ซ้าว เมี่ยน 24
24
1 บาลาอัม ฮิ้ว ตุ๊ เฒี้ยว อะเฮน้ย เหธย ฟุ ปุน อิสะลาเอน เมี่ยน, นิ่น ฯฒฯ ไม้ โหฒว หาย หญู่ง ฟ้าด ฮนั้ง ตะฮน้า หฑุ่น นอ. นิ่น ฮวิน มี่ง หมั่ง เต่ย-ปูง-ฮวาง, 2ปวัด อิสะลาเอน เมี่ยน หฒิว เหยียด ฝีง เหยียด ฝีง ธอง ด๊บ-ลิ่ว เยียม นิ่น บัว เญย เธี้ยง. ทิน-ฮู่ง เญย สีง ลี่ง เหฌี่ย ต้าย เยียม เจี๊ยน นิ่น, 3นิ่น ฯฒฯ โต่ว น้าย เต๋ย หว่า,
“น้าย เซ เบโอ เญย ตอน, บาลาอัม, โต่ว เญย หว่า.
เซ มฒีง ทง เญย เมี่ยน โต่ว หว่า ก๊อง,
4ต้ง ไฮ์ ทิน-ฮู่ง เญย หว่า วั้ว เต้า โต่ว เญย หว่า.
เยีย เญย มฒีง ทง, ไฮ่ หมั่ง ตุ๊ ปวัด#24:4 ฟาน หฒะ ฮิบลู หว่า ก๊อง “เยีย คีง เหฌี่ย เดา, มฒีง หนูง เจี๊ยน”.
เน่น เจี๋ย วั้ว เต้า#24:4 ฮิบลู หว่า ก๊อง ซัดได. หิ่น ย่าง เญย สี่.
5“โอ ยาโค้บ เญย เฒ้ย-ฟุน อ่า, เม่ย บัว เญย ด๊บ-ลิ่ว เหฑว่ย ไห่.
โอ อิสะลาเอน เมี่ยน อ่า, เม่ย บัว เญย เธี้ยง หฒะเก้ง คู่ หมั่ง.
6“เม่ย บัว ฮนั้ง ฮ์อง ธ้วด มี่ง จั๊ง เญย นอ,#24:6 ม่าย เต๋ย โซว ฟาน ต้าย ก๊อง ฮนั้ง เหยียด เลี์ยว เหยียด เลี์ยว เญย ตาว.
ฮนั้ง เยียม ด้าย เฮลน เญย หฮวีง.
ฮนั้ง เฒี้ยว หฒวัง เญย อาโล เมี้ย-ดาง,
ฮนั้ง เยียม ววม-เฮลน เญย สีดา ฒ่ง เดี๋ยง.
7ววม อ๋อย เหลี่ยว ธ้วด นิ่น บัว เญย ท้ง,
นิ่น บัว เญย เฒ้ย-ฟุน#24:7 เฒ้ย-ฟุน ฮิบลู หว่า ก๊อง ญิม. อ๋อย เยียม ม่าย ววม ธั้ม เญย ต๋อง.
“นิ่น บัว เญย ฮู่ง อ๋อย เก้า โฮล เจี๋ย อากัก ฮู่ง,
นิ่น บัว เญย กั๊วะ หย่า อ๋อย ตุ๊ ฌัง-หล่าง.
8“ทิน-ฮู่ง ต้อ นิ่น บัว ธ้วด อียิบ เต่ย-ปูง,
นิ่น บัว ม่าย ชะ ฮนั้ง เฮยี่ย ง่ง นอ.
นิ่น บัว นะ เหฑ่ง วิน-วั้ง เญย กั๊วะ,
ว้วด วิน-วั้ง เญย บู๊ง เน้า เหฑ่ง,
หล่ง ฟอง-ธัง ป๊วน ทง นิ่น บัว.#24:8 ไฟ “เบ๊าะ นิ่น บัว เญย ฟอง-ธัง หม่วน เหฑ่ง”.
9นิ่น บัว บ๊าบ เหฌี่ย เปว๋ย เจี๊ยน ฮนั้ง เซี่ยน โก๊ว,
หย่า ฮนั้ง เซี่ยน เญ์ย, หาย เต้า ก๊าม มี่ง เห่ว นิ่น บัว เจี์ย ซิน?#ทิน เต่ย โต้ว 49:9
“หาย เต้า ปวัง หว่า เม่ย บัว, โท้ ปุน วั้ว เต้า ตุ๊ ฟุ.
หาย เต้า เหฒียว เม่ย บัว, โท้ ปุน วั้ว เต้า หฒุ เหฒียว.”#ทิน เต่ย โต้ว 12:3
10บาล้าก เฉีย เจี์ย! ไห่ บาลาอัม, นิ่น ฯฒฯ ไบ๋ ปั์ว-ฒ้าง-ท้าด, ต๋อย บาลาอัม ก๊อง, “เยีย เห่ว เม่ย ต้าย เถง เยีย เหฒียว วิน-วั้ง. ต๋าว หฑวน เม่ย ปวัง หว่า ปุน นิ่น บัว ปัว หฑุ่น. 11อี้ หฒั่น เม่ย เปย๋า หฑวน เม่ย เญย ต๋อง อ๊ะ. เยีย ก๊อง อ๋อย ปุน ฒี่ง เหญ่ย โฮล เญย, มป่า เฒี้ยว ตั๊ง เจี๊ยน ปุน เม่ย ไม้ ตุ๊ ฒิบ.”
