มัดทาย 23
23
อ๋อย หฒุ ไฝ ฟิม หฌาว เล์ย เญย ฟิน-แซง เหธา ฟาลิสี เมี่ยน
(เป๊ย หมั่ง มาโค 12:38-39; ลูกา 11:43,46; 20:45-46)
1เจี๋ย ต้าย, เยซู บั๋ว หฒวัง เมี่ยน เหธา นิ่น เญย ไซ-ก๋อ, 2“หฌาว เล์ย เญย ฟิน-แซง เหธา ฟาลิสี เมี่ยน ม่าย เล์ย พ้อ เม่ง โมเซ เญย เล์ย.#23:2 กีก หว่า ก๊อง “เฒว์ย เจี๊ยน โมเซ เญย เหว่ย.” เอ๋ย เล์ย เซ ม่าย เล์ย พ้อ เม่ง โมเซ เญย เล์ย. 3เหว่ย น้าย เม่ย บัว อ๋อย หฒุ หมวัง หย่า เอย เจี๊ยน นิ่น บัว หฌาว เญย หว่า โหฒว. มป่า นิ่น บัว โหฒว เญย สี่ เม่ย บัว ไม้ ตู๋ง หฒวด, เหว่ย หฒุ นิ่น บัว หฌาว มป่า ไม้ เอย นิ่น บัว หฌาว เญย หว่า โหฒว. 4นิ่น บัว เฒาะ เฮนี้ย เญย, อะ ตุ๊ เหญีย เญย กะน้าย ผาน ปุน เมี่ยน เหญีย, มป่า นิ่น บัว กั้น เลี่ยม ไม้ คั้ง หล่ง เหยียด นอม ปั์ว-โด๊ะ เถง เมี่ยน โป้ว.
5“นิ่น บัว โหฒว เญย เหยียด ฒู้ง เซ เหว่ย ปุน เมี่ยน หมั่ง ฮนั้ง. หมั่ง ก๋า, นิ่น บัว เญย ปย้อง เหธา ปั์ว ตั้ง เจี๊ยน ตั๊บ กีง-โซว เญย หว่า วั้ว หญู่ง ฮลับ ด่ง หาย โฮล! ตี๋ง ลุย-จั๊วะ วั้ว เต๋ย ฆี่ง โฆว ด่ง หาย ด๊าว!#ซ้าว เมี่ยน 15:38; หฑั่ม เล์ย-หลัด 6:8; มัดทาย 6:1 6มี่ง ยิ่น หวุ่ย, นิ่น บัว ขูง อ๋อย เฒว์ย เจี๋ย แหมง ปูง เตี้ย กอน ฮนั้ง. เปียะ หวุ่ย ต้อง หย่า อ๋อย เฒว์ย หลง เจี๋ย เญย ต๋อง. 7มี่ง วั้ว เฮย-ห่อง อ๋อย เมี่ยน เฒาะ เยียะ ท่าย นิ่น บัว, หย่า เห่ว นิ่น บัว โหฒว ‘ไซ-เตี๋ย.’
8“ไม้ ตู๋ง ปุน เมี่ยน เห่ว เม่ย บัว โหฒว ‘ไซ-เตี๋ย’ เหว่ย หฒุ เม่ย บัว เหยียด ฒู้ง โหฒว ก๋อ-โย์ว. เม่ย บัว ขูง ม่าย ดุ เต้า ไซ-เตี๋ย ฮนั้ง. 9ไม้ ตู๋ง เห่ว เยียม น้าย ป้าม เกน เญย หาย เต้า โหฒว ‘เตีย,’ เหว่ย หฒุ เม่ย บัว ม่าย ดุ เต้า เตีย ฮนั้ง. เซ เยียม ทิน-ต้อง วั้ว เต้า เตีย. 10หย่า ไม้ ตู๋ง ปุน เมี่ยน เห่ว เม่ย บัว โหฒว ‘เปย๊ย เฒ้ย,’ เหว่ย หฒุ เม่ย บัว ม่าย ดุ เต้า เปย๊ย เฒ้ย ฮนั้ง, ต้ง เยีย, กีตู่.
