หล่าว ย่าง 7
7
เหยียด สิน เปยย หว่าน เปยย ธิน อิสะลาเอน เมี่ยน
1ฆะฮ้า เยีย ปวัด เปยย เต้า ฟิน-เมี่ยน โซ้ว เจี๊ยน เดา-เป้ย เญย เปยย ปูง เก๊าะ, หัด เจี๊ยน เปยย ปูง เญย หฑยาว, เหว่ย ไม้ ปุน หฑยาว ป่วน เดา-เป้ย ไฟ ค้อย ไฟ หาย ติ้ว เดี๋ยง.#เยเลมี 49:36; ดานีเอน 7:2; เสคาลิยา 6:5 2เยีย แอ๋ง ปวัด กั้น ม่าย เต้า ฟิน-เมี่ยน เยียม ตง ปูง ธ้วด ต้าย หย่า ต้อ เจี๊ยน เฒี่ยง เจี๊ยน เญย ทิน-ฮู่ง เญย เหยียน. นิ่น หล่ง เฉีย โฮล เญย เห่ว ต้ง ทิน-ฮู่ง ปุน หลี่ง โหฒว หว่าย เดา-เป้ย เหธา ค้อย วั้ว เต๋ย เปยย เต้า ฟิน-เมี่ยน. 3นิ่น ก๊อง, “ไม้ ตู๋ง แก้ง โหฒว หว่าย เดา-เป้ย เหธา ค้อย เหธา เดี๋ยง. ฒั้ว เยีย บัว ฆ้าบ เจี๊ยน เหยียน เยีย บัว เญย ทิน-ฮู่ง เญย โปว เญย ปย้อง.”#เอเสเคน 9:4,6 4เยีย หย่า ไฮ์ ก๊อง ตุ๊ ฆ้าบ เจี๊ยน เหยียน วั้ว เต๋ย เมี่ยน เญย โสว โหม่ว. ฝีงๆ อิสะลาเอน เมี่ยน เหยียด ฒู้ง ม่าย เหยียด สิน เปยย หว่าน เปยย ธิน เต้า ตุ๊ ฆ้าบ เหยียน.
| ฝีง | บัวะ เหฒีย เต้า |
|---|---|
| 5ยูดา ฝีง | ม่าย 12,000 เต้า ตุ๊ ฆ้าบ เหยียน |
| ลูเบน ฝีง | ม่าย 12,000 เต้า ตุ๊ ฆ้าบ เหยียน |
| กาด ฝีง | ม่าย 12,000 เต้า ตุ๊ ฆ้าบ เหยียน |
| 6อาเซ ฝีง | ม่าย 12,000 เต้า ตุ๊ ฆ้าบ เหยียน |
| นับทาลี ฝีง | ม่าย 12,000 เต้า ตุ๊ ฆ้าบ เหยียน |
| มะนัดเส ฝีง | ม่าย 12,000 เต้า ตุ๊ ฆ้าบ เหยียน |
| 7สิเมโอน ฝีง | ม่าย 12,000 เต้า ตุ๊ ฆ้าบ เหยียน |
| เลวี ฝีง | ม่าย 12,000 เต้า ตุ๊ ฆ้าบ เหยียน |
| อิดสาคา ฝีง | ม่าย 12,000 เต้า ตุ๊ ฆ้าบ เหยียน |
| 8เสบูลุน ฝีง | ม่าย 12,000 เต้า ตุ๊ ฆ้าบ เหยียน |
| โยเซ้บ ฝีง | ม่าย 12,000 เต้า ตุ๊ ฆ้าบ เหยียน |
| เบนยามิน ฝีง | ม่าย 12,000 เต้า ตุ๊ ฆ้าบ เหยียน |
เยียม ฝีงๆ ต้าย เญย เมี่ยน
9น้าย เต๋ย สี่ เจี๋ย ลิ์ว, เยีย หมั่ง ฯฒฯ ปวัด เมี่ยน ธั้ม! ไห่, ไม้ ม่าย หาย เต้า ไฮ่ ซ้าว ตุ๊ เฒี์ยน. นิ่น บัว เยียม หม่าน กั๊วะ, หม่าน ฝีง, หม่าน หญู่ง เมี่ยน, หม่าน หญู่ง หว่า ต้าย โซ้ว เจี๊ยน ฮู่ง เหว่ย เหธา ปะกี ยู่ง ตอน เญย หฑะเฮมียน. นิ่น บัว ฒุ เจี๊ยน ลุย-ด๊าว-แปะ, ปั์ว นั้น เจี๊ยน ตาว-น่อม, 10หย่า เห่ว เฉีย บุย เญย ก๊อง,
“เหฌียว เอน เยียม เยีย บัว เญย ทิน-ฮู่ง,
ต้ง เฒว์ย เจี๊ยน ฮู่ง เหว่ย วั้ว เต้า,
เหธา น้าย เต้า ปะกี ยู่ง ตอน ต้าย.”
