เลวี 8
8
ออน อาโลน ตอน-เตี๋ย ต่อย โหฒว ไซ เมี่ยน
(เป๊ย หมั่ง ธ้วด อียิบ 29:1-37)
1 เฒี้ยว ก๊อง บั๋ว โมเซ, 2“ต้อ อาโลน เหธา นิ่น เญย ตอน บัว ต้าย โซ้ว เจี๊ยน หวุ่ย ปวั้ง ด๊บ-ลิ่ว เญย แก้ง ด่าง. แอ๋ง ต้อ โหฒว ไซ เญย ลุย-โหว เหธา ออน เมี่ยน เญย โย่ว เหธา เต้า ง่ง โก๊ว เหฒี่ย ฟิ ฒุ์ย เหธา อี เต้า ปะกี ยู่ง โก๊ว, เหธา ดาน ไม้ อัน ปี๊ง เญย ฌั้ว ต้าย. 3แอ๋ง เห่ว หฒวัง แปะ ฝีง ต้าย กั๊บ ฒุ้น เยียม หวุ่ย ปวั้ง ด๊บ-ลิ่ว เญย แก้ง ด่าง.” 4โมเซ หฒิว เฒี้ยว บั๋ว เญย หว่า โหฒว เหฑ่ง. หฒวัง เมี่ยน ฯฒฯ ต้าย กั๊บ ฒุ้น เยียม หวุ่ย ปวั้ง ด๊บ-ลิ่ว เญย แก้ง ด่าง.
5โมเซ บั๋ว หฒวัง เมี่ยน, “เฒี้ยว พ้าย เหฒียง อ๋อย หฒุ ฮนั้ง น้าย นอ โหฒว.” 6โมเซ ฯฒฯ ต้อ อาโลน เหธา นิ่น เญย ตอน บัว ต้าย, หล่ง ววม เถง นิ่น บัว หฑาว ซิน. 7นิ่น เฒาะ กะญั์ว วั้ว เหยี่ยม ลุย-ด๊าว เถง อาโลน ฒุ เจี๊ยน, ไซ เจี๊ยน เจี๋ย จ๊าย เดีย. เฒาะ ต้ม ลุย-กว๋า เถง นิ่น ฒุ เจี๊ยน. แอ๋ง เฒาะ เอโฟ้ด ปุน นิ่น ฒุ เจี๊ยน, หย่า หล่ง ปั์ว-เต้า หลง, ดั๊ด ต้าย เหฑว่ย เญย เอโฟ้ด ฮลาง, ไซ เจี๊ยน ซิน หลง เญย. 8โมเซ แอ๋ง เฒาะ ปวัง หละค้วด วั้ว คว้าย กะน้าย ปวัง เจี๊ยน อาโลน เญย หละค้วด, หย่า เฒาะ อุลิม เหธา ทุมมิม ตั๊บ เจี๊ยน กะญั์ว, 9เฒาะ มฆ้อง-เปว เปว เจี๊ยน นิ่น เญย มฆ้อง. แอ๋ง เฒาะ โหฒว จั๋ง-โห่ ปิ๋ว เม่ง ฝูง ปุน เฒี้ยว วั้ว คว้าย เจียม-ป้าย แน้ด เจี๊ยน มฆ้อง-เปว หฑะเฮมียน แหมง.
