro hivi hivi niivyo gerenzani nimusumwiiya nae kagala muhikiza. 11Gula d̯ura Onesimo#11 Onesimo maana yakwe ni “kuwa na maana.” nkewa na maana muno kwako le, ela sasa ana maana kwako na kwangu pia.

12Onesimo mwana nimutsakiye dza mojo wangu, nyakumugalichani kwako. 13Ninkitsaka muno kwamba nikae nae ili aweze kunimpa ugijo pfantu pfako, kwa hu huu muḍa nifungijweo gerenzani kwa dzambo ḍya kuyasumwiiya haya Maagu Mema. 14Ela sikutsaka kuhenda dzambo ḍiḍeḍyonse pfasipfo ruhusa yako. Na nihenda hivi ili ugijo uḍewonse udzeotsaka kunimpa, uweze kuunimpa kwa miro yako wewe mwenye pfasipfo kusharut̯iswa. 15Pfangine saḅaḅu ya Onesimo ya kut̯anywa kuye nawe kwa muḍa mufufi, ni kwamba adzeaweze kuwa jwako maishi. 16Ela sasa si muhumwa t̯u, kenge ni ndugu mwenzehu amuhikiziye Kirist̯o. Mimi nimutsaka muno. Na nimanya ya kwamba, wewe unamutsaka zaid̯i, dza muhumwao na pia dza ndugu amuhikiziyee Ḅwana.

17D̯ubva kwa kwamba mimi unakaa na kunihwaa dza muhumisi mwenziwo, ḅasi Onesimo nae mupfokeye urembo dza kwamba kwakunipfokeani mimi mwenye. 18Ikiwa kwamba kakutsowea kwa njia iḍeyonse, ambu ana rando ḍiḍeḍyonse kwako, ḍinit̯aliye mimi. 19Hapfa, mimi Paulo nyakworani na mukono wangu mimi mwenye, kwamba, “Akiwa na rando ḍiḍeḍyonse naḍiipfa mimi.” Na ntai haḍya ya kukukumbusya kwamba, hat̯a nawe una rando kwangu kwa dzambo ḍya haya maisha mapfya upatiyeyo kuchiiya nami. 20D̯ubva ndugu yangu, nyakukuyombani kwa sari ḍya Ḅwana kwamba, unihendeye hu huu wema ili uweze kuningiza mojo dza Mukirist̯o mwenziwo.

21Hivi hivi nivyokukuyeheani hi hii ḅaruwa, nina hakika kwamba unahenda hat̯a zaid̯i ya hivi nikuyombeyevyo.

22Natsaka uniwekeye chumba cha kudza nikae, koro nina mat̯umaini kwamba Muungu anayasikia haya mayombo yenu na ananiyatsa niuje huko kwenu si hat̯a kae.

Kedhya za kwisia

23Huyu mwenzangu Epafuro hufungijwee pfamodza gerenzani kwa dzambo ḍya kumuhumikia Yesu Kirist̯o, kakukedhya nto. 24Na hawa wahenda kazi wenzangu, aḍe Marko, Arisitako, D̯ema na Luka, nao pia wakukedhya nto.

25T̯ei ya Ḅwana jwehu Yesu Kirist̯o naiwe pfamodza nanywi nyonse. Ikaani naghea.

Currently Selected:

Filemoni 1: pkb

Highlight

Copy

Compare