11“เม่ย บัว หาย เต้า โหฒว โฮล เจี๋ย, วั้ว เต้า อ๋อย หฒุ โหฒว เม่ย บัว เญย โปว.#มัดทาย 20:26-27; มาโค 9:35; 10:43-44; ลูกา 22:26 12หาย เต้า ท่าย กั้น โหฒว โฮล, ทิน-ฮู่ง อ๋อย ปุน วั้ว เต้า โหฒว ไฝ. หาย เต้า เหญี่ยม กั้น โหฒว ไฝ, ทิน-ฮู่ง อ๋อย ปุน วั้ว เต้า โหฒว โฮล.#ลูกา 14:11; 18:14
เยซู ตี่ง เป้ย หฒะ เฮญี้ยว ฌ้วด เญย เมี่ยน เญย ฒุ์ย
(เป๊ย หมั่ง มาโค 12:40; ลูกา 11:39-42,44,52; 20:47)
13“เม่ย บัว เป้ย หฒะ เฮญี้ยว ฌ้วด หฌาว เล์ย เญย ฟิน-แซง เหธา ฟาลิสี เมี่ยน อ้า! เม่ย บัว อ๋อย ปวั้ง หฒุ โค้ว อ๊ะ. เม่ย บัว ตอง เจี๊ยน เมี่ยน เญย เฮมียน กวน เปียะ ทิน-ฮู่ง เญย กั๊วะ วั้ว เต้า แก้ง. เม่ย บัว กั้น ไม้ เปียะ. เมี่ยน อ๋อย เปียะ เม่ย บัว หย่า ตั๊ง เจี๊ยน ไม้ ปุน เปียะ.#23:13 ม่าย เต๋ย โล์-ฮนอย โซว ไม้ ม่าย 23:14 วั้ว เหยี่ยม. 14เม่ย บัว เป้ย หฒะ เฮญี้ยว ฌ้วด หฌาว เล์ย เญย ฟิน-แซง เหธา ฟาลิสี เมี่ยน อ้า! เม่ย บัว อ๋อย ปวั้ง หฒุ โค้ว อ๊ะ. เม่ย บัว ดั๊ว เอ๊า-กว๊า เญย จา-ตี้ง หญั่น, หย่า ตุ๊-เอ๋ย เต๋า เก๋า ด๊าว เญย ดั๊ว เมี่ยน. เหว่ย น้าย เม่ย บัว ฒู้ง หฒุ ตี่ง ฒุ์ย เก้า เฮนี้ย เจี๋ย.
15“เม่ย บัว เป้ย หฒะ เฮญี้ยว ฌ้วด หฌาว เล์ย เญย ฟิน-แซง เหธา ฟาลิสี เมี่ยน อ้า! เม่ย บัว อ๋อย ปวั้ง หฒุ โค้ว อ๊ะ. เม่ย บัว เจี๋ย ค้อย เจี๋ย กั๊วะ เหว่ย ล์อ ตุ๊ ดุ ล่าน เมี่ยน ต้าย เปียะ เม่ย บัว. เปียะ ลิ์ว, เม่ย บัว โหฒว ปุน นิ่น อ๋อย หฒุ ด๊อด เต่ย หญัวะ เก้า ธั้ม เม่ย บัว อี โก๊ว.
16“เม่ย บัว ต้อ เจ๊า เญย มฒีง แม่ง เมี่ยน อ้า! เม่ย บัว อ๋อย ปวั้ง หฒุ โค้ว อ๊ะ. เม่ย บัว ก๊อง, ‘หาย เต้า เฒี้ยง เจี๊ยน หฒั่ง ทิน-ฮู่ง เญย เปย๊า แล์ง หว่า, ไม้ เอย เจี๊ยน นิ่น แล์ง เญย หว่า โหฒว, ไม้ เป๋น หาย หญู่ง. มป่า หาย เต้า เฒี้ยง เจี๊ยน ฒอง หฒั่ง ทิน-ฮู่ง เญย เปย๊า วั้ว เต๋ย เจียม, ฒู้ง อ๋อย หฒุ เอย เจี๊ยน นิ่น แล์ง เญย หว่า โหฒว.’
