2 Timoteo 4

1Kwa dzambo ḍya kudza kwa *Kirist̯o Yesu dza haju, nyakukuamuruni usoni kwa Muungu na kwa Yesu Kirist̯o, adzeewahukumu weo mojo na wafwiyeo: 2Sumwiiya hichi chuuwo. Wewe gija kukisumwiiya ngera zonse, uwe wakatiwe ambu utseewa wakatiwe. Kisumwiiye kuwafunda wantu, kuwabusa na kuwangiza mojo, na wayongweeze na umpowe. 3Koro ngera zakudzani za wantu kudziza kusikiiya mayongweezo ya hachi. Ishinu wadzakaiya chaka cha kusikiiya mambo garagara, na wanadziundukizia waalimu wenji na wenji wa kuwambia haya weyonatsaka kuyasikia. 4Wadzayatsa kuisikiiya hi hachi wananjia kusikiiyani ngano za nsuwe. 5Ela wewe, zigwaze akilizo kwa kula hali. It̯isa mad̯inani, ugije kusumwiiya haya *Maagu Mema. Henda kula kintu chichonakumala kuhenda dza muhumisi jwa Muungu. 6Ami le, nsiku zangu za kuyavigwa dza mvuugiya zimaafika. Na nsiku zangu za kufwa zimaawa hafufi. 7Dza vya muntu jwa mbio, nihenda kula niwezeyecho na hizi mbio nizid̯arama nizisa, na faro yangu sikuiyekeza. 8Na sasa hiḍi t̯ubvo ḍya kushinda kwangu ḍyakuniindani. Naḍyo ni t̯ubvo ḍya kwamba niweza kuishi maisha ya udheru.#4:8 Ambu: ni t̯ubvo ḍya kuhendezwa kuwa mudheru. Ḅwana, muhukumu jwa hachi, kadzaḍinimpa hiyo hiyo nsiku ya mwiso. Na nkakudzaḍinimpa mimi t̯u, ela na hawaḍe wonse weokuyoweeyani na hamu kuuja kwakwe.

Maḍamano na kedhya

9Ḍema kula udzevyoweza udze huku haraka huonane. 10Koro D̯ema kahekeka na mambo ya huju huju lumwengu, na kanid̯arama kachia Tesalonike. Ae Kireseni kenda Galatia, na Tito kachia Dalimatia. 11-12Na Tukiko nimuhuma Efeso. Ahafiye nami ni Luka jeje heket̯u. D̯ubva ukwakudzani, muhwae na Marko udze nae, kwa dzambo anaweza kunigijiija hi kazi. 13Ukwakudzani, ḍiyehe hiḍi koti ḍyangu niḍiyatsiyeḍyo na Kapo hukuḍe Tiroa. Viyehe na hivi vyuo, haswa hiviḍe vielekanyijwevyo na nchingo.

14Huyu Alekizanda mufuya vyuma, kanihendea mazuka menji muno. Ḅwana anamuipfa kwa haya ahendeyeyo. 15Wewe mwenye dzit̯unze nae, kwa dzambo ewa kayapfinga vyumuni haya mayongweezo yehu.

16Huḍe mweedha wa d̯ura nipfosumama d̯ubini kudzihehea, ntakwiwa muntu anineneeye. Kula muntu kanid̯arama. Nyakuyombani Muungu atseviwat̯alia. 17Ela Ḅwana kanisumamia na kunimpa nguvu. Ndookomu haya Maagu Mema yonse niweza kuyasumwiiya yapate kusikijwa ni wantu wonse wa vyeet̯i vingine, na Muungu mwenye kanipfonya na kufwa. 18Ḅwana ananipfonya na mazuka yonse, na ananipfiika salama kwa uhaju wakwe wa mbinguni. Ḅwana ashad̯we maishi na maishi! Amina.

19Nikedhyea Pirisila na Akwila na nyumba ya Onesiforo. 20Erasto kahafa Korint̯o, na Tirofimo nimuyatsa Mileto, kwa kwamba ni mujwazi. 21Ḍema kula njia, udze sika asidzaḍabva.

Ebulo, Pudeni, Lino, Kilaudia na hawa wandugu wangine wonse, wamukedhya nto. 22Ḅwana nawe pfamodza nawe ruhuni mwako. Na t̯ei ya Muungu naiwe pfamodza nanywi nyonse.

Currently Selected:

2 Timoteo 4: pkb

Highlight

Copy

Compare