ลูกา 2
2
เยซู ธ้วด เสย
(เป๊ย หมั่ง มัดทาย 1:18-25)
1วั้ว หฒั่น ซีซา ออกัดตัด ฮู่ง เหฌี่ย หลี่ง หัด โลมา เฒียว-ตี้ง เหยียด ฒู้ง แปะ ฝีง ฝาว เมี่ยน โฮ์ว. 2(ฝาว น้าย ตะเยี้ยด หฑุ่น เมี่ยน โฮ์ว วั้ว หฒั่น, ต๋อย หฒุ คีลินิอัด โหฒว หฒูง กุ๊น ซีเลีย เต่ย-ปูง.) 3เต้าๆ เมี่ยน ฯฒฯ หฑวน กั้น เญย ป๊วน-มู้ง ฝาว เมี่ยน โฮ์ว.
4โยเซ้บ ฯฒฯ เยียม กาลิลี แซ้ง, นาซาเล้ด มู้ง, มี่ง ยูเดีย แซ้ง, เบดเลเฮม มู้ง วั้ว. น้าย นอม มู้ง เซ โล์-ฮนอย ดาวิด ฮู่ง ธ้วด เสย เญย มู้ง. โยเซ้บ เซ ดาวิด ฮู่ง เญย เฒ้ย-ฟุน หธีง ต้าย อ๋อย หฒุ มี่ง วั้ว นอม มู้ง ฝาว เมี่ยน โฮ์ว. 5โยเซ้บ ก๊อง เฒี่ยง มาลียา, ฯฒฯ ต้อ นิ่น เหธา เจี๊ยน มี่ง. มาลียา เญย ซิน หย่า ไม้ ขูง.
6เยียม เบดเลเฮม มู้ง วั้ว หฒั่น, เถา ดุ๊ด ซิน เญย เฒี่ยง โห่ อ๊ะ. 7มาลียา ฯฒฯ ยู์ง ตุ๊ นิ่น เญย ต้าว เต้า ตอน ต้าย, หล่ง สวัง เปว เจี๊ยน ปุน นิ่น เปว๋ย ม์า-โฒ่ กะญั์ว, เหว่ย หฒุ แคะ เปย๊า ไม้ ม่าย ต๋อง ปุน นิ่น บัว ฮิด.
หมั่ง ยู่ง เญย เมี่ยน
8วั้ว นอม เต่ย-ปูง ม่าย เต๋ย โก๋ว ปะกี ยู่ง เญย เมี่ยน ลู่ง ม์วน หฒั่น เยียม ยู่ง เธี้ยง โก๋ว นิ่น บัว เญย ยู่ง. 9ม่าย เต้า เฒี้ยว เญย ฟิน-เมี่ยน หิ่น ธ้วด ต้าย หย่า ม่าย เฒี้ยว เญย ฌัง-หล่าง หฒิว เจี๊ยน นิ่น บัว, แฮะ นิ่น บัว กั้ม เหฑีย ไห่.
10ฟิน-เมี่ยน ก๊อง บั๋ว นิ่น บัว, “ไม้ ตู๋ง กั้ม เหฑีย โอ่. เยีย ต้อ คู้ เฝียน ต้าย ปุน เม่ย บัว. น้าย คู้ เฝียน อ๋อย ปุน ลู่ง เดี๊ย เมี่ยน ตุ๊ เฌียน-โย่ว. 11อี้ ฮนอย, เยียม ดาวิด เญย มู้ง, เม่ย บัว เญย เหฌียว เฒี้ยว ธ้วด เสย ต้าย อ๊ะ, ต้ง เฒี้ยว กีตู่. 12น้าย เซ โหฒว จั๋ง-โห่ ปุน เม่ย บัว. เม่ย บัว อ๋อย ล์อ ปวัด เต้า กู้งว์า เปว เจี๊ยน สวัง เปว๋ย ม์า-โฒ่ กะญั์ว.”
13เลี่ยม เฒ่ย แอ๋ง หิ่น ธ้วด เหยียด ต้ม กวั้น ฟิน-เมี่ยน ต้าย เหธา เจี๊ยน หิ่น ธ้วด ด่าง วั้ว เต้า, เธง ทิน-ฮู่ง. 14นิ่น บัว ก๊อง,
“เธง ทิน-ฮู่ง, เยียม ฮลัง เจี๋ย เญย ต๋อง วั้ว เต้า.
ลู่ง เดี๊ย เมี่ยน, ต้ง นิ่น อะเฮน้ย วั้ว เต๋ย, อ๋อย ตุ๊ แป้ง ออน.”
