มัดทาย 13
13
ฮ์า ญิม เญย หว่า-เป๊ย
(เป๊ย หมั่ง มาโค 4:1-9; ลูกา 8:4-8)
1ต้ง หน่าย ฮนอย เยซู ธ้วด วั้ว นอม เปย๊า มี่ง เฒว์ย เจี๊ยน วั้ว ค้อย-ตอน เฮลน. 2เมี่ยน ธั้ม ไห่ ต้าย กั๊บ ฒุ้น เว่ย เจี๊ยน นิ่น, นิ่น ฯฒฯ เปียะ โผว ฑั้ง เฒว์ย เจี๊ยน. หฒวัง เมี่ยน โซ้ว เจี๊ยน วั้ว เบี๋ยน.#ลูกา 5:1-3 3เยซู หล่ง หว่า-เป๊ย หฌาว ธั้ม-หญู่ง เจ๊า นิ่น บัว.
นิ่น ก๊อง, “ม่าย เต้า เมี่ยน ธ้วด มี่ง ฮ์า ญิม. 4ฮ์า เญย เฒี่ยง โห่, ม่าย เต๋ย ญิม ด๊อด หฒุ เจ๊า. เหนาะ ต้าย หญั่น เหฑ่ง หมี่ อ๊ะ. 5ม่าย เต๋ย ญิม ด๊อด หฒุ หละเปย๊ย-หล่ม, ไม้ ม่าย เนีย ธั้ม เญย ต๋อง. เนีย ไม้ โฮ์, ญิม ฯฒฯ กุ ญ่า เซี้ยบ. 6หญุด ธ้วด ต้าย พุย หฒุ ฯฒฯ เหญา เหฑ่ง หมี่ อ๊ะ, เหว่ย หฒุ ญิม เหฌี่ย ฑู่ง ไม้ โด. 7ม่าย เต๋ย ญิม ด๊อด หฒุ ฌิ้ม-หล่ม. ฌิ้ม โฮล ต้าย บย์อง เจี๊ยน อ๊ะ. 8ม่าย เต๋ย ญิม ด๊อด หฒุ เดา-หลง, ธ้วด ต้าย เฒี่ยง ตุ๊ กิ๊ด. ม่าย เต๋ย เหยียด โก๊ว เซียว ตุ๊ เหยียด แป๊ะ โก๊ว. ม่าย เต๋ย เซียว ตุ๊ หลัวะ เหฒียบ โก๊ว. ม่าย เต๋ย เซียว ตุ๊ ฟ่า เหฒียบ โก๊ว. 9หาย เต้า ม่าย มน่อม อ๋อย หฒุ แปง มน่อม หมวัง หลง โอ่.”
เยซู เหว่ย หาย ติ่ว หล่ง หว่า-เป๊ย หฌาว
(เป๊ย หมั่ง มาโค 4:10-12; ลูกา 8:9-10)
10ไซ- ก๋อ บัว ต้าย หน่าย เยซู, “ไซ-เตี๋ย เหว่ย หาย ติ่ว หล่ง หว่า-เป๊ย หฌาว น้าย เต๋ย เมี่ยน?”
11เยซู เตา, “ทิน-ฮู่ง โหฒว เฒี้ยว กุ๊น เมี่ยน น้าย เต๋ย เกม เจี๊ยน เญย สี่, ทิน-ฮู่ง ปุน เม่ย บัว ฮิ้ว, มป่า ไม้ ปุน นิ่น บัว ฮิ้ว. 12เหว่ย หฒุ หาย เต้า ม่าย เญย, อ๋อย จา ปุน นิ่น ม่าย เก้า ธั้ม, ฒู้ง ม่าย เหฒ่ง. หาย เต้า ไม้ ม่าย, เลี่ยม นิ่น ม่าย ติ๊ เตียน เญย, อ๋อย หฒุ เฒาะ มี่ง.#มัดทาย 25:29; มาโค 4:25; ลูกา 8:18; 19:26 13ฮนั้ง น้าย, เยีย หล่ง หว่า-เป๊ย หฌาว นิ่น บัว เหว่ย หฒุ
‘นิ่น บัว หมั่ง หย่า หมั่ง ไม้ ปวัด,
หมวัง หย่า หมวัง ไม้ ไฮ์, หย่า ไม้ เม่ง แปะ.’
