1 Kɔlìn 15
15
Yesò Klistò yù̧ù̧me
1Bɔnyɨ bɔ̧, maà nkɨ ku̧u̧te awɨ̧ àfɨ̀Ꞌ yaa ànəa Ntu̧ Ntsɔ̧̀ yu e ndi ntsɔ̀te abua yɨ̧, bɨ zə mbɨ̧̀ɨ̧̀nê mê mbaã me kweele adù̧ la. 2Wu Ntu̧ Ntsɔ̧̀ yaa nàa ghɨ̌ bɨa pema la na bɨ baãaã èngà̧ wu e ndi ndaꞋa abua yɨ̧ la me kweele adù̧ la. E bakà wu li ghɨ̌ bɨa peme, ko bɨ li mbɨ̧̀ɨ̧̀ne wùà àku.
3E ndi shu awɨ̧ ànəa Yesò Klistò li shu am la, mbɨ̀Ꞌɨ̀ ngule àghɨa mbì, nê Yesò Klistò li mpfə ane kàbɔ̀ŋ wa, mbɨ̀Ꞌɨ̀ Àkata Mbɔ̧ɔ̧mà a li shu nê aa wu la. 4Bɔ li ntu atò, è me wu ane èli betat tà yu̧u̧mê, mbɨ̀Ꞌɨ̀ Àkata Mbɔ̧ɔ̧mà a li shu nê aa wu la. 5Tà li mpuula a mbì Pità, mè mpuula a mbì bɔntu̧ bu ntsɔ̀b babe la. 6Tà li mè mpuula a mbì bɔnyɨ ba bɔ tsě ènkɨ̀ yetà̧â̧ la, àdzìꞋ yeamɔꞋ. Èbeko ane yɔb e batè mpfəèꞋtê, ka àbəèꞋ àyɔb nyaŋ a bele èbe yu̧. 7Tà lè lɔ̂Ꞌ mè mpuula a mbì Jimsì, me tsɔꞋɔ mpùùlà a mbì bɔntu̧ bu bàgème. 8A ghà me lìa tà puula abua am, è ngu wòt bɔ li mbi atò àfɨꞋa kà bòt e wua nchɨ̀Ꞌà la.
9E ngu tandiakwèn ane bɔntu̧ Yesò Klistò. E mbakà kuꞋu wòt bɔ̀ɔ me tɔ atò ane wantu̧ Yesò Klistò la nkàà nê, e ndi ngua nkɨà ètsə bòt chɔsì Mbɔ̧ɔ̧mà enɨ. 10Ka Mbɔ̧ɔ̧mà nɨa ntsɔ̧̀ vi ngɨ̀ e ngu àghɨa è ngu yùà la, ntsɔ̧̀ tò mbɔŋ li è kà tse àku. Ane nkûŋ, e ndi fàꞋ tè ntsè àwɔb bàgème, mbɔ̂ è li è kà lem ngu mmɔ̌, è li ngu ntsɔ̧̀ Mbɔ̧ɔ̧mà wu ane yaã la. 11Kò wu mmɔ̌ ka e ndi ndàꞋà èngǎ̧ mbɔŋ la, kò è li ndàꞋà bɔ̀ɔ̀ba leꞋ, ko eyaa wu èngǎ̧ Mbɔ̧ɔ̧mà ba li ndàꞋ la, mè ngu àghɨa bɨ li mbɨ̧̀ɨ̧̀ne la.
Bòt Mbɔ̧ɔ̧mà aa li yu̧u̧me
12Bɔ me làꞋà èngǎ̧ Mbɔ̧ɔ̧mà shua nê Yesò Klistò li njù̧ù̧me, ghǎ ghɨ̀ ka bòt ko ane yɨ̧ e me shu nê wòt nàa ngɨ̀ tà pfə, tà kà tsi njù̧ù̧me à? 13Ka è wu nê wòt nàà kà pfə mè njù̧ù̧mê, ko a wua shua nê Yesò Klistò li tà kà yu̧u̧me. 14A wu nê, Yesò Klistò bakà yù̧ù̧mê, ko èngǎ̧ Mbɔ̧ɔ̧mà wu ba làꞋà la e wu àku, èntɨ̧ɨ̧ wu bɨ zi ane Yesò Klistò la mè ngu àku. 15A wu ale ko aa nyɨꞋte mɨ̧̂ nê, ba wua ndàꞋà mèfà̧ ane ànəa Mbɔ̧ɔ̧mà, shua nê Tǎt wa Mbɔ̧ɔ̧mà li njù̧ù̧me a Yesò Klistò, kà tà ghɨ̀, na a wu nkûŋ nê wòt nàa mpfəa tà kà tsi njù̧ù̧mê la. 16È wu nê bèmpfəà bea kà yù̧ù̧mê, ko Yesò Klistò li tà kà yu̧u̧mè. 17A mè ngu nê, Mbɔ̧ɔ̧mà li tà kà yu̧u̧me a Yesò Klistò, ko èntɨ̧ɨ̧ wɨ̧ wu bɨ zi ane Yesò Klistò la wu àku, a mè me nyɨꞋte nê kàbɔ̀ŋ bele a mèntɨ̧ɨ̧ mɨ̧. 18Ko aa nyɨꞋte mɨ̧̂ nê, bòt Mbɔ̧ɔ̧mà bu bɔ me pfə ngu nè Yesò Klistò la e nyɔ̂. 19Ntɨ̀ yu ba bɔ ane Yesò Klistò mbɨ̀Ꞌɨ̀ peme la, wu wuê ànəa màntseka a ngɔ̀ŋ ŋaa, ko àya aa bɨɨ te tsè àyea wòt ègème a ngɔ̀ŋ ŋaa.
