2 Pet̯ero 1
1
1Mimi Simioni Pet̯ero, niiye muhumisi na *ntumi jwa Yesu *Kirist̯o, nyakumworeani nywinywi nyonse mumuhikiziyeo Yesu Kirist̯o, eye Muungu na mupfonya jwehu. Yesu kamuhendeza muwe na faro iyo na thamani dza hi ahupfiyeyo swiswi kwa dzambo ḍya wemawe. 2Muungu namuvodhye zaid̯i na zaid̯i na kumumpa naghea nto kwa kwamba mumumanya jeje na Ḅwana jwehu Yesu.
Namuna ya kukuya dza wantu wahanijweo ni Muungu
3Kwa uwezo wa Muungu amumpiyeo, Yesu kahupfa kula kintu hwichonamala kuwa nacho ili huweze kuishi maisha ya udheru. Kavihupfa kuchiiya na kwa kumumanya jeje ahuhaniye huwe na maremboye na wemawe. 4Na kwa dzambo ḍya haya haya maremboye na memaye, kahuahid̯ia kuhupfa mambo makuu muno ya thamani. Na haya ahuahid̯iiyeyo kayahupfa ili kwamba muweze kuishi dza wana wa Muungu. Haya haya kayamumpa ili muweze kupfona kuyawana na haya mambo yeyonawananga wantu wa huju lumwengu, yeyonayehegwa ni t̯amaa nzuka nzuka.
5Kwa dzambo muhanigwa muishi maisha ya kimuungu na mumuhikiza Kirist̯o, ḅasi hendani kula mudzeḍyoweza ili kwamba muwe na t̯aḅia nyema pia. Na zaid̯i ya kuwa na t̯aḅia nyema, muwe wantu wa kumumanya Muungu. 6Na zaid̯i ya kumumanya Muungu, ni had̯i muwe wantu wa kudzimiza na t̯amaa zenu. Na namutseewa wantu wa kudzimiza t̯u, ela wani pia na wantu wa kuit̯isa mad̯inani. Na mukimaawa wantu wa kuit̯isa, ni had̯i muishi maisha ya kumutsakiza Muungu. 7Mukwakuishini maisha ya kumutsakiza Muungu, ni had̯i muwatsake na mojo mumodza hawa wahikiza wenzenu, na muwatsake wantu wonse pia. 8Ndookomu haya haya yonse yakimudzaa, munawa wantu wa kumuhendea Muungu kazi nyema, na maisha yenu yanamuvyaiya Muungu matunda mema, huku mukigija kumumanya Ḅwana jwehu Yesu Kirist̯o zaid̯i na zaid̯i. 9Ela yuḍejwonse asiyekuwa na myenendo dza hii, ka dza muntu eyenaona mawizawiza kaḅisa na hat̯a ka dza ntumbu matso haswa! Muntu dzae kaarerwa kwamba nabviseze za kae kaziyatsijwa.
10D̯ubva wandugu zangu, hendani kula mwichonaweza ili muyange kwamba Muungu kamutsana na kamuhana ḍugha! Mukihenda hivyo ntamunagwa nabviseni meshi.#1:10 ntamunagwa nabviseni meshi, ambu ntamunaiyatsa faro yenu meshi. 11Ndookomu nanywi mudzapfokejwa urembo, muunjie hu uhaju wa kuunga na yuungo, wa Ḅwana na mupfonya jwehu Yesu Kirist̯o.
12Ndiyo maana nisiyoyatsa kumukumbusya kawii na kawii dzuu ya haya haya mambo, ingawa muyamanya, na muigija na mikono miwii hi hachi muisumwiijweyo. 13Ndookomu niona vyema kwamba nikae na kumukumbusya-kumbusya dzuu ya haya haya mambo mala niiyo mojo. 14Koro Ḅwana jwehu Yesu Kirist̯o kesakuniyanga tswee kwamba si nsiku nyinji za kuishi amaale. 15Nami nahenda kula nidzevyoweza kumulachia njia ya kwamba meshi mudzayakumbuka haya mambo, hat̯a nikidza nikifwa.
Nina uhakika wa hivi nivyokunenani
16Hwipfomwambia dzuu ya uwezo wa Ḅwana jwehu Yesu Kirist̯o na kudza kwakwe yupfii, ntahukumwambia mambo ya kamba na ambigwa hat̯a. Huyaona maremboye na matso yehu swiswi wenye. 17-18Koro saa ya Muungu Baba jwehu epfomuhendeza Yesu ayangae na marembo na akimuyanganya kwamba ni mukuu, swiswi wenye hwiiwa pfamodza nae hapfaḍe dzuu ya hu murima mudheru. Husikia idzwi kuu kuyawa mbinguni ḍikyamba, “Huyu ni Mwanangu mutsakwa, nitsakizijwee nae muno.”
19Ndookomu huna uhakika kwamba hivi vyuuwo vya hawa manabii waneneyevyo dzuu ya Kirist̯o mvya ḍugha. Na ni urembo kwamba muvigije na mojo koro vyaa dza tsaa iyonayangaa kizani hat̯a nsi ikacha. Vigijeni na mikono miwii mumpaka saa ya hu muyanga wa Kirist̯o, huyu eye dza nyoha ya magura udzepfomuyangaiya. 20Na zaid̯i ya hayo yonse, natsaka muimuke kwamba ntaku yuḍejwonse eyenaweza kuyaimuka haya matsoro ya hawa manabii na akili yakwe jeje mwenye,#1:20 Ambu: ntaku nabii yuḍejwonse oreye vyuuwo vya kuyawa mojoni mwakwe jeje mwenye. pfasipfo kuyongojwa ni Ruhu jwa Muungu. 21Koro ntaku unabii uḍewonse udziyeo kwa miro ya mwanaad̯amu. Kenge hawa manabii wayongojwa ni Ruhu Mudheru, na wanena vyuuwo viyawiyevyo kwa Muungu.
Currently Selected:
2 Pet̯ero 1: pkb
Highlight
Copy
Compare
Share
Want to have your highlights saved across all your devices? Sign up or sign in
© 2004, Bible Translation and Literacy
