1 PETÛRÛ 3

Eekûrû

1Naabi eekûrû, înyithagieni kîrî arûme beenu. Ûkaaya kwîgua kûrî we mûrûme wake ateetîgîîtie kiugo kîa Ngai, woû ûrî mwekûrû mûkarîre waku wa kîîngai waûmba kûmûkuuyia agatuîka wa Kîrîstû. Mûrûme waku nwa agarûke kinya ûtaarîîtie n'we, 2oona bûra ûgûtîîya Ngai mûtûûrîreeni waku ûmûtheru. 3Ûtikeegue kwîgemia kwenu kûrî kwa ome gunka—bûcukaga ntundu, bwîgemagia na tunyamû twa goro na bwîkagîra nguo cia goro akî. 4Ûthongi bwenu bûbatîîrue bwîgua bûrî ûthongi bwa gîînkoro bûra bûtoonekaga na meetho. Bu n'ûthongi bwa kuumania na kîrundu kîa ûbooreeru, kîrundu gîa ûkirîîria. Bu bûtithiraga rî kana rî na kîrî Ngai bûrî gîtûmi kîînene mûno. 5Wana eekûrû ba tene bara baarî baatheru i bu beethongamagia ûgu. Baarî eekûrû beenyithagia kîrî arûme baao na wîrîgîîro bwao bwarî kîrî Ngai. 6Kwa ngerekano, kûringana na bûra Saara aathîkagîra Îburaîmu bûgana, aamwîtaga mûnene wake. Kwoogu biû eekûrû, weegua bûkaarûthaga mantû meega gûtarî kîo bûgûkuthûka, ûkeegua bûrî aarî ba Saara.

Arûme

7Naabi arûme, tûûranagiani na eekûrû beenu bûkîmenyaga bo ibataûkîrîtwe, batiganeene naabi. Batîîyageeni n'ûntû bakeewa kîewa kîa mwoyo wa tene na tene bûkîewa. Na bûkarûtha ûgu, gûtirî kîgiria maromba meenu meeguîka.

Bûra Akîrîstû bonthe baagîrîtwe barûtha

8Na bûngî na bu bwa mûthia, i kîrî bwinthe. Na bu n'atî, îgaguani bûrî na yerekeeria rîmwe, bûkîîganagua na bûkîendanaga ta muntû na mûruagina kana mwaragina ndeni ya Kîrîstû. Îganaguani kîao. Na muntû neenyithagie kîrî ûra ûngî. 9Bwarûthîrwa ûthûûku bûtikaarîithie. Bwarumwa bûtikaarume bara babûruma. Bûbatîîrue bûthaarimaga bara bakaabûrûthagîra mantû ta mamu. Menyaani atî, bweetirwe i Ngai bûrûthaga ûgu kaingo bûthaarimwa, 10n'ûntû kwandîkîîtwe *Maandîkooni Maatheru,

“Ûra akeenda gûtûûra akeneete, akari bwega,

abatîîrue eemenyeera atikaarie ûthûûku

kana aaria ûrongo.

11Abatîîrue atiga kûrûthaga mantû maathûûku,

arûthaga mantû meega.

Abatîîrue eegua arî mûcûi ûkiri.

Naceragie ûkiri, nacûûgie bûra aûmba.

12Mwathani araithagîra bara baagîru,

eegagua maromba maao.

Atigwatanagîra na bara barûthaga ûthûûku.”#Cabuurî 34:12-16

Kûnyamaarua n'ûntû bwa kûrûtha bwega

13N'ûû abûrûthîra ûntû bûthûûku mûtugo wenu ûrî wa kûrûtha mantû meega? 14Îndî bûkaaya kûnyamaarua n'ûntû bwa kûrûtha bûra kwagîrîte, gîku i kîthaarimo. Kwoogu bûtigaakuthûke muntû kana bûmakua. 15Îndî nkorooni cienu thûkagiani Kîrîstû Mwathani wenu arî ûmûtheru. Na îgaguani rîonthe bwîthuuranîrîte gûcookeria kîûria ûra aûmba kûbûûria mantû ma wîrîgîîro bwenu bwa gîîkîrîstû, bûra bûrî na bu. 16Îndî nwa mwanka bûrûthage ûgu na njîra ya ûbooreeru bûkîbatîîyaga na bûkîîgagua bûtibîtîîtie. Bûkarûthaga ûgu, bara babûrumangaga kana bara baaragia mantû maathûûku îgûrû rîa mûtûûrîre wenu ûmwega ndeni ya Kîrîstû ibakaagîa îgi. 17I kaaba kûnyamaara n'ûntû bwa kûrûtha ûntû bwega weegua i kûringana na kwenda kwa Ngai kîrî kûnyamaara n'ûntû bwa kûrûtha ûntû bûûthûûku. 18Kinya Kîrîstû naanyamaariirue aakua rîmwe na rîa mûthia n'ûntû bwa meeyia meetû. Muntû ûmwagîru aakua n'ûntû bwa antû batarî baagîru kaingo abûreeta kîrî Ngai. Aûragirwe arî mwîrîîni wa kîîwîthîre aariûkua arî na mwîrî wa gîîkîrundu.#3:18 Kana: Aûragirwe kîîmwîrî aariûkua kwa inya ya Kîrundu. 19Arî ndeni ya Kîrundu aathi aatûmîîria irundu birî nceera.#3:19 N'inya gûtaûkîrwa i mûstaarî ûyû. Njîra îngî ya guutaûra i kuuga: I rîo aathiire eera araîka baathûûku bara bathaîkîîtwe agûcinda. 20Irundu bibu i bira biaregire kwathîkîra Ngai tene mûno, mbere ya Ngai athiria nthîgûrû na rûûyî. Ngai eeteere Nuu aaka cabina, na bara baarî cabinaani bonka i bo boonokiirue na rûûyî. Baarî antû baakai mûno, antû banaana. 21Rûûyî rûru i ta ûbaatithio bûra tûkûbaatithua na bu îîndî tûkoonokua. Îndî ingî ûbaatithio i mûkûûrani na kûthamba rûko rûkathira mwîrî. Ûbaatithio bungwa i muntû kûromba Ngai na nkoro îmbega amûgarûra kuumania na kûriûka kwa Yiesû Kîrîstû. 22Nyuma ya kûriûka Kîrîstû neetiirie îgûrû. Îîndî akari nthî rûteere rwa ûrîo rwa Ngai. Na gûku îgûrû n'we mûnene wa araîka, mwathani wa mainya monthe.

Currently Selected:

1 PETÛRÛ 3: thk

Highlight

Copy

Compare