20Ka ane nkûŋ, Yesò Klistò yu̧u̧me a èbem èsî, mbɨ̀Ꞌɨ̀ wòt mbì tà yu̧u̧me la e nɨ nyɨꞋte nê bòt bu bɔ pfəꞋte la aa li yu̧u̧me. 21Ndɨ̀ wu bòt àa mpfəèꞋta nkàà àghɨa wɔ̀bȩ̂ li ngɨ̀ la, wu wuê ndɨ bòt àa njù̧ù̧ma nkàà àghɨa wekǒ nè wòt li ngɨ̀ la. 22Ndɨ̀ wu bòt àa mpfəèꞋta nkàà ndɨ bɔ̀ wu àghɨ yeamɔꞋ nè Adàm la, wu wuê ndɨ bòt àa li yu̧u̧me nkàà ndɨ bɔ̀ wu àghɨ yeamɔꞋ nè Yesò Klistò la. 23Mbɔ̧ɔ̧mà bɔ̂ ngu ghɨ waa waa naa yu̧u̧me ane vi ne akɔ̀Ꞌ. Yesò Klistò bɨɨ njù̧ù̧mê, bòt bu è wù èbe tò la e wu li yu̧u̧me mɨ̧̂ ane àli yu tàa li kɨꞋɨ la. 24Taa li nkɨ̀Ꞌɨ̂ ale ngɔ̀ŋ lìà. Eyaa wu àfɨꞋa Yesò Klistò nàa tsòkè mètàŋ tèwuute fo tègème tèa ntsìta mènəè nè bènàmbəa bu bèa mbà̧aã èlaꞋ la, è bɔ̂ nɨ a kèfɔ̧̀ wu e zǐ tèkitebu Tǎt wa Mbɔ̧ɔ̧mà. 25Yesò Klistò bɔ ndɨ tàa me baãaã a kèfɔ̧̀ vi tè ndɨ Mbɔ̧ɔ̧mà nàa ghɨ̌ taa tsite èka bi a ègwet bɔmbù̧ bi la. 26Wɔ̀mbù̧ kwèn tàa ghɨ̀ tê bɔɔ baka tsi ndzə ànəa tò la wu èvə. 27Àkata Mbɔ̧ɔ̧mà a laꞋnê, “Mbɔ̧ɔ̧mà zǐ èghɨ ègème a èten èka tò”, ka àa me shu ale, à ka wu nê Mbɔ̧ɔ̧mà wu tà zǐ èghɨ ègème a èten èka Yesò Klistò la wu a eten èka tò mɨ̧̂. 28Mbɔ̧ɔ̧mà naa me ghɨ̀ tê ndzì èghɨ ègème a èten Yesò Klistò, tòà zìambɔŋ wu tà wù waã la zì àvi a èten Mbɔ̧ɔ̧mà wu tà zǐ èghɨ ègème a èten tò la, mbɨ̀Ꞌɨ̀ Mbɔ̧ɔ̧mà naa wu àtsəa àghɨ àgème.