17“มฒีง แม่ง เญย กะน้าย-หฮงง อ้า! หาย หญู่ง เก้า หล่ง เจี๊ยน เจี๋ย? เจียม ไฟ ปุน เจียม ธีง-เหฑ่ง วั้ว นอม หฒั่ง ทิน-ฮู่ง เญย เปย๊า? 18เม่ย บัว หย่า ก๊อง, ‘หาย เต้า เฒี้ยง เจี๊ยน เหฒี่ย-ต้อง แล์ง หว่า หย่า ไม้ เอย เจี๊ยน นิ่น แล์ง เญย หว่า โหฒว, ไม้ เป๋น หาย หญู่ง. มป่า หาย เต้า เฒี้ยง อัน เหฒี่ย-ต้อง กู้ หงว่าย วั้ว เต๋ย เหฒี่ย เญย กะน้าย แล์ง นอ, ฒู้ง อ๋อย หฒุ เอย เจี๊ยน นิ่น แล์ง เญย หว่า โหฒว.’ 19มฒีง แม่ง เญย เมี่ยน อ้า! หาย หญู่ง เก้า หล่ง เจี๊ยน เจี๋ย? เหฒี่ย เญย กะน้าย ไฟ เหฒี่ย-ต้อง? เซ เหฒี่ย-ต้อง ปุน เหฒี่ย เญย กะน้าย ธีง-เหฑ่ง. 20ฮนั้ง หน่าย, หาย เต้า เฒี้ยง เจี๊ยน เหฒี่ย-ต้อง แล์ง หว่า, นิ่น ฒู้ง เฒี้ยง เจี๊ยน เหฒี่ย-ต้อง เหธา อัน เหฒี่ย-ต้อง กู้ หงว่าย วั้ว เต๋ย เหฒี่ย เญย กะน้าย เหยียด ฒู้ง. 21หาย เต้า เฒี้ยง เจี๊ยน หฒั่ง ทิน-ฮู่ง เญย เปย๊า แล์ง หว่า, นิ่น ฒู้ง เฒี้ยง เจี๊ยน หฒั่ง ทิน-ฮู่ง เญย เปย๊า เหธา เยียม เปย๊า กะญั์ว วั้ว เต้า ทิน-ฮู่ง แล์ง หว่า. 22หาย เต้า เฒี้ยง เจี๊ยน ทิน-ต้อง แล์ง หว่า, นิ่น ฒู้ง เฒี้ยง เจี๊ยน ทิน-ฮู่ง เญย เหว่ย หย่า เฒี้ยง เจี๊ยน เฒว์ย เหว่ย วั้ว เต้า ทิน-ฮู่ง แล์ง หว่า.#อิสะยา 66:1; มัดทาย 5:34
23“เม่ย บัว เป้ย หฒะ เฮญี้ยว ฌ้วด หฌาว เล์ย เญย ฟิน-แซง เหธา ฟาลิสี เมี่ยน อ้า! เม่ย บัว อ๋อย ปวั้ง หฒุ โค้ว อ๊ะ. เม่ย บัว ต้อ แปะ ธิด, ท่ง เฮา เหธา เยี่ยน ซี เหฒียบ โก๊ว เญย เหยียด โก๊ว ฝ่ง ห่อ ทิน-ฮู่ง. เล์ย-หลัด หฌาว เก้า หล่ง เจี๊ยน เจี๋ย เญย เล์ย เซ อ๋อย หฒุ โหฒว แป้ง ฟิม, อ๋อย หฒุ ค้อ-เลี่ยน เมี่ยน, อ๋อย หฒุ โหฒว เฮญี้ยว หฒีง, มป่า เม่ย บัว ไม้ โหฒว. เม่ย บัว หอบ หฒุ ฮนั้ง น้าย โหฒว, หย่า อ๋อย หฒุ ไม้ ตู๋ง หละคุ เหฒียบ โก๊ว เญย เหยียด โก๊ว กะน้าย ฝ่ง ห่อ ทิน-ฮู่ง.#เลวี 27:30 24เม่ย บัว ต้อ เจ๊า เญย มฒีง แม่ง เมี่ยน อ้า! เยียม เม่ย บัว ฮบ เญย กะน้าย, ไฝ เจี๋ย เญย แกง เม่ย บัว โหล่ว ธ้วด หมี่ อ๊ะ. มป่า ล่อ ท่อ เม่ย บัว นะ ตุ๊ เหฌี่ย เญย.
