ซ้าว เมี่ยน 18
18
ไซ เมี่ยน เหธา เลวี เมี่ยน เญย กง
1 เฒี้ยว ก๊อง บั๋ว อาโลน, “เม่ย เหธา เม่ย เญย ตอน บัว, แอ๋ง เหธา เม่ย บัว จวั่ง เลวี ฝีง เญย เมี่ยน เหยียด ฒู้ง อ๋อย หฒุ ดาม ป์าม สีง ติ่น เญย ฒุ์ย. เม่ย กั้น เหธา เม่ย เญย ตอน บัว อ๋อย หฒุ ดาม ป์าม ไซ เมี่ยน เญย กง เญย ฒุ์ย. 2อ๋อย หฒุ ต้อ เม่ย เญย ก๋อ-โย์ว บัว, เซ เม่ย เญย อง-ถาย เญย ฝีง, เลวี เมี่ยน, ต้าย เหธา เม่ย กั๊บ เจี๊ยน. เม่ย เหธา เม่ย เญย ตอน บัว เยียม แล์ง แหง่ง หว่า เญย ด๊บ-ลิ่ว หฑะเฮมียน ฟู-สู เญย เฒี่ยง โห่ นิ่น บัว อ๋อย หฒุ เถง เม่ย บัว. 3นิ่น บัว อ๋อย หฒุ เอย เจี๊ยน เม่ย บัว พ้าย เญย หว่า โหฒว, หย่า โหฒว ด๊บ-ลิ่ว เญย หญู่งๆ กง. มป่า นิ่น บัว ธิน-หม่าน ไม้ ตู๋ง นิด ฟัด สีง ติ่น เญย จา-สี่ ไฟ เหฒี่ย-ต้อง. เหฑีย นิ่น บัว เหธา เจี๊ยน เม่ย บัว หฒุ ไต่. 4นิ่น บัว อ๋อย หฒุ เหธา เม่ย บัว กั๊บ เจี๊ยน หลิ่ว เล์ย หวุ่ย ปวั้ง เญย ด๊บ-ลิ่ว, โหฒว ด๊บ-ลิ่ว เญย เหยียด ฒู้ง กง. หย่า ไม้ ตู๋ง ปุน กะเฮลน เมี่ยน ต้าย นิด ฟัด เม่ย บัว เยียม เญย ต๋อง.
5“เม่ย เหธา เม่ย เญย ตอน บัว อ๋อย หฒุ หลิ่ว เล์ย สีง ติ่น เหธา เหฒี่ย-ต้อง. ฮนั้ง หน่าย อิสะลาเอน เมี่ยน หธีง ไม้ หฒุ เยีย แอ๋ง โน์ว อ๊ะ. 6เยีย กั้น กิ๊น เม่ย บัว เญย ก๋อ-โย์ว, เลวี เมี่ยน, เยียม อิสะลาเอน เมี่ยน ธ้วด ต้าย โหฒว ฒี่ง เหญ่ย ปุน เม่ย บัว, หย่า ฝูง ปุน เฒี้ยว เหว่ย โหฒว หวุ่ย ปวั้ง ด๊บ-ลิ่ว เญย กง. 7มป่า ขูง เม่ย เหธา เม่ย เญย ตอน บัว ไฮ่ โหฒว เหฒี่ย-ต้อง เหธา แบะ แก้ง เดีย กะญั์ว เญย เหยียด ฒู้ง กง. เยีย เฒาะ ไซ เมี่ยน เญย กง โหฒว ฒี่ง เหญ่ย ฝูง ปุน เม่ย บัว. ธ้วด ลิ์ว เม่ย บัว, หาย เต้า ต้าย ฟัด, อ๋อย หฒุ ไต่.”
