1 Piyer 4

Zəzagəla akoray lakəl aŋkul

1Nə̀ŋàwwàŋ kà Yesu Kristu asa ŋgərpa la vok aŋha, kà uwaga à akul babay: Gàw nekwa aŋa masay ŋgərpa bokuba aŋha bay, kà uwana dza uwana as ŋgərpa la vok aŋha, aɗah tsakana aya aw. 2Lagonay mədzəka la madla à huma à gay la kəla kaslà uwana kadzaw à ahəŋ la gudəŋ uwanay la vok kaslawwalla vok aŋa maɗàh uwana ahəɗ à Zəzagəla à adi, awkà azlatatak mawisiga uwana asa à ləv aŋkul aw. 3Kaslà uwana kadazawwaŋla adagay diga. Azlatatak uwana kaɗahàwwàŋ kà, aganay azlatatak uwana kaɗahàhàwwàŋ uwarà, kaɗahàhàwwàŋ kà uwana asa à vok aŋkul pəra: Kagàhàw azlaməna guzu, kahabàhàw azlamadəvaday kəla mavakay, kahamàhàw gay à vok kà mas guzu, kasləkàwàhàw azlamazlazlay atà uwana tawis mapəhay aŋa Zəzagəla ala ndzer. 4Ama lagonay kà, kagagàmàwla vok à ahàl la azladza uwana tasəl Zəzagəla aw, aw. Kà uwaga ləv adaval atà à gay, ŋgaha tatsəka à akul magoɗahay à gəl. 5Ama vuɗ tekula tadàtsizlla à huma aŋa Zəzagəla kà aŋa seriya. A masla kà nekwa aŋa maɗàh seriya à azladza uwana à gəl atà la sifa, ŋgaha azlauwana à gəl tamatsay babay. 6Makəs vok aŋa uwana Kristu azàŋ gay marabəŋ kà, azlauwana la mezewi bay kà atà aŋa madz à ahəŋ la sifa bokuba Zəzagəla uwana la sifa. Kay kà, Zəzagəla aɗahà à atà seriya à gəl bokuba uwana aɗehəŋ à azladza la gudəŋ la vok gesina nəma.

Maday aŋa azlaməna madiŋal gəl à vok

7Gudəŋ à vok kà nekwa adəv à gay. Gay gà la uwaga kə̀sàw gəl aŋkul, ŋgaha gàw nekwa kà akul aŋa madəv kuɗa à Zəzagəla. 8Iyay, tatak məŋga gà kà, say kawoyaw vok kà akul à akul la ləv aŋkul gesina, kà masal kà, aslaslaɗ maham à ahəŋ tsakana ala.#Haŋkəli 10.12 9Kiya uwaga kə̀sàw azladza la ahàl səla kokuɗa maŋoŋuzay. 10Zəzagəla adàɗahakulla delga la azladabaray anik anik. Avà maslay à kəla uwabeyuwi aŋkul, kà maɗàh azlatatak anik anik, say kəla uwabeyuwi aɗàh dziriga, masla azəɓ maslay aŋa Zəzagəla uwana avàl kà masla mazlakla azladza anik. 11Dza uwana la maslay kà mapəh gay anik apah azlagay uwaga à uwana asà à waŋ la slaka Zəzagəla, dza uwana la maslay kà mazlak azladza anik, azlaka atà la ndzəɗa uwana Zəzagəla avàl. Ɗahàwwàŋ kiya uwanay kà azladza aŋa mazləɓay Zəzagəla la tatak gesina la abà, kà madegolay Yesu Kristu, masla uwana la maslay la mazləɓay aŋa koksikoksi! Amen.

Marabay la masla madiŋal gəl à vok uwana as ŋgərpa

12Azladeda gulo, ləv avalla akul à gay, kà manəŋ azlamatərəɓay anik anik aw. Azlatatak uwaga aɓəzà à akul kà aŋa maguray madiŋal gəl à vok aŋkul, kadzugwaw kà azlatatak uwaga kà azlatatak mavalakulla à ləv à gay aw. 13Kahamaw à ŋgərpa uwana à abà Kristu asà, kà uwaga kà, vàlàhàw à zagəla la kaslà uwana azladza tadànəŋəŋ kà masla məŋga la yewdi anatà, akul kadàvalahaw à zagəla la ləv aŋkul gesina. 14Baŋa azladza tatsəka akul magoɗahay à gəl kà, kà uwana akul azlaaŋa Kristu, Zəzagəla adapisakulla gay à vok kà uwaga, kà uwana Masasəɗok aŋa Zəzagəla uwana ndzəɗa, ŋgaha aɗuwaŋ gesina adza à ahəŋ la akul. 15Baŋa dza la ahəŋ la tataka aŋkul la abà asa ŋgərpa, kà uwana aɗahà mawisiga baŋaw akə̀ɗ dza, baŋaw adà à gəl aŋa azlatatak anik, baŋaw kamavàlàh à gay aŋa azladza anik à abà bokuba mavdzagogor kà, dza azləɓà kà uwaga aw, apakà vok kiya uwaga la akul aw. 16Ama baŋa dza asa ŋgərpa, kà uwana masla aŋa Kristu, ziruwi akəs kà uwaga aw. Kiya uwaga kà, ‘Kikay’, agoɗ à Zəzagəla, kà uwana azladza tazalla ala kà masla dza aŋa Kristu.

17Kaslà kà adaslay à uwana Zəzagəla aɗah seriya à azladza à gəl. Adàɗah seriya kà azlaaŋha à gəl dadàŋ. Kayyà, baŋa adàɗehəŋ kà azladza aŋha à gəl dadàŋ, ma kakay adàpaka vok la azladza uwana tatsəɓ sləm à gay marabəŋ aw ma? 18Bokuba uwana tatsetsèr à wakità Zəzagəla à abà:

ˈBaŋa Zəzagəla adakəsay azlaaŋha la seriya, atà uwana azladziriga, mana adàpaka vok la azladza mawisiga uwana tasəl Zəzagəla aw ma?ˈ#Haŋkəli 11.31

19Kà humà à gay uwaga, azlauwana tasa ŋgərpa kà uwana Zəzagəla awoyàŋ, kiya uwaga kà tada à huma à gay la maɗàh delga, ŋgaha tavà vok aŋatà gesina à Zəzagəla à ahàl, masla uwana aɗahà à atà, ŋgaha masla uwana dziriga.

Currently Selected:

1 Piyer 4: mfh

Highlight

Copy

Compare