15ฟิน-เมี่ยน ฯฒฯ เล่ย ฆอย นิ่น บัว, แอ๋ง หฑวน ทิน-ต้อง หมี่ อ๊ะ. วั้ว เต๋ย โก๋ว ยู่ง เมี่ยน, ล่าน บั๋ว ล่าน, “บัว อ๋อย หฒุ มี่ง เบดเลเฮม มู้ง หมั่ง ก๋า เฒี้ยว บั๋ว บัว น้าย เต๋ย เจ๊า เอาะ?”
16นิ่น บัว ฯฒฯ ก๊าน เจี๊ยน มี่ง, ล์อ ปวัด มาลียา เหธา โยเซ้บ หย่า ปวัด วั้ว เต้า กู้งว์า เปว๋ย เจี๊ยน ม์า-โฒ่ กะญั์ว. 17โก๋ว ปะกี ยู่ง เญย เมี่ยน ปวัด, นิ่น บัว ฯฒฯ เฒียง ฟิน-เมี่ยน ก๊อง น้าย เต้า กู้งว์า เญย เจ๊า-โหล่ว บั๋ว หฒวัง เมี่ยน. 18หาย เต้า ไฮ์ หย่า บัวะ ฮ่อง โก๋ว ยู่ง เมี่ยน ก๊อง เญย หว่า. 19มป่า มาลียา ไม้ ไฮ่ หละคุ. อ้าโหล่ จั๋ง เจี๊ยน น้าย เต๋ย เจ๊า. 20หมั่ง ยู่ง เญย เมี่ยน เหว่ย นิ่น บัว ปวัด ลิ์ว, ไฮ์ ลิ์ว เญย สี่ ฯฒฯ ท่าย ทิน-ฮู่ง, เธง เจี๊ยน ทิน-ฮู่ง หฑวน. เหยียด ฒู้ง ต๋อย เหฑ่ง ฟิน-เมี่ยน ก๊อง เญย หว่า.
ต้อ เยซู ฝูง ปุน ทิน-ฮู่ง
21เยซู ธ้วด เสย ต้าย ปวั๊ง เหฮยียด ฮนอย วั้ว ฮนอย, เถา เฒี่ยง โห่ เถง นิ่น เจี๋ย ก๊าด เญย เล์ย,#เลวี 12:3 นิ่น บัว ฯฒฯ เถง นิ่น ธ้วด บั๋ว เห่ว เยซู.#ลูกา 1:31 น้าย นอม บั๋ว, มาลียา ไม้ แก้ง ม่าย ซิน วั้ว หฒั่น ฟิน-เมี่ยน เถง ธ้วด เหฒียง อ๊ะ.
22เอย เจี๊ยน โมเซ เญย เล์ย-หลัด, มาลียา สา หวุย เญย ฮนอย-เหญียะ เถา. โยเซ้บ เหธา มาลียา ฯฒฯ ต้อ เยซู มี่ง เยลูซาเลม ฒี่ง ฝูง ปุน เฒี้ยว,#เลวี 12:6-8 23เอย เฒี้ยว เญย เล์ย-หลัด เฟี้ย เจี๊ยน ก๊อง,
“หาย เต้า ยู์ง ตุ๊ ต้าว เต้า ตอน อ๋อย หฒุ ฝูง ปุน เฒี้ยว.”#ธ้วด อียิบ 13:2,12,15
24นิ่น บัว หย่า เอย เฒี้ยว เญย เล์ย-หลัด ต้อ กะน้าย มี่ง เหฒี่ย ปุน เฒี้ยว ฮนั้ง น้าย,
“เหยียด ต๋อย เหนาะ โฆ ไฟ อี นอม แปะ ก๊บ หลุน.”
25เยียม เยลูซาเลม ฒี่ง ม่าย ล่าน เมี่ยน, บั๋ว เห่ว สิเมโอน. นิ่น โหฒว คู้ เมี่ยน, กัน หลง ทิน-ฮู่ง เญย เล์ย. นิ่น ฒั้ว เจี๊ยน ทิน-ฮู่ง เหฌียว อิสะลาเอน เมี่ยน. สีง ลี่ง หย่า เหธา นิ่น เยียม. 26สีง ลี่ง ปุน นิ่น ฮิ้ว ตุ๊ นิ่น ฒั้ว เถา ตุ๊ ปวัด เฒี้ยว แล์ง ปุน วั้ว เต้า กีตู่ หธีง ต้าย ไต่.
