Waeburania 13

Ishini maisha ya kumutsakiza Muungu

1Gijani kutsakana dza ndugu Wakirist̯o. 2Namutseyatsa kukaraḅisha wageni madzumbani mwenu. Koro wangine, kwa dzambo ḍya kutsayatsa kukaraḅisha wageni, wakaraḅisha malaika pfasipfo kuvimanya. 3Wamuud̯amiyeni hawaḍe weo gerenzani, dza kwamba nanywi mufungwa pfamodza nao. Wamuud̯amiyeni na hawaḍe weokukuntiswani d̯ina, dza kwamba hizi d̯ina mwakuzikuntiswani nywinywi.

4Ndoa naihilwe ni kula muntu! Ntaku ruhusa ya muke ambu muyume kuyawa nze, maanaye Muungu anawahukumu hawaḍe wonse weo waḅari na wantu wa ranga.

5Nywinywi namutsehekwa ni uhamile wa kutsaka fwedha. Furumani na hivi mwivyonavyo, koro Muungu kamba, “Siwezi kumuyatsa, na wala siwezi kumufat̯ula.” 6D̯ubva hunaweza kunena pfasipfo oga, hwambe,

“Ḅwana ndiye mugijiija jwangu,

siwezi kuwa na oga.

D̯ubva mwanaad̯amu anaweza kunihenda kintu ga mimi?”

7Wakumbukeni hawa wayongozi wenu weomusumwiiya chuuwo cha Muungu. Yowani namuna wevyoishi na namuna wadzevyowakifwa, nanywi mut̯aḅe hi faro yao. 8Koro Yesu *Kirist̯o nkadzaperuka. Ni yuyuḍe jwa dzana, yeo, na hat̯a pfasipfosia. 9D̯ubva namutseyatsa kula aina ya mayongweezo mageni yamwaarye. T̯ei ya Muungu kwehu, ndiyo iyonahungiza nguvu, ela kuuḅa masharia ya kuḍya chakuḍya kisiku ambu kutsaaḍya chakuḍya kisiku ntakusaiḍie yuḍejwonse. 10Hawaḍe wakohani wa Kiyahud̯i weonahumika humuḍe mwa hiḍi hema, ntawa hachi ya kuḍya hi mvuugiya yehu hwiyonayavya.

11Kula mwaka, huyu *Mukohani Mukuu jwa Kiyahud̯i ekikaa na kutsukuya mwazi wa waḍondo akanjia nao hapfa Pfantu Pfadheru pfa mwiso. Ekinjia nao akauyavya dza mvuugiya ya kuyatsijwa wantu nabvise. Ela hivi vivimba vya hawa waḍondo vikitsomwa nze ya hi nkambi. 12Ndiyo maana Yesu nae, kafwa nze ya hu mudzi apate kuwadheresa wantu nabvise zao kwa mwaziwe mwenye. 13D̯ubva naswi, nahuyawe nze ya hi nkambi hwende kwa Yesu, hukabeye hukuajaiswa kwakwe aajaisijweko. 14Koro huju huju lumwengu siyo makao yehu ya maishi, swiswi hwakuyoweeyani hu mudzi wehu udzeokudza.

15D̯ubva kuchiiya na kwa Yesu, swiswi nahumuyavize Muungu mvuugiya ya kumushad̯a kut̯wa, iyo mvuugiya ya wantu weonakwamba Yesu ni Ḅwana jwao. 16Namutseyatsa kuwahendea mema wangine. Gijiijanani na hiviḍe mwivyonavyo, maanaye mukihenda hivyo, ni dza kuyavya mvuugiya zizonamutsakiza Muungu.

Wat̯iini wayongozi wenu

17Wat̯iini wayongozi wenu na muuḅe hivi wevyonamwambia. Wao wakudzitsovyani nsoho kwa dzambo ḍya kumumuud̯amia nywinywi, maanaye ni had̯i wadzewamuyange Muungu hi kazi yao wahendeyeyo. Wat̯iini wapate kuihenda kazi yao na tsekea. Mukitsawat̯ii, kazi yao inawa nyumu na wanaihenda na tsungu, ndookomu hi kazi yao ntaimufaiḍi na kintu.

18Namutseyatsa kuhuyombea. Myojo yehu ntai wasiwasi, maanaye hunatsaka kuhenda hi ya hachi kut̯wa. 19Nyakumuyombani muno, mugije kuniyombea ili Muungu anigaliche huko kwenu haraka ivyonawezekana.

Mafunda ya kwisia na kedhya

20Muungu ndiye amufufwiiye Ḅwana jwehu Yesu, eye Mut̯ikisa Mukuu jwa hizi mbuzi. Jeje ni mut̯ikisa mukuu kwa dzambo ḍya kudziyavya kwakwe dza mvuugiya akifwa. Hu mwaziwe uwa ndiwo mwazi wa hiḍi ḍamano ḍya maishi kahi ya Muungu na wanaad̯amu. 21Nyakumuyombeani kwamba, huyu Muungu eyenangiza naghea, amumpe kula kintu chema mwicho na t̯uri nacho mupate kuhenda miroye. Na nyakuyombani kwamba, kuchiiya na kwa Yesu Kirist̯o, Muungu ahende hayaḍe yeyonamutsakiza kuzimuni mwehu. Na Yesu ashad̯we maishi na maishi, Amina.

22D̯ubva wandugu zangu, nyakumuyombani mutsetsoka kusikiiya hivi vyuuwo vya kungiza mojo nivyokumwambiani. Koro hi hii ḅaruwa nimworeeyo si ndeya ya kwambadze.

23Natsaka kumumanyisa kwamba, ndugu Timoteo kesakuyavigwa na gerenzani. Na akidza mapfema, nikwakudzani kwenu, hunagijana pfamodza humut̯embeeye.

24Hukedhyeyeni wayongozi wenu na wantu wonse wa Muungu. Hawa wandugu wa Ut̯aliano nao wamukedhya nto.

25T̯ei ya Muungu naiwe pfamodza nanywi nyonse.

Currently Selected:

Waeburania 13: pkb

Highlight

Copy

Compare