1 Timoteo 5

Namuna ya kuḍit̯ikisa hiḍi tsanganiko

1Nkudzomubuse muntu mukuu, ela nena nae na umpowe dza kwamba kwakunenani na babajo. Hawa wayume waḍoḍo wahwae dza wanduguzo, 2hawa wake wazee uwahwae dza wamamazo, na hawa wake waḍoḍo wahwae dza waimbuzo pfasipfo kuwa na mat̯aro mazuka nao.

3Wapfe ugijo wake wachiwa weo wachiwa hachi! 4Ela ikiwa kwamba muke muchiwa ana wana ambu wadzukuu, wao ni had̯i nguzi wadziyongweeze kuit̯unza hi nyumba yao kwa kumushooga Muungu. Na kwe hi namuna wanawagalichia ḍuḍa wavyazi wao na wabibi zao, koro ndivyo vya Muungu evyonatsaka. 5Huyu muke eye muke muchiwa jwa ḍugha, asiye muntu jwa kumut̯unza, madzikwat̯yo yakwe kayaweka kwa Muungu. Siku na musikahi anagija kumuyomba Muungu na kumulacha ugijo. 6Ela muke muchiwa adzingizie maisha ya kudzitsekeza, huyo kesakufwa, hat̯a ingawa kakuishini. 7Wapfe hi hii amuri ili kwamba kutseewa na muntu jwa kuwaona na tsowa. 8Ela muntu akitsawat̯unza hawa wantu eo na yuuko nao, na fat̯i wantu wa nyumbani mwao, huyo kesakuikana hi faro ya Kikirist̯o na kakuhendekani viwi kuchia muntu asiyedzahikiza.

9Muke muchiwa jwa kungizwa kwa hi orodha ya wake wachiwa wa tsanganiko, ni huyuḍe t̯u eye na myaka miyongo mihandahu na zaid̯i. Na ni had̯i awe ewa kahwajwa mweedha mumodza t̯u. 10Na ni had̯i awe muke amanyikaniye kwa mahendoye mema, dza mahendo ya kuyeya wanawe urembo, kukaraḅisha wageni nyumbani mwakwe, kukosa#5:10 Hizihiziḍe ngera wahumwa wekikosa wageni maguu dza adha ya kukola ḍukuu ḍya maguuni wasidzangizwa nyumbani. maguu ya wantu wa Muungu, kugija wantu weo d̯inani, na kudziyavya kuhendea wantu kula aina ya hendo dzema.

11Ela wake wachiwa weo nsii ya myaka miyongo mihandahu, namutsewangiza humu mwa hi orodha ya wake wachiwa wa tsanganiko. Koro hamu zao za kimwii zikiwanjia, wadzat̯amani kuhwajwa. Ndookomu wanamuyatsa *Kirist̯o, 12na wanapata hukumu kwa kuvunza ahad̯i yao wawekeyeo kwa Kirist̯o. 13Na kawii wanadziyongweeza kudzikaiya ḅasi na kutsumpa-tsumpa huku na huku, wakinjia na kuyawa madzumba ya wantu. Na si hivyo t̯u, ela wanadziyongweeza na kuwa wantu wa nyano na vitsampizi, wakinjiiya mambo yasiyowamala. 14D̯ubva, ami nindetsaka hawa wake wachiwa waḍoḍo wahwajwe kawii, wavyae wana na wat̯unze madzumba yao, wapate kutsawapfa nyabva wehu kapfango ka kuhunenea mazuka. 15Koro wake wachiwa wangine wesakuperuka na wakumuuḅani Shaat̯ani.

16Muke Mukirist̯o yuḍejwonse, nyumbani mwao kukiwa wake wachiwa, ni had̯i awat̯unze. Hu muzigo nka ruhusa ya kuupfaza tsanganiko, ili kwamba hiḍi tsanganiko ḍipate kuwat̯unza hawa wake wachiwa wasio na wantu t̯u.

17Hawa wazee weonahenda kazi nyema ya uyongozi, na haswa hawaḍe weonasumwiiya na kuyongweeza na hiḍu, wanamala kuhilwa na kuipfwa urembo. 18Koro haya matsoro yamba, “Nkudzoifunge kanwa ngombe ikwakukuvuniani bvaro.”#5:18 Ḅaad̯a ya nganu na shayiri kukekentwa, ikirangwa-rangwa ni ngombe zipate kuit̯anya hi nganu na haya maḅuwa. Kwiwa sharia ivingiriyeo kuzifunga manwa hizi ngombe zikwakurangani-rangani hi bvaro ili ziwe huru kuḍya. Na “Kula muhenda kazi anamala t̯ubvoḍye.” 19Nkudzosikiiye masit̯aki yaḍeyonse dzuu ya muzee, lamud̯a yawe yayehegwa ni mashaahiḍi wawii ambu wahahu. 20Ela hawa wazee weonahenda nabvise, wabuse wekeani tswee, ili hawa wangine nao wanjie oga.

21Nyakukuamuruni usoni kwa Muungu, usoni kwa Kirist̯o Yesu na kwa malaika wadheru, uzigije hizi amuri pfasipfo kuyatsa hat̯a modza. Na wala nkudzohende mambo kimwana abo na kimwana ano. 22Nkudzorebve kumupfaza muntu mikono umuvodhye kwa kazi ya Ḅwana. Nkudzouwe na mukuruḅa na nabvise za wantu wangine, dziweke udheruni.

23Nkudzokaiye kunwa madzi ḅasi, ela ikaa na kunwa mvinyo kachuchu kachuchu kwa dzambo ḍya hiḍi humboḍyo, koro u muntu jwa kujwaa kut̯wa.

24Nabvise za wantu wangine zinaonekana tswee tswee, na zinawayanga wantu wazi kwamba hawa hawa wantu wadzahukumigwa. Ela nabvise za wantu wangine zinadzifitsa zikaonekana mwisoni. 25Vivyo, mahendo mema yanaonekana tswee tswee, na hat̯a hayaḍe yasiyoonekana tswee tswee, mwisowe ntayakudzafitsika.

Currently Selected:

1 Timoteo 5: pkb

Highlight

Copy

Compare