ไซ เมี่ยน ตุ๊ เญย ป่วน กะน้าย
8 เฒี้ยว ก๊อง บั๋ว อาโลน, “เยีย กั้น ปุน เม่ย โก๋ว ฝ่ง ห่อ ปุน เยีย เญย กะน้าย. อิสะลาเอน เมี่ยน ฝ่ง ห่อ ปุน เยีย เญย หญู่งๆ ธีง-เหฑ่ง กะน้าย เยีย จิว ปุน เม่ย เหธา เม่ย เญย เฒ้ย-ฟุน เหว่ย โหฒว เม่ย บัว เหยียด ลิ์ว ตุ๊ เญย ป่วน. 9ต้อ ต้าย ฝ่ง ห่อ เก้า ธีง-เหฑ่ง เจี๋ย เญย กะน้าย, ต้ง ไม้ ปั๊ว เหฒี่ย วั้ว เต๋ย, อ๋อย หฒุ เป๋น เม่ย บัว เญย ป่วน. ต้อ ต้าย ฝ่ง ห่อ ปุน เยีย เญย เหยียด ฒู้ง ธีง-เหฑ่ง เจี๋ย เญย กะน้าย, ไม้ กุ๊น เหฒี่ย เญย ล่าง หฒิ, ไฟ เหฒี่ย เหว่ย ฟิ ฒุ์ย, ไฟ เหฒี่ย เหว่ย ฟิ โหฒว ต่อง เญย ฒุ์ย, น้าย เต๋ย กะน้าย เซ เป๋น เม่ย เหธา เม่ย เญย ตอน บัว เญย ป่วน. 10อ๋อย หฒุ เยียม นอม ธีง-เหฑ่ง เจี๋ย เญย ต๋อง หญั่น.#18:10 ไฟ “อ๋อย หฒุ หญั่น ฮนั้ง หญั่น ธีง-เหฑ่ง กะน้าย”. ขูง มจั่ง ตอน ม่าย เล์ย หญั่น ฮนั้ง. อ๋อย หฒุ ฝุน เป๋น ธีง-เหฑ่ง เญย กะน้าย.
11“น้าย เต๋ย หย่า เป๋น เม่ย บัว เญย. อิสะลาเอน เมี่ยน ธุ้น กีง ฝ่ง ห่อ เญย กะน้าย เป๋น เม่ย บัว เญย. เยีย จิว ปุน เม่ย เหธา เม่ย เญย ตอน บัว, เม่ย เญย เซียะ บัว เหยียด ลิ์ว ตุ๊ เญย ป่วน. เยียม เม่ย บัว เญย เปย๊า ฒง เมี่ยน, ตะฟ่าน ธีง-เหฑ่ง, ไม้ ม่าย หวุย เญย เมี่ยน, หญั่น ตุ๊ เญย.
12“ต้อ ต้าย ฝ่ง ห่อ ปุน เฒี้ยว เญย เหยียด ฒู้ง ต้าว ถอง ล่าง หฒิ, ต้ง เก้า หลง เจี๋ย เญย กะลั้น โย่ว เหธา เก้า หลง เจี๋ย เญย เซียง-อะหงุ่น ติ๊ว เหธา ล่าง หฒิ, เยีย จิว ปุน เม่ย บัว. 13ตะฟ่าน วั้ว นอม เต่ย-ปูง เญย เดา ธ้วด เญย ต้าว ถอง กะน้าย, เมี่ยน ต้อ ต้าย ฝ่ง ห่อ ปุน เฒี้ยว ฯฒฯ เป๋น เม่ย เญย. เยียม เม่ย เญย เปย๊า ฒง, ตะฟ่าน ธีง-เหฑ่ง, ไม้ ม่าย หวุย เญย เมี่ยน นอ, หญั่น ตุ๊ เญย.
14“เยียม อิสะลาเอน เต่ย-ปูง ฝูง ตั๋ง ปุน เฒี้ยว เญย ป่วน#18:14 เป๊ย หมั่ง ธ้วด อียิบ 22:20. เหยียด ฒู้ง เป๋น เม่ย เญย หมี่ อ๊ะ.
15“ต้อ ต้าย ฝ่ง ห่อ ปุน เฒี้ยว, เลี่ยม เมี่ยน, เลี่ยม แซง-คู้, ตะฟ่าน ต้าว ทอย เป๋น เม่ย เญย หมี่ อ๊ะ. มป่า หฒวัง เมี่ยน เญย ต้าว เต้า ตอน ฒู้ง อ๋อย หฒุ หฒัวะ. ม่าย หวุย เญย แซง-คู้ เญย ต้าว เต้า ตอน หย่า อ๋อย หฒุ หฒัวะ. 16ปวั๊ง หฮลา อ๋อย หฒุ หฒัวะ. อ๋อย หฒุ เหว่ย เหยียด เต้า ธ้วด เหยียด ลู์ง ฟาม-ฒิ่น#18:16 ฮิบลู หว่า ก๊อง 5 เซเขน. เซ เล่ย ไม้ โก 55 กัม. เป๊ย หมั่ง เลวี 27:6. ญ่าน หฒิว สีง ติ่น ตี่ง ต้าย เญย เฮนี้ย-ต้าว.#18:16 ฮิบลู หว่า แอ๋ง ก๊อง “ม่าย เฮนี้ย-ต้าว เหธา 20 เกลา ฟี่ บัวะ”.