10โมเซ ฯฒฯ หล่ง ออน เมี่ยน เญย โย่ว โต๋ หฒั่ง ทิน-ฮู่ง เญย ด๊บ-ลิ่ว เหธา เยียม ด๊บ-ลิ่ว เญย หญู่งๆ กะน้าย, เฒาะ เหยียด ฒู้ง ฝูง เป๋น เฒี้ยว เญย. #8:10 ม่าย เต๋ย โซว ฟาน ต้าย ก๊อง “สา เป๋น ธีง-เหฑ่ง เญย กะน้าย.” เอ๋ย เล์ย เซ “กิ๊น ธ้วด ต้าย เหว่ย เป๋น เฒี้ยว เญย กะน้าย ฯฒฯ เป๋น ธีง-เหฑ่ง, ไม้ ม่าย หวุย เญย กะน้าย”.#ธ้วด อียิบ 40:9 11นิ่น แอ๋ง หล่ง วั้ว เต๋ย โย่ว ฟุ เหฒี่ย-ต้อง กู้ หงว่าย เสี่ย หฑุ่น, หย่า กั๊วะ เหฒี่ย ต้อง เหธา เหฒี่ย-ต้อง เญย เหยียด ฒู้ง จา-สี่ เหธา ปุ้น เหธา ปุ้น เญย ท้าบ เหว่ย สา ธีง-เหฑ่ง ต้าย.#ธ้วด อียิบ 40:10-11 12นิ่น แอ๋ง หล่ง ออน เมี่ยน เญย โย่ว โต๋ อาโลน เญย มฆ้อง เหว่ย ออน นิ่น หย่า สา นิ่น ธีง-เหฑ่ง. 13โมเซ แอ๋ง ต้อ อาโลน เญย ตอน บัว ต้าย เถง นิ่น บัว ฒุ ลุย-ด๊าว, ไซ เจี๊ยน เจี๋ย จ๊าย เดีย, เฒาะ หมั่ว ปุน นิ่น ด๋ง เจี๊ยน, หฒิว เฒี้ยว บั๋ว โมเซ นอ.
14โมเซ เฒาะ เหฒี่ย เหว่ย ฟิ ฒุ์ย วั้ว เต้า ง่ง โก๊ว ต้าย. อาโลน เหธา นิ่น เญย ตอน บัว ฯฒฯ ต้อ ปั์ว มาน เจี๊ยน ง่ง เญย มฆ้อง. 15โมเซ ฯฒฯ ไต๋ วั้ว เต้า ง่ง, หล่ง ปั์ว-โด๊ะ โธะ ง่ง เญย ฑย้าม ไหฒ เหฒี่ย-ต้อง เปยย นอม เก๊าะ เญย จอง เหว่ย ปุน เหฒี่ย-ต้อง ธีง-เหฑ่ง. นิ่น เฒาะ ฑย้าม โต๋ เหฌี่ย เหฒี่ย-ต้อง เญย กอน เหว่ย สา เหฒี่ย-ต้อง เญย หวุย, เฒาะ เหฒี่ย-ต้อง ฝูง ปุน เฒี้ยว. 16โมเซ เฒาะ เหยียด ฒู้ง เยียม เฮญี้ยว เญย เฮมย, ปวัง เจี๊ยน ฮลัน เญย อ๊อ-บย์อง, อี นอม หญุด เฒ้ย เหธา แน้ด หญุด เฒ้ย เญย เฮมย, อัน เจี๊ยน เหฒี่ย-ต้อง กู้ หงว่าย ปั๊ว. 17มป่า ง่ง เญย ด๊บ เหธา อ๊อ เหธา จ้าง ต้อ ธ้วด หฒิ ด๊บ-ลิ่ว เธี้ยง หล่ง โต์ว ปั๊ว กวั่ง, หฒิว เฒี้ยว บั๋ว โมเซ เญย หว่า โหฒว.
18นิ่น แอ๋ง เฒาะ เหว่ย ปั๊ว เหฒี่ย เญย ปะกี ยู่ง โก๊ว ต้าย. อาโลน เหธา นิ่น เญย ตอน บัว ต้อ ปั์ว มาน เจี๊ยน น้าย เต้า ปะกี ยู่ง เญย มฆ้อง. 19โมเซ ฯฒฯ ไต๋ ต้าย, เฒาะ ปะกี ยู่ง เญย ฑย้าม เพี้ยด ฮวีง ก๋อม เหฒี่ย-ต้อง เปยย ปูง. 20ฮงะ ปะกี ยู่ง เป๋น เหยียด หฆัน เหยียด หฆัน ลิ์ว, โมเซ เฒาะ มฆ้อง เหธา อ๊อ, เลี่ยม เฮมย ปั๊ว เหฑ่ง. 21หล่ง ววม หฑาว ลิ์ว กะญั์ว เฮญี้ยว เญย กะน้าย เหธา ฒุ่ย, โมเซ ฯฒฯ เฒาะ น้าย เต้า ปะกี ยู่ง เญย หญู่งๆ อัน เหฒี่ย-ต้อง ปั๊ว เหฒี่ย, เว่ย ดาง เญย เฉีย หอบ เฒี้ยว เญย เฮญี้ยว. เซ หล่ง โต์ว ปั๊ว เหฒี่ย ฝ่ง ห่อ ปุน เฒี้ยว, หฒิว เฒี้ยว บั๋ว โมเซ โหฒว วั้ว นอ.