14นิ่น บัว ต๋อย-ติ่ว เหฑ่ง อิสะยา โต่ว เญย หว่า. นิ่น ก๊อง,
‘เม่ย บัว ด่ง หาย หมวัง,
เม่ย บัว ไม้ ไฮ่ เปียะ เฮญี้ยว,
ด่ง หาย หมั่ง, หย่า ไม้ ไม้ เม่ง แปะ.#อิสะยา 6:9-10
15เหว่ย หฒุ น้าย เต๋ย แปะ ฝีง เญย เฮญี้ยว ฑด,
นิ่น บัว ฒด เจี๊ยน มน่อม ค้วด หย่า ฌิบ เจี๊ยน มฒีง.
ไม้ เฒย แอ๊ะ, นิ่น บัว เญย มฒีง ไฮ่ หมั่ง ตุ๊ ปวัด,
มน่อม ไฮ่ หมวัง ตุ๊ ไฮ์,
เฮญี้ยว หย่า ไฮ่ เม่ง แปะ,
ฯฒฯ ฮวิน หฑวน ต้าย
ปุน เยีย หฒ่อ หลง นิ่น บัว.’
16มป่า เม่ย บัว ออน-เหลาะ ไห่ อ๊ะ, เหว่ย หฒุ เม่ย บัว เญย มฒีง ไฮ่ หมั่ง ตุ๊ ปวัด. เม่ย บัว เญย มน่อม ไฮ่ หมวัง ตุ๊ ไฮ์.#ลูกา 10:23-24 17เยีย บั๋ว เฒียน เม่ย บัว, ฒิ่น ด่าง ม่าย โต่ว หว่า เมี่ยน เหธา คู้ เมี่ยน ธั้ม อ๋อย ปวัด ไห่ ต้ง เม่ย บัว ปวัด เญย, มป่า นิ่น บัว ไม้ ตุ๊ ปวัด. อ๋อย ไฮ์ ต้ง เม่ย บัว ไฮ์ เญย, มป่า นิ่น บัว ไม้ ตุ๊ ไฮ์.
เยซู ก๊อง เม่ง ฮ์า ญิม เญย หว่า-เป๊ย
(เป๊ย หมั่ง มาโค 4:13-20; ลูกา 8:11-15)
18“วั้ว หญู่ง, เม่ย บัว หมวัง ก๋า, ฮ์า ญิม เญย หว่า-เป๊ย ฮนั้ง หาย นอ. 19ฮ์า ด๊อด เจ๊า วั้ว เต๋ย ญิม เซ ฮนั้ง เมี่ยน ไฮ์ ทิน-ฮู่ง โหฒว เฒี้ยว กุ๊น เมี่ยน เญย คู้ เฝียน#13:19 ไฟ โต์ ไฟ หว่า. มป่า ไม้ เม่ง แปะ. เยียม นิ่น บัว เญย เฮญี้ยว วั้ว เต๋ย คู้ เฝียน, ฮยวัง เอ๊าะ วั้ว เต้า ต้าย ธ้าง ธ้วด หมี่ อ๊ะ. 20ฮ์า ด๊อด หละเปย๊ย-หล่ม, เป๊ย เมี่ยน เยี้ยด ไฮ์ คู้ เฝียน ฯฒฯ อะเฮน้ย ฒิบ. 21มป่า เซ ฮนั้ง คู้ เฝียน เหฌี่ย ฑู่ง ไม้ โด, เสียน ไม้ เล่า. หลาย คู้ เฝียน ปวั้ง หฒุ สี่ ไฟ หฒุ เมี่ยน โหฒว โตะ, นิ่น บัว ฯฒฯ ธ้วด หมี่ อ๊ะ. 22ฮ์า ด๊อด หฒุ ฌิ้ม-หล่ม วั้ว เต๋ย ญิม, เป๊ย เมี่ยน ไฮ์ คู้ เฝียน. มป่า หลาย ขวน เฮญี้ยว เญย สี่ ไฟ หลาย ฮนั้ม ฒิ่น ญ่าน บย์อง เจี๊ยน คู้ เฝียน, ญิม ฯฒฯ ไม้ ไฮ่ เจ้า อ๊ะ. 23ฮ์า ด๊อด เดา-หลง เญย ญิม, เซ ฮนั้ง เมี่ยน ไฮ์ คู้ เฝียน หย่า เปียะ เฮญี้ยว, น้าย เต๋ย ญิม ฯฒฯ เฒี่ยง ตุ๊ กิ๊ด. ม่าย เต๋ย เหยียด โก๊ว ตุ๊ เหยียด แป๊ะ โก๊ว, ม่าย เต๋ย ตุ๊ หลัวะ เหฒียบ โก๊ว, ม่าย เต๋ย ตุ๊ ฟ่า เหฒียบ โก๊ว.”
