2 Timoteo 2

Waa muhikizika kwa Kirist̯o Yesu

1D̯ubva wewe mwanangu, haya matsako ya Muungu hwiyonayo hariani mwa *Kirist̯o Yesu, nayakungize nguvu. 2Hayaḍe mayongweezo nikupfiyeyo usoni ya mashaahiḍi wenji na wenji, yahwae uyawayongweeze wantu weonahikizika, wadzeoweza kuwayongweeza na wantu wangine.

3Dzifunge kukunta d̯ina dzaswi, dza asikari mut̯iifu jwa Kirist̯o Yesu. 4Ntaku asikari eyenawa kazini, akayatsa kudzitsakiza kwa mukuuwe, akanjia kudzingizani-ngizani kwa maisha ya wantu wa kawaiḍa. 5Na muntu anjiiye mashindano ya mbio, nkawezi kushinda apfegwe t̯ubvo, ikiwa kwamba nkakuuḅa hizi sharia za mbio. 6Dza vivyo, muntu jabva jwa kuima ndiye eyenamala kupata haya mavuno ya d̯ura. 7Yat̯arie haya mambo nikwambiiyeyo, na Ḅwana anakuwezesa kuimuka kula kintu.

8Kumbuka kwamba Yesu Kirist̯o, kayawa sindo wa haju D̯aud̯i na kafufujwa kuyawa kwa wafu. Na haya ndiyo haya *Maagu Mema niyonasumwiiya. 9Na kwa dzambo ḍya haya haya Maagu Mema niyonasumwiiya, nyakukuntiswani d̯ina, na ninjia hat̯a kufungwani minyoro dza kwamba niwa muhenda mazuka. Ela chuuwo cha Muungu ntakiwezi kufungwa minyoro. 10D̯ubva, nabea mazuka yonse kwa dzambo ḍya watsanwa wa Muungu, ili nao wapate kupata mupfonyo kuyawa kwa Kirist̯o Yesu, pfamodza na maisha ya kuunga na yuungo.

11Hu muneno hu ni muneno wa ḍugha:

Ikiwa kwamba hufwa na Kirist̯o,

pia hudzaishi pfamodza nae.

12Ikiwa kwamba hugija kuit̯isa,

pia hudzat̯awala pfamodza nae.

Ikiwa kwamba humukana jeje,

nae pia anahukana.

13Hukitsowa kuwa wahikizika,

jeje nkayatse kuwa muhikizika,

kwa kwamba jeje nkawezi kuvunza ahad̯i yakwe.

Waa muhenda kazi jwa kumutsakiza Muungu

14Hawa wantuwo, wakumbusye haya mambo. Wakanye kwa sari ḍya Ḅwana, watsekaiya kuḍaat̯ia vyuuwo. Huko kuḍaat̯iana ntakumusaiḍie yuḍejwonse, ishinu kunananga faro za wantu wadzeovisikia. 15Ḍema mala wiyonaweza upate kuhikizika kwa Muungu, uwe muhumisi asiyeionea yutswa kaziye na eyenaiyongweeza urembo hi hachi ya haya Maagu Mema ya Muungu. 16Dzit̯anye na vyuuwo visivyo maana, vivyonangiza wantu kuhendani mazuka zaid̯i na zaid̯i. 17Mayongweezo dzayo, ni dza kilonda ndugu kisichopfowa. Na wangine weonayongweeza hayo hayo mayongweezo ni aḍe Hamena na Fileto. 18Hawa wantu wowii waiyatsa hi njia ya hachi, na wakunangani-nangani faro za hawa wahikiziyeo. Wanayongweeza kwamba, hu ufufuo si dzambo ḍidzeḍyohendeka, ela wanakwamba wisakuhendeka. 19Ela Muungu kaḍisumamisa hiḍi tsanganiko ḍyakwe dza musinji mumu gu usiosukusika. Na hu musinji woregwa hivi vyuuwo hivi: “Ḅwana kamanya weo wakwe.” Na kawii woregwa hivi: “Yuḍejwonse ambiye njwa Ḅwana, ni had̯i ayayatse mazukaye.”

20Kuzimuni mwa nyumba nkuu, kunakaa kukiwa na vija vya namuna garagara. Vingine vinaelekanywa na fwedha ambu dhahaḅu, na vingine vikawa vya muhi ambu vya haka. Vija vingine vinatumika byeka kwa mambo ya hila, na vingine vikatumika kwa mambo ya kawaiḍa. 21Na muntu akidzidheresa na mazuka yonse, anawa dza kija cha kutumika byeka kwa mambo ya hila. Anatsanigwa ni Muungu na anawa muntu jwa maana kwa Ḅwana, jwa kuhenda kula aina ya kazi nyema.

22Timoteo, nkudzohekwe ni t̯amaa za uḍyana, ela jwania kuishi maisha mema, uwe muhikizika kwa Kirist̯o, na uwatsake Wakirist̯o wenziwo na kuwa na naghea nao. Wewe pfamodza na hawaḍe wonse weonamuyomba Ḅwana na mojo mumodza hendani dzevihivi. 23Ela wantu weo na yuḍaat̯o jwa uḍyura na jusijo maana, wakaiye kuye. Koro kumanya ya kwamba yuḍaat̯o dzajo, mwiso junasia na kuheha. 24Na muhumisi jwa Ḅwana ni kutsaawa muntu jwa kuheha. Ni had̯i awe mumpowe kwa wantu wonse, na awe mwaalimu mwema na eyenait̯isa. 25Akwakuwafundani hawa weonamupfinga, ni awafunde na umpowe. Pfangine Muungu anawapfa kupfyehuza mama, na wanaimanya hi hachi. 26Na ndipfo pfa akili zao zidzepfowagalia na wadzepfoweza kumud̯arama Shaat̯ani, eyewaheka akiwahendeza wahende miroye.

Currently Selected:

2 Timoteo 2: pkb

Highlight

Copy

Compare