1 Wakorint̯o 5
5
Namuna ya kujwana na uḅari matsanganikoni
1Nisikia kwamba kunjia uḅari muzuka muno kahi yenu. Ni uḅari muzuka wa kwamba hat̯a kahi ya hawa walumwengu ntaupfo. Nisikia kwamba kuna muntu eyekuyaani hat̯a na mukaza babajwe! 2Kisa mwakudzionani! Ni muwe kwamba munjijwa ni sikit̯iko, na huyu muntu ahendeye haya muwe kwamba mumuyavya tsanganikoni. 3-4Hat̯a ingawa sikwaa pfamodza nanywi kimwii, nya pfamodza nanywi kiruhu. Na dza vya muntu eye pfamodza nanywi, nisakukiza hukumu kwa sari ḍya Ḅwana jwehu Yesu *Kirist̯o dzuu ya huyu muntu ahendeye hiḍi hiḍi dzambo zuka. Mwipfonatsanganika, nami nawa pfamodza nanywi kiruhu. Na kwa nguvu za Ḅwana jwehu Yesu, 5huyu muntu ni mumungize mikononi mwa Shaat̯ani, ili hu mwiiwe upate kunangwa-nangwa, na apate kupfonywa ruhuye Nsiku ya Ḅwana Yesu adzeyokudza.
6Kudziona kwenu si kwema. Ntamukuumanya au muneno wambiyeo, “Hamira nchuchu inafurisha mukahe muzima.” 7Ndookomu ifat̯uleni hi nabvise yenu, dza hiviḍe mwivyonafat̯ula hamira ya kae, mudzidherese, mupate kuwa dza mukahe usiwodzangizwa hamira, dza mwivyonamala kuwa. Koro Kirist̯o, eye dza mwana mbuzi jwehu jwa *Pasaka, kamayavigwa dza mvuugiya. 8D̯ubva, hi hii jila ni kutsaihenda na mikahe ingizijweyo hamira ya kae, yani hamira ya nabvise na uzuka, ela ni kuihenda na mukahe usiwongizwa hamira, mukahe wa udheru na hachi.
9Kuzimuni mwa hiḍe ḅaruwa yangu niyomworea, niimwamba mutsenjiiyana na wantu waḅari. 10Siwa na maana ya kwamba mutsenjiiyana na wantu wa huju lumwengu weo waḅari, ambu weo wahamile, ambu weo wevi, ambu weonayomba masanamu hat̯a. Koro t̯ambere indeewa ni kuyawana na hawa wonse, indemumala kujusama huju lumwengu. 11Ela nichonikitsaka kumwambia ni kwamba, mutsenjiiyana na muntu yuḍejwonse eyenadzihana ndugu, na huku katsi ni muḅari, ambu ni muhamile, ambu anayomba masanamu, ambu ni muntu jwa nyano, ambu ni murumi, ambu ni mwivi. Muntu dzae, hat̯a kukaa chihako muḍye nae ntamu ruhusa!
12-13Hangu d̯ura ami nina haḍya ga ya kukizia hukumu wantu wa nze ya hiḍi tsanganiko? Muungu mwenye ndiye jwa kuwahukumu. Ela nywinywi, wenu wa kuwakizia hukumu ni hawaḍe weo humu tsanganikoni mwenu. Dza vya matsoro yambiyevyo, “Huyu muntu muzuka muyavyeni kiza cha nze.”
Currently Selected:
1 Wakorint̯o 5: pkb
Highlight
Share
Copy
Want to have your highlights saved across all your devices? Sign up or sign in
© 2004, Bible Translation and Literacy