22โมเซ แอ๋ง เฒาะ ตะเหญ่ย เต้า ปะกี ยู่ง โก๊ว, ต้ง หล่ง ออน เมี่ยน โหฒว ไซ เมี่ยน วั้ว เต้า. อาโลน เหธา นิ่น เญย ตอน บัว ต้อ ปั์ว มาน เจี๊ยน วั้ว เต้า ปะกี ยู่ง โก๊ว เญย มฆ้อง. 23โมเซ ฯฒฯ ไต๋ ต้าย แอ๋ง เฒาะ เต๋ย ปะกี ยู่ง เญย ฑย้าม กั๊วะ อาโลน เญย บย่าว ปูง มน่อม เปี๊ยว เหธา บย่าว เจี๊ยะ ปั์ว-โด๊ะ-เญ์ย เหธา บย่าว เจี๊ยะ เหฒา-โด๊ะ-เญ์ย. 24โหฒว ลิ์ว, ฯฒฯ ต้อ อาโลน เญย ตอน บัว ต้าย แอ๋ง เฒาะ เต๋ย น้าย เต้า ยู่ง เญย ฑย้าม กั๊วะ นิ่น บัว เญย บย่าว ปูง มน่อม เปี๊ยว, บย่าว เจี๊ยะ ปั์ว-โด๊ะ-เญ์ย เหธา บย่าว เจี๊ยะ เหฒา-โด๊ะ-เญ์ย. เหฒ่ง เหฌี่ย เญย ฑย้าม โมเซ เพี้ยด เหฒี่ย-ต้อง เปยย ปูง. 25นิ่น แอ๋ง เฒาะ เฮมย เหธา จุ่น เญย เตว๊ย, เลี่ยม เหยียด ฒู้ง เยียม เฮญี้ยว เญย เฮมย, เหธา ปวัง เจี๊ยน ฮลัน เญย อ๊อ-บย์อง, อี นอม หญุด เฒ้ย เหธา ปั๊น โย่ว เหธา บย่าว ปูง เหฒา-ฒุ่ย. 26เยียม เฒี้ยว เญย หฑะเฮมียน วั้ว ดาน ไม้ อัน ปี๊ง เญย ฌั้ว โมเซ เฒาะ นอม ไม้ อัน ปี๊ง หฒอบ เจี๊ยน กะลั้น โย่ว เญย ฌั้ว, เหธา เหยียด นอม ฑ้าด เจี๊ยน กะลั้น โย่ว เญย ฌั้ว เหธา เหยียด นอม ฌั้ว-เปียะ เฮยี้ยด เจี๊ยน เฮมย เหธา บย่าว ปูง เหฒา-ฒุ่ย กู้ หงว่าย. 27น้าย เต๋ย กะน้าย เหยียด ฒู้ง นิ่น เฮยี้ยด เจี๊ยน อาโลน เหธา นิ่น เญย ตอน บัว เญย ปั์ว. นิ่น บัว ฯฒฯ เยียม เฒี้ยว เญย หฑะเฮมียน ธุ้น กีง เหว่ย โหฒว ธุ้น กีง ฝ่ง ห่อ เญย กะน้าย. 28โมเซ แอ๋ง เฒาะ เยียม นิ่น บัว เญย ปั์ว วั้ว เต๋ย กะน้าย ต้าย อัน เจี๊ยน เหฒี่ย-ต้อง, ปั๊ว เหฒี่ย เญย กะน้าย กู้ หงว่าย, เหยียด เหฌี่ย ปั๊ว. เซ เหฒี่ย เหว่ย ออน เมี่ยน โหฒว ไซ เมี่ยน เญย กะน้าย, หล่ง โต์ว ปั๊ว เหฒี่ย ฝ่ง ห่อ ปุน เฒี้ยว, เว่ย ดาง เญย เฉีย หอบ เฒี้ยว เญย เฮญี้ยว. 29โมเซ หย่า เฒาะ เหลาะ ฮยวัง อ๊อ เยียม เฒี้ยว เญย หฑะเฮมียน ธุ้น กีง เหว่ย โหฒว ธุ้น กีง ฝ่ง ห่อ เญย กะน้าย. น้าย เซ โมเซ เญย ป่วน หล่ง ออน เมี่ยน โหฒว ไซ เมี่ยน เญย ยู่ง โก๊ว อ๊อ, หฒิว เฒี้ยว พ้าย โมเซ เญย หว่า.
