2 Piyer 1
1
Ayyi
1Gi Səmon Piyer, gi uwana gi mayà aŋa Yesu Kristu, gi masla matapla la slaka aŋha bay, à uwana gətsetser à akul wakità uwanay, akul uwana kadiŋaw gəl à Yesu à vok kalkal bokuba uwana mədiŋal gəl à vok babay, anu gesina məɓəzà à tatak uwaga la slaka gà. Yesu Kristu aɗahà uwaga kà aŋami gesina, kà uwana masla kà dziriga. Masla kà Zəzagəla la gəl aŋha, ŋgaha masla maɓəl anu babay. 2Awoyàŋ kà mapis gay à vok aŋa Zəzagəla agay la akul kaykay, la lapiya, kà akul aŋa masəlay kaykay Zəzagəla la Yesu, Sufəl gami.
Maday aŋa azlaməna madiŋal gəl à vok
3Yesu Kristu apə̀hanula Zəzagəla uwana azàlla anu, kà anu aŋa maham à mazləɓay aŋha à abà, ŋgaha kà anu aŋa manəf maday aŋha, uwana aɗuwa gesina, kiya uwaga masla avà à anu ndzəɗa aŋa maslay aŋha, azlatatak gesina uwana anu mənəkuɗa aŋha, kà anu aŋa maɓəzal sifa mawga, ŋgaha kà anu aŋa manəf maday uwana ahəɗ à Zəzagəla à adi. 4La azlatsəhay tetəvi uwanay à uwana avà à anu azlatatak uwanay, uwana apə̀h à ahəŋ uwarà kà aŋa mav à anu azlatatak uwana dzəɓa aŋha səla aw kà aŋami. Aɗahàŋ kiya uwanay kà, kà madegolay azlatatak uwanay, kà azlatatak mawisiga aŋa gudəŋ à vok uwana akəɗ à adi aŋa mabiy akul aw, kà akul aŋa maf gəl à azlamadzugway aŋa Zəzagəla. 5Lakəl aŋa azlatatak uwanay, gəgoɗ akul kà: Wàɗàw vok à uda! Dìŋàw gəl à Yesu Kristu à vok lagonay, kanəfaw maday delga! Dàw à huma la maday delga! Yàhàw kà masəl azlatatak babay! 6Kà uwana kasəlaw azlatatak uwanay, dzàw à ahəŋ titi babay, kà uwana kadafahaw akur à vok aŋkul à lig, tsìzllàw à ahəŋ la ndzəɗa la azlamatərəɓay la abà la mawaɗàh vok à uda. Nəfàw bokuba uwana ahəɗ à Zəzagəla à adi. 7Kà madla vok kà akul à akul bokuba uwana ahəɗ à Zəzagəla à adi. La madz à ahəŋ uwana bokuba akul la azladeda, wòyàw azladza gesina babay. 8Baŋa kaɗahaw azlatatak uwanay koksikoksi kà, masəl Yesu Kristu aŋkul adakəsakulla vok, ŋgaha maday aŋkul adavà mayyay lela. 9Ama kà aŋa azladza uwana taɗah uwaga aw kà, tapakahay bokuba azlaguləf. Adavika atà à tsakana uwana taɗahàhàŋ uwarà, Zəzagəla amàtsatàŋ ala. 10Azladeda, tsa baŋa kiya uwanay kà, wàɗàhàw vok à uda, kà uwana Zəzagəla azalà akul, ŋgaha atsatsàmànì akul kà maɗehəŋ kiya uwanay. Baŋa kaɗahawwaŋ kiya uwanay, tetuwa tetəvi aŋa Zəzagəla adàvika akul aw. 11Kiya uwanay la kokuɗa matsigay, Zəzagəla adàpəzlla akul gamagày, kà akul aŋa mad à makoray aŋa Sufəl gami Yesu Kristu à abà, uwana aɓə̀l anu. Makoray uwatà adàdzehəŋ aŋa koksikoksi. 12Kà uwaga kà, gədàwulakulla à gəl koksikoksi, tekeɗika kà, sə̀làw nəma kà akul aŋa matsizl à ahəŋ la ndzəɗa la azlagay dziriga uwanay la abà, katapawla. 13La mok uwana gi la ahəŋ la sifa dadàŋ la gudəŋ la vok, gəsəl kà dzəɓa aŋha səla aw kà gi aŋa mawulakulla tatak uwanay à gəl, kà akul aŋa madz à ahəŋ la adi. 14Gəzlàmətsay à dagay, bokuba uwana Sufəl Yesu Kristu apə̀h à gi à vok à abà. 15Uwana gəwaɗ vok à uda lagwa, kà baŋa gədamətsay kà, kadàɓəzaw à tetəvi aŋa mawul akul à gəl aŋa azlagay uwanay.
Azlauwana tanəŋà mazləɓay aŋa Kristu
16Dagay uwarà məpə̀h à akul mas à waŋ aŋa Yesu Kristu la maslay aŋha à gudəŋ à vok. La mapəh à akul kiya uwanay, məpə̀h à akul azlagay maviyaga, uwana asàhàh à uda la madzugway aŋa azladza la abà aw. Ama mənəŋàŋ ndzəɗa aŋa mazləɓay aŋha, la yewdi gami. 17La kaslà uwana aɓəzà à masləkaway ŋgaha la mazləɓay la ahàl aŋa Zəzagəla, məgà la abatà, mətsənàŋ kà Zəzagəla uwana aɗuwaŋ gesina la mazləɓay, apə̀h gay uwanay:
ˈUwaga kà bəzi gay ləv gulo, uwana gəwoyaŋ kaykayˈ,
Zəzagəla agòɗ. 18La mok uwana məgà la gudəŋ tsikaslaga la afik, la Sufəl gami Yesu Kristu, à uwana mətsənà azlagay uwanay, atsə̀n à ahəŋ la zagəla
19Uwana azlaməna mapəh à atà gay à ahàl aŋa Zəzagəla tapàh kà, apakà vok la huma yewdi gami babay, kà uwaga mədiŋ gəl à mapəhay aŋatà à vok. Delga kà kaɗahaw haŋkəli la mapəhay aŋatà, kà uwana sayda aŋatà kà, aga bokuba fənəs, uwana auɗay la mələs la abà. Dàw à huma à gay la matsəɓal sləm, tsəràh à kaslà mavakay uwana adàpəhla vok ala la paraka. La mavakay uwatà kà, ŋuzla bebəŋ, uwana Kristu, adàpəhla vok ala, ŋgaha kadànəŋaw azlatatak gesina la paraka. 20Azlatatak uwana aɗuwa vok gesina, à uwana gəpə̀h à akul, kà gay aŋa azlaməna mapəh à atà gay à ahàl uwarà tapàh, ŋgaha tatsetsèr à wakità Zəzagəla à abà babay, gay uwaga kà matsihila aŋa azladza aw. 21Gay aŋa azlaməna mapəh à atà gay à ahàl uwaga kà matsihila aŋa azladza aw, Masasəɗok tsikaslaga la uwana avà à atà maslay, kà atà aŋa mapàh paŋaw aŋa Zəzagəla, uwana apə̀h à atà.
Currently Selected:
2 Piyer 1: mfh
Highlight
Copy
Compare
Share
Want to have your highlights saved across all your devices? Sign up or sign in
©2019, Wycliffe Bible Translators Inc. All rights reserve.