29Bòt bɔ pfəꞋte la e bakà wu ghɨ̌ yu̧u̧me, ko bòt bu bɔ̀ɔ ndzìà àwɔb a èdzî ane tèlente bòt bɔ pfəꞋte la àa mɨ̀ɨ̀tà nê bɔ̀ɔ bɔ ghàà? È wu nkûŋ nê bòt aa kà pfə mè njù̧ù̧mê, ghǎ ghɨ̀ ka bòt e me zi bòt a èdzî ane tèlente bòt bɔ pfəꞋte la à? 30A wu ale ko lə yu ba yea ngoꞋ àfɨ̀Ꞌ àgème la wu ghà à? 31Bɔnyɨ bɔ̧, èvə aa nəèꞋa a tèdzi taã àli àgème. E nkà̧à̧ àyaa ane kèghàꞋtè fu mâ bɔ ane yɨ̧ ndɨ̀ wu bà wu àghɨ yeamɔꞋ nè Yesò Klistò Lefɨ̀Ꞌ wa la. 32E ndi ngɨ̀ ale ngua ndzea mènəè wuê ndɨ wɔ̀bȩ̂ nàa ndzea la, ko àbȩ̀ am e me nû nyaãtebàꞋ a Efesɔ̀s wû ghàà? È wu nê bòt aa kà pfə njù̧ù̧mê, ko
“Bɨ̀ tsiꞋ bà me jɨa nua ngùꞋtà wa nkàà nê,
naa me wu a tetsɔꞋ baa pfəꞋte.”
33Bɨ̀ ka mbɨ̧̀ɨ̧̀nê wòt fɨ̀te awɨ̧, “Bèshu̧ kàbɔ̀ŋ bea ntsòkà wòt mènəè ntsɔ̧̀.” 34Bɨ̀ kubte mènkwàꞋte mɨ̧, bɨ̀ ka tsi ngɨ a kàbɔ̀ŋ. ÀbəèꞋ àyɨ̧ ako a bakà bê nkoê wòt Mbɔ̧ɔ̧mà wû wùà la. E ndàꞋà àyaa mbɨ̀Ꞌɨ̀ bɨa bɔ àtsəa kɔꞋɔ.
Mbɨ̧̀ ènyit nàa li yu̧u̧me la
35Wòt kǒ naa biite nê, “Mbɔ̧ɔ̧mà nàa njù̧ù̧ma bèmpfəà na à? Bɔ̀ɔ ngɨ̀ bɔ̀ me yu̧u̧me ale bɔ dzəè nè ka èwuu mbɨ̧̀ ènyit à?” 36Ye èkèghɨ̧̀ ko! Àa nyɔ̀Ꞌà kèmbèm àghɨ a si, kè baka tu kèmbèm fu kea fǐ, kè ka tsə. 37Àa nyɔ̀Ꞌɔ̀ àghɨ mbɨ̀Ꞌɨ̀ kèmbem ntsəè kò kèmbem àghɨa ko tsa leꞋ, kè ka wuê àghɨa kèa ghɨ̌ wu la, ke wu wuê kèmbèm. 38Mbɔ̧ɔ̧mà nàa ngɨ̀ tà ghɨ̀ kèmbèm fu ke tsə mbɔ̌ mbɨ̧̀ tà kɔ̀ŋkè la. Tàa ngɨ̀ tà ghɨ̀ kèmbèm kègème ke bɔ zi ne mbɨ̧̀. 39Mbɨ̧̀ ènyit ntsě yemɔ̀Ꞌ. Bɔbȩ e bɔ yɔb ne mbɨ̧̀ ènyit, banyaãbàꞋ e bɔ tɔb, banɨ̧̀ e bɔ tɔb, basə e mè mbɔ̀ tɔb. 40Mbɨ̧te ènyit tea ègwelebuule, mbɨ̧te ènyit te mè ngu a sitsǎꞋ, ka kèbɔ̂ŋ tu a ègwet la tea tsa, kèbɔ̂ŋ tu a sitsǎꞋ la te mè ngu tsa. 41Àtaãnyèm a bɔ kèbɔ̂ŋ fi, èŋu e bɔ fi, těnto̧ te mè mbɔ̀ tɔb, ka wuê těnto̧tsə te bɔ tèbɔ̂ŋtsə tsa tsa.
42Eyaa bê ngu ndɨ mbɨ̧te ènyit bòt bɔ pfəꞋte la tèa li wu tsa àfɨꞋa bɔ yu̧u̧me la. Mbɨ̧̀ ènyit bɔ zǐ a si la nàà fìà, ka è ye è dzə a èbem èsî la ka wua fìà. 43Bɔ̀ɔ me zǐ a si è kà wua mbɔ̀, è me dzəâ a si è me bɔ̌. Bɔ̀ɔ ngɨ̀ bɔ̀ me zǐ a si è me yu, è me dzəâ, è tsìꞋi àghɨa àa nkwèèla la. 44Bɔ̀ɔ ngɨ̀ bɔ̀ me zǐ a si, tà bɔ̀ wuê èwuu mbɨ̧̀ ènyit yu ba bɔ la, è me dzəâ, è tsìꞋi mbɨ̧̀ ènyit è dzəè a ègwet la.
