1 Wakorint̯o 2
2
Maagu dzuu ya Kirist̯o apfatsikijwe
1Wandugu zanguni, nipfokudza kwenu kumusumwiiya hi ngadzi ya mupfonyo wa Muungu, sikumudzia na ud̯ubat̯a wa kunena wala umanyi wa kibenaad̯amu. 2Koro niihuna kutsasumwiiya ḍingine ḍiḍeḍyonse, lamud̯a ḍya Yesu *Kirist̯o na kufwakwe muhini mwa mpatsa. 3Na nipfokudza kwenu, nidza ninkiwa nguvu zinisia, na nidza huku nikikuka kuhehema na oga. 4Nipfonikiyongweeza na kusumwiiya, hivi vyuuwo vyangu ntaviiwa vya ukaro wa kibenaad̯amu, ela viiwa na ushaahiḍi wa nguvu za Ruhu jwa Muungu. 5Nihenda hivi ili kwamba, faro yenu itseemeeya vyuuwo vya ukaro wa mwanaad̯amu, ela iemeeye nguvu za Muungu.
Mvidhyo ya Muungu hunaipfegwa ni Ruhu Mudheru
6Hat̯a vivyo, kwa hawaḍe wangoreyeo kiruhu, hivi hwivyokunenani ni vyuuwo vivyo na mvidhyo. Ela hi si mvidhyo ya wantu na wat̯awala wa huju huju lumwengu weokuyoweeyani mwiso wao. 7Hi mvidhyo hwiyokusumwiiyani, ni ngadzi ya mvidhyo ya Muungu eyoiwafitsa wantu. Ela ewa kahuna kuhungiza maremboni mwakwe hangu lumwengu jusidzaumbwa. 8Ntaku hat̯a mumodza jwa hawa wat̯awala wa huju huju lumwengu eyeimanya hi hii mvidhyo. T̯ambere wandeewa kwamba waimanya, ntawandemupfatsika muhini mwa mpatsa Ḅwana jwa marembo. 9Ni dza vya matsoro yaneneyevyo yakyamba,
“Hikiḍe cha wantu wasichokiona na matso ambu kuchisikia,
na hikiḍe cha wantu wasichokit̯aria kwamba kinahendeka,
hicho ndicho cha Muungu awaelekanyiziyecho hawaḍe wonse wamutsakiyeo.”
10Ela swiswi, haya haya mambo Muungu kayahupfenwiiya kwa njia ya Ruhu jwakwe. Koro huyu Ruhu ndiye amanyiye kula kintu, kamanya hat̯a hizi ngadzi nkuu nkuu za Muungu. 11Ntaku eyenaweza kumanya mat̯aro ya muntu, lamud̯a huyu muntu jeje mwenye. Na dza vivyo, Ruhu jwa Muungu ndiye amanyiye kula kintu dzuu ya Muungu. 12Naswi ntahukupfokea ruhu jwa kilumwengu, ela hupfokea huyu Ruhu ayawiye kwa Muungu, hupate kuziimuka hizi t̯ola hupfegejwezo ni Muungu. 13D̯ubva, hukwakuyongweezani mambo ya kiruhu kwa hawaḍe weo na huyu Ruhu, ntahukae hukiyongweeza na vyuuwo vya ukaro wa kibenaad̯amu hat̯a, hunayongweeza na vyuuwo hupfegejwevyo ni huyu Ruhu. 14Ela muntu asiyekuwa na huyu Ruhu anazidziza hizi t̯ola zizonayawa kwa Ruhu jwa Muungu. Kwakwe haya haya ni uḍyura muhupfu, na nkayaimuke, kwa dzambo ḍya kwamba yanaimukika kwa ugijo wa Ruhu t̯u. 15Muntu eye na huyu Ruhu anaweza kuimuka maana ya kula kintu, ela jeje mwenye nkawezi kuhukumigwa ni muntu yuḍejwonse jwa kilumwengu. 16Dza vya matsoro yaneneyevyo yakyamba,
“Ni ga amanyiye mat̯aro ya Ḅwana?
Ni ga eyenaweza kumushauri Muungu?”
Ela swiswi hunayaimuka haya haya mambo kwa kwamba huna Ruhu jwa Kirist̯o.
Currently Selected:
1 Wakorint̯o 2: pkb
Highlight
Share
Copy
Want to have your highlights saved across all your devices? Sign up or sign in
© 2004, Bible Translation and Literacy