25“เม่ย บัว เป้ย หฒะ เฮญี้ยว ฌ้วด หฌาว เล์ย เญย ฟิน-แซง เหธา ฟาลิสี เมี่ยน อ้า! เม่ย บัว อ๋อย ปวั้ง หฒุ โค้ว อ๊ะ. เม่ย บัว หฑาว เม่ย บัว เญย หฑ่อม เยี้ยน, ขูง หฑาว กะเหญี่ย เหฑ่ง ฮนั้ง. มป่า กะญั์ว ฒ่าง ปวั๊ง เหฑ่ง เม่ย บัว ธ้าง ต้าย เม้า ต้าย เญย กะน้าย.
26“มฒีง แม่ง เญย ฟาลิสี เมี่ยน อ้า! หฑาว หฑ่อม เยี้ยน อ๋อย หฒุ หฑาว เหฑ่ง กะญั์ว ด่าง. เลี่ยม กะเหญี่ย ฯฒฯ เหฑ่ง หมี่ อ๊ะ.
27“เม่ย บัว เป้ย หฒะ เฮญี้ยว ฌ้วด หฌาว เล์ย เญย ฟิน-แซง เหธา ฟาลิสี เมี่ยน อ้า! เม่ย บัว อ๋อย ปวั้ง หฒุ โค้ว อ๊ะ. เม่ย บัว เซ ฮนั้ง ฑ้าด เจี๊ยน ฮวุย-แปะ เญย จั๋น-ไต่ โฒ้ว นอ. ปวัด กะเหญี่ย เหฑว่ย เญย, มป่า กะญั์ว ม่าย จั๋น-ไต่ เญย บู๊ง เหธา หญู่งๆ ไล่ ฮลบ เญย กะน้าย ปวั๊ง เหฑ่ง.#กง-โฒ่ 23:3 28เม่ย บัว ฟี่ ฮนั้ง เญย. เมี่ยน ปวัด เม่ย บัว เซ ฮนั้ง คู้ เมี่ยน มป่า เม่ย บัว เป้ย หฒะ เฮญี้ยว ฌ้วด, ม่าย ฒุ์ย ปวั๊ง เหฑ่ง.
หฌาว เล์ย เญย ฟิน-แซง เหธา ฟาลิสี เมี่ยน อ๋อย หฒุ ตี่ง ฒุ์ย
(เป๊ย หมั่ง ลูกา 11:47-51)
29“เป้ย หฒะ เฮญี้ยว ฌ้วด หฌาว เล์ย เญย ฟิน-แซง เหธา ฟาลิสี เมี่ยน อ้า! เม่ย บัว อ๋อย ปวั้ง หฒุ โค้ว อ๊ะ. โต่ว หว่า เมี่ยน ไต่ มี่ง, เม่ย บัว เหธย ตุ๊ นิ่น บัว เญย โฒ้ว หลง ไห่. คู้ เมี่ยน เญย โฒ้ว เม่ย บัว หย่า ฒอง ตุ๊ เหฑว่ย. 30เม่ย บัว หย่า ก๊อง, ‘สี ก๊อง เยีย บัว เยียม เยีย บัว เญย อง-ถาย-แงะ วั้ว จ๋า ลู่ง เดี๊ย, เยีย บัว ฒู้ง ไม้ เหธา เยีย บัว เญย อง-ถาย-แงะ ไต๋ โต่ว หว่า เมี่ยน.’ 31ฮนั้ง หน่าย, เม่ย บัว แล์ง เม่ย บัว โหฒว ไต๋ โต่ว หว่า เมี่ยน วั้ว เต๋ย เมี่ยน เญย เฒ้ย-ฟุน. 32วั้ว หญู่ง, กุ๊น โหฒว เจี๊ยน มี่ง เถา โหฒว เหฒียง ฮนั้ง เม่ย เญย อง-ถาย โหฒว นอ.