Mbɨ̧̀ ènyit wɔ̀bȩ̂ wua, ko è ye Fo Mbɔ̧ɔ̧mà zì mèmpème adù̧ la nàà və mɨ̧̂. 45Àkata Mbɔ̧ɔ̧mà a laꞋnê, “Mbɔ̧ɔ̧mà li ngɨ a Adàm mbì tà tsìꞋi wòt yû̧.” Ka Adàm kwèn tsìꞋi Fo nàa ŋǎ mèmpème la. 46È wu nè wòt è wû wɔ̀bȩ̂ la li nkɨ̀Ꞌɨ̂ a mbì, è wu kà wu wɔ̀bȩ̂ la tsiꞋi kɨꞋɨ a kwèn. 47Wòt mbì li ngu wòt sitsǎꞋ, ngu wòt bɔ nɨ ètsaꞋ ka ngɨ̀ atò la, è we kwèn wu wòt ègwet. 48Bòt sitsǎꞋ aa mbɨ̀Ꞌɨ̀ wòt wu bɔ li nɨ̀ ètsaꞋ ngɨ̀ atò la, bòt ègwet e wu mbɨ̀Ꞌɨ̀ wòt wu tà li ndzə a ègwet la. 49Ale, ndɨ bɔ wèè awa mbɨ̀Ꞌɨ̀ wòt sitsǎꞋ la, wu wuê ndɨ bɔ̀ɔ wèè awa mbɨ̀Ꞌɨ̀ wòt wu tà li ndzə a ègwet la.
50Bɔnyɨ bɔ̧, ànəa e shua la wu nê, betsiꞋa wòt kà nyi a kèfɔ̧̀ Mbɔ̧ɔ̧mà nè mbɨ̧̀ ènyit wɔ̀bȩ̂, àghɨa àa fìà la à ka wuê bɔ̂ èghɨ kà wu li fǐ. 51Bɨ̀ zə! TsiꞋ è shu awɨ̧ ànəa ko è li ngu ànəa ndò̧ la. Bà ka li pfəꞋte bàgème a, ka baa li kubte bàgème. 52Àyaa aa li wu kwàꞋ ngò̧ yemɔ̀Ꞌ, mbɨ̀Ꞌɨ̀ bɔ̀ɔ ngwèlà èghɨ la, àfɨꞋa bɔ tɔ èsɔndɨk e lìa la. Bɔɔ li ntɔ lùà, bòt bɔ pfəꞋte la e yu̧u̧mè ntsìꞋi bòt kà wu tsi pfə, baa wu bà bele e be yu̧ la e kubtè. 53Aa li wu ale ngu nê, àghɨa àa fìà la, a bɔ ndɨ àa kubte tsiꞋi ayea kà wua fìà la, àyea àa mpfəa la a kubtè ntsìꞋi àyea kà wua mpfəa. 54Naa li ngu àfɨꞋa àghɨa àa fìà la a wèè àvi nè àyea àa ka fì la, àyea àa mpfəa la a wèè àvi nè àyea àa ka pfə la. ÀfɨꞋa mbɔŋ, àghɨa bɔ shɨ a èbem Àkata Mbɔ̧ɔ̧mà la a te. “Bɔ nù èvə tè ntsè, èbet wu e mî.”
55“Èvə è, àa mě wa à?
Èvə è, àghɨa àa mě me nɨa ntea bòt la àa ya à?”
56Àghɨa èvə àa nɨa ntea bòt la wu kàbɔ̀ŋ, kàbɔ̀ŋ me nɨ mètàŋ mi ane mbɨ̧. 57Ka bà kɔ̀ŋka Mbɔ̧ɔ̧mà wu tà ghɨ̂ ba nù tè ntsè, nkàà àghɨa Yesò Klistò Lefɨ̀Ꞌ wa è ghɨ̀ la.
58È wu ale, à ngule bɔnyɨ bɔ̧, bɨ̀ tɨ̧ɨ̧ ntsɔ̧̀, àghɨ à ka nyìꞋì àwɨ̧. Bɨ̀ me ghɨ̌ àfaꞋa Lefɨ̀Ꞌ nɨa ngà nè mbì àfɨ̀Ꞌ àgème, ndɨ̀ wu bɨ ko nê betsiꞋa àfàꞋ àyɨ̧ abua Lefɨ̀Ꞌ à ka tse àku la.
Currently Selected:
1 Kɔlìn 15: mnf
Highlight
Share
Copy
Want to have your highlights saved across all your devices? Sign up or sign in
© 2006, Cameroon Association for Bible Translation and Literacy