11เหยียด หฒวัง ฟิน-เมี่ยน โซ้ว เว่ย ก๋อม ฮู่ง เหว่ย เหธา เมี่ยน โก๋ เหธา วั้ว เต๋ย เปยย เต้า นั่ง เญย กะน้าย, หย่า พัวะ เหฌี่ย เดา ป๋าย ทิน-ฮู่ง. 12นิ่น บัว ก๊อง,
“อาเมน.
เธง ทิน-ฮู่ง, แล์ง ฒี่ง ทิน-ฮู่ง.
เยีย บัว เญย ทิน-ฮู่ง เหยียด ลิ์ว ม่าย ฌัง-หล่าง,
ม่าย ธง-เม่ง, ม่าย เม่ง โห่, ม่าย หลี่ง, ม่าย ชะ
เถา หม่าน โก๊ว หม่าน ต่อย.
อาเมน.”
13วั้ว เต๋ย เมี่ยน โก๋ ม่าย เต้า หน่าย เยีย, “ฒุ เจี๊ยน ลุย-ด๊าว-แปะ เญย น้าย เต๋ย เมี่ยน เซ หาย เต้า? นิ่น บัว เยียม หาย ต้าย?”
14เยีย เตา, “ต้ม ก๋อ อ้า! เม่ย ฮิ้ว เญย.”
นิ่น ฯฒฯ บั๋ว เยีย, “น้าย เต๋ย เมี่ยน เซ เยียม วั้ว หฑุ่น เญย ต้ม หน่าน ฒี่ง ธ้วด ต้าย. นิ่น บัว หล่ง วั้ว เต้า ปะกี ยู่ง ตอน เญย ฑย้าม โหฑ นิ่น บัว เญย ต้ม ลุย-ด๊าว แปะ ต้าย.#ดานีเอน 12:1; มัดทาย 24:21; มาโค 13:19 15เหว่ย น้าย,
นิ่น บัว เยียม ทิน-ฮู่ง เญย ฮู่ง เหว่ย หฑะเฮมียน,
เฒี่ยง ฮนอย เฒี่ยง ม์วน เยียม หฒั่ง ทิน-ฮู่ง เญย เปย๊า ฟู-สู นิ่น.
เฒว์ย เจี๊ยน ฮู่ง เหว่ย วั้ว เต้า อ๋อย เหธา นิ่น บัว เยียม,
เปว เจี๊ยน นิ่น บัว.#7:15 เปว เจี๊ยน นิ่น บัว กีก หว่า ก๊อง “อ๋อย ธอง นิ่น เญย ด๊บ-ลิ่ว นิ่น บัว กู้ หงว่าย”.
16เยียม น้าย มี่ง นิ่น บัว เหยียด ลิ์ว ไม้ หง่อ,
เหยียด ลิ์ว หย่า ไม้ ฆ้าด อ๊ะ.
บะฮนอย ไฟ หญุด โต์ว หย่า พุย ไม้ หฒุ นิ่น บัว.#อิสะยา 49:10
17เหว่ย หฒุ เยียม ฮู่ง เหว่ย บุด๋ง วั้ว เต้า ปะกี ยู่ง ตอน
อ๋อย โก๋ว นิ่น บัว,#สีง ฑูง 23:1; เอเสเคน 34:23
ฮนั้ง โก๋ว ปะกี ยู่ง เญย เฒี้ยว โก๋ว นิ่น เญย ปะกี ยู่ง นอ.
นิ่น หย่า อ๋อย ต้อ นิ่น บัว มี่ง เถา ยู์ง แหม่ง เญย ววม-ฒี้ง.#สีง ฑูง 23:2; อิสะยา 49:10
ทิน-ฮู่ง หย่า อ๋อย ซ้อด ฆาย
นิ่น บัว เญย เตี๊ยมๆ ววม-เหมว่ย.”#อิสะยา 25:8
Currently Selected:
หล่าว ย่าง 7: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