ไฮ่ แหล่ง เมี่ยน เญย เบย้า หฒอบ เฒียน เบย้า เญย หว่า-เป๊ย
24เยซู แอ๋ง ก๊อง ติ้ว หว่า-เป๊ย ปุน นิ่น บัว หมวัง. นิ่น ก๊อง, “ทิน-ฮู่ง โหฒว เฒี้ยว กุ๊น เมี่ยน เป๊ย เต้า เมี่ยน ต้อ เบย้า มี่ง ฮ์า#13:24 ต้อ เบย้า มี่ง ฮ์า อิสะลาเอน เมี่ยน หฒวัง เบย้า นิ่น บัว ฮ์า, ไม้ เฒ์ย ฮนั้ง บัว นอ หฑบ. วั้ว เด่ย. 25ม่าย ม์วน, หฒวัง เมี่ยน เปว๋ย มฌ่อม วั้ว หฒั่น, ม่าย เต้า นิ่น เญย วิน-วั้ง เฒาะ ไฮ่ แหล่ง เมี่ยน เญย เบย้า ฮ์า หฒอบ เจี๊ยน, ฯฒฯ เปย๋า หมี่ อ๊ะ. 26เบย้า โฮล ต้าย, ธ้วด เบย้า ต๊อ เญย เฒี่ยง โห่ ฯฒฯ เฒียะ ตุ๊ วั้ว หญู่ง แหล่ง เมี่ยน เญย เบย้า หฒอบ เจี๊ยน ธ้วด.
27“โปว ฯฒฯ มี่ง หน่าย เด่ย-เฒี้ยว, ‘ก๋อ อ่า, เม่ย ฮ์า เบย้า วั้ว เด่ย ไม้ เฒ์ย? ฮนั้ง หน่าย, วั้ว หญู่ง แหล่ง เมี่ยน เญย เบย้า เยียม หาย ต้าย?’
28“เด่ย-เฒี้ยว เตา, ‘น้าย เซ วิน-วั้ง โหฒว เญย กง.’
“โปว ฯฒฯ หน่าย, ‘วั้ว หญู่ง, ก๋อ อ๋อย เยีย บัว มี่ง แปง กวั่ง ไฟ?’
29“เด่ย-เฒี้ยว ก๊อง, ‘ไม้ ตู๋ง แปง อ๊ะ. เฑ่า เหย เลี่ยม เบย้า แปง หฒุ. 30ธิ่น นิ่น โฮล ต้าย. เถา ก๊าด เญย เฒี่ยง โห่ เยีย ฯฒฯ บั๋ว กง-เมี่ยน ก๊าด วั้ว หญู่ง เมี้ย ด่าง, โด้ เจี๊ยน เหยียด เฒ้ย เหยียด เฒ้ย เญย, ต้อ มี่ง ปั๊ว กวั่ง. ฆะฮ้า เซียว เบย้า ต้าย ตั๊บ เจี๊ยน เยีย เญย ลั์ม.’”