12บาลาอัม เตา บาล้าก, “เยีย มต้าย บั๋ว เจี๋ย เม่ย พ้าย ต้าย เญย เมี่ยน, 13‘ไม้ กุ๊น บาล้าก เฒาะ เหฑ่ง ปวั๊ง ฮู่ง ติ่น เญย เจียม ญ่าน ปุน เยีย, เยีย หย่า ไม้ ไฮ่ โหฒว เจี๋ย ด่าง เฒี้ยว บั๋ว เญย หว่า, เอย เยีย กั้น เญย หฒะเอ๋ย โหฒว หลง ไฟ โหฒว หว่าย. เฒี้ยว ฮนั้ง หาย นอ ก๊อง, เยีย หย่า อ๋อย หฒุ ฮนั้ง วั้ว นอ ก๊อง.’ 14อี้ หฒั่น เยีย หฑวน เยีย เญย ป๊วน-ฝีง เมี่ยน วั้ว มป่า ต้าย ม่าะ! เยีย บั๋ว เม่ย ฆะฮ้า ฮี้ง น้าย ฝีง อิสะลาเอน เมี่ยน อ๋อย ฮนั้ง หาย นอ โหฒว ปุน เม่ย เญย แปะ ฝีง.”
บาลาอัม โต่ว ตะเฝย หฑุ่น หว่า
15บาลาอัม ฯฒฯ โต่ว น้าย เต๋ย หว่า,
“น้าย เซ เบโอ เญย ตอน, บาลาอัม, โต่ว เญย หว่า.
เซ มฒีง ทง เญย เมี่ยน โต่ว หว่า ก๊อง,#24:15 เป๊ย หมั่ง ซ้าว เมี่ยน 24:4.
16ต้ง ไฮ์ ทิน-ฮู่ง เญย หว่า วั้ว เต้า โต่ว เญย หว่า,
เซ เยียม ฮลัง เจี๋ย วั้ว เต้า ปุน ฮิ้ว เญย เจ๊า.
เยีย เญย มฒีง ทง ไฮ่ หมั่ง ตุ๊ ปวัด#24:16 เป๊ย หมั่ง ซ้าว เมี่ยน 24:4.
เน่น เจี๋ย เญย ทิน-ฮู่ง หิ่น ย่าง เญย สี่.
17“เยีย ปวัด นิ่น มป่า ไม้ เฒ์ย อี้ หฒั่น.
เยีย หมั่ง นิ่น มป่า ไม้ เฒ์ย ฟัด เญย.
อ๋อย ม่าย นอม เหฮลย เยียม ยาโค้บ เญย เฒ้ย-ฟุน ธ้วด ต้าย,
ม่าย ฮู่ง เญย ด้าง เงา เยียม อิสะลาเอน เมี่ยน ธ้วด.
นิ่น อ๋อย เบ๊าะ ฮู้ โมอับ เมี่ยน เญย ปย้อง,
หย่า ป่าย เหฑ่ง เซ้ด เญย เฒ้ย-ฟุน.
18เอโดม อ๋อย หฒุ เซวย เป๋น กั้น เต้า เญย.
นิ่น เญย วิน-วั้ง, เสอี, หย่า อ๋อย หฒุ เมี่ยน ฮี่ง.
มป่า อิสะลาเอน เมี่ยน อ๋อย เฮ้น เจี๊ยน ฝาว.
19ม่าย เต้า ยาโค้บ เญย เฒ้ย-ฟุน อ๋อย ธ้วด ต้าย กุ๊น.
นิ่น อ๋อย เหมียด เหฑ่ง เยียม ฒี่ง เบ๊าะ ลิ์ว จ๋า เหฒ่ง เหฌี่ย เญย เมี่ยน.”
บาลาอัม โต่ว ฆะฮ้า ลาย เญย หว่า
20เยียม บาลาอัม ปวัด หิ่น ย่าง เญย สี่ นิ่น ปวัด อามาเล้ก เมี่ยน ฯฒฯ โต่ว น้าย เต๋ย หว่า,
“เยียม หม่าน กั๊วะ อามาเล้ก โหฒว ตะเยี้ยด,
มป่า เซ้ด เมว์ย นิ่น ฒู้ง หฒุ ป่าย เหฑ่ง.”
21นิ่น แอ๋ง ปวัด เคไน เมี่ยน ฯฒฯ โต่ว หว่า ก๊อง,
“เม่ย เยียม เญย ต๋อง เซ ว้วน ไห่,
เม่ย เญย เล์า เยียม แบ๋ง-ง่าม กะญั์ว.
22ไม้ กุ๊น ฮนั้ง หน่าย เม่ย บัว เคไน เมี่ยน อ๋อย หฒุ เหมียด.
อัดซู เมี่ยน อ๋อย ธ้าง เม่ย บัว มี่ง ด่ง หาย เล่า?”
23บาลาอัม แอ๋ง โต่ว หว่า ก๊อง,
“โค้ว อ๊า โล่ะ! ทิน-ฮู่ง ฮนั้ง น้าย โหฒว,
หาย เต้า ไฮ่ ม่าย แหม่ง เฒี่ยง?
24ม่าย เมี่ยน แฑง ฑั้ง เยียม คิดทิม กั๊วะ ต้าย
โหฒว ปุน อัดซู เหธา เอเบ หฒุ ป่าย,
มป่า นิ่น บัว กั้น หย่า อ๋อย หฒุ เหมียด.”
25ก๊อง ลิ์ว, บาลาอัม เจี์ย ซิน หฑวน อ๊ะ. บาล้าก หย่า หฒิว นิ่น กั้น เญย เจ๊า หฑวน หมี่ อ๊ะ.
Currently Selected:
ซ้าว เมี่ยน 24: IuMiTH
Highlight
Share
Compare
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