27สีง ลี่ง ต้อ สิเมโอน เปียะ หฒั่ง ทิน-ฮู่ง เญย เปย๊า. โยเซ้บ เหธา มาลียา หย่า ต้อ เยซู เปียะ มี่ง อ๋อย เอย เจี๊ยน เล์ย-หลัด โหฒว. 28สิเมโอน ฯฒฯ ฮล้อบ เจี๊ยน เยซู เธง ทิน-ฮู่ง. นิ่น ก๊อง,
29“เฒี้ยว อ่า, เม่ย แล์ง เญย หว่า, เม่ย โหฒว เหฒียง อ๊ะ.
อี้ หฒั่น ปุน เยีย, เม่ย เญย โปว, แป้ง ออน เญย เกวย เสย.
30เหว่ย หฒุ เยีย กั้น เญย มฒีง ตุ๊ ปวัด ลิ์ว เม่ย เญย เหฌียว เอน,
31ต้ง เม่ย ตอง เจี๊ยน หม่าน ฝีง เมี่ยน หลิ่ว เล์ย เหฒียง เญย เหฌียว เอน.
32น้าย เต้า กู้งว์า โหฒว ฌัง
ปุน กั้น ฝีง เมี่ยน ฮิ้ว ตุ๊ เม่ย เญย เอ๋ย,
หย่า ปุน เมี่ยน ท่าย เม่ย เญย แปะ ฝีง, อิสะลาเอน เมี่ยน.”#อิสะยา 42:6; 49:6; 52:10
33กู้งว์า เญย เตี๋ย หม่า บัวะ ฮ่อง ไห่ สิเมโอน ฮนั้ง น้าย นอ ก๊อง กู้งว์า เญย เจ๊า-โหล่ว. 34สิเมโอน ปวัง หว่า ปุน นิ่น บัว, แอ๋ง บั๋ว เยซู เญย มา, มาลียา, “ทิน-ฮู่ง กิ๊น น้าย เต้า กู้งว์า ต้าย ปุน อิสะลาเอน เมี่ยน ธั้ม เญย หฒุ เหมียด, ปุน ธั้ม เญย ตุ๊ เหฌียว. นิ่น อ๋อย เป๋น นอม จั๋ง-โห่ มป่า ม่าย เมี่ยน ธั้ม เญย อ๋อย ต้าน นิ่น, 35ปุน นิ่น บัว เยียม เฮญี้ยว ฮนั้ม เญย เจ๊า ปิ๋ว เม่ง ธ้วด ต้าย. เม่ย อ๋อย ปวั้ง หฒุ เฑ่า ฮนั้ง หฑุ ด๊าว ป๊ะ เจี๊ยน เม่ย เญย บะฑิว วั้ว นอ.”
36แอ๋ง ม่าย เต้า มเซียะ ตอน, บั๋ว เห่ว อันนา, โหฒว โต่ว หว่า เมี่ยน. นิ่น เซ อาเซ ฝีง, ฟานูเอน เญย เซียะ. อันนา โก๋ ไห่ อ๊ะ. ฒิ่น ด่าง นิ่น ตอง เจี๊ยน จา เสี่ย หฮญัง, 37ฯฒฯ กว๊า หมี่ อ๊ะ. นิ่น โหฒว เอ๊า-กว๊า เถา ตุ๊ เป๊ด เหฒียบ เฝย หฮญัง หย่า ไม้ มี่ง หาย เดา. ขูง เยียม หฒั่ง ทิน-ฮู่ง เญย เปย๊า ฮนอยๆ ม์วนๆ หฒั่ง ทิน-ฮู่ง ฮนั้ง. ม่าย เฒี่ยง โห่ นิ่น เฒย เจี๊ยน ไม้ หญั่น หาย หญู่ง หย่า เต๋า เก๋า. 38สิเมโอน เยียม วั้ว ก๊อง เจี๊ยน หว่า วั้ว หฒั่น, อันนา แอ๋ง มี่ง เถา นิ่น บัว วั้ว, แล์ง ฒี่ง ทิน-ฮู่ง แอ๋ง ก๊อง น้าย เต้า กู้งว์า เญย เจ๊า-โหล่ว ปุน ฒั้ว เจี๊ยน ทิน-ฮู่ง ต้าย หฒัวะ เยลูซาเลม ฒี่ง วั้ว เต๋ย เมี่ยน หมวัง.