ไล-จ๋าย ญิม เญย หว่า-เป๊ย
(เป๊ย หมั่ง มาโค 4:30-32; ลูกา 13:18-19)
31เยซู แอ๋ง ก๊อง ติ้ว หว่า-เป๊ย ปุน นิ่น บัว หมวัง. “ทิน-ฮู่ง โหฒว เฒี้ยว กุ๊น เมี่ยน เญย เอ๋ย เล์ย เป๊ย นอม ไล-จ๋าย ญิม, ม่าย เต้า เมี่ยน ต้อ มี่ง หฒวัง นิ่น เญย เด่ย. 32เหยียด ปั๊วะ ญิม เซ ต้ง ไล-จ๋าย ญิม เก้า ไฝ เจี๋ย. มป่า หฒวัง เจี๊ยน ธ้วด ต้าย เซ เก้า โฮล เจี๋ย หญู่งๆ ไล, ฒู้ง เป๋น เดี๋ยง.#13:32 น้าย หญู่ง ไล-จ๋าย เซ ไม้ เฒ์ย บัว เมี่ยน หฒวัง เญย ไล-จ๋าย. เหนาะ หย่า ต้าย โหฒว เล์า เยียม นิ่น เญย ฆว่า.”
ปี๊ง เญย หว่า-เป๊ย
(เป๊ย หมั่ง ลูกา 13:20-21)
33เยซู แอ๋ง ก๊อง เหยียด ติ้ว หว่า-เป๊ย ปุน นิ่น บัว หมวัง. “ทิน-ฮู่ง โหฒว เฒี้ยว กุ๊น เมี่ยน เซ ฮนั้ง ปี๊ง นอ. ม่าย เต้า มเซียะ ตอน เฒาะ เต๋ย ปี๊ง โช้ว ปัว ท้ง บ๊วน. น้าย เต๋ย บ๊วน ฯฒฯ ปุ๊ด เหฑ่ง หมี่ อ๊ะ.”
เยซู เหว่ย หาย ติ่ว หล่ง หว่า-เป๊ย
(เป๊ย หมั่ง มาโค 4:33-34)
34น้าย เต๋ย เจ๊า เหยียด ฒู้ง, เยซู ขูง หล่ง หว่า-เป๊ย หฌาว หฒวัง เมี่ยน ฮนั้ง. ธ้วด ลิ์ว หล่ง หว่า-เป๊ย นิ่น ไม้ หฌาว หาย หญู่ง นิ่น บัว. 35นิ่น ฮนั้ง น้าย โหฒว เหว่ย ปุน ต๋อย เหฑ่ง ฒิ่น ด่าง โต่ว หว่า เมี่ยน#13:35 ม่าย เต๋ย โล์-ฮนอย โซว เฟี้ย เจี๊ยน ก๊อง โต่ว หว่า เมี่ยน, อิสะยา. ก๊อง เญย หว่า.#สีง ฑูง 78:2 นิ่น ก๊อง,
“เยีย อ๋อย หล่ง หว่า-เป๊ย เหธา นิ่น บัว ก๊อง,
เยีย อ๋อย เฒาะ ต้ง ฒิ่น ด่าง เยียม เหฒย ลู่ง เหฒย เดา
ไม้ แก้ง บย๋าง ย่าง เถา อี้ หฒั่น เญย สี่
ฒุ่น ย่าง ปุน นิ่น บัว หมวัง.”
เยซู พ้อ เม่ง แหล่ง เมี่ยน เญย เบย้า หฒอบ เฒียน เบย้า เญย หว่า-เป๊ย
36เหธา หฒวัง เมี่ยน ก๊อง ลิ์ว หว่า, เยซู ฯฒฯ เปียะ เปย๊า หมี่ อ๊ะ. ไซ-ก๋อ บัว แอ๋ง ต้าย ก๊อง, “โท้ ไซ-เตี๋ย พ้อ เม่ง เยียม เด่ย หฒอบ ไฮ่ แหล่ง เมี่ยน เญย เบย้า เญย หว่า-เป๊ย ปุน เยีย บัว ฮิ้ว โอ่.”
37เยซู เตา, “ฮ์า#13:37 เป๊ย หมั่ง 13:24. เบย้า วั้ว เต้า เซ เยีย, ป้าม เมี่ยน เญย ตอน. 38เด่ย เซ น้าย ป้าม เกน. เบย้า ญิม เซ ทิน-ฮู่ง เญย กั๊วะ เญย แปะ ฝีง. ไฮ่ แหล่ง เมี่ยน วั้ว หญู่ง เบย้า ญิม เซ ฮยวัง เอ๊าะ วั้ว เต้า เญย แปะ ฝีง. 39ฮ์า ไฮ่ แหล่ง เมี่ยน เญย ญิม วั้ว เต้า วิน-วั้ง เซ เมี้ยน เญย ฮู่ง. ก๊าด เบย้า เญย เฒี่ยง โห่ หย่า เป๊ย ป้าม เกน เญย เซ้ด เมว์ย. ก๊าด เบย้า วั้ว เต๋ย กง-เมี่ยน เซ ฟิน-เมี่ยน.