17“มป่า ต้าว ทอย ง่ง ไฟ ปะกี ยู่ง ไฟ ยู่ง ไม้ ตู๋ง หฒัวะ เหว่ย หฒุ เป๋น ธีง-เหฑ่ง เญย กะน้าย. อ๋อย หฒุ เฒาะ นิ่น บัว เญย ฑย้าม ฟุ เหฒี่ย-ต้อง กู้ หงว่าย, เฒาะ แซง-คู้ เญย เฮมย หล่ง โต์ว ปั๊ว เหฒี่ย ฝ่ง ห่อ, เว่ย ดาง เญย เฉีย หอบ เฒี้ยว เญย เฮญี้ยว. 18น้าย เต๋ย แซง-คู้ เญย อ๊อ เป๋น เม่ย เญย, ฮนั้ง ธุ้น กีง ฝ่ง ห่อ ลิ์ว เญย เหลาะ ฮยวัง อ๊อ เหธา บย่าว แหมง เหฒา-ฒุ่ย เป๋น เม่ย เญย.
19“อิสะลาเอน เมี่ยน ฝ่ง ห่อ ปุน เยีย เญย เหยียด ฒู้ง กะน้าย เยีย จิว ปุน เม่ย เหธา เม่ย เญย น่าม โญ์ว โหฒว เหยียด ลิ์ว ตุ๊ เญย ป่วน. เซ ฮนั้ง หล่ง เฑ้า เยียม เฒี้ยว เญย หฑะเฮมียน เหลียบ เจี์ย เหยียด ลิ์ว หล่ง เญย แหง่ง หว่า เหว่ย เม่ย บัว เหธา เม่ย บัว เญย เฒ้ย-ฟุน.”#เลวี 2:13; 2 ฒุ่น ต่อย โต้ว 13:5 20เฒี้ยว ก๊อง บั๋ว อาโลน, “เม่ย เยียม อิสะลาเอน เต่ย-ปูง ไม้ ม่าย เม่ย หฑิบ เญย ป่วน. เยียม นิ่น บัว บุด๋ง หย่า ไม้ ม่าย เม่ย ปุน ฆอย เญย ป่วน. เยียม อิสะลาเอน เมี่ยน บุด๋ง เยีย กั้น โหฒว เม่ย ปุน ฆอย เญย ป่วน หย่า เป๋น เม่ย หฑิบ เญย ป่วน.
เลวี เมี่ยน ตุ๊ เญย ป่วน กะน้าย
21“อิสะลาเอน เมี่ยน ฝ่ง ห่อ เหฒียบ โก๊ว เญย เหยียด โก๊ว กะน้าย#เลวี 27:30-33; หฑั่ม เล์ย-หลัด 14:22-29 เยีย จิว ปุน เลวี เมี่ยน โหฒว นิ่น บัว หฑิบ เญย ป่วน, วิ่น นิ่น บัว เยียม หวุ่ย ปวั้ง เญย ด๊บ-ลิ่ว ฟู-สู, โหฒว เญย กง. 22ยั่ง น้าย เจี๋ย, อิสะลาเอน เมี่ยน ไม้ คู่ มี่ง ฟัด หวุ่ย ปวั้ง เญย ด๊บ-ลิ่ว. มี่ง ฟัด นอ, ฯฒฯ หฒุ ดาม กั้น เญย ฒุ์ย หฒุ ไต่. 23ยั่ง น้าย มี่ง, ขูง เลวี เมี่ยน อ๋อย หฒุ โหฒว หวุ่ย ปวั้ง ด๊บ-ลิ่ว เญย กง หย่า ดาม โหฒว ต่อง ด๊บ-ลิ่ว เญย ฒุ์ย. น้าย เซ โหฒว เม่ย บัว ต่อย เจี๋ย ต่อย เหยียด ลิ์ว อ๋อย หฒุ กัน เญย เล์ย. เยียม อิสะลาเอน เมี่ยน บุด๋ง หย่า ไม้ ม่าย นิ่น บัว หฑิบ เญย ป่วน. 24ต๋าว หฑวน, อิสะลาเอน เมี่ยน ฝ่ง ห่อ ปุน เฒี้ยว เหฒียบ โก๊ว เญย เหยียด โก๊ว กะน้าย เยีย จิว ปุน เลวี เมี่ยน โหฒว นิ่น บัว เญย ป่วน. เหว่ย น้าย เยีย หธีง ต้าย ก๊อง, เยียม อิสะลาเอน เมี่ยน บุด๋ง ไม้ ม่าย นิ่น บัว หฑิบ เญย ป่วน.”