39โยเซ้บ เหธา มาลียา เอย เจี๊ยน เฒี้ยว เญย เล์ย-หลัด โหฒว เหฒียง เหฑ่ง, นิ่น บัว ฯฒฯ หฑวน กาลิลี แซ้ง, นิ่น บัว เญย ป๊วน-มู้ง นาซาเล้ด.#มัดทาย 2:23 40น้าย เต้า กู้งว์า กุ๊น โฮล กุ๊น เฮ้น, กุ๊น ม่าย ธง-เม่ง, ทิน-ฮู่ง หย่า เหธย เอน ปุน นิ่น.
เยซู ตุ๊ เหฒียบ เหญ่ย หฮญัง วั้ว หฮญัง
41หฮญังๆ เยซู เญย เตี๋ย หม่า มี่ง เยลูซาเลม ฒี่ง เจี๋ย เสีย แหม่ง ฒิบ.#ธ้วด อียิบ 12:1-27; หฑั่ม เล์ย-หลัด 16:1-8 42เยซู ตุ๊ เหฒียบ เหญ่ย หฮญัง วั้ว หฮญัง, นิ่น บัว เอย เจี๊ยน เล์ย มี่ง เจี๋ย ฒิบ. 43ต้ง วั้ว หฑุ่น มี่ง เกา, เจี๋ย ฒิบ เญย หวุ่ย หฑาน, นิ่น บัว หฑวน, มป่า น้าย เต้า ตอน, เยซู, หธ่อ เยียม เยลูซาเลม ฒี่ง. นิ่น เญย เตี๋ย หม่า หย่า ไม้ ฮิ้ว ตุ๊, 44หล่าย เยซู เหธา เจี๊ยน เมี่ยน ธั้ม หฑวน. นิ่น บัว ฯฒฯ หฑวน เหยียด ฮนอย หฮมวัง อ๊ะ, หธีง ต้าย ล์อ หน่าย เธียน-เธะ ก๋อ-โย์ว. 45ล์อ หย่า ล์อ ไม้ ปวัด, นิ่น บัว ฯฒฯ ต๋าว ซิน หฑวน เยลูซาเลม ฒี่ง ล์อ.
46แอ๋ง ล์อ เกา, เถา ตะฟาม ฮนอย วั้ว ฮนอย, ปวัด นิ่น เยียม หฒั่ง ทิน-ฮู่ง เญย เปย๊า เฒว์ย เจี๊ยน ฟิน-แซง เญย บุด๋ง, เหยียด ปิ่น หมวัง นิ่น บัว ก๊อง, เหยียด ปิ่น หน่าย นิ่น บัว. 47เมี่ยน ไฮ์ นิ่น ก๊อง เญย หว่า, หาย เต้า หย่า บัวะ ฮ่อง ไห่ นิ่น ด่ง หน่าย ไกว, เตา ตุ๊ ด่ง หน่าย หอบ.
48นิ่น เญย เตี๋ย หม่า ปวัด นิ่น วั้ว หฒั่น, นิ่น บัว เลี่ยม ฮนั้ม ไม้ ฮิ้ว. นิ่น เญย มา ฯฒฯ ก๊อง บั๋ว นิ่น, “อา ตอน อ้า! เม่ย ฝู่ง ฮนั้ง น้าย นอ โหฒว ปุน เยีย บัว? เม่ย เญย เตีย เหธา เยีย ล์อ ไม้ ปวัด เม่ย, เฑ่า ตุ๊ โค้ว ไห่ อ๊ะ นีอา.”
49เยซู เตา, “อา มา บัว เหว่ย หาย ติ่ว ล์อ เยีย? เม่ย บัว ไม้ ฮิ้ว ตุ๊ เยีย อ๋อย หฒุ เยียม เยีย เญย เตีย เญย เปย๊า?” 50เยซู ฮนั้ง หน่าย นอ ก๊อง มป่า นิ่น บัว หธ่อ ฮนั้ม ไม้ เม่ง แปะ.
51เยซู ฯฒฯ กัน เจี๊ยน นิ่น บัว หฑวน นาซาเล้ด มู้ง, หย่า หมวัง เหฑ่ง เตี๋ย หม่า เญย หว่า. น้าย เต๋ย เจ๊า-โหล่ว ธ้วด ลิ์ว, นิ่น เญย มา หาย หฒั่น หย่า จั๋ง เจี๊ยน. 52เยซู กุ๊น โฮล กุ๊น ม่าย ธง-เม่ง. ทิน-ฮู่ง อะเฮน้ย ไห่ นิ่น. เมี่ยน หย่า ฟี่ ฮนั้ง เญย อะเฮน้ย ไห่ นิ่น.#1 ซามูเอน 2:26; ธง-เม่ง หว่า 3:4
Currently Selected:
ลูกา 2: IuMiTH
Highlight
Share
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007