40“กง-เมี่ยน ฮนั้ง หาย นอ ก๊าด ไฮ่ แหล่ง เมี่ยน เญย เบย้า ต้าย ปั๊ว โต์ว, เถา ป้าม เกน เญย เญย เซ้ด เมว์ย หย่า ฮนั้ง วั้ว นอ. 41เยีย, ป้าม เมี่ยน เญย ตอน, อ๋อย พ้าย เยีย เญย ฟิน-เมี่ยน มี่ง เฒาะ ต้ง หฒอบ เจี๊ยน เยีย เญย กั๊วะ เญย แปะ ฝีง วั้ว เต๋ย เหยียด ฒู้ง ดั๊ว เมี่ยน ป์าม ฒุ์ย เหธา โหฒว หว่าย เญย เมี่ยน เซียว ต้าย 42ฒอย เปียะ ต้ม โต์ว-เหฑ่า กะญั์ว, ปุน นิ่น บัว เยียม วั้ว ปู๋ง-ซีง ปู๋ง-เฉีย เญย เญี้ยม, หงาด เจี๊ยน ญ่า เตี๊ย. 43วั้ว หฒั่น กัน หลง ทิน-ฮู่ง วั้ว เต๋ย ฯฒฯ เยียม นิ่น บัว เญย หฒั่ง เตี๋ย เญย กั๊วะ ฮนั้ง บะฮนอย นอ, หฒิว ฌัง. หาย เต้า ม่าย มน่อม, อ๋อย หฒุ แปง มน่อม หมวัง หลง โอ่.
เจียม ญ่าน ปย๊บ เจี๊ยน เญย หว่า-เป๊ย
44“ทิน-ฮู่ง โหฒว เฒี้ยว กุ๊น เมี่ยน, เซ ฮนั้ง เจียม ญ่าน ปย๊บ เจี๊ยน วั้ว เด่ย นอ. ม่าย เต้า เมี่ยน ปวัด ลิ์ว, นิ่น ฯฒฯ แอ๋ง ปย๊บ เจี๊ยน อ๊ะ. นิ่น อะเฮน้ย ไห่ ฯฒฯ หฑวน มี่ง เฒาะ นิ่น เญย จา-ตี้ง หญู่งๆ กะน้าย หม่าย เหฑ่ง, ต้อ ญ่าน มี่ง ม์าย วั้ว ฑง เด่ย อ๊ะ.
หละเปย๊ย-โฒว เญย หว่า-เป๊ย
45“ทิน-ฮู่ง โหฒว เฒี้ยว กุ๊น เมี่ยน หย่า ฮนั้ง เต้า แซง-เอ๋ย เมี่ยน มี่ง ล์อ จ๋าย เญย หละเปย๊ย-โฒว.#13:45 จ๋าย เญย หละเปย๊ย-โฒว จั๋น-ไท้ หว่า ก๊อง ไข่ มุก. 46ล์อ ตุ๊ นอม เก้า จ๋าย เจี๋ย, นิ่น ฯฒฯ หฑวน มี่ง หม่าย เหฑ่ง นิ่น ม่าย เญย เหยียด ฒู้ง แอ๋ง ม์าย วั้ว นอม หละเปย๊ย-โฒว.