25 เฒี้ยว ก๊อง บั๋ว โมเซ, 26“อ๋อย หฒุ ก๊อง บั๋ว เลวี เมี่ยน, ‘อิสะลาเอน เมี่ยน ฝ่ง ห่อ เหฒียบ โก๊ว เญย เหยียด โก๊ว กะน้าย เยีย จิว ปุน เม่ย บัว เว่ย เม่ย บัว หฑิบ เญย ป่วน. เม่ย บัว ฒิบ ต้าย เม่ย บัว หย่า อ๋อย หฒุ เยียม น้าย เต๋ย เหฒียบ โก๊ว เญย เหยียด โก๊ว เฒาะ ธ้วด เหฒียบ โก๊ว เญย เหยียด โก๊ว ฝ่ง ห่อ ปุน เฒี้ยว. 27ฮนั้ง น้าย ฝ่ง ห่อ เซ ฝุน ฮนั้ง เยียม เบ๊าะ เบย้า เธี้ยง เญย ล่าง หฒิ, หย่า ฮนั้ง เยียม เญว่ย อะหงุ่น เปี๊ยว เญย ฒ่อง เญย ววม ฝ่ง ห่อ เญย ป่วน. 28ฮนั้ง หน่าย, เยียม อิสะลาเอน เมี่ยน ฒิบ ต้าย เหฒียบ โก๊ว เญย เหยียด โก๊ว, เม่ย บัว อ๋อย หฒุ แอ๋ง เฒาะ ธ้วด เหฒียบ โก๊ว เญย เหยียด โก๊ว ปุน เฒี้ยว. เฒี้ยว เญย ป่วน อ๋อย หฒุ จิว ปุน อาโลน ไซ เมี่ยน. 29เยียม จิว ปุน เม่ย บัว เญย หญู่งๆ อ๋อย หฒุ เฒาะ ธ้วด เก้า หลง เจี๋ย, เก้า ธีง-เหฑ่ง เจี๋ย เญย, เหว่ย โหฒว เฒี้ยว เญย ป่วน.’
30“อ๋อย หฒุ บั๋ว เลวี เมี่ยน, ‘เม่ย บัว เฒาะ เก้า หลง เจี๋ย เญย ป่วน ต้าย ฝ่ง ห่อ ฯฒฯ ฝุน ฮนั้ง เยียม เบ๊าะ เบย้า เญย เธี้ยง ไฟ เญว่ย อะหงุ่น เปี๊ยว เญย ฒ่อง ธ้วด ต้าย เญย นอ. 31เหฒ่ง เหฌี่ย วั้ว เต๋ย, เม่ย บัว เหธา เม่ย บัว เญย เปย๊า ฒง เมี่ยน เยียม หาย หญั่น หย่า ตุ๊ เญย. เซ เม่ย บัว เญย ฟิน-โค้ว เหว่ย เม่ย บัว เยียม หวุ่ย ปวั้ง เญย ด๊บ-ลิ่ว โหฒว เญย กง. 32เม่ย บัว เฒาะ เก้า หลง เจี๋ย เญย ป่วน ฝ่ง ห่อ เม่ย ฯฒฯ ไม้ หฒุ เหว่ย น้าย เต๋ย กะน้าย ดาม หาย หญู่ง ฒุ์ย. ไม้ ตู๋ง โหฒว ปุน อิสะลาเอน เมี่ยน ฝ่ง ห่อ น้าย เต๋ย ธีง-เหฑ่ง เญย กะน้าย ม่าย หวุย, เม่ย บัว ฯฒฯ ไม้ หฒุ ไต่ อ๊ะ.’”
Currently Selected:
ซ้าว เมี่ยน 18: IuMiTH
Highlight
Share
Compare
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