30โมเซ แอ๋ง เฒาะ เต๋ย ออน เมี่ยน เญย โย่ว เหธา เยียม เหฒี่ย-ต้อง เญย ฑย้าม ฟุ อาโลน เหธา นิ่น เญย ลุย-โหว. หย่า ฟุ อาโลน เญย ตอน บัว เหธา นิ่น บัว เญย ลุย-โหว. ฮนั้ง หน่าย นิ่น เฒาะ อาโลน เหธา นิ่น เญย ตอน บัว เหธา นิ่น บัว โหฒว ไซ เญย ลุย-โหว ฝูง ปุน เฒี้ยว.
31โมเซ บั๋ว อาโลน เหธา นิ่น เญย ตอน บัว, “เฒาะ อ๊อ เยียม วั้ว หวุ่ย ปวั้ง ด๊บ-ลิ่ว เญย แก้ง ด่าง โฒ้ว, หย่า เยียม วั้ว หญั่น, เหธา เจี๊ยน ฝ่ง ห่อ เหว่ย ออน โหฒว ไซ เมี่ยน วั้ว นอม ดาน เญย ฌั้ว ฮนั้ง เยีย พ้าย เหฒียง ก๊อง, ‘น้าย เซ อาโลน เหธา นิ่น เญย ตอน บัว อ๋อย หฒุ หญั่น.’ 32เหฒ่ง เหฌี่ย เญย อ๊อ เหธา ฌั้ว อ๋อย หฒุ หล่ง โต์ว ปั๊ว กวั่ง. 33อ๋อย หฒุ เยียม หวุ่ย ปวั้ง ด๊บ-ลิ่ว เญย แก้ง ด่าง เสี่ย ฮนอย หย่า ไม้ ตู๋ง ธ้วด มี่ง หาย เดา. ฒั้ว เถา ออน โหฒว ไซ เมี่ยน เญย เล์ย เญย ฮนอย-เหญียะ ปวั๊ง, เหว่ย หฒุ ออน เมี่ยน เญย เล์ย เซ หล่ง เสี่ย ฮนอย หธีง ตุ้น ยุ่น. 34อี้ ฮนอย โหฒว เญย เซ หฒิว เฒี้ยว บั๋ว เญย หว่า เหว่ย เถง เม่ย บัว ฟิ ฒุ์ย. 35อ๋อย หฒุ เยียม หวุ่ย ปวั้ง ด๊บ-ลิ่ว เญย แก้ง ด่าง ปวั๊ง เสี่ย ฮนอย เสี่ย ม์วน, เอย เจี๊ยน เฒี้ยว เญย หว่า โหฒว. ไม้ เฒย แอ๊ะ, เหฑีย เม่ย บัว หฒุ ไต่ เหว่ย หฒุ เฒี้ยว ฮนั้ง น้าย นอ หัด เยีย.” 36อาโลน เหธา นิ่น เญย ตอน บัว ฯฒฯ เอย เจี๊ยน เฒี้ยว หล่ง โมเซ พ้าย เญย หว่า โหฒว เหฑ่ง.
Currently Selected:
เลวี 8: IuMiTH
Highlight
Share
Compare
Copy
Want to have your highlights saved across all your devices? Sign up or sign in
Mien Bible (Thai Script) © Thailand Bible Society, 2007