ป์อง มู์ง เญย หว่า-เป๊ย
47“ทิน-ฮู่ง โหฒว เฒี้ยว กุ๊น เมี่ยน หย่า เป๊ย มู์ง ป์อง เหฌี่ย ค้อย กว๊าด ตุ๊ หญู่งๆ เบย์า. 48เบย์า ปวั๊ง มู์ง, ป์อง เบย์า เญย เมี่ยน ทอ ธ้วด วั้ว เบี๋ยน มี่ง. นิ่น บัว ฯฒฯ เฒว์ย เจี๊ยน กิ๊น หลง เญย ตั๊บ ท้ง. ไม้ เป๋น วั้ว เต๋ย ฯฒฯ แกว๋ง กวั่ง. 49ป้าม เกน เญย เซ้ด เมว์ย หย่า ฮนั้ง น้าย นอ. ทิน-ฮู่ง เญย ฟิน-เมี่ยน อ๋อย ต้าย เฒาะ หว่าย เญย เมี่ยน เหธา โหฒว หอบ ทิน-ฮู่ง วั้ว เต๋ย ปุน ฆอย. 50หว่าย เญย ฒอย เปียะ ต้ม โต์ว-เหฑ่า กะญั์ว, ปุน นิ่น บัว เยียม วั้ว ปู๋ง-ซีง ปู๋ง-เฉีย เญย เญี้ยม, หงาด เจี๊ยน ญ่า เตี๊ย.”
เซียง-กะน้าย เหธา โล์-กะน้าย
51เยซู หน่าย ไซ-ก๋อ บัว, “น้าย เต๋ย หว่า เหยียด ฒู้ง เม่ย บัว เม่ง แปะ เญย ซ่าะ?”
นิ่น บัว เตา, “เม่ง แปะ เญย.”
52เยซู ก๊อง บั๋ว นิ่น บัว, “วั้ว หญู่ง, โม์ว เต้า หฌาว เล์ย เญย ฟิน-แซง, ต้ง ตุ๊ โหะ ทิน-ฮู่ง โหฒว เฒี้ยว กุ๊น เมี่ยน เญย เฒียน เล์ย วั้ว เต๋ย, เซ ฮนั้ง เต้า เปย๊า-เฒี้ยว เยียม นิ่น เซียว กะน้าย เญย ต๋อง เฒาะ ธ้วด โล์ เญย เหธา เซียง เญย กะน้าย ต้าย นอ.”
นาซาเล้ด มู้ง เญย เมี่ยน เฆ่ม เยซู
(เป๊ย หมั่ง มาโค 6:1-6; ลูกา 4:16-30)
53เยซู ก๊อง ลิ์ว น้าย เต๋ย หว่า-เป๊ย, นิ่น ธ้วด วั้ว นอม ต๋อง 54แอ๋ง หฑวน เถา นิ่น กั้น เญย ป๊วน-มู้ง, เยียม วั้ว หวุ่ย ต้อง หฌาว เมี่ยน. หมวัง ไฮ์ เญย เมี่ยน บัวะ ฮ่อง ไห่. นิ่น บัว หน่าย ก๋า, “นิ่น เยียม หาย ตุ๊ น้าย หญู่ง ธง-เม่ง นี? นิ่น ฮนั้ง หาย นอ ไฮ่ โหฒว ตุ๊ น้าย เต๋ย บัวะ ฮ่อง เญย สี่? 55นิ่น ไม้ เฒ์ย วั้ว เต้า เดี๋ยง-หฒั่ง เญย ตอน ไฟ? นิ่น เญย มา หย่า ไม้ เฒ์ย มาลียา ไฟ? ยากอบ, โยเซ้บ, ซีโมน, เหธา ยูดาด โหฒว นิ่น เญย โย์ว ไม้ เฒ์ย? 56นิ่น เญย หมั่ว บัว เหยียด ฒู้ง เหธา บัว เยียม น้าย ไม้ เฒ์ย? วั้ว หญู่ง, น้าย เต๋ย ธง-เม่ง เหธา ปั้น เหฒ่ย โหฒว บัวะ ฮ่อง เญย สี่ เยียม หาย ตุ๊ ต้าย?” 57นิ่น บัว ฯฒฯ เฆ่ม นิ่น อ๊ะ.
เยซู บั๋ว นิ่น บัว, “โต่ว หว่า เมี่ยน มี่ง เถา หาย, ม่าย เมี่ยน ท่าย. ขูง กั้น เญย ป๊วน-มู้ง เหธา เปย๊า ฒง เมี่ยน ไม้ ท่าย ฮนั้ง.”#โยฮัน 4:44 58หลาย นิ่น บัว ไม้ เสียน, เยียม วั้ว เยซู ฯฒฯ ไม้ โหฒว บัวะ ฮ่อง เญย สี่ ธั้ม อ๊ะ.
Currently Selected:
มัดทาย 13: IuMiTH
Highlight
Copy
Compare
Share
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