33“เม่ย บัว หน่าย เต๋ย นาง, หน่าย ดุย นาง-โตะ เญย ป๊วน อ้า! เม่ย บัว ฮนั้ง หาย นอ ไฮ่ เปย๋า ตุ๊ ดุ๊ด, ไม้ หฒุ ตี่ง ฒุ์ย ด๊อด เต่ย หญัวะ?#มัดทาย 3:7; 12:34; ลูกา 3:7 34เหว่ย น้าย เยีย อ๋อย พ้าย เต๋ย โต่ว หว่า เมี่ยน เหธา ธง-เม่ง เญย เมี่ยน เหธา ฟิน-แซง ต้าย ล์อ เม่ย บัว. ม่าย เต๋ย เม่ย บัว อ๋อย ไต๋ ไต่. ม่าย เต๋ย เม่ย บัว อ๋อย ตีง เหฒียบ หฑั่ง จ๋า. ม่าย เต๋ย เม่ย บัว อ๋อย เยียม หวุ่ย ต้อง กะญั์ว หล่ง ปย๊า-ปิน เบ๊าะ, แอ๋ง โหฒว โตะ ปุน นิ่น บัว เหยียด นอม มู้ง หฒุ่น ธ้วด เจี๋ย เหยียด นอม มู้ง. 35ฮนั้ง หน่าย, เหยียด ฒู้ง คู้ เมี่ยน หฒุ ไต๋ ไต่, น้าย หญู่ง ฒุ์ย ด๊อด หฒุ เม่ย บัว, เยียม อาแบน หฒุ ไต๋ เถา เบเลคิยา เญย ตอน, เสคาลิยา, เยียม หฒั่ง ทิน-ฮู่ง เญย เปย๊า เญย ธีง-เหฑ่ง ต๋อง เหธา เหฒี่ย-ต้อง บุด๋ง หฒุ เม่ย บัว ไต๋.#ทิน เต่ย โต้ว 4:8; 2 ฒุ่น ต่อย โต้ว 24:20-21 36เยีย ก๊อง เฒียน บั๋ว เม่ย บัว, อี้ จ๋า เมี่ยน อ๋อย หฒุ หลาย น้าย เต๋ย ไต๋ เมี่ยน เญย สี่ หฒุ ตี่ง ฒุ์ย.
เยซู เฑ่า ไห่ เยลูซาเลม ฒี่ง
(เป๊ย หมั่ง ลูกา 13:34-35)
37“เยลูซาเลม ฒี่ง อ้า! เยลูซาเลม ฒี่ง! เม่ย ไต๋ โต่ว หว่า เมี่ยน หย่า เฒาะ หละเปย๊ย ฒง ไต่ ทิน-ฮู่ง พ้าย มี่ง เม่ย หน่าย เญย เมี่ยน. บัวะ เหฒีย หฑุ่น เยีย อ๋อย ฮล้อ ฒุ้น เม่ย เญย เมี่ยน, ฮนั้ง ไจ-เญ์ย ปั่ว ตอน เยียม ด๊าด-เดี๊ย นอ. มป่า เม่ย ไม้ คั้ง ปุน เยีย โหฒว. 38หมั่ง ม่าะ! เม่ย เญย เปย๊า ฒู้ง หฒุ กวั่ง เป๋น เปย๊า-ฮวาง.#เยเลมี 22:5 39เยีย บั๋ว เม่ย บัว, เยียม น้าย มี่ง เม่ย บัว ไม้ ตุ๊ ปวัด เยีย. ฒั้ว เม่ย บัว ก๊อง,
‘โท้ ทิน-ฮู่ง เหธย ฟุ เต๊ง เฒี้ยว เญย บั๋ว ต้าย วั้ว เต้า’#สีง ฑูง 118:26
หธีง ตุ๊ ปวัด เยีย.”
Currently Selected:
มัดทาย 23: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
